24/12/2025
నేను క్రిస్మస్ పండుగను జరుపుకోవడం మానేసాను! ఎందుకంటే...
👉 ఈ పదం గానీ, ఈ పండుగను గూర్చిన ప్రస్తావన గానీ బైబిల్ లో ఎక్కడా లేదు కనుక!
👉 యేసు క్రీస్తు ప్రభువు యొక్క దైవత్వాన్ని ఈ పుట్టిన రోజు పండుగ ప్రశ్నార్థకం చేస్తుంది గనుక! ఆది అంతం లేని వాడికి ఒక పుట్టిన రోజును ఆపాదించడం ఆయన దైవత్వాన్ని శంకింపజేయడమే అవుతుంది! నేడు అనేకమంది క్రైస్తవేతరులు, ముఖ్యంగా ముస్లిం సోదరులు క్రీస్తు దైవత్వాన్ని ప్రశ్నించడానికి/ఒప్పుకోకపోవడానికి ఈ పండుగ ఒక ప్రధాన కారణం అవుతుంది కనుక!
👉 అసలు యేసు క్రీస్తు ఈ కాలంలో పుట్టనే లేదు అని బైబిల్ ని అధ్యయనం చేస్తే తెలుస్తుంది. కావున సాధారణ మనుష్యులకు ఆపాదించినట్టు ఆయనకు ఒక పెట్టుడు పుట్టిన రోజు ఆపాదించడం తప్పు కనుక!
👉 క్రొత్త నిబంధన కాలపు అన్యులకు నాలుగు విషయాలను నిషేధించమని ఆజ్ఞ ఇవ్వడం జరిగింది. అందులో విగ్రహ సంబంధమైన అపవిత్రత అంటకుండా వుండడం ఒకటి! ఈ పండుగ విగ్రహ సంబంధమైన అపవిత్రతతో కూడిన ఒక అన్యమత ఆచారం నుండి తీసుకుని క్రైస్తవీకరించబడింది కనుక!
👉 నాకు సువార్త ప్రకటించడానికి ఒక ప్రత్యేకమైన మిష/సాకు/రోజు/పండుగ అవసరం లేదు! నేను ప్రతీ రోజు సువార్తను ప్రకటించాలి/ప్రకటించమని ఇతరులను ప్రోత్సహించాలి అనే స్పృహను కలిగియున్నాను. ఆయన మరణాన్ని జ్ఞాపకం చేసుకుని, ప్రచురపరచడం ప్రతీ రోజు చెయ్యాలి అనేది జ్ఞాపకం వుంచుకోవడానికి ఆది సంఘం ప్రతీ రోజు ఇంటింటా రొట్టె విరిచింది! ఒక విధంగా సంవత్సరం పొడువునా నా జీవితం సువార్త పత్రికలా వుండాలి అనే ప్రయత్నం చేస్తున్నాను కనుక!
👉 నేను క్రీస్తు ప్రభువును కలిగియున్నాను కనుక నాకు ఒక పెట్టుడు పండుగ ద్వారా వచ్చే కృత్రిమ ఆనందం అవసరం లేదు! నేను ఎల్లప్పుడూ ప్రభువు నందు ఆనందించగలను/ఆనందించమని ప్రోత్సహిస్తాను. అదే నాకు బైబిలు నేర్పించింది... చివరికి కష్ట సమయంలో కూడా!
👉 సువార్త సారాంశంలో పుట్టుక గురించి చెప్పమని లేదు... ఆయన మరణ పునరుత్థానం గూర్చి ప్రకటిస్తే చాలు కనుక!
👉 రక్షకుడు పుట్టాడు అనే ఆనందం రక్షించబడిన వాడికి మాత్రమే వుంటుంది, అది రక్షించబడినది మొదలు మరణించే వరకు/ఆయన రాకడ వరకు ఎల్లప్పుడూ వుంటుంది కనుక!
👉 కొందరు క్రిస్మస్ కు ఒక తప్పుడు నిర్వచనం (రోమన్ కాథలిక్ వారు ఇచ్చింది) Christ/క్రీస్తు + Mass/ఆరాధన అని, ఆ రోజు క్రీస్తును ఆరాధిస్తున్నాము అనే కుంటి సాకు చెప్పి తప్పించుకునే ప్రయత్నం చేస్తున్నారు! నిజమైన క్రీస్తు ఆరాధికుడు ప్రతీ క్షణం, ప్రతీ రోజు క్రీస్తును ఆరాధిస్తూనే వుంటాడు. అసలు క్రీస్తును ఆరాధించడం అంటే అదొక కార్యక్రమం కాదు, జీవిత విధానం అనే స్పృహను కలిగియున్నాను కనుక! పరిశుద్ధమును, దేవునికి అనుకూలమైన సజీవయాగముగా మన శరీరములను ఆయనకు సమర్పించుకోవడమే యుక్తమైన సేవ/ఆరాధన – రోమా 12:1-2.
👉 క్రిస్మస్ అనే పదం ఒక అబద్ధం, క్రిస్మస్ చెట్టు అబద్ధం, క్రిస్మస్ తాత/ సాంటా క్లాస్ అబద్ధం, కారల్స్ అబద్ధం, క్రిస్మస్ స్పిరిట్ అబద్ధం, క్రిస్మస్ ఆరాధన అబద్ధం, మొత్తం పండుగే అబద్ధం గనుక! ప్రకటన 22:15 కుక్కలును, మాంత్రికులును, వ్యభిచారులును, నరహంతకులును, విగ్రహారాధకులును, అబద్ధమును ప్రేమించి జరిగించు ప్రతివాడును వెలుపటనుందురు.
👉 క్రిస్మస్ పండుగ పేరున దుబారా ఖర్చులు చేయడం, ప్రపంచంలో ఘోరమైన వర్తకం చేసుకుంటున్న వారిని ప్రోత్సహించడం నాకు ఇష్టం లేదు కనుక! ప్రపంచం యావత్తూ ఈ పండుగకు పెట్టే సొమ్ముతో ప్రపంచంలో పేదరికాన్ని నిర్మూలించవచ్చు!
👉 కొందరు మేము ఈ పండుగ సందర్భంగా పేదలకు సహాయం చేస్తున్నాము అని కుంటి సాకులతో సమర్ధించుకోవడాన్ని నేను ఒప్పుకోను. చేసేది గోరంత, చెప్పుకునేది/చూపించుకునేది కొండంత! నీకు రెండు వుంటే ఒకటి పేదలకు ఇవ్వు అని యేసయ్య బోధించింది ఎప్పుడో సంవత్సరానికి ఒకసారి చేయమని కాదు! ఎల్లప్పుడూ పేదలను జ్ఞాపకం చేసుకుంటూ... దిక్కులేని పిల్లలను, విధవరాండ్రను, అవసరతలో ఉన్నవారికి ఎప్పుడూ సహాయం చేస్తూనే వుండాలి. అదే నిజమైన భక్తి అని నేను నమ్ముతున్నాను కనుక!
👉 పాత నిబంధన దినాలలో కానీ క్రొత్త నిబంధన దినాలలో కానీ పుట్టిన రోజులు చేసుకునే ఆచారం దైవ భక్తి గలవారికి లేనేలేదు కనుక. అది కేవలం అన్యులలో మాత్రమే వుంది. నేను చేసుకున్నా, నేను నమ్మే దేవుడికి చేసినా నేను క్రైస్తవుడనే కాకుండా పోతాను కనుక!
ప్రవీణ్ కంటి మహంతి, మదనపల్లె
