20/08/2021
മാർത്തോമാ ശ്ലീഹായുടെ സിംഹാസനത്തെ ഭാഗ്യമോടെ അലങ്കരിച്ച മലങ്കര നസ്രാണികളുടെ ജാതിക്ക് തലവനും, പൗരസ്ത്യ സിംഹാസനത്തിൽ 91-ാം സ്ഥാനിയും, മലങ്കരയിലെ എട്ടാം കാതോലിക്കായും, 21-ാം മലങ്കര മെത്രാപ്പോലീത്തായുമായിരുന്ന് കാലം ചെയ്ത പരിശുദ്ധ ബസേലിയോസ് മാർത്തോമ്മാ പൗലോസ് ദ്വിതീയൻ ബാവാ തിരുമേനിയുടെ നാൽപതാം ചരമദിനം പരിശുദ്ധ സഭ ആചരിക്കുന്നു✝️
സ്വജീവിതം പോലെ തന്നെ തൻ്റെ വിയോഗവും കൊണ്ട് അൽഭുതം തീർത്ത ഭാഗ്യവാനായ പിതാവ്. ഒരു പക്ഷേ, മലങ്കര സഭയുടെ സമീപകാല ചരിത്രത്തിൽ, സഭാ മക്കൾ ഇത്രമേൽ വേദനയോടെ ഉൾക്കൊണ്ട ഒരു വേർപാട് പരിശുദ്ധ പിതാവിൻ്റെത് ആയിരിക്കാം. അത്രമേൽ, വലിയവനെന്നോ ചെറിയവനെന്നോ വ്യത്യാസം കൂടാതെ ഓരോ വിശ്വാസിയുടെയും ഹൃദയത്തിൽ ഇടം കണ്ടെത്തിയ ശ്രേഷ്ഠ ഇടയനായിരുന്നു പരിശുദ്ധ ബാവാ. കാലം ചെയ്ത് നാൽപത് ദിവസങ്ങൾ ആകുമ്പോൾ പോലും, ആ വിയോഗത്തിൽ ലോകത്തിൻ്റെ നാനാ തുറകളിൽ നിന്നും അനുസ്മരണങ്ങളും അനുശോചനവും അനസ്യൂതം പ്രവഹിക്കയാണ്. 🛐
നമ്മുടെ പിതാവായ മാർത്തോമാ ശ്ലീഹായുടെ സിംഹാസനത്തിൻ്റെ മഹിമയ്ക്കും സ്വത്വത്തിനും കോട്ടം തട്ടുന്ന യാതൊന്നും തൻ്റെ കാലത്ത് സംഭവിക്കയില്ല എന്നും, തൻ്റെ ജീവനേക്കാൾ വലുത് പരിശുദ്ധ സഭയുടെ സ്വാതന്ത്ര്യം ആണെന്ന് ഉറക്കെ പ്രഖ്യാപിച്ച ഇടയനായിരുന്നു പരിശുദ്ധ പിതാവ്.
ആ നിലപാടിലെ വ്യക്തത തന്നെയായിരുന്നു പരിശുദ്ധ പിതാവിൻ്റെ മേന്മയും വിശുദ്ധിയും💗
പരിശുദ്ധ പരുമല തിരുമേനിയെ പോലെ നിഷ്ഠയോട് കൂടിയ പ്രാർത്ഥനാ ജീവിതവും, പരിശുദ്ധ വട്ടശ്ശേരിൽ തിരുമേനിയെ പോലെ സഭാ സ്വാതന്ത്ര്യത്തെ പറ്റിയുള്ള വ്യക്തമായ കാഴ്ചപ്പാടും ഒത്തിണങ്ങിയ പരിശുദ്ധ ബാവാ തിരുമേനി മലങ്കര സഭയുടെ ഭാഗ്യതേജസ്സ് എന്ന് വിളിക്കപ്പെടുവാൻ അക്ഷരാർഥത്തിൽ യോഗ്യനാണ്🕎
കാലാ കാലങ്ങളിൽ മാർത്തോമായുടെ സിംഹാസനത്തിൻ്റെ പദവിക്കും പകിട്ടിനും യോജിച്ച പിതാക്കന്മാരെ ദൈവം ഉയർത്തി എന്നത് തന്നെയാണ് മലമലങ്കരങ്കരയുടെ ചരിതം. ശ്രേഷ്ഠരായ മുൻഗാമികളുടെ നിരയിൽ, പൗരസ്ത്യ കാതോലിക്കാ സിംഹാസനത്തെ അലങ്കരിക്കുവാൻ ഉചിതനായ ഒരു പിൻഗാമി തിരഞ്ഞെടുക്കപ്പെടുവാൻ പ്രത്യാശയോടെ പ്രാർഥിക്കാം 🙏
മലങ്കരയെ അതിഭാഗ്യമോടെ മേയിച്ച് ഭരിച്ച പരിശുദ്ധ പൗലോസ് ദ്വിതീയൻ ബാവാ തിരുമേനിയുടെ മാദ്ധ്യസ്ഥം നമുക്ക് കൂട്ടും കോട്ടയും കാവലുമായി തീരട്ടെ🕎✝️🕎
