29/12/2013
श्री संतशिरोमणी साधू देवमामलेदार तथा श्री यशवंतराव महाराज यांची वद्य मार्गशीर्ष एकादशीस( शनिवारी दि. २८) आरम नदीच्या तिरी १२६वी पुण्यतिथी यात्रा उत्सव सोहळा साजरा होत आहे...
आपल्या सत्कर्माने आपल्या जीवनाचे शुद्धीकरण करून परमार्थ तेजाने तळपणारा हा महामानव साक्षात परमेश्वराचे स्वरूप बनले. उत्तर महाराष्ट्राचे विशेषत: खान्देशचे त्यात सटाणा शहराचे वैभव ठरलेले साधू देवमामलेदार साक्षात कर्णासारखे दाते होते. याचक कधीही रिकाम्या हाताने परतणार नाही, याची अहोरात्र काळजी घेतली. हे कार्यच त्यांचे परमेश्वर रूप सिद्ध होण्यास पुरेसे आहे. ते प्रत्येकाला घरचा माणूस वाटत असत. काम असो की वर्तन असो त्यात त्यांनी प्रामाणिकपणा कधीही चुकविला नाही. त्यांनी कर्तव्यबुद्धीने प्रत्येक गोष्ट केली. त्यामुळे खजिनदार म्हणून त्यांच्या कामाची कडक तपासणी होऊन चूक आढळली नाही. महाराजांनी प्रामाणिकपणा कधीही सोडलेला नाही, लाचारी कधीही पत्करली नाही. मदत कुणालाही नाकारलेली नाही, नम्रता कधीही सोडली नाही. कामात देव पाहिला, अधिकार्यात देव पाहिला, शिपायातही तो दिसला, जे पूजेत चालत नाही ते कुठेही बाहेर चालत नाही, ते पूजेत चाले तेच सर्वत्र ठेवणे आवश्यक आहे, अशी त्यांची तपश्चर्या व जीवनव्रत होते. त्यामुळे नोकरीच्या प्रत्येक ठिकाणी वरिष्ठांची मर्जी सांभाळली व जनतेचा आदर मिळाला. महाराजांनी ज्या ज्या ठिकाणी नोकरी केली तेथे त्यांनी परोपकार अनाथांना सावली व भाकरी दिली. त्यामुळे बदली झाली की, तेथील लोकांचा कंठ दाटून येई. माणसाला देवासारखी वागणूक देणारा साधू देवमामलेदार आजच्या जगात चुकून आढळणार नाही. अशा महामानवाच्या पुण्यतिथी सोहळ्यास व देवमामलेदारांना कोटी-कोटी प्रणाम.
