14/05/2026
حضرت مفتی نذیر احمد قاسمی صاحب دامت برکاتہم کو گزشتہ روز (13 مئی کو) معمول کے مطابق طبی معائنے کے لیے اسپتال لا جایا گیا تھا، جہاں گزشتہ سال ڈالے گئے اسٹنٹ کا معائنہ مقصود تھا۔ تاہم دورانِ معائنہ ڈاکٹروں نے یہ دریافت کیا کہ دل کی ایک اور اہم رگ میں تقریباً 80 فیصد بلاکیج آیا ہوا ہے۔ صورتِ حال کی نزاکت کو دیکھتے ہوئے ماہر ڈاکٹروں نے فوری طور پر دو مزید اسٹنٹ ڈالنے کا کہا۔ چناں چہ اللہ تعالیٰ کے فضل و کرم اور ڈاکٹروں کی مہارت سے اسی وقت کامیاب طریقے سے یہ عمل انجام دیا گیا۔
الحمد للہ! حضرت مفتی صاحب کی صحت پہلے سے بہتر ہے۔ تاہم معالج ڈاکٹروں نے سختی کے ساتھ یہ ہدایت دی ہے کہ اب حضرت کے معمولات، مصروفیات، ملاقاتوں اور ذہنی و جسمانی دباؤ کو حد درجہ کم کرنا ناگزیر ہو چکا ہے۔ کیوں کہ گزشتہ ایک سال کے مقابلے میں حضرت مفتی صاحب کی صحت میں بہتری کے بجائے کافی گراوٹ آچکی ہے۔ اس لیے اب پہلے کی طرح مسلسل مصروفیات، کثرتِ ملاقات، بیانات، سفر اور بار بار کی آمد و رفت حضرت کی صحت کے لیے مناسب نہیں رہی۔ ڈاکٹروں نے خصوصی طور پر مکمل آرام اور غیر ضروری مصروفیات سے سخت اجتناب کی تاکید کی ہے۔
لہٰذا ہم تمام متعلقین، علماء، عوام و خواص، عزیز و اقارب، شاگردوں، محبین اور دوستوں سے نہایت دردمندی اور عاجزانہ درخواست کرتے ہیں کہ براہِ کرم حضرت مفتی صاحب کی صحت کا خصوصی لحاظ رکھیں۔ معمولی مسائل، چھوٹی چھوٹی باتوں اور غیر ضروری معاملات کے لیے بار بار رابطہ کرنے یا حضرت کو زحمت دینے سے مکمل اجتناب کریں۔ اسی طرح بلا ضرورت ملاقاتوں، مسلسل آمد و رفت اور غیر ضروری حاضری سے بھی مکمل پرہیز کیا جائے۔
بار بار کی ملاقاتوں اور غیر متوقع آمد و رفت سے حضرت کے آرام میں خلل پڑتا ہے، جب کہ اس وقت ہم سب کی اولین ترجیح حضرت کی صحت، آرام اور سکون ہونا چاہیے۔ اس لیے تمام متعلقین اور عزیز و اقارب سے گزارش ہے کہ اس معاملے کا خصوصی لحاظ رکھیں۔ اور ملاقاتوں سے مکمل پرہیز کریں۔
ہم مکرر اپنے تمام علماء، قریبی دوستوں، متعلقین اور مخلص احباب سے دست بستہ گزارش کرتے ہیں کہ آپ حضرات کا تعلق حضرت سے خالص دینی اور اللہ کے لیے ہے۔ اسی تعلق کا تقاضا یہ ہے کہ اس نازک مرحلے میں حضرت کے آرام، راحت، سکون اور صحت کو مقدم رکھا جائے اور غیر ضروری ملاقاتوں سے اجتناب کیا جائے، تاکہ اللہ تعالیٰ انہیں صحت و عافیت کے ساتھ مزید عرصہ تک دینِ اسلام کی خدمت کی توفیق عطا فرمائے۔
تمام احباب سے درخواست ہے کہ حضرت مفتی صاحب کی مکمل صحت یابی کے لیے دعا اور صدقہ کا اہتمام فرمائیں۔ اللہ تعالیٰ حضرت مفتی صاحب کو صحتِ کاملہ و عاجلہ عطا فرمائے اور انہیں ہر قسم کی تکلیف و پریشانی سے محفوظ فرمائے۔ آمین
محمد انیس
محمد ادریس
وسیم حسین
