28/04/2021
"स्त्रीयांची व संपत्तीची आसक्ती मातीत मिसळवते"
एकदा एक ७०-७५ वर्षांची म्हातारी गंगेच्या काठावर बसून करताना आपलं अंग धारधार अशा काळ्या दगडाने घासत घासत अंघोळ करत होती. ती तीचं अंग इतकं घासत होती, की त्या घासण्याने तीचं सगळं अंग रक्तबंबाळ झालं होतं. त्या म्हातारीचं जोरजोरात अंग घासणं अन् गंगेच पाणी अंगावर घेणं हे सुरूच होतं, इतक्यात तिच्या शेजारून जाणाऱ्या एका बाईंनं तिला हे अशाप्रकारे अंघोळ करताना पाहिलं अन् विचारलं, "अगं म्हातारे ! असं काय पाप केलंस तू की, साऱ्या अंगातून रक्त येईपर्यंत गंगेच्या पाण्यानं अंघोळ करत आहेस?"
यावर त्या म्हातारीने दिलेलं उत्तर हे काळजावर ओरखडे उमटवणारं आहे. ती म्हातारी म्हणाली, " अगं बाई ! मी कोणतंच पाप केलं नाही, परंतु मी वयात आल्यापासून माझ्या शरीराला चिटकलेल्या माणसांच्या वाईट नजरा खरवडून काढत आहे."
म्हातारीचे हे उत्तर नखशिखांत हादरून सोडणारे आहे.
कारण, काही महाभाग या समाजात असे आहेत की यांना लहान-मोठं, आपलं- परकं, आई - बहीण काही काही कळत नाहीत. अशी माणसं अतिशय घाण आणि विखारी नजरेने स्त्रीयांकडे पाहत असतात. यांच्या नजरेत इतकं विष भरलेलं असतं, की वाटतं नुसतं यांच्या नुसत्या पाहण्यानं सुध्दा समोरची स्त्री जळून खाक होईल.
संत तुकाराम महाराज
अशा नीच वृत्तीच्या लोकांचा समाचार घेताना पुढील अभंगात म्हणतात की,
कामातुर चवी सांडी |
बरळ तोंडी बरळे ||१||
विषय वासनेच्या आहारी गेलेला माणूस सगळी लाज लज्जा सोडून देतो.
अशा हलकट व स्त्री लंपट माणसांला समाज काय म्हणेल, याची अजिबात भीती वाटत नाही.
अशा माणसांच्या मनात सदा न् कदा स्त्रींयाचा उपभोग घेण्याचे घाणेरडे विचार येत असतात.
अशावेळी ना यांच्या बुद्धीवर ताबा असतो ना यांच्या बोलण्यावर नियंत्रण असते.
मग अशाप्रकारचे वासनेने बरबटलेले वाचाळवीर कुठेही आणि कधीही वटवट करत असतात. याच्या अश्लील बोलण्याला ना वेळेचे ना ठिकाणाचे भान असते. आपण कुठे बोलतोय, कुणासमोर बोलतोय अन् काय बोलतोय याचेही भान राहत नाही.
'कोण आपलं ऐकून घेत आहे की नाही! किंवा
आपलं म्हणणं समोरच्याला पटतं की नाही !' याचा कसलाही विचार न करता ह्याची आपली वटवट सुरूच असते.
रंगलें ते अंगी दावी |
विष देववी आसडे ||२||
हा माणूस बायकांच्या विचारात इतका रंगलेला असतो की, या रंगेलपणाच्या भरात आपणं कशाप्रकारे वागतोय, काय कृती करतोय याचं अजिबात भान रहात नाही.
असा माणूस रस्त्यानं जाताना चित्र- विचित्र अंगविक्षेप करत असतो, तसेच वासनेने भरलेली नजर घेऊन गावभर हुंदडत असतो.
एखादा विष पिलेला माणूस ज्या पध्दतीने अंगाला झटके देत असतो त्याप्रमाणे हा लिंगपिसाट माणूस वागत असतो.
हा नीच माणूस अशा काही रंगेल व नाटकी पध्दतीने वागत असतो की ज्यामुळे इतरांचे लक्ष, विशेषतः स्त्रीयांचे लक्ष आपल्याकडे वेधले जाईल असे अश्लील चाळे करत असतो.
धनसोसें लागे वेड |
ते बडबड शमेना ||३||
बरं हा व्यक्ती जितका स्त्रीयांच्या विषयी आसक्ती बाळगून असतो, तितकाच तो पैशाच्या बाबतीतही लोभी असतो.
आणि असा हा विषयांध व हव्यासी माणूस नेहमीच वेड्यासारखे काही तरी बरळत असतो.
नेहमी धन, संपत्ती, सोनं - नाणं, जमीन- जुमला, घर- बंगला, बायका यांच्या विषयीच वटवट करतो.
यांच्या मेंदूत फक्त धनसंपत्ती अन् स्त्रीयांच्या विषयी अभिलाषा इतकीच घाण भरलेली असतात. अन् याच भावनेतून साऱ्या जगाला पाहत असतो.
तुका म्हणे व्यसनें दोन्ही |
नर्कखाणी भोगावया ||४||
तुकाराम महाराज म्हणतात, ' स्त्रीयांच्या बाबतीतची आस्तकी आणि धनचा हव्यास ही दोन व्यसनं माणसाला नरक यातना भोगायला लावतात.'
स्त्री लंपटता आणि हरामखोरी करून मिळवलेला पैसा एक ना एक दिवस मातीतच घालतो.
ज्यांची स्त्रीयांच्या विषयीची भावना नीच आहे, तसेच जो इतरांच्या कष्टाचा पैसा लुबडतो असा माणसाला जिवंतपणीच त्याच्या लेकराबाळा सहीत नरकयातना भोगाव्या लागतात.
