19/11/2025
മാർത്തോമ്മാ മെത്രാപ്പോലീത്താ സ്ഥാനാരോഹണത്തിൻ്റെ അഞ്ചാം വാർഷികത്തിന് അനുമോദനങ്ങൾ അർപ്പിച്ച് നിരണം മാരാമൺ ഭദ്രാസനം
തിരുവല്ല : സാമൂഹിക ഇടങ്ങളിൽ കാലികമായി ഇടപെട്ട് ദൗത്യ നിർവഹണത്തിൽ സഭ സാക്ഷ്യം നൽകണമെന്നും, ഒരുമിച്ചുള്ള കൂട്ടായ്മാസമൂഹമായി ക്രൈസ്തവർ ലോകത്തിന് പ്രകാശം പരത്തുവാൻ ഇടയാകണമെന്നും ദൈവത്തിൻ്റെ സൃഷ്ടിയെ സ്നേഹിക്കുന്നതിനും സഹോദരനോടുള്ള കരുതൽ അവരവരുടെ ഉത്തരവാദിത്വമായി കണ്ട് പ്രവർത്തിക്കുവാൻ സഭാ സമൂഹമായി നമുക്ക് കഴിയണമെന്നും അവിടെയാണ് സമത്വവും ഏകതാബോധവും രൂപപ്പെടുന്നത് എന്നും ഡോ. തിയഡോഷ്യസ് മാർത്തോമ്മാ മെത്രാപ്പോലീത്താ പറഞ്ഞു. മാർത്തോമ്മാ സഭ നിരണം - മാരാമൺ ഭദ്രാസനത്തിൻ്റെ ആഭിമുഖ്യത്തിൽ മാർത്തോമ്മാ സഭയുടെ പരമാദ്ധ്യക്ഷനായി ഡോ. തിയഡോഷ്യസ് മാർത്തോമ്മാ മെത്രാപ്പോലീത്താ സ്ഥാനാരോഹണത്തിൻ്റെ അഞ്ചാം വാർഷിക അനുമോദന സമ്മേളനത്തിൽ മറുപടി പ്രസംഗം നിർവ്വഹിക്കുകയായിരുന്നു മെത്രാപ്പോലീത്താ. വികാരി ജനറാൾ വെരി റവ. മാത്യു ജോൺ അദ്ധ്യക്ഷത വഹിച്ചു. ഭദ്രാസന സെക്രട്ടറി റവ. മാത്യൂസ് എ. മാത്യു, ട്രഷറാർ അനീഷ് കുന്നപ്പുഴ, ഭദ്രാസന കൗൺസിലംഗങ്ങളായ ലിനോജ് ചാക്കോ, റവ. ജോസഫ് ജോണി എന്നിവർ പ്രസംഗിച്ചു. മെത്രാപ്പോലീത്താ കേക്ക് മുറിച്ച് മധുരം പങ്കിട്ടു.
