Ramamangalam Perumthrikovil

പഞ്ചമഹാേക്ഷത്രങ്ങളിലൊന്നാണ്‌ രാമമംഗലം പെരുംതൃക്കോവില്‍. ഒരേ നാലമ്പലത്തിനകത്ത്‌ തന്നെ രണ്ട്‌ പ്രതിഷ്‌ഠകള്‍, രണ്ട്‌ നടയിലും നിത്യധ്വജം, അതിലൊന്ന്‌ ഏറ്റവും വലുത്‌ മറ്റൊന്ന്‌ ഏറ്റവും ചെറുത്‌. അങ്ങനെ പോകുന്നു പ്രത്യേകതകളുടെ പട്ടിക.

ഗജാകാരമായ കൂറ്റന്‍ ചുറ്റുമതില്‍, ഗോപുരമാളിക, ഗാംഭീര്യമിയന്ന ആനപ്പന്തലുകള്‍, കൂറ്റന്‍ വിളക്കുമാടം, വലിയ ബലിക്കല്‍പുര, കൂത്തമ്പലത്തോട്‌ കൂടിയ വിശാലമായ വലിയമ്പലം, ദാരുശില്‌പങ്

ങള്‍ കൊണ്ടലംകൃതമായ മുഖമണ്‌ഡപം, ചെമ്പ്‌ മേഞ്ഞ ഇരുനില വട്ട ശ്രീകോവില്‍, അടിത്തട്ട്‌ വരെ നടന്നു ഇറങ്ങി ചെല്ലാവുന്ന ഒരിക്കലും വറ്റാത്ത കൊക്കരണി, വിശാലമായ ഊട്ടുപുര, 36 ആയിരം പറ നെല്ല്‌ കൊള്ളുന്ന കൂറ്റന്‍ പത്തായമിരിക്കുന്ന അറപ്പുരമാളിക തുടങ്ങി വിസ്‌മയ കാഴ്‌ചകള്‍ കൊണ്ട്‌ സമ്പന്നമാണ്‌ ഈ മഹാക്ഷേത്രം. ഹിരണ്യകശിപുവിനെ നിഗ്രഹിച്ച ശേഷം പ്രഹ്‌ളാദ സ്‌തുതി കേട്ട്‌ സംപ്രീതനായ നരസിംഹമൂര്‍ത്തിയാണ്‌ പ്രധാന പ്രതിഷ്‌ഠ. ശാന്തചിത്തനായ നരസിംഹം ബാലനരസിംഹമെന്നറിയപ്പെടുന്നു. ഉണ്ണിഭൂതമെന്ന ഉപദേവസാന്നിധ്യം പെരുംതൃക്കോവിലിന്റെ മാത്രം പ്രത്യേകതയാണ്‌. പ്രധാന ശ്രീകോവിലില്‍ നിന്നുള്ള ഓവിന്റെ സ്ഥാനത്താണ്‌ ഉണ്ണിഭൂതത്തിന്റെ പ്രതിഷ്‌ഠ. പ്രധാന ശ്രീകോവിലില്‍ നിന്നുള്ള ഓവ്‌ താങ്ങി നില്‍ക്കുന്ന നിലയിലാണ്‌ പ്രതിഷ്‌ഠയെങ്കിലും ക്ഷേത്രത്തിന്റെ പ്രശസ്‌തിക്ക്‌ നിദാനം ശിവഭൂതമായി കരുതുന്ന ഉണ്ണിഭൂതമാണ്‌. മുത്തശ്ശി കഥകളിലെ ഉണ്ണികളെ കാക്കുന്ന കണ്‍കണ്ട ദൈവമാണ്‌ ഉണ്ണിഭൂതം. മതില്‍ക്കകത്ത്‌ തെക്ക്‌ പടിഞ്ഞാറെ മൂലയില്‍ കൂവളത്തിന്‍ മൂട്ടില്‍ ഭഗവതി കുടികൊള്ളുന്നു. ശാസ്‌താവ്‌, ദുര്‍ഗ്ഗ സാന്നിദ്ധ്യങ്ങളും ഭഗവതിക്കൊപ്പമുണ്ട്‌. പ്രാചീന ഗോത്ര വര്‍ഗ്ഗ സംസ്‌കൃതിയുടെ ആരാധനപദ്ധതിയുടെ ഭാഗമായ കാവ്‌ സങ്കല്‌പത്തിന്റെ ശേഷിപ്പുകളാകാം ഇതിനടിസ്ഥാനം. പഞ്ചമൂര്‍ത്തി വിതാനത്തില്‍പ്പെട്ട ആരാധന രീതികള്‍ നിലനിന്നിരുന്ന ഗ്രാമത്തില്‍ പില്‍ക്കാലത്തെന്നോ വൈഷ്‌ണവരുടെ അധിനിവേശം ഉണ്ടായപ്പോള്‍ തദ്ദേശിയരുടെ ആരാധനാകേന്ദ്രമായ കാവ്‌ നിലനിര്‍ത്തിക്കൊണ്ട്‌ തന്നെ അവര്‍ വിഷ്‌ണുക്ഷേത്രം സ്ഥാപിച്ചതാകാനുമുള്ള സാധ്യതകള്‍ തള്ളിക്കളയാനാവില്ല.