02/02/2025
Guddoomiyaha ONLF,Cabdirahman Maadey ayaa qoraalkan hoose qoray
Dood galoof ah: Xaqiiqda La Illaaway iyo Hagardaamada La iska indha tirayo
Inta lagu mashquulsan yahay “Hebel baa la tuuri” iyo “Hebel baa la keenayaa”, waxaa muuqata in si dadban loo aqbalay gumaysiga Itoobiya. Xataa inta yar ee dastuur ku sheegoodu ogol yahay—ee xuquuqda qowmiyadaha ku saabsan—waxaad noqoteen dad aan difaacan karin, ilaa heer aan xataa la diidi karin xadgudubyada badhreedhka ah ee la idinku hayo. Itoobiya iyadoo ka gaashaamanaysaa inaad iska caabidaan faragelinta iyo dulaynta ay idinku hayso ayay idiin dajisay riwaayad ay idinku mashquuliso oo maankiina ku ciyaarto oo ay marba qob moos ah idiin tuurto. Meeshii aad idinku madaxdiina ka dooran lahaydeen ayaa inta la idiin diiday , ayaa haddana la idinku ciyaarsiinayaa Kanaan soo wadnaa iyo Kanaan ka qaadaynaa.
Nin kastoo la keeno sow dantooda inuu fuliyo kuma qasbana. In kasto la kala dadnimo duwan yahay, hanada qofka ay itoobioya soo doorato wuxuu la iman barnaamijka itoobiya ay ku talo gashay inay idinku maamusho oo aad aad u taqaanaan oo intii ay idin haysatay ay idinku maamuli jirtay siday doonaan ha u kala gacan kululaadaanee
Nasiib daro, waxaa dood la idinka dhigay “Hebel baan idin soo wadayaa” iyo “Hebel baa la badalayaa, halkii laga doodi lahaa mustaqbalka shacabka Soomaaliyeed ee ku hoos nool Itoobiyada sii kala tagaysa. Maanta, cid si dhab ah uga doodeysa aayaha ummadda iyo jihada la qaadayo ma jirto. Waxay dhigtay Itoobiya shax la inagu mashquuliyo oo ay ka socdaan dabinno siyaasadeed iyo marin-habaabin halis ah.
Ismaamul goboleed ku mashquulsan “Hebel baa la keenayaa” iyo “Hebel baa la tuurayaa” ma aha ismaamul xor ah oo matalaya danaha shacabka. Waa in la fahmaa in hadal aan tayo lahayn iyo war-moognimo ayan xal noo keenayn. Waa in la tashadaa, la toosaa oo laga baxaa hurdada siyaasadeed. Dhardhaaro la isweydaariyay waxba ma beddeli karaan, haddii aan la helin qorshe cad oo ku salaysan xaqiijinta aayaha ummadda Soomaaliyeed ee la gumaysto.
Hurdada ka kaca, tolkayo, oo tashada!
