12/06/2026
🚩*అరుణాచల క్షేత్ర మహత్యం భాగం - 44*🚩
🙏*అరుణాచలుని దివ్య వైభవం*🙏
*సనాతన ధర్మం నుండి*
అరుణాచల శివ అరుణాచల శివ - అరుణాచల శివ అరుణాచలా!
అరుణాచల శివ అరుణాచల శివ - అరుణాచల శివ అరుణాచలా!!
కార్తీక పౌర్ణమి నాడు అరుణాచల శిఖరాగ్రంపై వెలిగించిన ఆ మహా పరంజ్యోతి కేవలం ఒకరోజుతో ఆరిపోదు. అది ఏకధాటిగా 11 నుండి 13 రోజుల పాటు దేదీప్యమానంగా వెలుగుతూనే ఉంటుంది. ప్రతిరోజూ సాయంత్రం 6 గంటల నుండి రాత్రంతా ఆ అఖండ జ్యోతి భక్తులకు కనువిందు చేస్తుంది. ఆ కార్తీక జ్యోతికి ఒక అనిర్వచనీయమైన, విశిష్టమైన అయస్కాంత ఆకర్షణ శక్తి ఉంది. అది భక్తుల దృష్టిని, మనసును ఇట్టే తనవైపుకు లాగేసుకుంటుంది.
ఆ దివ్య కాంతిపైనే మనసును లగ్నం చేసి, సంపూర్ణ ఎరుకతో గిరిప్రదక్షిణ చేస్తే.. మనసులోని ఆలోచనలన్నీ నశించి, "సంకల్ప రహితమైన" అద్భుత ఆత్మానందం అనుభవంలోకి వస్తుంది. అటువంటి పారవశ్యంలో ఉన్న భక్తునికి ఆకాశంలోని ఆ చంద్రుడు, నక్షత్రాలు ఏవీ గుర్తుకురావు. వారి మనసంతా కేవలం ఆ అరుణాచలుడు, ఆ పరంజ్యోతి మాత్రమే నిండిపోతాయి. ఈ పవిత్ర దీప దర్శనం వల్ల జన్మజన్మల పాపాలు పటాపంచలై ముక్తి లభిస్తుంది. ఈ ఒక్క దీప దర్శనం.. కోటి యాగాలు చేసిన మహా పుణ్యఫలాన్ని, సమస్త క్షేత్రాలను దర్శించిన భాగ్యాన్ని ఏకకాలంలో ప్రసాదిస్తుంది.
అరుణాచల క్షేత్రం యొక్క గొప్పదనాన్ని వివరిస్తూ స్కాందపురాణంలో ఒక అత్యద్భుతమైన శ్లోకం ఉంది:
నాస్తి శోణాద్రితః క్షేత్రం నాస్తి పంచాక్షరాన్మనుః
నాస్తి మహేశ్వరాద్ధర్మో నాస్తి దేవో మహేశ్వరాత్
నాస్తి జ్ఞానం శివజ్ఞానా నాస్తి శ్రీరుద్రతః శ్రుతిః
నాస్తి శైవాగ్రణిర్విష్ణో నాస్తి రక్షాకరాద్గురుః
నాస్తి రుద్రాక్షతో భూషా నాస్తి శాస్త్రం శివాగమాత్
నాస్తి బిల్వదళాతత్రం నాస్తి పుష్పం సువర్ణకాత్
నాస్తి వైరాగ్యతత్సౌఖ్యం నాస్తి ముక్తేః పరంపదమ్
శ్లోక భావము:-
అరుణాచలమును మించిన పుణ్యక్షేత్రము ఈ సృష్టిలో మరొకటి లేదు.
పంచాక్షరీ మంత్రము కంటే శ్రేష్ఠమైన మంత్రము లేదు.
ఆ పరమశివుని మించిన దైవము లేదు.
శివజ్ఞానమును మించిన అసలైన జ్ఞానము లేదు.
శివ భక్తులలో శ్రీమహా విష్ణువుకు సాటిరాగల వారు లేరు.
పవిత్రమైన విభూతిని ధరించుట మించిన రక్షాకవచము లేదు.
బిల్వ పత్రమును మించిన పవిత్రమైన పత్రము లేదు.
వైరాగ్యమును మించిన ఆనందము లేదు, చిట్టచివరకు.. ముక్తిని మించిన పరమపదము లేదు!
ఇంతటి పరమ పవిత్రమైన తిరువణ్ణామలై(అరుణాచలం) పట్టణములోని ప్రతీ దేవాలయము, ఆశ్రమము, మఠము ఒక ప్రత్యేకమైన ఆధ్యాత్మిక విశిష్టతను, గొప్ప మర్మాన్ని తమలో ఇముడ్చుకుని ఉన్నాయి. ఇది కేవలం ఒక పట్టణం కాదు, సాక్షాత్తు ఆ పరమేశ్వరుని నివాసస్థలము! ఈ మహా పుణ్యభూమిలోనే ఎందరో సాధువులు, జ్ఞానులు, అవధూతలు, సిద్ధపురుషులు నివసించారు.
ఈ పవిత్ర క్షేత్రానికి చుట్టూ 48 కిలోమీటర్ల పరిధిలో నివసించే వారందరూ, ఎటువంటి కఠినమైన సాధనలు చేయకపోయినా సరే.. అంతిమంగా ముక్తిని పొందగలరు. ఇది సాక్షాత్తు ఆ పరమేశ్వరుడే ఇచ్చిన అభయము! ఈ అద్భుత విశిష్టతను భగవాన్ శ్రీ రమణమహర్షులు కూడా స్వయంగా ధృవీకరించారు. అరుణాచల పురాణములో ఈ మొత్తం ప్రదేశం "మహామండలము" గా కీర్తించబడింది.
ఈ మండలానికి నాలుగు దిక్కులలో తిరుక్కోయలూరు, చెంగం, పోలూరు, చెంజీ అను నాలుగు పట్టణాలు సరిహద్దులుగా వర్ధిల్లుతూ ఉన్నాయి. ఆ అరుణాచలేశ్వరుని సేవించడానికి ఇంద్రాది దిక్పాలకులు సైతం గిరిరూపాలు ధరించి నాలుగు దిక్కులందు కొలువై ఉన్నట్లు పురాణాలు చెబుతున్నాయి.
ఇంతటి అద్భుతమైన, మహిమాన్వితమైన మహాక్షేత్రం గురించి ఎంత చెప్పినా, మరెంత వివరించినా అది తక్కువే అవుతుంది. ఇటువంటి క్షేత్ర దర్శనం, లేదా ఒక్క గిరి ప్రదక్షిణం జన్మజన్మల పాపాలను సమూలంగా హరిస్తుందనటంలో ఎటువంటి సందేహము లేదు. స్మరణ మాత్రంచేతనే ముక్తిని ప్రసాదించే ఆ దయామయుని మనసారా స్మరిస్తూ...
"స్వామీ! అరుణాచలేశ్వరా! ఈ జన్మలో నాకు ఇప్పటివరకు రెండు సార్లు మాత్రమే నీ దర్శన భాగ్యం కల్పించావు. కానీ నీ అపార కరుణతో, నీ 'క్షేత్ర మహత్యాన్ని' భక్తులందరికీ సులభంగా అర్థమయ్యేలా సరళీకరించి అందించే అదృష్టాన్ని నాకు ప్రసాదించావు. త్వరలోనే నన్ను మరళా నీ చెంతకు రప్పించుకుని, నీ గిరి ప్రదక్షిణ చేసే మహాభాగ్యంతో పాటుగా... ప్రస్తుతం మాచేత భక్తిశ్రద్ధలతో నిర్వహించబడుతున్న 'మాస శివరాత్రి రుద్రాభిషేకము'ను కనీసం ఒక్క మాసమైనా సాక్షాత్తు నీ సన్నిధిలో జరుపుకునే అదృష్టాన్ని మాకు ప్రసాదించు తండ్రీ!" అని ఆర్తితో ఆ స్వామికి ఆత్మ నివేదన చేసుకుంటూ, మనసారా నమస్కరిస్తున్నాను. 🙏
ఆ కరుణామయుడైన అరుణాచలేశ్వరుని సంపూర్ణ అనుగ్రహంతో... ఇంతటితో "అరుణాచల క్షేత్ర మహత్యం" సంపూర్ణమైనది.,
సమర్పణ:
తంగిరాల చంద్రశేఖర అవధాని.
12-06-2026
మరిన్ని ఆధ్యాత్మిక విశేషాల కోసం మా గ్రూప్లో చేరండి:
🔗 https://whatsapp.com/channel/0029VamwYOp89inl15KDVT3X
Facebook:-
https://www.facebook.com/share/1YSNGbfe74/
అరుణాచల శివ అరుణాచల శివ - అరుణాచల శివ అరుణాచలా!
అరుణాచల శివ అరుణాచల శివ - అరుణాచల శివ అరుణాచలా!! 🙏🙏🙏🙏🙏🙏🙏🙏🙏🙏🙏🙏🙏
చంద్రశేఖర పాహిమాం,
అరుణాచలా రక్షమాం
ఓం శాంతిః శాంతిః శాంతిః
శ్రీ అరుణాచలార్పణమస్తు 🙏
(అరుణాచల క్షేత్ర మహత్యం సంపూర్ణము)
#అరుణాచలం #తిరువణ్ణామలై #కార్తీకదీపం #సనాతనధర్మం #భక్తి
#తంగిరాల #తంగిరాలచంద్రశేఖరశర్మ
