26/12/2025
❤ ആചാര്യവന്ദനം 🪔🙏🏻
1914 ലെ ശ്രീമൂലം തിരുനാൾ ആഘോഷങ്ങളുടെ അദ്ധ്യക്ഷനായി ശ്രീ കൈനിക്കര കുമാരപിള്ളയെ തിരഞ്ഞെടുത്തു. നായന്മാരുടെ അവശനില, മറ്റ് മതസ്ഥരുടെ അവഗണന എന്നിവയ്ക്ക് പരിഹാരം കാണുക, സംഘടനയുടെ കെട്ടുറപ്പ്, ചങ്ങനാശ്ശേരി താലൂക്ക് അടിസ്ഥാനത്തിൽ നായർ സമാജങ്ങൾ സ്ഥാപിക്കുക, വർഷംതോറും വിജയദശമി ദിനത്തിൽ ശ്രീമൂലം തിരുനാൾ ആഘോഷം കൊണ്ടാടണം എന്നീ തീരുമാനങ്ങൾ 1914 ലെ തിരുനാൾ സമ്മേളനത്തിൽ എടുത്തിരുന്നു.
അനൈക്യം, വാശി, ഉപജാതിഭേദം, ആഢ്യത്വം, അസൂയ, അനുസരണയില്ലായ്മ എന്നീ ദോഷങ്ങൾ നായന്മാരുടെ എക്കാലത്തുമുള്ള ശാപങ്ങളാണ്.
ശ്രീമൂലം പ്രജാസഭയിലേക്കുള്ള വോട്ടാവകാശമാനദണ്ഡം അമ്പതു രൂപ കരം അടയ്ക്കുന്ന വസ്തുവിന്റെ ഉടമയായിരിക്കണം. 1915 ൽ ചങ്ങനാശ്ശേരിയിൽ നിന്നും തിരുവിതാംകൂർ പ്രജാസഭയിലേക്കുള്ള സ്ഥാനാർത്ഥിയായത് മന്നത്തിന്റെ ആത്മസുഹൃത്ത് വാൽപ്പറമ്പിൽ വേലായുധൻ പിള്ളയാണ്.
വേലായുധൻപിള്ളയുടെ വിജയാഹ്ളാദവേളയിൽ, മന്നത്തു പർവ്വതിയമ്മ കൊളുത്തിവെച്ച നിലവിളക്ക് സാക്ഷിയായി സമുദായത്തിന്റെ ഉന്നമനത്തിനുവേണ്ടി സർവ്വാത്മനാ പ്രവർത്തിക്കുമെന്ന് മന്നവും പതിമൂന്നുപേരും പ്രതിജ്ഞചെയ്തു, തുടർന്ന് നായർ സമുദായഭൃത്യജനസംഘം രൂപീകരിക്കുകയും ചെയ്തു. നായർ സമുദായ ഭൃത്യജനസംഘത്തിന്റെ ആദ്യ പ്രസിഡന്റായി ശ്രീ കേളപ്പൻ നായരെയും സെക്രട്ടറിയായി ശ്രീ മന്നത്തു പത്മനാഭനെയും തെരഞ്ഞെടുത്തു. ശ്രീ കേളപ്പൻ നായരെ നായർ സമുദായ ഭൃത്യജനസംഘത്തിന്റെ നിയമാവലി എഴുതി തയ്യാറാക്കാൻ നിയുക്തനായി. സർവ്വസമുദായ മൈത്രി, അധഃകൃതോദ്ധാരണം എന്നിവ നിയമാവലിയിൽ പ്രത്യേക ലക്ഷ്യങ്ങളായി എഴുതിച്ചേർത്തു.
1905 ജൂൺ 12-ന് രൂപീകരിച്ച സെർവെൻറ് ഓഫ് ഇന്ത്യ സൊസൈറ്റി എന്ന ഉത്തരേന്ത്യയിലെ സംഘടനയുടെ പ്രവർത്തന ശൈലിയാണ് നായർ സമുദായ ഭൃത്യജനസംഘം മാതൃകയാക്കിയത്. ഗോപാലകൃഷ്ണ ഗോഖലെ, എം.എൻ ദാവീദ്, ജി.കെ ദേവ്ധർ, എ.വി. പട് വർദ്ധൻ എന്നിവരായിരുന്നു സെർവെൻറ് ഓഫ് ഇന്ത്യ സൊസൈറ്റിയുടെ പ്രമുഖ പ്രവർത്തകർ. ഗോപാലകൃഷ്ണ ഗോഖലെയായിരുന്നു സംഘടനയുടെ അദ്ധ്യക്ഷൻ.ഭാരതസേവനത്തിന് മിഷനറിമാരെ പരിശീലിപ്പിക്കുക, ഭാരതീയരുടെ ക്ഷേമം പുലർത്തുക എന്നിവയായിരുന്നു സെർവെൻറ് ഓഫ് സൊസൈറ്റിയുടെ ലക്ഷ്യങ്ങൾ.
നായർ സമുദായ ഭൃത്യജനസംഘം രൂപീകരിച്ചപ്പോൾ പ്രതിജ്ഞയെടുത്ത പതിന്നാലു ഇവരായിരുന്നു.
1. കെ.കേളപ്പൻ നായർ. ബി . എ
2 . മന്നത്തുപത്മനാഭപിള്ള,പെരുന്ന
3 . പനങ്ങാട്ടു കേശവപ്പണിക്കർ, മുട്ടാർ
4 . എൻ .സി. ത്രിവിക്രമകൈമൾ, നൈനാടത്ത്, ഈര
5 . കാക്കനാട് നാരായണപ്പണിക്കർ, വെളിയനാട്
6 . പനയ്ക്കാട്ട് പരമേശ്വരക്കുറുപ്പ്, വേഴപ്ര
7 . നാഗവള്ളിൽ കൊച്ചുകുഞ്ഞുകുറുപ്പ്, രാമങ്കരി
8 . പടിഞ്ഞാറേക്കുറ്റ് കൃഷ്ണപിള്ള, പെരുന്ന
9 . കൊറ്റനാട്ടിൽ പത്മനാഭപിള്ള, പുഴുവാത്
10 . പള്ളിപ്പുറത്തു നാരായണപിള്ള, തൃക്കൊടിത്താനം
11 . കൊണ്ടൂർ കൃഷ്ണപിള്ള, തൃക്കൊടിത്താനം
12 . തളിയിൽ മാധവൻപിള്ള. തൃക്കൊടിത്താനം
13 . വാല്പറമ്പിൽ വേലായുധൻ പിള്ള, വാഴപ്പള്ളി
14 . പൊതുവാടത്തു പത്മനാഭപിള്ള,വാഴപ്പള്ളി
പ്രതിജ്ഞ നിർവ്വഹിക്കുമ്പോൾ മന്നത്തിന്റെ പ്രായം മുപ്പത്തിയേഴും മറ്റു സ്ഥാപകനേതാക്കളുടെ പ്രായം 25 നും 40 നും ഇടയിലുമായിരുന്നു.
നായർ സമുദായത്തിന്റെ ഉന്നമനത്തിൽ സംഘാംഗങ്ങളെ പരിശീലിപ്പിക്കുക, അതിന് ന്യായവും നിയമാനുസൃതവുമായ മാർഗ്ഗം കണ്ടെത്തുക. അനാചാരങ്ങൾ ഇല്ലായ്മചെയ്യാൻ കേരളമൊട്ടാകെ പ്രചാരണം നടത്തുക, നായർ സമാജങ്ങൾ സ്ഥാപിക്കുക, രാജഭക്തി, സന്മാർഗ്ഗജീവിതം, ഈശ്വര വിശ്വാസം, വ്യവസായം, ധനസ്ഥിതി,ഒരുമ എന്നിവയിൽ പ്രകടമായ വർദ്ധയുണ്ടാക്കുക, ഇതരസമുദായ ഐക്യത്തിനുവേണ്ടി പ്രവർത്തിക്കുക എന്നിവയാണ് നായർ സമുദായ ഭൃത്യജനസംഘം നിയമാവലി അനുശാസിക്കുന്ന പ്രധാന തീരുമാനങ്ങൾ.
ഞാൻ നായർ സമുദായോന്നതിക്കായി നിരന്തരം ആലോചിക്കുകയും പരിശ്രമിക്കുകയും ചെയ്യും. അങ്ങനെയുള്ള ശ്രമങ്ങളിൽ ഇതര സമുദായങ്ങൾക്ക് ക്ഷോഭകരമായ യാതൊരു പ്രവർത്തിയും ചെയ്യുന്നതല്ല. ഈ സംഘോദ്ദേശ്യങ്ങളെ മുൻനിർത്തിയും ഉദ്ദേശ്യസാദ്ധ്യത്തിനുവേണ്ട ന്യായമായ കരുതലോടുകൂടിയും ഞാൻ ജീവിച്ചുകൊള്ളാം.സത്യം സത്യം സത്യം. ഇതാണ് സംഘടനാ നിയമാവലി എട്ടാം വകുപ്പുപ്രകാരം നായർ സ്ഥിരാംഗങ്ങൾ ചൊല്ലേണ്ട സത്യവാചകം.
🌸🏵️🌸
