28/01/2026
*मुंबईतील एकमेव सूर्यमंदिर आणि दुर्मीळ सूर्यदीप !*
*( रथसप्तमी विशेष )*
*मुंबईतील भुलेश्वर, पायधुणी, काळबादेवी हा अत्यंत वेगळ्याच प्रकारचा परिसर आहे. येथे अल्युमिनियम, तांबे, पितळ, कापड, औषधे इत्यादींपासून ते सोने, चांदी, हिरे, मोती पर्यंत सगळ्या वस्तू एकाचवेळी उपलब्ध असतात. शेकडो वर्षांपूर्वी येथे प्रामुख्याने मराठी आणि गुजराथी वस्तीच होती. त्यामुळे याच भागामध्ये सर्वाधिक, म्हणजे सुमारे ४५ / ५० मंदिरे आढळून येतात. काळबादेवी, भुलेश्वर, मुंबादेवी या इतिहासकालीन मंदिरांबरोबरच येथे नागदेवी, कालभैरव, कालिका देवी, नरनारायण, बापदेव, विघ्नेश्वर जगदंबा अशी इतरत्र सहसा न आढळणारी अत्यंत दुर्मीळ देवतांची मंदिरे आढळून येतात. येथे एक जुने पण अत्यंत छान स्थितीत असलेले आणि मुंबईत असलेले एकमेव सूर्यमंदिर आहे. या संपूर्ण भागाचे झालेले पूर्ण व्यापारीकरण, अति गर्दी, सतत कोलमडणारी वाहतूक व्यवस्था, अरुंद रस्ते आणि गल्ल्या, यामुळे या भागात मुद्दाम पर्यटनासाठी फारसे कुणी येत नाही. पण हे सूर्यमंदिर वेगळे, सुंदर आणि उत्तम स्थितीत आहे.*
*मुख्य मंदिराच्या बाहेरच्या इमारतीच्या आतमध्ये हे खूप उंच असे मुख्य मंदिर आहे.*
