11/04/2026
വിശുദ്ധ തോമസിൻറെ ഞായർ
Sunday of St Thomas
പുതു ഞായർ
ആമുഖം
=======
"നേരംവൈകിയപ്പോൾ ശിഷ്യന്മാർ ഇരുന്ന സ്ഥലത്തു യെഹൂദന്മാരെ പേടിച്ചു വാതിൽ അടെച്ചിരിക്കെ യേശു വന്നു നടുവിൽ നിന്നുകൊണ്ടു: നിങ്ങൾക്കു സമാധാനം എന്നു അവരോടു പറഞ്ഞു.
യേശു വന്നപ്പോൾ പന്തിരുവരിൽ ഒരുവനായ ദിദിമൊസ് എന്ന തോമാസ് അവരോടുകൂടെ ഉണ്ടായിരുന്നില്ല.
എട്ടു ദിവസം കഴിഞ്ഞിട്ടു ശിഷ്യന്മാർ പിന്നെയും അകത്തു കൂടിയിരിക്കുമ്പോൾ തോമാസും ഉണ്ടായിരുന്നു. വാതിൽ അടെച്ചിരിക്കെ യേശു വന്നു നടുവിൽ നിന്നുകൊണ്ടു: നിങ്ങൾക്കു സമാധാനം എന്നു പറഞ്ഞു.
പിന്നെ തോമാസിനോടു: നിന്റെ വിരൽ ഇങ്ങോട്ടു നീട്ടി എന്റെ കൈകളെ കാൺക; നിന്റെ കൈ നീട്ടി എന്റെ വിലാപ്പുറത്തു ഇടുക; അവിശ്വാസി ആകാതെ വിശ്വാസിയായിരിക്ക എന്നു പറഞ്ഞു.
തോമാസ് അവനോടു: "എന്റെ കർത്താവും എന്റെ ദൈവവും ആയുള്ളോവേ" എന്നു ഉത്തരം പറഞ്ഞു.
യേശു അവനോടു: നീ എന്നെ കണ്ടതുകൊണ്ടു വിശ്വസിച്ചു; കാണാതെ വിശ്വസിച്ചവർ ഭാഗ്യവാന്മാർ എന്നു പറഞ്ഞു".
സാരാംശം
========
ജൂഡാസ് ഒഴികെ പത്തുപേർ ജൂതരെ പേടിച്ചു വാതിലടച്ചു അകത്തിരുന്നപ്പോൾ, പുറത്തിറങ്ങാൻ ചങ്കൂറ്റമുണ്ടായിരുന്നതു ഒരേ ഒരുവൻ, തോമാസ്!. അതുകൊണ്ടു ആദ്യ വരവിൽ, തോമാസ് ക്രിസ്തുവിനെ കണ്ടില്ല.
മറ്റൊരിക്കലും ഇതേ കരളുറപ്പ് നാം കാണുന്നുണ്ട്: "ഉറങ്ങുന്ന ലാസറിനെ ഉണർത്താൻ" ക്രിസ്തു ബെഥാന്യയിലേക്കു പോകാൻ തയ്യാറെടുക്കുമ്പോൾ മറ്റു ശിഷ്യന്മാർ ജൂത ഭയത്താൽ ഒപ്പം പോകാൻ ശങ്കിച്ചു. എന്നാൽ അവിടെയും, "അവനോടുകൂടി മരിക്കേണ്ടതിനു നമുക്കും പോകാം" എന്ന് പറഞ്ഞവൻ തോമാസ് മാത്രം!
ഇതേ ചങ്കുറപ്പാണ്, "ലോകത്തിൻറെ അറ്റം" എന്ന് BC ആറാം നൂറ്റാണ്ടുമുതലെങ്കിലും ഗ്രീക്കോ-റോമൻ രേഖകളിൽ അറിയപ്പെട്ട ഇന്ത്യൻ-ലങ്കൻ (റ്റാപ്രൊബന - Taprobana) തെക്കൻ തീരം എന്ന അക്കാലത്തെ അതിവിദൂര പ്രദേശത്തേക്ക് സുവിശേഷമെത്തിക്കാൻ തോമസിനെ തിരഞ്ഞെടുക്കാൻ ഉള്ള കാരണം. അതി ദുർഘടമായ യാത്ര, ഇരുണ്ടത് എന്നു വിശേഷിക്കപ്പെട്ട സംസ്കൃതി, അജ്ഞാത ഭാഷ, മതം, ജനത, ഭക്ഷണം, വേഷം എല്ലാം അപരിചിതം. ദൗത്യം ഏറ്റെടുക്കാൻ, ഒരാളും ധൈര്യപ്പെടുന്നില്ല.
പത്രോസിൻറെ പ്രവർത്തനങ്ങൾ പൗലോസ് എന്ന ശക്തിദുർഗ്ഗത്തിൻറെ തണലിലാണ്.
എന്നാൽ തോമാസ് ഇന്ത്യയിലേക്ക് യാത്രതിരിച്ചത്, ഒറ്റയ്ക്ക്. മറ്റു ശിഷ്യന്മാർ എല്ലാം രണ്ടുപേർ ചേർന്ന് സുവിശേഷം പ്രഘോഷിച്ചു. മാർത്തോമാ ശ്ലീഹായുടെ സഹയാത്രികനായ അറിയിപ്പുകാരൻ തദ്ദേവൂസ് പേർഷ്യയിൽ തന്നെ രക്തസാക്ഷിത്വം വരിച്ചിരുന്നു. ആദ്യ കാല സഹപ്രവർത്തകനായ അപ്പോസ്തോലൻ ബർത്തലോമ (Bartholomew the Apostle) അർമേനിയൻ പര്യടനത്തിലേക്കു തിരിഞ്ഞു.
പന്തിരുവരിൽ പെട്ട ബർത്തലോമയുടെ വടക്കേ ഭാരത സന്ദർശനം പുരാതന ലിഖിതങ്ങളിൽ പരാമർശിക്കുന്നുണ്ട്. എന്നാൽ, ആധുനിക ഗവേഷകർ ഇത് സ്വീകരിക്കുന്നില്ല. പേരിലെ വ്യാഖ്യാന പിശക് എന്നാണു പൊതുവേ വിലയിരുത്തൽ.
എന്നാൽ അതി പുരാതന കാലം മുതൽ, ഗുജറാത്ത് തുറമുഖവും (Lothal Port, 2200 BC) അർമേനിയായും തമ്മിൽ വളരെ അടുത്ത ബന്ധം ഉണ്ട്. ഇവിടെനിന്നു രാഷ്ട്രീയ അഭയം തേടി കുടിയേറിയ ഹൈന്ദവ രാജ പരമ്പരകളും, അവരുടെ ഗണേശ ക്ഷേത്രങ്ങളും അർമേനിയയിൽ ഉണ്ട്. മുംബൈയിൽ, ഇപ്പോഴും സജീവമായ അർമേനിയൻ ചെറു സമൂഹം ഉണ്ട്.
'പുതുഞായർ'
===========
പിന്നെ, പുനരുത്ഥാനത്തിൻറെ 'പുതുഞായർ' എന്ന എട്ടാം നാൾ വീണ്ടും ക്രിസ്തു വന്നപ്പോൾ, തോമാ ശ്ലീഹായുടെ വിശ്വപ്രസിദ്ധമായ വിശ്വാസ പ്രഖ്യാപനം.
കണ്ടറിഞ്ഞാൽ വിശ്വസിക്കുന്നവരാണ് യുക്തിവാദികൾ. എന്നാൽ തൊട്ടു മാത്രം അറിഞ്ഞവൻ തോമാസ് . കുന്തം ഇറങ്ങിയ വിലാപ്പുറത്ത്, കൈകളിലെ ആണിപ്പഴുതിൽ, കാൽ പാദത്തിൽ വിരൽകടത്തി വിശ്വാസം പ്രഖ്യാപിച്ച താര്ക്കികന്.
സ്വന്തം യുക്തിബോധ്യങ്ങളിൽ ഉറച്ച ഈ നിലപാടിന്റെ ഏറ്റവും വലിയ ഗുണഭോക്താവ്, സാക്ഷാൽ പത്രോസ് സ്ലീഹായാണ്.
Re-commissioning of Peter / പത്രോസിന്റെ അപ്പോസ്തോലിക പുനഃസ്ഥാപനം
===============================
ഒരു ബാലികയുടെ ചോദ്യം ഭയന്ന്, ഗുരുവിനെ 'മുത്തലാഖ്' ചൊല്ലി ഉപേക്ഷിച്ച വിശ്വാസവും സ്ലൈഹീക സ്ഥാനവും താക്കോലും അധികാരങ്ങളും - സത്യത്തിൽ ഇസ്ക്കറിയോത്ത ജൂദയേക്കാൾ വലിയ വീഴ്ച്ചയാണ് പത്രോസിന്റേത്. എന്നാൽ പുനരുത്ഥാനം വരെ പിടിച്ചുമിൽക്കാൻ, ഒറ്റപ്പെട്ടുപോയ ജൂദാസിന് കഴിഞ്ഞില്ല.
ഉത്ഥാനം ചെയ്ത ക്രിസ്തു, ഗലീലാ കടൽക്കരയിൽ ഖിന്നനായ പത്രോസിനെ പുനഃസ്ഥാപിക്കുമ്പോൾ, 'നേരിൽ കണ്ടുമാത്രം വിശ്വസിക്കുന്ന തോമസ്' ആണ് - മറ്റു ശിഷ്യരിൽ നിന്ന് വ്യത്യസ്തനായി - സംഭവത്തിൻറെ അതിനിർണ്ണായക ദൃക്സാക്ഷി. എന്തുകൊണ്ടോ, അന്ന് പതിവില്ലാതെ പത്രോസോപ്പം വലയെറിയാൻ തോമസും കൂടെ ഇറങ്ങിയിരുന്നു! .
ഇല്ലായിരുന്നുവെങ്കിൽ?
ക്രിസ്തുവിൻറെ വിമോചനം ലഭിച്ച പത്രോസ് സ്ലീഹായുടെ വാക്കു വിശ്വസിച്ചു ആര് വീണ്ടും അപ്പോസ്തോലിക ഗണത്തിൽ അദ്ദേഹത്തെ എണ്ണുമായിരുന്നു? അപ്പോൾ, എല്ലാറ്റിനും ഒരു ചരടുവലിക്കാരനുണ്ട്, ചിലപ്പോൾ. എല്ലാം നമ്മുടെ ഇച്ഛയും തീരുമാനങ്ങളും അല്ല.
തോമസിൻറെ അവിശ്വാസം എന്നത് തെറ്റായ വ്യാഖ്യാനം എന്നു മറ്റു ഓർത്തോഡോക്സ് സഭകൾ പഠിപ്പിക്കുന്നതു ഇതുകൊണ്ടാണ്: "തോമസിൻറെ സ്പർശം" (The Touching of Thomas) എന്നു ഗ്രീക്കിലും, "തോമസിൻറെ വിശ്വാസം" (The Belief of Thomas) എന്നു റഷ്യൻ-യൂറോപ്യൻ സ്ലവോണിക് ഭാഷയിലും ഈ പ്രയോഗം വിവർത്തനം ചെയ്യുന്നു.
ഇതേ തോമാ സ്ലീഹായ്ക്കു പട്ടമില്ലെന്നുപറഞ്ഞു രണ്ടുവട്ടം ഔദ്യോഗിക കൽപ്പനയിട്ട സിറിയൻ സുറിയാനിക്കാരന്റെ മഹാപാതകമാണ്, രണ്ടു സഹസ്രാബ്ദങ്ങൾ നീളുന്ന ക്രൈസ്തവ ചരിത്രം കണ്ട എക്കാലത്തെയും പൈശാചികമായ വേദ വിപരീതം.
ഇന്ത്യൻ ഓർത്തഡോക്സ് സഭ മീഡിയ വിംഗ്
(കടപ്പാട് - Anil G George)
