മുതുകുളം ,മേജര്‍ പാണ്ഡവര്കാവ് ദേവി ക്ഷേത്രം
--------------------------------------------------------
നമ്മുടെ ദേശനാഥ കുടികൊള്ളുന്ന പാണ്ഡവര്കാവ് ദേവി ക്ഷേത്രം , മധ്യ തിരുവിതാംകൂറിലെ പ്രശസ്ത ദേവി ക്ഷേത്രങ്ങളില്‍ ഒന്നാണ്. മഹാഭാരതകാലത്തോളം പഴമ അവകാശപ്പെടുന്ന ഐതീഹ്യമാണ് ഈ ക്ഷേത്രത്തിനുള്ളത് ..മുതുകുളം ഗ്രാമത്തിന്റെ ഐശ്വര്യവും അതിലുപരി ഏതൊരു മുതുകുളത്തുകാരന്റെയും വൈകാരിക അംശമാണ് പാണ്ഡവര്കാവ് ദേവി ക്ഷേത്രം...
പാണ്ഡവരുടെ വനവാസ കാലത്ത് അവര്‍ ഈ പ്രദേശത്ത് താമസിക്കുകയും അന്ന് മണ്‍പാത്ര നിര്‍മ്മാണത്തിന് ഉപയോഗിച്ചിരുന്ന ചെളി ഉപയോഗിച്ച് കുന്തിദേവി തന്റെ തേവാരമൂര്‍ത്തിയായ ദുര്‍ഗാദേവിയുടെ വിഗ്രഹം നിര്‍മിച്ചു ആരാധിച്ചിരുന്നു എന്നും വിശ്വസിക്കപ്പെടുന്നു. ദുർഗ്ഗാദേവിയുടെ വിഗ്രഹത്തിനൊപ്പം സാളഗ്രാമവും വച്ച് പൂജകൾ കഴിച്ചിരുന്നു എന്ന് പറയപ്പെടുന്നു . കുന്തി ദേവി ചെളി കൊണ്ട് നിര്‍മിച്ച വിഗ്രഹമാണ്‌ ഇപ്പോഴും ഇവിടുത്തെ മൂല വിഗ്രഹം . പന്ജലോഹ നിര്‍മിതമായ ഗോളക കൊണ്ട് ആവരണം ചെയ്തു സംരക്ഷിച്ചു പൂജാദി കര്‍മങ്ങള്‍ നിര്‍വഹിച്ചു പോരുന്നു. കുന്തിദേവി തന്റെ തേവാരമൂര്‍ത്തിക്ക് പ്രതിഷ്ഠാനന്തരം അന്ന് ഖാണ്ഡവ വനത്തിന്റെ ഭാഗമായിരുന്ന ഈ പ്രദേശത്ത് സുലഭമായി ലഭിച്ചിരുന്ന കദളിപ്പഴം ആണ് ആദ്യമായി നിവേദിച്ചതു. ഇന്നും പാണ്ഡവര്കാവ് ദേവിയുടെ ഇഷ്ട വഴിപാടു കദളിപ്പഴം ആണ് .കൊടിയേറ്റ് ദിവസവും , പൂരം ആറാട്ട്‌ ദിവസവും കുന്തിക്ക് മാതൃ സങ്കല്‍പ്പത്തില്‍ പുറത്തേക്ക് തൂവുന്ന ചടങ്ങ് ഇപ്പോഴും തുടര്‍ന്നുവരുന്നു..
ഇഷ്ടവരദായിനിയായ പാണ്ഡവര്‍കാവിലമ്മ സമസ്ത ജനങ്ങള്‍കും അനുഗ്രഹാശിസ്സുകള്‍ ചൊരിഞ്ഞു കൊണ്ട് ഓണാട്ടുകരയുടെ ഐശ്വര്യ ദേവതയായി പരിലസിക്കുന്നു.!!
അതേ കാലഘട്ടത്തില്‍ തന്നെ , പഞ്ചപാണ്ഡവന്മാര്‍ പ്രതിഷ്ഠിച്ച മറ്റു 5 ക്ഷേത്രങ്ങള്‍ കൂടി മദ്ധ്യ തിരുവിതാംകൂറില്‍ ഉണ്ട് . അവ പാണ്ഡവരില്‍ മൂത്ത പുത്രനായ ധര്‍മപുത്രര്‍ പ്രതിഷ്ഠിച്ച ത്രിചിറ്റാറ്റ് ശ്രീകൃഷ്ണ ക്ഷേത്രം , ഭീമന്‍ പ്രതിഷ്ഠിച്ച തൃപ്പുലിയൂര്‍ ശ്രീകൃഷ്ണ ക്ഷേത്രം , അര്‍ജുനന്‍ പ്രതിഷ്ഠിച്ച തിരുവാറന്മുള ക്ഷേത്രം , നകുലന്‍ പ്രതിഷ്ഠിച്ച തൃക്കൊടിത്താനം , സഹദേവന്‍ പ്രതിഷ്ഠിച്ച തിരുവന്‍വണ്ടൂര്‍ ശ്രീ കൃഷ്ണ ക്ഷേത്രം എന്നിവയാണ്.. ത്രിചിറ്റാറ്റ് ശ്രീകൃഷ്ണ ക്ഷേത്രത്തിലെ നിര്‍മാല്യ ദര്‍ശനം തുടങ്ങി യഥാക്രമം പുലിയൂര്‍, ആറന്മുള ,തൃക്കൊടിത്താനം, തിരുവന്‍വണ്ടൂര്‍ എന്നീ ക്ഷേത്രങ്ങളില്‍ ദര്‍ശനം നടത്തിയ ശേഷം പാണ്ഡവര്‍കാവില്‍ എത്തി തൊഴുതു കദളിപ്പഴം നിവേദിച്ചു പ്രാര്‍ഥിച്ചാല്‍ മാത്രമെ ദര്‍ശനക്രമം പൂര്‍ത്തിയാവുകയുള്ളൂ എന്നും അങ്ങിനെ ചെയ്‌താല്‍ അഭീഷ്ടസിദ്ധി ഉണ്ടാകുമെന്നും അനുഭവസ്ഥര്‍ പറയുന്നു...
പാണ്ഡവര്കാവ് ദേവി ക്ഷേത്രം തിരുവിതാംകൂര്‍ ദേവസ്വം ബോര്‍ഡ്‌ ന്‍റെ മേജര്‍ ക്ഷേത്രങ്ങളില്‍ ഒന്നാണ്... കുംഭ മാസത്തിലെപൂയം നക്ഷത്രത്തില്‍ കൊടിയേറി പൂരം നക്ഷത്ത്രത്തില്‍ ആദ്യ ആറാട്ട്‌ വരത്തക്ക വിധമാണ് ഇവിടുത്തെ തിരുവുത്സവം . ക്ഷേത്രവുമായി ബന്ധപ്പെട്ട 5 കരകള്‍ ആണ് ഉത്സവം നടത്തുന്നത്... പൂരം ആറാട്ടിന് ശേഷം മാത്രമേ ആഘോഷങ്ങള്‍ പതിവുള്ളു..തിരുവുത്സവ ദിവസങ്ങളില്‍ നിത്യേനയുള്ള പകല്‍ ആറാട്ട്‌ ഈ ക്ഷേത്രത്തിലെ പ്രത്യേകതയാണ് . ആറാട്ട്‌ കഴിഞ്ഞു വരുന്ന ഭഗവതിയെ മലര്‍പ്പറ ഇട്ടു സ്വീകരിക്കുന്നു..ഉത്സവ ദിവസങ്ങളില്‍ പാണ്ഡവര്‍കാവിലെ സേവ വളരെ പ്രസിദ്ധമാണ് . 4 മുതല്‍ 9 വരെയുള്ള ദിവസങ്ങളില്‍ ദേവിയുടെ ചൈതന്യ വര്‍ധനവിനായി തന്ത്ര വിധി പ്രകാരം അതി പ്രധാനമായ ഉത്സവബലി നടത്തി വരുന്നു.ഉത്സവകാലത്ത് സ്ത്രീകളുടെ ചമയ വിളക്കെടുപ്പ് ഈ ക്ഷേത്രത്തിലെ പ്രത്യേകതയാണ്. ഏതാണ്ട് അഞ്ഞൂറിൽപ്പരം ചമയവിളക്കുകളുടെ അകമ്പടിയോടെയുള്ള പാണ്ഡവർകാവിലമ്മയുടെ എഴുന്നള്ളിപ്പുകൾ കാണേണ്ട കാഴ്ചയാണ് .നിത്യേനയുള്ള ഉരുളിച്ച വരവും , 9 ആം ഉത്സവ നാളിലെ വലിയകാണിക്കയും ,പള്ളിവേട്ട കഴിഞ്ഞ് ആഘോഷപൂര്‍വമുള്ള തിരിച്ചെഴുന്നള്ളത്തും വളരെ പ്രാധാന്യമുള്ള ചടങ്ങുകള്‍ ആണ്.ആറാട്ട്‌ ദിവസം വൈകുന്നേരം 5 ഭഗവതിമാരുടെ എഴുന്നള്ളത്തും, എതിരെല്പ്പും യാത്ര ചോദിക്കലും ദര്‍ശന പ്രധാനമായ ചടങ്ങുകള്‍ ആണ്.തുടര്‍ന്നുള്ള തിരുവാറാട്ടും , എഴുന്നള്ളത്തും അതിഗംഭീരമാണ്....
വൃശ്ചിക മാസത്തില്‍ തുടങ്ങുന്ന അമ്മയുടെ ഉത്സവകാലം തിരുവാറാട്ടോട് കൂടി പൂര്‍ണമാവുകയാണ്..മണ്ഡലകാലത്തെ നിറമാല - വിളക്ക് , നവരാത്രി ഉത്സവം, തൃക്കാര്‍ത്തിക ഉത്സവം, ധനു മാസ കാര്‍ത്തിക ഉത്സവം , മകര മാസത്തിലെ പറയ്ക്ക്‌ എഴുന്നള്ളത്തു,കര്‍ക്കിടകത്തിലെ നിറപുത്തരി, രാമായണ മാസാചരണം , തുലാമാസ ആയില്യം എന്നിവ ആണ് ക്ഷേത്രത്തിലെ പ്രധാന ആട്ടവിശേഷങ്ങള്‍.. കൂടാതെ എല്ലാ മാസത്തിലെയും കാർത്തികയും , പൗർണ്ണമിയും വിശേഷമായിട്ട് ആചരിച്ചു വരുന്നു ...
മൈനർ പോരൂര്‍ മഠം ക്ഷേത്രം , കരുണാമുറ്റം മഹാദേവര്‍ ക്ഷേത്രം , , കൊല്ലകല്‍ ക്ഷേത്രം , ഇലങ്കം ദേവി ക്ഷേത്രം എന്നിവ പാണ്ഡവര്കാവ് ദേവി ക്ഷേത്രത്തിന്റെ കീഴൂട്ട്‌ ക്ഷേത്രങ്ങള്‍ ആണ്...
ശ്രീധര്‍മ്മ ശാസ്താവ് , ഒക്കത്ത് ഗണപതി, തേവാര ശിവൻ ,ഘണ്ടാകർണ്ണന്‍ , ബ്രഹ്മരക്ഷസ്സ് , നാഗരാജാവ് , നാഗയക്ഷി ,മണിനാഗം , യക്ഷിയമ്മ തുടങ്ങിയ ഉപദേവതകൾ ഭക്തജനങ്ങള്‍ക്ക് അനുഗ്രഹം ചൊരിഞ്ഞു കൊണ്ട് ഇവിടെ പരിലസിക്കുന്നു.. കൂടാതെ ക്ഷേത്രസങ്കേതത്തിൽ മുല്ലപ്പന്തൽ (വനദുർഗ്ഗാ സങ്കല്പം) എന്ന മേൽക്കൂര ഇല്ലാത്ത ക്ഷേത്രവും ഇവിടെ സ്ഥിതി ചെയ്യുന്നു . വൃശ്ചികം & ധനുമാസങ്ങളിലെ കാർത്തിക നാളിൽ ദേവിയെ മുല്ലപ്പന്തലിൽ എഴുന്നള്ളിച്ചിരുത്തുന്ന പതിവുണ്ട് .മതിൽകെട്ടിന് പുറത്തായി അല്പം കിഴക്കു മാറി കമനീയമായ കൊത്തുപണികളാൽ അലംകൃതമായ കൂട്ടംകൊട്ടമ്പലം (വഴിയമ്പലം) നിലകൊള്ളുന്നു . ഉത്സവദിവസങ്ങളിൽ ദേവിയെ ഇവിടെ എഴുന്നള്ളിച്ചിരുത്തി മാത്ര കൊട്ട് എന്ന ചടങ്ങും തുടർന്ന് കൂട്ടംകൊട്ടും നടന്നു വരുന്നു ..
ക്ഷേത്ര കാര്യങ്ങളും ഉത്സവത്തിന്‍റെ സുഗമമായ നടത്തിപ്പിനും വേണ്ടി മുതുകുളം എൻഎസ്സ് എസ്സ് സംയുക്ത കരയോഗം കമ്മിറ്റി, ക്ഷേത്രോപദേശക സമിതി എന്നിവ പ്രവര്‍ത്തിച്ചു വരുന്നു.. കൂടാതെ ക്ഷേത്രവുമായി ബന്ധപ്പെട്ടു കദളിപ്രിയ ഭക്തജന സംഘം , ശ്രീദേവി പൗര്‍ണ്ണമി സംഘം , ഗജപ്രിയ ആനപ്രേമി സംഘം ,സാമഗാനപ്രിയ സംഗീത സഭ , എന്നിവ പ്രവര്‍ത്തിച്ചു വരുന്നു....
പ്രധാന വഴിപാടുകൾ: കദളിപ്പഴ നിവേദ്യം , കദളിപ്പഴം കൊണ്ടുള്ള തുലാഭാരം , ചതുഃശ്ശതം , പുഷ്പാഭിഷേകം , പുഷ്പാഞ്ജലി , ഉത്സവകാലത്തും വൃശ്ചിക & ധനുമാസങ്ങളിലെ കാർത്തിക നാളിൽ സ്ത്രീകൾ വ്രതശുദ്ധിയോടു കൂടി ചമയവിളക്ക് എടുക്കുന്നത് , അൻപൊലി സമർപ്പണം ,ലക്ഷാർച്ചന തുടങ്ങിയവ .. ക്ഷേത്രത്തിൽ അരങ്ങേറ്റം നടത്തുന്നത് വളരെ ശ്രേയസ്ക്കരമാണന്ന് 2008 ലെ ദേവപ്രശ്നത്തിൽ പറയുകയുണ്ടായി .
ക്ഷേത്രത്തിലെ തന്ത്ര അവകാശം ഹരിപ്പാട് കിഴക്കേ പുല്ലാംവഴി ഇല്ലത്തിനാണ് .. .കഴകം , വിളക്കെടുപ്പ് മാലകെട്ടു എന്നിവയ്ക്കുള്ള അവകാശം മുതുകുളം മണിവേലില്‍ വാര്യത്തിനും , മേളത്തിനുള്ള ചുമതല
കോയിക്കല്‍ & തട്ടാമുറി കുടുംബങ്ങള്‍ക്കും
ആണ്... കൂടാതെ ക്ഷേത്രത്തിലെ പുടവ അലക്ക് ,പന്തം പിടിക്കൽ , പീഠം & മെഴുവട്ടക്കുട എടുക്കൽ , ക്ഷേത്രം സ്ഥപതി തുടങ്ങിയവ ചില കുടുംബങ്ങളുടെ
അവകാശമാണ് .
ശ്രീ ഭഗവതിയുടെ നിസര്‍ഗ്ഗ സാന്നിധ്യകല
കാലാതിവര്‍ത്തിയായി അന്യൂനമായി
നിലനില്‍ക്കുന്ന ഇവിടെ എത്തി എല്ലാവരും
അമ്മയുടെ അനുഗ്രഹത്തിന് പാത്രീഭൂതരകണം.
വിവരണം: ശരത് ശങ്കർ
https://youtu.be/DJRzvWBM9Mw
