03/03/2026
*നവീകരണ കലശത്തിന് മംഗള പരിസമാപ്തി*
ഭക്തജനങ്ങളെ,
ആറ്റൂർ ശ്രീ കാർത്ത്യായനി ഭഗവതി ക്ഷേത്രത്തിൽ നടന്നു വന്ന പുനരുദ്ധാരണ യജ്ഞത്തിന്റെ ഭാഗമായി പരിഹാരകർമ്മങ്ങൾ, ശ്രീകോവിൽ നവീകരിച്ച് ചെമ്പോല മേയൽ , ചുറ്റമ്പലത്തിന്റെ കേടുപാടുകൾ തീർത്ത് കരിങ്കല്ല് വിരിക്കൽ, വിളക്കുമാടം പുനർനിർമാണം എന്നിവയ്ക്ക് ശേഷം ക്ഷേത്ര ചൈതന്യ വർദ്ധനവിനായി ഫെബ്രുവരി 20 മുതൽ നടന്നു വന്ന നവീകരണ കലശത്തിന് ഇന്നലെ പരിസമാപ്തി കുറിച്ചിരിക്കുകയാണ്. സങ്കീർണമായ തന്ത്രപൂജാവിധികൾ,മറ്റു ചടങ്ങുകൾ, പ്രാർത്ഥനകൾ, അലങ്കാരങ്ങൾ, വാദ്യഘോഷങ്ങൾ, കലാപ്രകടനങ്ങൾ, പ്രസാദഊട്ടുകൾ എന്നിവയാൽ പൂരിതമായിരുന്ന ക്ഷേത്രം സജ്ജനങ്ങളുടെ പങ്കാളിത്തത്താലും പ്രാർത്ഥനകളാലും ധന്യമായി. കലശം ഭംഗിയായി പര്യവസാനിക്കുന്നതിന് ക്ഷേത്ര സംരക്ഷണ സമിതിയോട് ചേർന്ന് പ്രവർത്തിച്ച തന്ത്രി വര്യന്മാർ, കഴകക്കാർ , വാദ്യക്കാർ , ദേഹണ്ഡക്കാർ , കലാപ്രകടനങ്ങൾ കാഴ്ചവച്ച പ്രതിഭകൾ, ക്ഷേത്രം ജീവനക്കാർ, മറ്റു സഹായികൾ തുടങ്ങി ഈ മഹാ യജ്ഞവുമായി ബന്ധപ്പെട്ട് പ്രവർത്തിച്ച എല്ലാവർക്കും സമിതിക്കുവേണ്ടിയും നാട്ടുകാർക്ക് വേണ്ടിയും നന്ദി രേഖപ്പെടുത്തുന്നു. അതിലുപരി ഈ വിജയത്തിനായി ഒരുമിച്ചു കൂടെ നിന്ന നാട്ടുകാർക്കും ഭക്തജനങ്ങൾക്കും ഭഗവതിയുടെ അനുഗ്രഹം ഭവിക്കട്ടെ എന്ന് പ്രാർത്ഥിക്കുന്നു. ഇതുവരെയുള്ള പ്രവർത്തനങ്ങളിൽ സാമ്പത്തികമായും ശാരീരികമായും മാനസികമായും സഹകരിച്ച എല്ലാ ഭക്തർക്കും ഹൃദയം നിറഞ്ഞ നന്ദി.
നടത്തിയ കർമ്മങ്ങളിൽ എല്ലാം തന്ത്രിവര്യൻമാരും ആചാര്യന്മാരും അത്രയധികം സംതൃപ്തി രേഖപ്പെടുത്തിയത് അഭിമാനവും സന്തോഷവും ഉളവാക്കുന്നതാണ്.
നാടിന്റെയും ക്ഷേത്രത്തിന്റെയും ഉന്നമനത്തിനായി കൂടെ നിന്ന് പ്രവർത്തിച്ചതിന് ഒരിക്കൽ കൂടി നന്ദി 🙏🙏
ക്ഷേത്ര സംരക്ഷണ സമിതി
