08/01/2023
മലങ്കര സുറിയാനി കത്തോലിക്കാ സഭയുടെ തിരുവല്ല അതിരൂപത അംഗമായ ബഹുമാനപ്പെട്ട ജോൺ ഇരുമേട അച്ചൻ കർത്താവിൽ നിദ്ര പ്രാപിച്ച് അദ്ദേഹത്തിൻറെ കബറടക്ക ശുശ്രൂഷകൾക്കായി സഭ ഒരുങ്ങുന്ന ഈ സമയം മലങ്കര സുറിയാനി കത്തോലിക്കാ സഭയുടെ നാമത്തിലുള്ള പ്രാർത്ഥനാപൂർണ്ണമായ അനുശോചനവും കൂട്ടായ്മയും ഈ സമയം കുടുംബാംഗങ്ങളെയും വൈദിക സഹോദരങ്ങളെയും തിരുവല്ല അതിരൂപതയെയും ഞാൻ അറിയിക്കുന്നു;ദൈവം ഈ ആത്മാവിന് നിത്യമായ സമാധാനം നൽകി അവിടുത്തെ ഭവനത്തിൽ കാത്ത് സൂക്ഷിക്കുമാറാകട്ടെ .
പുനരൈക്യ പ്രസ്ഥാനത്തിൻറെ മധ്യതിരുവിതാംകൂറിലെ ശുശ്രൂഷയിൽ പ്രത്യേകിച്ച് മല്ലപ്പള്ളി പ്രദേശം കേന്ദ്രമാക്കി നടത്തിയ പുനരൈക്യ ശുശ്രൂഷ അത് ഹൃദയപൂർവ്വം ഏറ്റെടുത്ത കുടുംബങ്ങളിൽ ഒരു പ്രധാനപ്പെട്ട കുടുംബമാണ് ഇരുമേട കുടുംബം . വന്ദ്യനായ ജോൺ ഇരുമേട അച്ഛൻറെ മാതാപിതാക്കൾ സത്യവിശ്വാസ ജീവിതത്താൽ പ്രചോദിതരായി നമ്മുടെ മലങ്കര സുറിയാനി കത്തോലിക്കാ സഭാ കൂട്ടായ്മയെ ബലപ്പെടുത്തുന്നതിൽ ഏറെ ത്യാഗം സഹിച്ചിട്ടുള്ള കുടുംബമാണ്. ഇരുമേട കുടുംബത്തിൽ നിന്ന് ധീരരായ അല്മായ പ്രേഷിതർ- വന്ദ്യനായ ജോൺ ഇരുമേട അച്ഛൻറെ സഹോദരൻ പരേതനായ ബാറീത്തോ കാശീറോ ജോർജ് ഇരുമേട സാർ, ബഥനി സന്യാസിനി സമൂഹത്തിലെ സുപ്പീരിയർ ജനറൽ ആയിരുന്ന പരേതയായ സിസ്റ്റർ അനൻസിയേറ്റാ എസ് ഐ സി , സിസ്റ്റർ ഇഗ്നേഷ്യസ് എസ് ഐ സി -തുടങ്ങിയവരും ബാക്കി സഹോദരങ്ങളും സഭാ ശുശ്രൂഷയിൽ മുൻപന്തിയിൽ ഉണ്ടായിരുന്നു. ഇരുമേട കുടുംബാംഗങ്ങൾ ലോകത്തിന്റെ ഏത് ഭാഗത്തായിരുന്നാലും മലങ്കര സഭയോടുള്ള ബന്ധത്തിൽ ഇന്നും സജീവമാണ്.
ഏറ്റം കരുതലോടുകൂടി വിദ്യാഭ്യാസ ശുശ്രൂഷയെ ക്രമീകരിക്കുന്നതിനും നേതൃത്വം നൽകുന്നതിനും സന്നദ്ധനായ ബഹുമാനപ്പെട്ട ഇരുമേട അച്ഛൻ ഇതെല്ലാം ഒരു കുടുംബത്തിൻറെ സഭയോടുള്ള ബന്ധത്തിൻറെ അടയാളമായി ഞാൻ കാണുന്നു. സഭയുടെ കെട്ടുപണിയിൽ ഇരുമേട കുടുംബം നിർവഹിച്ചിട്ടുള്ള എല്ലാ നന്മകളെയും കൃതജ്ഞതയോട് കൂടി ഓർക്കുന്നു.തിരുവല്ല അതിരൂപതയിലും ബത്തേരി രൂപതയിലും മാർ ഇവാനിയോസ് പിതാവിന്റെ നാമകരണ നടപടികളിൽ ഭാഷാന്തരം ചെയ്യുന്നതിലെ വിദഗ്ധ സമിതി അംഗമായും വന്ദ്യനായ ജോൺ ഇരുമേട അച്ഛൻ ശുശ്രൂഷ ചെയ്തിട്ടുണ്ട്. സ്കൂളിലെ പ്രധാന അധ്യാപകൻ എന്ന നിലയിൽ വിവിധ സ്കൂളുകൾക്ക് അദ്ദേഹം നേതൃത്വം നൽകി. ഏറെക്കാലം ബത്തേരി രൂപതയിലെ ബത്തേരി സെൻറ് ജോസഫ് സ്കൂളിന്റെയും ,ഈങ്ങാപ്പുഴ മാർ ബസേലിയോസ് സ്കൂളിന്റെയുംചുമതലക്കാരനായി അദ്ദേഹം പ്രവർത്തിച്ചു. തിരുവല്ല അതിരൂപതയുടെ വിവിധ സ്കൂളുകൾക്ക് ശ്രദ്ധേയമായ നേതൃത്വം നൽകി.ഹൈറേഞ്ചിലും മലബാറിലും തിരുവല്ല അതിരൂപതയുടെ മധ്യതിരുവിതാംകൂർ അജപാലന പ്രദേശങ്ങളിൽ എല്ലാം വിവിധ ഇടവകൾക്കും മിഷനുകൾക്കും എല്ലാം പൗരോഹിത്യപരമായ നേതൃത്വം നൽകി.
വന്ദ്യനായ ജോൺ ഇരുമേട അച്ഛൻ തന്റെ ശുശ്രൂഷകൾക്ക് ഈ ലോകത്തിൽ വിരാമം ഇട്ടുകൊണ്ട് ക്ലേശം ഇല്ലാത്ത വേദനയും രോഗവും ഇല്ലാത്ത ഒരു നാട്ടിലേക്ക് കർത്താവിൻറെ ഭവനത്തിലേക്ക് വിളിച്ച് ചേർക്കപ്പെട്ടിരിക്കുമ്പോൾ അദ്ദേഹത്തിൻറെ എല്ലാ ശുശ്രൂഷകൾക്കും ദൈവത്തോട് നന്ദി പറയുന്നു ,അവിടുത്തെ സ്തുതിക്കുന്നു. ഈ കുടുംബത്തെ ഓർത്ത് ദൈവത്തോട് നന്ദി പറയുന്നു.ഈ കുടുംബം വഴിയായി സഭയ്ക്ക് ലഭിച്ചിട്ടുള്ള എല്ലാ കരുതലുകൾക്കും ദൈവത്തെ മഹത്വപ്പെടുത്തുന്നു. ഈ ആത്മാവിന് നിത്യ ശാന്തി നേരുന്നു.
ഭാഗ്യവാനായ പുരോഹിത അങ്ങ് സമാധാനത്തോടെ കൂടി പോയാലും!!!!
ദൈവ തിരുനാമത്തിന് എന്നും മഹത്വം ഉണ്ടായിരിക്കട്ടെ ആമ്മേൻ.
