20/11/2025
Tasawwuf Kya Hai?
Hazrat Junaid Baghdadi Rahmatullah Alaih farmatay hain keh Tasawwuf ki bunyad 8 hisson par hai:
Sakhawat (Generosity)
Raza (Contentment/Willingness)
Sabr (Patience)
Ishara (Sign/Hint/Indication)
Gurbat (Exile/Estrangement)
Gudri (Rags/Woollen Garb)
Siyahat (Travelling/Wandering)
Faqr (Spiritual Poverty/Neediness)
Yeh 8 khaslatain 8 Ambiya-e-Kiram Alaihimussalam se mansoob hain.
1. Sakhawat (Generosity): Hazrat Ibrahim Alaihissalam se hai, kyunki aapؑ ne apne farzand Hazrat Ismail Alaihissalam ko qurban karne ke liye paish kiya.
2. Raza (Contentment): Hazrat Ismail Alaihissalam se hai, kyunki waqt-e-zibah unhone apni raza mandi zahir ki aur apni jaan-e-aziz ko Barghah-e-Khudawandi mein paish kar diya.
3. Sabr (Patience): Hazrat Ayyub Alaihissalam se hai, kyunki aapؑ ne beshumar masa'ib-o-azmaishon par sabr farmaya aur Allah Ta'ala ki bheji hui ibtala'on par saabit qadam rahe.
4. Ishara (Sign/Hint): Hazrat Zakariya Alaihissalam se hai, kyunkay Haq Ta'ala Ne farmaya keh aapؑ ne 3 din tak logon se isharay kay siwa baat na ki, aur isi silsilay mein Irshad-e-Bari Ta'ala hai keh unhone apne Rab ko aahista pukaara.
5. Gurbat (Exile/Estrangement): Hazrat Yahya Alaihissalam se hai, kyunke woh apne watan mein musafiron ki tarah rahe aur apne khandaan mein rehte hue bhi apno se begaana the.
6. Siyahat (Wandering): Hazrat Isa Alaihissalam se hai, kyunke aapؑ ne mujarrad (tanha) zindagi guzari, aur aapؑ ke paas bajuz 1 pyale aur 1 kanghi ke kuch na tha. Jab aapؑ ne kisi ko dono hathon se paani peete dekha to pyala tod diya, aur jab kisi ko ungliyon se baalon mein kanghi karte dekha to kanghi bhi tod di.
7. Gudri/Godhri (Woollen Garb)/(Sufi ka libaas): Hazrat Musa Alaihissalam se hai, kyunki aapؑ pashmeene ka libaas pehna karte the.
8. Faqr (Spiritual Poverty): Sayyid-e-Aalam, Hazrat Muhammad Mustafa ﷺ se hai.
Allah Ta'ala ne Aap ﷺ ko ro'ay zameen ke tamaam khazano ki kunjiyan ataa farmaeen aur irshad farmaya ke Aap ﷺ in nea'maton ko istemal karain aur araish ikhtiyar karain, lekin Aap ﷺ ne Barghah-e-Ilahi mein arz kiya:
"Aye Allah! Mujhay is ki haajat nahin, meri khwahish yeh hai keh 1 din shikam sair rahoon to 2 din faaqa karoon."
ﷺ
