12/04/2026
সপ্তদশবাৰ্ষিক প্ৰতিষ্ঠা দিৱস উদযাপন, একশৰণ ভাগৱতী ধৰ্ম নামঘৰ ৷
৷৷ জয় গুৰু শঙ্কৰ ৷৷
যোৱা ৯ এপ্ৰিল আৰু ১১ এপ্ৰিল ক্ৰমে বৃহস্পতিবাৰ আৰু শনিবাৰে তিনিচুকীয়াৰ হিজুগুৰি অঞ্চলৰ লংকেশ্বৰ গোহাঁই নগৰস্থিত একশৰণ ভাগৱতী ধৰ্ম নামঘৰৰ সপ্তদশবাৰ্ষিক প্ৰতিষ্ঠা দিৱস উদযাপন কাৰ্যসূচী সফলতাৰে সমাপন হৈ যায় ৷
দুদিনীয়া কাৰ্যসূচীৰে উদযাপিত হোৱা প্ৰতিষ্ঠা দিৱসটিত প্ৰথমদিনা অৰ্থাৎ ৯ এপ্ৰিল তাৰিখ, বৃহস্পতিবাৰে পুৱাৰ নামপ্ৰসংগ আৰু ধৰ্মধ্বজা উত্তোলন কাৰ্যসূচী পালন কৰা হয় ৷ নামঘৰৰ ভকতবৃন্দই পুৱাতেই নামপ্ৰসংগৰে প্ৰতিষ্ঠা দিৱসটি মুকলি কৰে তথা নামঘৰৰ সভাপতি শ্ৰীযুত যুগল বৰা বাপ আৰু সাধাৰণ সম্পাদক শ্ৰীযুত বসন্ত বুঢ়াগোহাঁই বাপে বন্তি প্ৰজ্বলনসহ ধৰ্মধ্বজাভাগ উত্তোলন কৰে ৷
তাৰ পিছৰ কাৰ্যসূচীমৰ্মে ১১ এপ্ৰিল তাৰিখ, শনিবাৰে দিনজোৰা শিতানেৰে প্ৰতিষ্ঠা দিৱসটি উদযাপন কৰা হয় । সেইমৰ্মে উক্তদিনা পুৱাতেই নামপ্ৰসংগৰে কাৰ্যসূচী মুকলি কৰা হয় ৷ তাৰ পিছত শিৱসাগৰৰ পৰা আমন্ত্ৰিত তৰুণ ব্যাখ্যাকাৰ পূজ্যপাদ শ্ৰীমান উজ্জ্বল সৌকাধৰাৰ শ্ৰীমুখহন্তে ভাগৱত ব্যাখ্যা কাৰ্যসূচী ৰূপায়ণ কৰা হয় । প্ৰায় আঢ়ৈঘন্টাজোৰা এই ভাগৱত ব্যাখ্যা অনুষ্ঠানটিত তৰুণ বাপজনাই ভাগৱতৰ অমৃতবাণী ভক্তবৃন্দলৈ ব্যাখ্যাৰ মাজেৰে আগবঢ়াই দিয়ে । পিছৰ পৰ্যায়ৰ কাৰ্যসূচীমৰ্মে আহাৰ বিৰতি আৰু তাৰে পিছত গুৰগৃহৰ আইসকলৰদ্বাৰা দিহানাম পৰিবেশন কৰা হয় । দিহানামৰ পিছতে প্ৰতিষ্ঠা দিৱস উদযাপন সমিতিয়ে আমন্ত্ৰণ কৰি অনা তিনিচুকীয়াৰে বিশিষ্ট সাংস্কৃতিক উদ্যোগী, সমাজকৰ্মী শ্ৰীযুত অনিল বৰা বাপদেৱে অনুষ্ঠানটি উদ্ধোধন কৰে প্ৰতিষ্ঠা দিৱসৰ মূল কাৰ্যসূচী গুৰুজনাৰ অমূল্য সৃষ্টি ৰুক্মিণী হৰণ অংকীয়া নাট প্ৰদৰ্শন কৰা হয় । বিশিষ্ট সত্ৰীয়া গুৰু শ্ৰীযুত নন্দেশ্বৰ ভূঞা বাপৰ দ্বাৰা পৰিচালিত আৰু নামঘৰৰ ভগ্নী অনুষ্ঠান শংকৰ মাধৱ সত্ৰীয়া কলাকৃষ্টি কেন্দ্ৰৰ চেমনীয়া কলা-কুশলীবৃন্দ লগতে নামঘৰৰে কণ-কণ মইনাসকলৰ দ্বাৰা প্ৰদৰ্শিত অংকীয়া নাটভাগে উপস্থিত সমূহ ভক্তবৃন্দকে নথৈ আনন্দ দিয়ে ।
উল্লেখ্য যে অনুষ্ঠানটিত ক্ৰমে জ্যেষ্ঠ সাংবাদিক, সমাজকৰ্মী শ্ৰীযুত অৰূপ বৰকটকী, শংকৰ সংঘৰ সৈতে জড়িত শ্ৰীমতী জ্যোতিমণি কাকতি আই, উৎপল বৈশ্য কাকতি বাপ, হিজুগুৰি বৰ নামঘৰৰ উপদেষ্টা শ্ৰীযুত প্ৰকাশ দত্ত বাপ, সাধাৰণ সম্পাদক শ্ৰীযুত ভৰত সোনোৱাল বাপ, একশৰণ ভাগৱতী ধৰ্ম নামঘৰৰ সভাপতি শ্ৰীযুত যুগল বৰা বাপ, উপ সভাপতি শ্ৰীযুত দীপ্তি গগৈ বাপকে আদি কৰি কেইবাগৰাকীও বিশিষ্ট ব্যক্তি উপস্থিত থাকে ।
উদযাপন সমিতিৰ সভাপতি শ্ৰীযুত দেৱজিৎ ভৰালীয়ে আঁত ধৰা অনুষ্ঠানটিত শেষলৈ সকলোৱে নাটৰ ভাৱৰীয়াবৃন্দৰ সমন্বিতে উপস্থিত সমূহ ভকতবৃন্দই সমূহীয়া সেৱাৰে প্ৰতিষ্ঠা দিৱস উদযাপন কাৰ্যসূচীৰ সফল সামৰণি পৰে ৷
