10/09/2025
Múthuuri úmwe athiire thabaarí ya kúraya akínoga múno. Riúa narío rígíakana múno na akíona níwega acarie handú hena kííruru. Akíona mútí múnene múno na agíikara rungu rwagwo - kííruru iní kíagwo.
Híndí íría arorire igúrú akíona mútí úcio waarí na matunda. No ríría arorire matunda macio akíambia kwíyúria ciúria nyingí; "Níkíí gíatúmire Ngai ahe mútí múnene úguo matunda size niini úguo na mítí íría míniini ta water mellon na mababaí íkoragwo na matunda manene? Na githí mútí úyú ndwagíríirwo úkorwo na itunda ría kilo ta magana meerí? Akíona hau Ngai ndaarí fair.
Thuutha wa gwícúúrania kwa ihinda na kúruta Ngai mahítia, gatunda kaniini gakiuma mútí igúrú na gakímúgútha mútwe waake. Akíigua ruuo na akímaka múno. Akiuga ríu níndamenya Ngai níarí úúgí múingí múno. Tondú korwo itunda ríu riuma inene makíria no gúkua ingíakua.
. Meeciria ma Ngai ti ta meeciria maitú. Nacio njíra cia Ngai ticio njíra ciitú. Ona híndí íría woona ta maúndú mataikaire weega, gía na mwonere wa ú Ngai. No gúkorwo hena múbango wa Ngai úndú iní úcio.
Híndí íría mbura yaríkia kuura, andú amwe manegenaga makiugaga barabara íína ndooro. Nao aría angí makenaga makauga ríu nímekúhaanda, na kíría kí múgúnda nígígúkúra. Kúraringana na mwonere waaku. Riúa ríngíara múno angí manegenaga na angí magakena tondú nímekwendia maaí. Ngai nímúiganania wa maúndú.
Níkwarí na múndú útaarí na úhoti wa kwaria na kúigua na níendete múno gúthií kanitha. Híndí ímwe múraata waake akímwandíkíra na akímúúria, "Úthiiaga kanitha iní gwíka atía? Ndúngíhota kúina, ona kúigua ndúngíigua. Na githí ndúngíikaraga o múcií?
Múndú úcio akímúcokeria akímwíra thiaga kanitha nígetha andú mamenye ndí mwena úríkú. Nígetha mamenye ndí múhonoku na nínyendete Ngai.
Mwonere waaku wa maúndú útaarí atía kana hiihi ní útetagia Ngai ríría maúndú maritúha? Maúndú iní moothe wírute gúcookagíria Ngai ngaatho.
