10/06/2026
നാല് അർദ്ധരാത്രികൾ🙏🙏🙏🙏🙏
"തിരുവട്ടാറിൻ്റെ മാസ്റ്റർ പീസ് പ്രസംഗം പൂർണ്ണരൂപത്തിൽ)❤️
അരനൂറ്റാണ്ടായി കേരള ജനത ശ്രവിച്ച തിരുവട്ടാറിൻ്റെ ഏറ്റവും പ്രസിദ്ധമായ "നാല് അർദ്ധരാത്രികൾ" എന്ന പ്രഭാഷണത്തിന് പകരം വയ്ക്കുവാൻ മറ്റൊരു പ്രഭാഷണവും നാളിതുവരെയായിട്ടും ഉണ്ടായിട്ടില്ല. പതിനായിരങ്ങളെ സ്വാധീനിച്ച നാല് അർദ്ധരാത്രികൾ അഭിമാനപൂർവ്വം തിരുവട്ടാറിൻ്റ ഓർമ്മയുടെ മുമ്പിൽ അനുവാചക സമക്ഷം ഞാൻ അവതരിപ്പിക്കുന്നു. തിരുവട്ടാറിൻ്റെ മാസ്റ്റർപീസ് എന്ന് ശ്രോതാക്കൾ വിശേഷിപ്പിക്കുന്ന ഈ പ്രഭാഷണം യാതൊരു കുറിപ്പുകളുമില്ലാതെ, ഓർമ്മയുടെ ചെപ്പിൽനിന്ന് അക്ഷരം പ്രതി പകർത്തിയെഴുതുക എന്ന അതീവ ശ്രമകരമായ ദൗത്യമാണ് ഇവിടെ ഞാൻ നിർവഹിച്ചിരിക്കുന്നത്.ചരിത്രത്തിൻ്റെ അർദ്ധരാത്രിയിൽ നീതിസൂര്യനായ് അവതരിച്ച്, ജീവിതത്തിൻ്റെ അർദ്ധരാത്രിയിൽ മരണവക്ത്രത്തിൽ അകപ്പെട്ടുപോയ മനുഷ്യന് പ്രത്യക്ഷപ്പെട്ട് തൻ്റെ ജീവിതത്തിന് അർത്ഥവും ആശയവും , നല്‌കി ,ദൈവസഭയുടെ അർദ്ധരാത്രിയിൽ സഭയാം കാന്തയെ വേളികഴിക്കുവാനെത്തുന്ന, ന്യായവിധിയുടെ അർദ്ധരാത്രിയിൽ മനുഷ്യൻ്റെ പ്രവൃത്തിക്കൊത്തവണ്ണം മുഖപക്ഷം കൂടാതെ അവനെ ന്യായവിധി നടത്തുവാൻ പോകുന്ന നമ്മുടെ കർത്താവായ യേശുക്രിസ്‌തുവിനെ വ്യക്തവും ശക്തവുമായി ശ്രോതാക്കളുടെ മുമ്പിൽ അവതരിപ്പിക്കുന്ന ഈ പ്രഭാഷണം ചിലരുടെ ആത്മ രക്ഷയ്ക്ക് കാരണമായെങ്കിൽ എന്ന പ്രാർത്ഥനയോടെ അവതരിപ്പിക്കുന്നു. ഇനി തുടർന്ന് വായിക്കുക.
വേദഭാഗം ലൂക്കോസ് 11:6-8
“പിന്നെ അവൻ അവരോട് പറഞ്ഞത് നിങ്ങളിൽ ആർക്കെങ്കിലും ഒരു സ്നേഹിതൻ ഉണ്ട് എന്നിരിക്കട്ടെ, അവൻ അർദ്ധരാത്രിയിൽ അവൻ്റെ അടുക്കൽ ചെന്ന് സ്നേഹിതാ, എനിക്ക് മൂന്നപ്പം വായ്‌പ തരേണം; എൻ്റെ ഒരു സ്നേഹിതൻ വഴിയാത്രയിൽ എൻ്റെ അടുക്കൽ വന്നു. അവന് വിളമ്പിക്കൊടുക്കുവാൻ എൻ്റെ പക്കൽ ഏതുമില്ല എന്ന് അവനോട് പറഞ്ഞാൽ എന്നെ പ്രയാസപ്പെടുത്തരുത്, കതക് അടച്ചിരിക്കുന്നു; പൈതങ്ങളും എന്നോടുകൂടെ കിടക്കുന്നു. എഴുന്നേറ്റു തരുവാൻ എനിക്ക് കഴികയില്ല എന്ന് അകത്തുനിന്ന് ഉത്തരം പറഞ്ഞാലും, അവൻ സ്നേഹിതനാകകൊണ്ട് എഴുന്നേറ്റ് അവന് കൊടുക്കയില്ലെങ്കിലും, അവൻ ലജ്ജ കൂടാതെ മുട്ടുകനിമിത്തം വേണ്ടുന്നിടത്തോളം കൊടുക്കും എന്ന് ഞാൻ നിങ്ങളോട് പറയുന്നു”.
ആമുഖം
നമ്മുടെ കർത്താവായ യേശുക്രിസ്തു തൻ്റെ ഐഹിക ജീവിതകാലത്ത് അരുമശിഷ്യന്മാരോട് അയവിറക്കിയ ഒരു ഉപമയാണ് ഇന്നത്തെ പ്രസംഗത്തിനാധാരമായി ഞാൻ വിശുദ്ധ ലൂക്കോസിൻ്റെ സുവിശേഷം 11-ാം അദ്ധ്യായത്തിൽനിന്നും ഉദ്ധരിച്ചു കേൾപ്പിച്ചത്. പരസ്പരനിബദ്ധരായ മൂന്ന് സ്നേഹിതന്മാരെ ഇവിടെ നാം കാണുന്നു. (1) അർദ്ധരാത്രിയിൽ ആഗതനായ അതിഥി. (2) അതിഥിക്ക് ആതിഥ്യം അരുളുവാൻ തല്പരനെങ്കിലും അത്യന്തം വിഷമതയിലായിത്തീർന്ന ആതിഥേയൻ. (3) അർദ്ധരാത്രിയിലെ അതിഥിക്കും ആതിഥേയനും മദ്ധ്യേ കരുണയുടെ അമൃതം ചൊരിയുന്ന മധ്യവർത്തിയായ സ്നേഹിതൻ. ഇങ്ങനെ പരസ്പരനിബദ്ധരായ മൂന്നു സ്നേഹിതന്മാർ, വ്യക്തികൾക്കല്ല സമയത്തിനാണിവിടെ പ്രാധന്യം. സമയം അർദ്ധരാത്രി.
ഇതുവരെയുള്ള ലിഖിതചരിതം. സുമാർ 5000 ർഷത്തെ ചരിത്രമാണ്. ഈ അയ്യായിരം വർഷത്തെ ചരിത്രത്തെ രണ്ടഗ്രങ്ങളിൽ നിന്നും തുല്യമായി അടർത്തിമാറ്റിയാൽ. നാം വന്നെത്തുന്നത് ഏതാണ്ട് ബി.സി 700 നോടുത്ത ഒരു കാലഘട്ടത്തിലാണ്. ചരിത്രത്തിൻ്റെ മഹനീമായ മദ്ധ്യാഹ്നവേളയാണിത്. ചരിത്രത്തിൻ്റെ അർദ്ധരാത്രിയെന്നിതിനെ വിളിക്കാവുന്നതാണ്.അർദ്ധരാത്രി ലോകചരിത്രത്തിൽ പല നിലകളിലും പ്രാധാന്യതയർഹിക്കുന്നു. ദിവസം ദിവസത്തിനു വഴിമാറുന്ന സമയമാണ് അർദ്ധരാത്രി. രാത്രി പകലിനു വഴിമാറിക്കൊടുക്കുന്ന സമയമാണിത്. ലോകത്തിലെ മിക്ക രാഷ്ട്രങ്ങളൂടെയും സ്വാതന്ത്ര്യപ്രഖ്യാപനങ്ങൾ നടത്തിയിട്ടുള്ളതും ലോകനേതാക്കന്മാർ സമാധാന ഉടമ്പടികളിൽ ഒപ്പുവെയ്ക്കുകയും ഒക്കെ ചെയ്‌തിട്ടുള്ളത് അർദ്ധരാത്രിയിലാണ്. അർദ്ധരാത്രി ഇങ്ങനെ എത്രയെത്ര മഹാസംഭവങ്ങൾ ഈ ലോകത്തിൽ അരങ്ങേറിയിട്ടുണ്ട്?
അർദ്ധരാത്രിയെന്ന ശീർഷകത്തിൽ നാല് അർദ്ധരാത്രികളാണ് ഈ രാത്രിയിലെ എൻ്റെ പ്രമേയം. ആയതിലേക്ക് മാന്യശ്രോതാക്കളുടെ ശ്രദ്ധയെ ഞാൻ ക്ഷണിക്കുന്നു. (1) ചരിത്രത്തിൻ്റെ അർദ്ധരാത്രി (2) ജീവിതത്തിൻ്റെ അർദ്ധരാത്രി(3) ദൈവസഭയുടെ അർദ്ധരാത്രി, (4) ന്യായവിധിയുടെ അർദ്ധരാത്രി.
1. ചരിത്രത്തിൻ്റെ അർദ്ധരാത്രി.
ചരിത്രത്തിൻ്റെ അർദ്ധരാത്രിയെ വിചിന്തനം ചെയ്‌കയിൽ നാല് മണ്ഡലങ്ങൾ പ്രശസ്തമാണ്. ഒന്ന്, രാഷ്ട്രീയ മണ്ഡലം, രണ്ട്, സാംസ്കാരിക മണ്ഡലം, മൂന്ന് ,മതമണ്ഡലം, നാല് താത്വിക മണ്ഡലം
രാഷ്ട്രീയ മണ്ഡലം
ക്രിസ്‌തുവിൻ്റെ ജനനത്തിനു മുമ്പുള്ള ആറാം ശതകത്തെക്കുറിച്ച് പ്രാചീന ചരിത്രകാരനായ എച്ച്.ജി. വെത്സ് പറയുന്നു: ലോകചരിത്രത്തിലെ ഏറ്റവും അന്ധകാരാവൃതമായ കാലഘട്ടമാണിത്. എങ്കിലും ബി.സി. ആറാം ശതകം ചരിത്രത്തിൽ അത്യന്തം പ്രാധാന്യമർഹിക്കുന്ന ഒരു കാലഘട്ടമാണ്. നാം അതിജീവിക്കുന്ന ഈ പ്രപഞ്ചത്തെക്കുറിച്ചും, മനുഷ്യന് അതിലുള്ള സ്ഥാനത്തെപ്പറ്റിയും വ്യക്തമായ അറിവ് സമ്പാദിക്കുവാൻ ഗ്രീക്ക് തത്വജ്ഞാനികൾ സമാരംഭിക്കുകയും ഈശായ പ്രവാചകന്മാരുടെ പ്രവചനവാസനയെ അതിൻ്റെ അത്യുച്ചകോടിയിലേക്ക് ഉയർത്തപ്പെട്ട, ഇൻഡ്യയിൽ ഗൌതമബുദ്ധനും, ചൈനയിൽ കൺഫ്യൂഷ്യസും ,ലാവോസും ലോകോപദേശം ആരംഭിക്കുകയും ചെയ്ത ഇതുപോലൊരു കാലഘട്ടം വിശ്വചരിത്രത്തിലില്ല. ഒറ്റവാക്കിൽപ്പറഞ്ഞാൽ, ആതൻസു നഗരവീഥികൾ തൊട്ട് ശാന്തസമുദ്രാന്തങ്ങൾ വരെ മനുഷ്യമനസ്സ് തരംഗിതമായി കഴിഞ്ഞിരുന്ന ഒരു കാലഘട്ടമാണിത്.
ലോകചരിത്രത്തിലെ അതിപുരാതന സാമ്രാജ്യനാഗരികത ബി.സി. 3750 നും 2750 നും മദ്ധ്യ യൂഫ്രട്ടീസ്, ടൈഗ്രീസ് നദീതടങ്ങ ളിൽ ആവിർഭവിച്ച് സുമാർ 1000 വർഷത്തോളം തളിർത്തുപന്തലിച്ചുനിന്ന സുമേറിയൻ രാഷ്ട്രമായിരുന്നു. ഇവിടെ നിപ്പൂർ, ഊർ, കീഷ് എന്ന നഗരരാഷ്ട്രങ്ങൾ ആവിർഭവിക്കുകയും, ബി.സി 2500 നോടടുത്ത കാലത്തുതന്നെ രാജ വാഴച സമാരംഭിക്കുകയും ചെയ്‌തതായി കാണാം. ബി.സി 2750 ൽ സെമിറ്റിക് നേതാവായ സെർഗോൺ സുമേറിയൻ സാമ്രാജ്യത്തിന്മേൽ തൻ്റെ ആധിപത്യം സ്ഥാപിച്ച് അതിനെ കീഴടക്കി അസീറിയൻ സാമ്രാജ്യം സ്ഥാപിക്കുകയുണ്ടായി. ബി.സി. 2750 മുതൽ ബി.സി. 612 ൽ അസീറിയയുടെ തലസ്ഥാനമായ നിനവയെ മേദ്യർ കീഴ്പ്പെടുത്തുംവരെ ഉജ്ജ്വലമായി ജ്വലിച്ചു പ്രകാശിച്ച അസീറിയൻ സാമ്രാജ്യത്തിൻ്റെ ഒടുവിലത്തെ ഭരണാധികാരി നെബോപോലെസരെ പരാജയപ്പെടുത്തിയതോടെ അസീറിയൻ സാമ്രാജ്യം അസ്‌തമിക്കയായി.
ഈ കാലയളവിൽ ആ മഹാസാമ്രാജ്യത്തിൻ്റെ അധികാരസീമയിൽ രംഗപ്രവേശം ചെയ്ത ഹമുറാബി, ഒന്നാം തിഗ്ളത്ത് പെലേസ്സർ, അസൂർ നസീർപാൽ, ശല്‌മനേസ്സർ, അദദ് നിരാരി, തിഗ്ലത്ത് പിലേസ്സർ 3, ശല്‌മനേസ്സർ അഞ്ചാമൻ, സെൻഹരീബ്, അസൂർ ബാനിപ്പാൽ തുടങ്ങിയ നിരവധി രാഷ്ട്രീയ അതികായന്മാരുടെ സമർത്ഥമായ ശാസനത്തിൻ്റെ കീഴിൽ വിജയശ്രീലാളിതമായിരുന്നു അസീറിയയുടെ ചരിത്രം. എങ്കിലും അത് കാലത്തിൻ്റെ കരുത്തേറിയ കാൽപ്പെരുമാറ്റത്തിൽപ്പെട്ടു തകർന്ന് വീഴുകയാണുണ്ടായത്.
ഇതേതുടർന്ന് രംഗത്തുവന്നു രണ്ടാം ബാബിലോന്യ സാമ്രാജ്യം, കേവലം എഴുപതിൽപ്പരം വർഷങ്ങൾ മാത്രം നിലനിന്ന ബാബിലോൺ സാമ്രാജ്യത്തിൽ കുറഞ്ഞത് ഏഴ് രാജാക്കന്മാർ ഭരണസാരഥ്യം വഹിക്കുകയുണ്ടായി. ബി.സി. 627-605 വരെ നോബോപോലസ്റ്റർ, 605 മുതൽ 562 വരെ നെബൂഖദ്നേസ്സർ, 562-560 വരെ ഏവീൽ മെറോഡക്ക്, 560-556 വരെ നെരീഗ് ലിസ്റ്റർ, 556 ൽ കേവലം 2 മാസക്കാലം ലെബാഷി മർഡുക്, 556-553 വരെ നബോണീഡസ്, 553-539 വരെ ബെൽശസ്സർ. ഈ ഏഴ് രാജാക്കന്മാരിൽ സൈന്യവിന്യാസംകൊണ്ട് ലോകസാമ്രാജ്യങ്ങളെ സടകുട വിറപ്പിച്ച സൈനിക സമ്രാട്ടായ നെബുഖദ്‌നേസ്സറിൻ്റെ കാലത്ത് ബാബേൽ സാമ്രാജ്യം ഐശ്വര്യവും, പ്രതാപവുംകൊണ്ട് രാഷ്ട്രീയമായി അതിൻ്റെ അത്യുച്ചകോടിയിലെത്തി.
നാനാ രാജ്യങ്ങളിൽ നിന്നുമായി കൊണ്ടുവരപ്പെട്ട വിവിധ ഭാഷക്കാരായ തൻ്റെ പത്നിമാർക്കുവേണ്ടി 200 ഏക്കറിൽ ആടുന്ന പൂന്തോട്ടം നിർമ്മിച്ച, ബാബിലോൺ പട്ടണം പടുത്തുയർത്തിയ ഈ നെബൂഖദ്നേസ്സർ ചരിത്രത്തിലെ അവിസ്മരണീയ കഥാപാത്രമാണ്. എന്നാൽ ബി സി 539 ൽ മേദ്യനായ ദാര്യാവേശ് ബാബേൽ സാമ്രാജ്യത്തിലെ ഒടുവിലത്തെ ഭരണാധികാരിയായിരുന്നു ബൽശസ്സറിനെ വധിച്ചതോടെ ബാബേൽ സാമ്രാജ്യതാരകവും പൊലിഞ്ഞുപോയി.
തുടർന്ന് ബിസി 331മുത. 323 വരെയുള്ള കാലഘട്ടം ഗ്രീക്ക് സാമ്രാജ്യം എന്ന പേരിൽ അറിയപ്പെട്ടു രാഷ്ട്രീയ നഭോമണ്ഡലത്തിലെ അത്യച്ച സൂര്യനായിരുന്നു മഹാനായ അലക്സാണ്ടർ .33 ആമത്തെ വയസ്സിൽ മഹാസമുദ്രത്തിൻ്റെ ഇങ്ങേ തീരംവരെ സാമ്രാജ്യ സീമകളെ അതിരില്ലാതെ വെട്ടിപ്പിടിച്ച ആ മാന്യദേഹം മഹാസമുദ്രത്തെ നോക്കിക്കൊണ്ട് ഇപ്രകാരം വിളി ച്ചുപറഞ്ഞു: "അല്ലയോ മഹാസമുദ്രമേ! നീയും വലിയൊരു ജനതതിയായായിരുന്നെങ്കിൽ ഞാൻ നിന്നെയും എൻ്റെ അധികാര സീമയിൽ ഒതുക്കുമായിരുന്നു ". എന്നാൽ യൗവനത്തിൻ്റെ തനിച്ചോരത്തിളപ്പിൽ അപ്രതീക്ഷിതമായെങ്കിലും മലമ്പനിക്കടിമപ്പെട്ട് മരണത്തിനു വഴിമാറിയ അലക്സ‌ാണ്ടറുടെ കാലശേഷം അദ്ദേഹത്തിൻ്റെ നാലു ജനറൽമാരിൽ എഫെസോസു വരെയുള്ള ഭാഗം സെലൂക്കസും, ഈജിപ്ട് ടോളമിയും, മാസിഡോണിയ ആൻ്റിഗോണസും പങ്കിട്ടെടുത്തു.ഇതോടെ രാജ്യം വിഭജിക്കപ്പെട്ടു. ഇതേ തുടർന്ന് തൻ്റെ സേനാധിപരിൽ നാലാമനായ പോംപി ബി.സി. 63 ൽ റോമാസാമ്രാജ്യത്തിനടിത്തറപാകി. ഇതാണ് ലോകസാമ്രാജ്യ ചരിത്രമെങ്കിൽ, ഇന്നത്തെ ഗർവ്വം നിറഞ്ഞ മഹാശക്തികൾ എന്നും ഇങ്ങനെയായിരിക്കുമെന്നുള്ളതിന് യാതൊരു ഉറപ്പും പ്രഖ്യാപിക്കാവുന്നതല്ല. കാലത്തിൻ്റെ മുമ്പിൽ ഏതൊരു രാഷ്ട്രീയ ശക്തിയും കാലിളകിപ്പോകയേയുള്ളൂ.
ലോക സാമ്രാജ്യങ്ങൾ ഒന്നൊന്നായി തകർന്നുവീഴവെ , സ്വന്തം വിജയങ്ങൾ കൊണ്ട് ഊറ്റം കൊണ്ടിരുന്ന സൈനീക സാമ്പ്രാട്ടായിരുന്ന ആസൂർ ബാനിപ്പാൽ ,അദ്ദേഹം കഴിഞ്ഞകാലത്തിൻ്റെ കദനകഥകൾ ഒന്നൊന്നായി എണ്ണിപ്പറയുന്ന ഒരു വലിയ കളിമൺ ശേഖരത്തിൻ്റെ ഉടമയായിരുന്നു. തൻ്റെ പ്രാർത്ഥനയ്ക്കും ലോകസമ്രാട്ടുകളുടേതായ ഒരു പ്രാതിനിധ്യമുണ്ട്
- വെളിച്ചത്തിനുവേണ്ടിയുള്ള അദ്ദേഹത്തിൻ്റെ പ്രാർത്ഥന"എൻ്റെ ദൈവമേ, നിൻ്റെ വെളിച്ചം കാണുന്നതിന് എന്നെ അനുവദിക്കണമേ" എന്നായിരുന്നു. സാമ്രാജ്യശക്തികൾക്കോ, രാഷ്ട്രീയ വിജയങ്ങൾക്കോ, മനുഷ്യമനസ്സിനെ തൃപ്തമാക്കാനോ, സമാശ്വസിപ്പിക്കാനോ, വെളിച്ചം നല്‌കി പ്രകാശത്തിലേക്കാനയിക്കുവാനോ സാധ്യമല്ലെന്നാണ് ചരിത്രത്തിൻ്റെ അർദ്ധരാത്രിയിൽ നിവർന്നുനിന്നുകൊണ്ട് ഈ രാഷ്ട്രീയ വങ്കാചാര്യന്മാർ ഉഛൈസ്‌തരം ഉദ്ഘോഷിക്കുന്നത്
E S T/ 10.06/2026
( നാളെ സാംസ്കാരിക മണ്ഢലം).
