06/03/2021
അത്യന്തം ചൈതന്യപൂർണ്ണങ്ങളായ ശ്രീലക്ഷ്മീനരസിംഹ പാർത്ഥസാരഥി ആഞ്ജനേയ പ്രതിഷ്ഠകളുൾപ്പെടുന്ന ഒരു ക്ഷേത്രസങ്കേതമാണു ശ്രീ കുളശ്ശേരി ക്ഷേത്രം. തൃശ്ശൂർ നഗരമധ്യത്തിൽ ചെട്ടിയങ്ങാടിയിൽ കെ.എസ്.ആർ.ടി.സി ബസ് സ്റ്റാൻഡിനു സമീപം സ്ഥിതി ചെയ്യുന്ന ക്ഷേത്രത്തിലേക്ക് വെളിയന്നൂർ മാതൃഭൂമി കെട്ടിടത്തിനു മുൻ വശത്തുള്ള കിഴക്കേ നടയിൽക്കൂടിയും പ്രവേശനം സാധ്യമാണ്.
പാനകപ്രിയനായ ശ്രീലക്ഷ്മീനരസിംഹമൂര്ത്തിയാണ് പ്രധാനപ്രതിഷ്ഠയെങ്കിലും അതീവ ചൈതന്യവാനും ഭക്താഭീഷ്ട പ്രദായകനുമായ ശ്രീഹനുമാന് സ്വാമിക്കും ധാരാളം ഉപാസകർ ഉണ്ട്. ഹനുമാന് സ്വാമിക്ക് എന്നും വെറ്റില മാലയും, വടമാലയും ചാര്ത്താം. പിന്നെ അവില് നിവേദ്യം, പൂമൂടല് മുതലായവയും നടത്താവുന്നതാണ്. അവിടെ തന്നെ കിഴക്ക് ദർശ്ശനമായി അനുഗ്രഹം ചൊരിയുന്ന ഭഗവാൻ പാർത്ഥസാരഥിക്ക് വെണ്ണയും പഴം പഞ്ചസാരയുമാണ് ഹിതകരം. കൂടാതെ മുൻ വശത്ത് ആലിൻ ചുവട്ടിൽ സർപ്പസാന്നിദ്ധ്യവും ഉണ്ട്.
ക്ഷേത്രം ഇപ്പോൾ കൊച്ചിൻ ദേവസ്വം ബോർഡിന്റെ ഭരണത്തിൻ കീഴിലാണ്. ഭരണസമിതി കാര്യാലയം ക്ഷേത്രത്തിന്റെ പടിഞ്ഞാറെ നടയുടെ മുൻ വശത്താണ് പ്രവർത്തിക്കുന്നത്. ക്ഷേത്രത്തിന്റെ വികസനപ്രവർത്തനങ്ങളെ മുൻനിർത്തി ദേശവാസികളെ പങ്കെടുപ്പിച്ച് ഒരു ക്ഷേത്രസംരക്ഷണസമിതിയും നിലനിൽക്കുന്നുണ്ട്.
