16/02/2026
ശിവ ക്ഷേത്രത്തിൽ പൂർണ്ണ പ്രദക്ഷിണം അരുത്*
ശിവക്ഷേത്രത്തിലെ പ്രദക്ഷിണം മറ്റു ക്ഷേത്രങ്ങളിലെ പ്രദക്ഷിണത്തിൽ നിന്നും വ്യത്യാസപ്പെട്ടതാണ് . ശിവക്ഷേത്രത്തിൽ ശ്രീകോവിലിനു ചുറ്റും പ്രദക്ഷിണം വെക്കുമ്പോൾ യാതൊരു കാരണവശാലും ഓവ് മുറിച്ചു കടക്കരുത് .
ശിവഭഗവാന്റെ ശിരസ്സിലുള്ള ദേവഗംഗ ഒഴുകുന്നത് ഓവിലൂടെയാണെന്നു സങ്കൽപം .ഗംഗനദി ആണെന്ന സങ്കല്പമാണ് ഓവിന് . ഓവ് മറികടന്നു പ്രദക്ഷിണമരുതെന്ന് പറയുന്നതിന്റെ ഒരു കാരണമിതാണ് .കൂടാതെ താന്ത്രികവും യോഗശാസ്ത്രപരവുമായ ചില കാരണങ്ങളും ഇതിനു പിന്നിലുണ്ട് .
തന്ത്രശാസ്ത്രത്തിൽ എല്ലാദേവന്മാർക്കും ഉപരിയായ വർത്തിക്കുന്നത് പരമശിവനാണ് . പൂർണ്ണതയുടെ ദേവനായാണ് ഭക്തർ ശിവനെ ആരാധിക്കുന്നത് .ശരീരത്തിലെ ജഡാധാരങ്ങളിൽ ഏറ്റവും മുകളിലുള്ള സഹസ്രാര പത്മത്തിലെ ബ്രഹ്മരന്ധ്രസ്ഥാനമാണ് ശിവഭഗവാന് കല്പിച്ചിട്ടുള്ളത് .
അതുകൊണ്ടു തന്നെ ശിവലിംഗത്തിൽ അഭിഷേകം നടത്തുമ്പോൾ സഹസ്രാരപത്മത്തിൽ നിന്നും യോഗാനുഭൂതിയാകുന്ന അമൃതധാര അഭിഷേക ജലത്തോടൊപ്പം കലർന്നു വടക്കുഭാഗത്തുള്ള സോമസൂത്രത്തിലൂടെ (ഓവ്) ഒഴുകുന്നു .
കിഴക്കുനിന്നും പ്രദക്ഷിണമായി ഓവിന് സമീപമെത്തുമ്പോൾ സാധകൻ തന്നെ സഹസ്രാരപത്മം വരെ എത്തുന്നു എന്നതാണ് വിശ്വാസം . അതുകൊണ്ട് തന്നെ ശിവക്ഷേത്രത്തിലെ പ്രദക്ഷിണം പ്രാണായാമ തുല്യമായ പ്രക്രിയ ആണെന്ന് പറയാം .
ഓം നമഃശിവായ
Credit: Hinduism Malayalam
