12/09/2026
തിരുന്നാവായയിൽ 'ജിന്ന് മഹ്ളറ' എന്ന പേരിൽ പ്രവർത്തിച്ചിരുന്ന തട്ടിപ്പ് കേന്ദ്രത്തിനെതിരെ നാട്ടുകാർ രംഗത്തുവരികയും അത് അടപ്പിക്കുകയും ചെയ്ത സംഭവം അഭിനന്ദനാർഹമാണ്.
ഇത് തിരുന്നാവായയിൽ മാത്രം നടക്കുന്ന ഒന്നല്ല; കേരളത്തിന്റെ പല ഭാഗങ്ങളിലും ഒളിഞ്ഞും തെളിഞ്ഞും ഇത്തരം കേന്ദ്രങ്ങൾ പ്രവർത്തിക്കുന്നുണ്ട്. ചിലത് വളരെ ദുരൂഹവും രഹസ്യവുമായി സംഘടിപ്പിക്കപ്പെടുമ്പോൾ, മറ്റു ചിലത് ലക്ഷങ്ങളുടെ വരുമാനമുള്ള, സ്ഥാപനവൽക്കരിക്കപ്പെട്ട് എസ്റ്റാബ്ലിഷ്ഡ് ആയ രീതിയിലാണ് നടക്കുന്നത്.
പ്രദേശവാസികൾക്ക് ഇതിന്റെ പങ്കുപറ്റാൻ അവസരം നൽകി എതിർപ്പുകളെ ഇല്ലാതാക്കാനും ജനങ്ങളെ കൈവശപ്പെടുത്താനും ഇവർക്ക് കഴിയുന്നു. ആ പ്രദേശം തന്നെ ഈ ചൂഷണം കൊണ്ട് ജീവിച്ചു പോകുന്ന ഒരു അവസ്ഥ രൂപപ്പെടുമ്പോൾ പിന്നീട് ആരും അതിനെ എതിർക്കാത്ത സാഹചര്യമുണ്ടാകുന്നു.
അവിടെ എത്തുന്ന വലിയൊരു വിഭാഗത്തിൻ്റെ പിന്തുണ നഷ്ടപ്പെടുമെന്ന് കരുതി അധികാരികളും രാഷ്ട്രീയക്കാരും വ്യക്തമായ ഇത്തരം ആത്മീയ തട്ടിപ്പ് കേന്ദ്രങ്ങൾക്കെതിരെ ഇടപെടാതെ മാറിനിൽക്കുകയാണ്. എല്ലാ മതവിഭാഗങ്ങളുടെ പേരിലും നമ്മൾ ഇത് കണ്ടുവരുന്നുണ്ട്. കൂണുപോലെ മുളക്കുന്ന ഇത്തരം ആത്മീയ ചൂഷണ കേന്ദ്രങ്ങളെ ഇല്ലാതാക്കാൻ അതാത് സമുദായത്തിലെ പണ്ഡിതന്മാരും നാട്ടുകാരും ജാഗ്രതയോടെ രംഗത്തുവരേണ്ടതുണ്ട്.
മനുഷ്യന്റെ നൈസർഗ്ഗികമായ ആത്മീയ തൃഷ്ണകൾക്കും സൃഷ്‌ടാവിനുമിടയിൽ ഇടനിലയുണ്ടാകുന്നിടത്താണ് പൗരോഹിത്യത്തിന്റെ ആത്മീയ ചൂഷണങ്ങൾ ഉടലെടുക്കുന്നത്. ഇതിന്റെ കേവലം ശാഖകൾ മാത്രം ചികിത്സിച്ചാൽ പോരാ, വേരുകളും ചികിത്സിക്കണം. ആ വേരുകൾ കിടക്കുന്നത് ചില തെറ്റായ വിശ്വാസങ്ങളിലാണ്. ഏകദൈവ വിശ്വാസത്തിൽ അഥവാ തൗഹീദിൽ നിന്ന് വഴിതെറ്റുമ്പോഴാണ് മുസ്‌ലിം സമുദായം ഇത്തരം ആത്മീയ ചൂഷണങ്ങളിലേക്ക് വഴുതിവീഴുന്നത്. അഭൗതികമായ മാർഗ്ഗത്തിലൂടെ അല്ലാഹുവല്ലാത്തവർക്ക് - അത് ജിന്നിനോ, മന്ത്രവാദികൾക്കോ, സിദ്ധന്മാർക്കോ, ബാബമാർക്കോ, ബീവിമാർക്കോ ആകട്ടെ - പ്രത്യേക കഴിവുണ്ടെന്ന വിശ്വാസത്തിന്റെ അടിസ്ഥാനത്തിലാണ് ഇതെല്ലാം തഴച്ചു വളരുന്നത്. അതിനാൽ ആ വിശ്വാസത്തെയാണ് ആദ്യം തിരുത്തേണ്ടത്.
ഇസ് ലാമിക പ്രമാണങ്ങളോടും ദീനിനോടും പ്രതിബദ്ധതയുള്ള സത്യസന്ധരായ പണ്ഡിതന്മാർ ഏത് വിഭാഗങ്ങളിൽപ്പെട്ടവരാണെങ്കിലും ആത്മീയ ചൂഷണങ്ങൾക്കും അന്ത വിശ്വാസങ്ങൾക്കുമെതിരായി ശക്തമായി പടവെട്ടാൻ തയ്യാറാകണം. ഈ തെറ്റായ വിശ്വാസങ്ങളിലൂടെ ഉപജീവനമാർഗ്ഗം കണ്ടെത്തുന്ന സാഹചര്യം ഒഴിവാക്കണം. ഇത്തരം കാര്യങ്ങളിലൂടെ ജീവിക്കുന്നവർ നാളെ സമൂഹത്തിന് മുന്നിൽ വിചാരണ ചെയ്യപ്പെടുക തന്നെ ചെയ്യും.
കേരളത്തിലെ ധാരാളം ജനങ്ങൾ അവലംബിക്കുന്ന ഇരു സമസ്തയിലെയും പണ്ഡിതന്മാർ ഈ കാര്യം ഗൗരവപൂർവ്വം ചിന്തിക്കേണ്ടതുണ്ട്. പണ്ട് പറഞ്ഞിടത്ത് തന്നെ നിൽക്കാതെ തങ്ങളുടെ അനുയായികളോട് ഈ വിഷയത്തിലെ അപകടത്തെക്കുറിച്ച് കൃത്യമായി സംസാരിക്കണം. ഇസ് ലാമികമായി തെറ്റായി എഴുതുകയും പ്രസംഗിക്കുകയും ചെയ്ത കാര്യങ്ങളെക്കുറിച്ച് പുനർവിചാരം നടത്താനുള്ള അവസരമാണിത്. കേവലം തള്ളിപ്പറഞ്ഞതുകൊണ്ടോ പ്രസ്താവനകൾ ഇറക്കിയതുകൊണ്ടോ കാര്യമായി ഒന്നുമുണ്ടാകില്ല.
"അല്ലാഹു കൊടുത്ത കഴിവിൽ നിന്ന് മഹാന്മാർക്ക് അഭൗതികമായി സഹായിക്കാൻ കഴിയും" എന്ന ഒരൊറ്റ തിയറിയിൽ നിന്നാണ് "സി.എം. മടവൂർ ഞങ്ങളുടെ പടച്ചോനാണ്" എന്ന പാട്ട് ഇവിടെ ഇറങ്ങിയത്. ആ പാട്ടിനെ പ്രാമാണികമായി ഖണ്ഡിക്കാൻ സമസ്തയിലെ പണ്ഡിതന്മാർക്ക് കഴിയാതെ പോയതിനെക്കുറിച്ച് അവർ ഉറക്കെ ചിന്തിക്കണം.
നിങ്ങൾ ഉയർത്തിയ ആദർശപരമായ വ്യതിയാനങ്ങൾ വിശിഷ്യാ തൗഹീദിൻ്റെ രംഗത്ത് സമൂഹത്തെ എവിടെ കൊണ്ടെത്തിച്ചു എന്ന് തിരിച്ചറിയണം. ഈ പോക്ക് തുടരുകയാണെങ്കിൽ, പ്രവാചക വചനങ്ങളിൽ മുന്നറിയിപ്പ് നൽകിയതുപോലെ മുസ്‌ലിം സമുദായത്തിലെ വലിയൊരു വിഭാഗം ബഹുദൈവത്വത്തിലേക്ക് (ശിർക്ക്) ആപതിക്കുന്ന കാര്യത്തിൽ തർക്കമില്ല.
അതുകൊണ്ട് പരലോകത്തെ പേടിക്കുന്ന, അല്ലാഹുവിനെ കണ്ടുമുട്ടേണ്ടി വരുമെന്ന് പ്രതീക്ഷിക്കുന്ന, സ്വാർത്ഥ താല്പര്യങ്ങളില്ലാത്ത എല്ലാ ആളുകളും പണ്ഡിതന്മാരും ആത്മവിമർശനത്തോടെ ചിന്തിക്കണം. നമുക്ക് അല്ലാഹു മാത്രം മതി. കാര്യകാരണ ബന്ധങ്ങൾക്ക് അതീതമായ മാർഗ്ഗത്തിലൂടെ നമ്മെ രക്ഷിക്കാനോ ശിക്ഷിക്കാനോ അല്ലാഹുവിനല്ലാതെ മറ്റാർക്കും കഴിയില്ല. ഒരു ചരടിനോ, ഏലസ്സിനോ, തേങ്ങയ്ക്കോ, കോഴിമുട്ടക്കോ, മന്ത്രത്തിനോ, ജിന്നിനോ, ശൈത്താനോ, ഖബറാളികൾക്കോ ഒന്നും തന്നെ നമുക്ക് ഒരു ദോഷവും ലാഭവും വരുത്താനോ തടയാനോ കഴിയില്ല എന്ന ഉറച്ച വിശ്വാസം സമൂഹത്തിൽ വളർത്തിയെടുക്കണം.
തൗഹീദിന്റെ പ്രബോധന പ്രവർത്തനം കൂടുതൽ ശക്തിപ്പെടുത്താൻ മുന്നിട്ടിറങ്ങണം. എങ്കിൽ മാത്രമേ ഇത്തരം ആത്മീയ തട്ടിപ്പുകളുടെ വേരുകൾ പിഴുതെറിയാൻ നമുക്ക് സാധിക്കൂ. തിരുനാവായിലെ യുവാക്കൾ ഉയർത്തിവിട്ട ഈ ചർച്ച ശരിയായ ലക്ഷ്യത്തിലേക്ക് നയിക്കട്ടെ. അല്ലാഹു എല്ലാവർക്കും നേർവഴിയിൽ ചിന്തിക്കാനുള്ള സന്മനസ്സ് നൽകട്ടെ.
- ടി.കെ. അഷ്റഫ്
(ജനറൽ സെക്രട്ടറി, വിസ്ഡം ഇസ് ലാമിക് ഓർഗനൈസേഷൻ)
