20/08/2026
គ្រីស្តបរិស័ទគោរពថ្វាយបង្គំព្រះយេស៊ូគ្រីស្តតែមួយព្រះអង្គគត់ ទុកជាព្រះសង្គ្រោះរបស់ខ្លួន និងរបស់មនុស្សលោក។ តាំងពីដើមរៀងមក គ្រីស្តបរិស័ទក៏តែងតែគោរពព្រះនាងម៉ារីក្នុងឋានៈជាព្រះមាតារបស់ព្រះយេស៊ូ ដែលជាព្រះបុត្រារបស់ព្រះជាម្ចាស់។ ពេលបុណ្យគោរពព្រះជាម្ចាស់លើកព្រះនាងម៉ារីឲ្យឡើងឋានបរមសុខ ព្រះសហគមន៍លើកតម្កើងការសង្គ្រោះរបស់ព្រះយេស៊ូ គឺព្រះអង្គបានប្រោសឱ្យព្រះមាតាទៅនៅជាមួយព្រះអង្គ ទាំងរូបកាយទាំងវិញ្ញាណ។ ព្រះនាងម៉ារីជាតំណាងរបស់ព្រះសហគមន៍ទាំងមូល ព្រះនាងបានទទួលសិរីរុងរឿងពីព្រះគ្រីស្តមុនគ្រីស្តបរិស័ទឯទៀតៗទាំងអស់ ព្រោះព្រះនាងមានជំនឿលើព្រះបន្ទូលរបស់ព្រះជាម្ចាស់ ហើយរួមជាមួយព្រះយេស៊ូយ៉ាងជិតស្និទ្ធជាងគេ។
បពិត្រព្រះជាម្ចាស់ជាព្រះបិតាដ៏មានតេជានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច! ព្រះអង្គសព្វព្រះហឫទ័យ លើកព្រះនាងម៉ារីឡើងស្ថានបរមសុខ ទាំងរូបកាយទាំងវិញាណ គឺព្រះអង្គបានប្រោសព្រះនាងម៉ារីមានកិត្តិយសដ៏ខ្ពង់ខ្ពស់បំផុត ក្នុងឋានៈជាព្រះមាតានៃព្រះបុត្រាព្រះអង្គ។ សូមទ្រង់ព្រះមេត្តាប្រោសយើងខ្ញុំឱ្យផ្ចង់ចិត្តនឹងសម្បត្តិសួគ៌ សូមឱ្យយើងខ្ញុំបានទទួលសិរីរុងរឿងរួមជាមួយព្រះនាងនៅថ្ងៃណាមួយផង។
