15/09/2026
*🌿 കാവ്, ക്ഷേത്രം എന്നിവയിലെ ഭരണ സമിതി അംഗങ്ങൾ ആരെങ്കിലും ഈ ഗ്രൂപ്പിൽ ഉണ്ടെങ്കിൽ, അവരുടെ പ്രത്യേക ശ്രദ്ധയ്ക്ക്🌿*
*വിഷയം: കേരള വനം വകുപ്പിന്റെ കാവ് പുനരുദ്ധാരണ പദ്ധതി - ധനസഹായം - സംബന്ധിച്ച്.*
പ്രിയമുള്ളവരെ,
*നമ്മുടെ പവിത്രമായ കാവുകൾ (ക്ഷേത്രങ്ങളോട് ചേർന്നുള്ളവ ഉൾപ്പെടെ) സംരക്ഷിക്കുന്നതിനും പരിസ്ഥിതി പുനരുദ്ധരിക്കുന്നതിനുമായി കേരള വനം വകുപ്പ് നടപ്പിലാക്കുന്ന പ്രധാന പദ്ധതിയാണ് കാവ് പുനരുദ്ധാരണ പദ്ധതി. കാവ് പുനരുദ്ധാരണ പദ്ധതിയെക്കുറിച്ചുള്ള പ്രധാന വിവരങ്ങള്‍ താഴെ ചേർക്കുന്നു.*
*📌1. എന്താണ് ഈ പദ്ധതി?*
കേരളത്തിലെ തനത് ജൈവവൈവിധ്യത്തിന്റെ ഈറ്റില്ലങ്ങളായ കാവുകൾ (Sacred Groves) സംരക്ഷിക്കുന്നതിനും, നാശോന്മുഖമായിക്കൊണ്ടിരിക്കുന്ന അവയുടെ പരിസ്ഥിതി പുനരുജ്ജീവിപ്പിക്കുന്നതിനുമായി കേരള വനം വന്യജീവി വകുപ്പ് (Forest Department) കേന്ദ്ര സർക്കാരിന്റെ സഹായത്തോടെ 'Protection and Conservation of Sacred Groves' (കാവ് പുനരുദ്ധാരണ പദ്ധതി) എന്ന പേരിൽ നൽകി വരുന്ന ഒരു പ്രത്യേക ധനസഹായ പദ്ധതിയാണിത്.
*📌2. പ്രധാന ലക്ഷ്യങ്ങളും പ്രവർത്തനങ്ങളും*
ഈ പദ്ധതിയിലൂടെ തെരഞ്ഞെടുക്കപ്പെടുന്ന കാവുകളിൽ താഴെ പറയുന്ന പ്രവർത്തനങ്ങൾ നടത്താം.
*📍ജൈവവൈവിധ്യ സംരക്ഷണം:* അപൂർവ്വങ്ങളും ഔഷധഗുണമുള്ളതുമായ തദ്ദേശീയ സസ്യങ്ങൾ നട്ടുപിടിപ്പിക്കുക.
*📍കാവ് നഴ്സറികൾ:* കാവുകളിൽ വളരുന്ന തനത് സസ്യങ്ങൾ വംശവർദ്ധനവ് നടത്തി സംരക്ഷിക്കുന്നതിനായി പ്രത്യേക 'കാവ് നഴ്സറികൾ' സ്ഥാപിക്കുക.
*📍ജലാശയങ്ങളുടെ പുനരുദ്ധാരണം:* കാവുകളിലെ കുളങ്ങളും ഉറവകളും ശുദ്ധീകരിക്കുകയും സംരക്ഷിക്കുകയും ചെയ്യുക.
*📍ജൈവവേലി നിർമ്മാണം:* കാവുകളിലേക്ക് അതിക്രമിച്ചു കയറുന്നത് തടയാൻ തദ്ദേശീയ സസ്യങ്ങൾ ഉപയോഗിച്ച് സ്വാഭാവിക ജൈവവേലി (Bio-fencing) നിർമ്മിക്കുക.
*📍മാലിന്യ നിർമ്മാർജ്ജനം:* പ്ലാസ്റ്റിക് അവശിഷ്ടങ്ങളും അധിനിവേശ സസ്യങ്ങളും (Invasive species) നീക്കം ചെയ്ത് കാവുകളുടെ സ്വാഭാവികത നിലനിർത്തുക.
*📌3. ആർക്കൊക്കെ അപേക്ഷിക്കാം?*
(1) വ്യക്തികളുടെ ഉടമസ്ഥതയിലുള്ള കാവുകൾ.
(2) കുടുംബ ട്രസ്റ്റുകൾ, കുടുംബ കൂട്ടായ്മകൾ എന്നിവയുടെ കീഴിലുള്ളവ.
(3) ക്ഷേത്ര കമ്മിറ്റികൾ, ദേവസ്വം ബോർഡുകൾ എന്നിവയ്ക്ക് കീഴിൽ സംരക്ഷിക്കപ്പെടുന്ന കാവുകൾ.
*📌4. ധനസഹായം ലഭിക്കുന്നതിനുള്ള മാനദണ്ഡങ്ങൾ*
🔸അപേക്ഷിക്കുന്ന കാവിന് കൃത്യമായ ഭൂമിയുടെ ഉടമസ്ഥാവകാശ രേഖകൾ ഉണ്ടായിരിക്കണം.
🔸കാവിന്റെ ആകെ വിസ്തൃതി വ്യക്തമാക്കുന്ന രേഖകൾ സമർപ്പിക്കണം.
🔸മുൻഗണന ലഭിക്കുന്നത് കൂടുതൽ ജൈവവൈവിധ്യമുള്ളതും, നാശത്തിന്റെ വക്കിലുള്ളതുമായ വലിയ കാവുകൾക്കാണ്.
🔸പദ്ധതി തുക പൂർണ്ണമായി വനം വകുപ്പിന്റെ സോഷ്യൽ ഫോറസ്ട്രി (Social Forestry) വിഭാഗത്തിന്റെ മേൽനോട്ടത്തിൽ മാത്രമേ വിനിയോഗിക്കാൻ പാടുള്ളൂ.
*📌5. എങ്ങനെ അപേക്ഷിക്കണം?*
വനം വകുപ്പ് ഓരോ വർഷവും ഈ പദ്ധതിക്കായി അപേക്ഷകൾ ക്ഷണിക്കാറുണ്ട്.
വനം വകുപ്പിന്റെ ഔദ്യോഗിക വെബ്‌സൈറ്റായ www.forest.kerala.gov.in വഴി അപേക്ഷാ ഫോം ഡൗൺലോഡ് ചെയ്യാം.
പൂരിപ്പിച്ച അപേക്ഷയോടൊപ്പം ഭൂമിയുടെ നികുതി രസീത്, ആധാരത്തിന്റെ പകർപ്പ്, കാവിൽ ചെയ്യാൻ ഉദ്ദേശിക്കുന്ന പ്രവർത്തനങ്ങളുടെ വിശദമായ പ്ലാൻ എന്നിവ ഉള്ളടക്കം ചെയ്യണം.
അപേക്ഷകൾ അതത് ജില്ലകളിലെ അസിസ്റ്റന്റ് ഫോറസ്റ്റ് കൺസർവേറ്റർ (സോഷ്യൽ ഫോറസ്ട്രി) ഓഫീസിലാണ് സമർപ്പിക്കേണ്ടത്.
*📍ഓഫീസ് വിലാസം:*
അസിസ്റ്റന്റ് കൺസർവേറ്റർ ഓഫ് ഫോറസ്റ്റ്,
(Social Forestry Division), പി.ടി.പി നഗർ, വട്ടിയൂർക്കാവ് പി.ഒ, തിരുവനന്തപുരം - 695013
ഫോണ്‍ : 0471-2360462
Mobile: 9447979135
Email: [email protected]
[email protected]
അപേക്ഷ ഫോറം (മാതൃക) ഇതോടൊപ്പം ഉള്ളടക്കം ചെയ്യുന്നു.
