29/03/2026
Assalamualaikum
Jamaat-e-Islami Hind, Yadgir ki janib Se Har Saal Ki Taraha Is Saal Bhi “Eid Milan Program” ka ihtemaam kiya gaya.
Yeh programme 29 March 2026 subha 10 Baje Soudagar Function Hall,Lumbini Park ke qareeb munaqid hua.
Programme ke aaghaz par tamaam mehmano ko Eid Mubarak Memento (Gift) dekar khair maqdam kiya gaya. Ijlaas mein muqami ulema, Samaji rehnuma aur mukhtalif tanzeemon ke zimmedaran ne shirkat ki. Muqarrireen ne apni taqreeron mein Eid ke paigham, bhaichara, aman-o-ittehad aur muashray mein mohabbat ko farogh dene par zor diya.
Yadgir MLA Channareddy Patil Tunnur ne apne khitab mein kaha ke aise Eid milan programs Mashray mein aman, sahanshilta aur ekta ko mazboot karte hain. Unhon ne kaha ke Eid ka paigham mohabbat, sabr aur ta‘awun hai jise har shakhs ko apni zindagi mein apnana chahiye.
Is mauqe par Shantveer Guru Murugharajendra Swamiji ne bhi khitab karte hue kaha ke insaniyat har mazhab se badi hai, aur is tarah ke programs logon ke darmiyan samajh aur bhai-chara barhane mein aham kirdar ada karte hain.
Guest Speeker Zeeshan Akhil Siddiqui
(Syndicate Member)
Sri Adikavi Maharshi Valmiki University,Raichur ne apni taqreer mein muashray mein aman, aur ekta ki zaroorat par roshni dali aur kaha ke mukhtalif mazhab hone ke bawajood insaniyat aur akhlaqi qadrain sab mein mushtarik hoti hain.
Ijlaas ke ikhtitam par tamaam mehmano ke liye Sheer khurma (Sweet) ka bhi khaas intezam kiya gaya, jise hazreen ne khoob pasand kiya.
Programme ki sadarat Amjad Hussain ne ki jabke mehmaan-e-khususi ke taur par Ghulam Samadani Moosa, Dalit rehnuma Mareppa Chatterkar, Mallanna Dasanakeri, G. Gundappa Kalaburagi, Dr.Bhagwant Anwaar, Vishwanath Shirwar, Channappagouda Mosambi, Ex Chairman CMC Yadgir Janab Aziz Ahmed Sab Shahan, President JIH Yadgir Mohamed Salahuddin Jagirdar, Basheemiya Wadigera aur digar shakhsiyat ne shirkat ki. Programme ki nizaamat Mohammed Atif ne anjaam di.
Is programme ke Organiser Zakir Ahmed Secratary JIH Yadgir the aur intizaam mein Jamaat-e-Islami Hind ke saath Solidarity Youth Movement Karnataka aur Students Islamic Organisation of India (SIO) ka aham kirdar raha.