09/03/2026
Khamenai Rahbar 🙌🏻❤️
Ameer-ul-Momineen Hazrat Ali ibn Abi Talib (A.S) ki shahadat ke ayaam mein jab dil ghamgeen aur aankhein ashkbaar hain aur farzand-e-Ali (A.S) ki shahadat ne is gham ko do-bala kar diya hai, yeh khabar zakhm par marham ke phaye ki tarah hai ke woh Ali (A.S) jise kal mehrab-e-ibadat mein shaheed karke zalim ne socha tha ke hum ne is silsile ko khatam kar diya. Usi silsile se Rahbar-e-Kabeer Inqilab-e-Islami Ayatullah al-Uzma Syed Ruhullah Khomeini (R.A) ne Inqilab-e-Islami ke zariye millat ko hayat-e-nau ata ki. Unke baad Rahbar-e-Shaheed Ayatullah al-Uzma Syed Ali Khamenei (R.A) ne is azeem sarmaye ki na sirf hifazat ki balki ise sari duniya tak is tarah pohcha diya ke poori duniya ka jhukao Ahl-e-Bait ki taraf ho gaya. Unki shahadat ke baad ek tarah ki yaasiyat zehno par taari ho rahi thi ke ab kya hoga, ab kaun is kashti ko sambhalega?
Karam-e-Parwardigar se ek baar phir usi silsile se Ayatullah Syed Mojtaba Khamenei daam zillahu al-aali istimaar ki tamam tar dhamkiyon ke bawajood nizaam-e-Islami ki baag-dor sambhalne ke liye saamne aa gaye.
Aur ek baar phir yeh haqeeqat saamne aa gayi ke hum lawaaris nahin hain. Zamane ka wali aur hum sab ka sarparast-o-nigahban ghaib se hamari muhafizat kar raha hai.
Ab Iran ke Islami nizaam ke tehat 80 se zyada fuqaha ke zariye muntakhib hone wale Wali-e-Faqih Ayatullah Syed Mojtaba Khamenei daam zillahu al-aali se wabastagi ikhtiyar karne ka waqt hai.
Aaiye mojooda Wali-e-Faqih ki wilayat ko qubool karte hue Imam-e-Zamana (A.J) ke huzoor ek baar phir ahd karein ke zindagi ki aakhri saans tak is nizaam-e-wilayat-o-marjaiyat se wabasta rahenge aur asr-e-ghaibat mein Wali-e-Faqih ke daira-e-itaat-o-wilayat mein rehte hue InshaAllah waqt-e-zahoor Imam (A.S) ke nasireen mein shamil honge.
Wassalamualaikum wa Rahmatullahi wa Barakatuh
Syed Safi Haider
(Secretary Tanzeem-ul-Makatib)
