अभ्युदय नगर ची कुलस्वामिनी ..तरुण मित्र नवरात्र उत्सव मंडळ

11/10/2024

🏵️ सेवा रत्न 🏵️
===================
अनंत रूपे तुझी
तोषवी भक्तांना माऊली ।
जनकल्याणा साठी माते
सत्वर तू धावली ॥
सावित्री अन् फुले ज्योतिबा
कर्मवीर आले ।
गाडगेबाबा समस्त जनासी
शिकवून गेले ॥
भारत भूच्या कुशीत रत्न
रतन रूपा आली
जे रंजले गांजले
त्यांची सेवा ती केली ॥
उद्यम जगती नाव दुमदुमे
रतन टाटांचे ।
निरलस सेवा व्रती जन्मला
भाग्य या देशाचे ॥
===================
🔶 गीत :- श्री. विश्वास बाबर
🔶 ११ ऑक्टोबर २०२४

10/10/2024

🏵️ जागर 🏵️
==================
गोंधळ मांडला मातेचा
जागर त्यो घुमला ।
उभा गोंधळी कथा
ऐकण्या जनसागर जमला ॥
डिंबडी वरती बोटं कडाडली
संबळही कडकडली ।
सूर लागले तुणतुण्यावर
हाताने टाळी ही धरली ॥
उदे गं अंबे उदे
नाद तो त्रिभूवनी घुमला ।
शिवा संगे शक्ती
सोबत गणुबा दुडदुडला ॥
साद घातली दिलं आवातनं
आठवण साऱ्यांची ।
तुळजाई अंबाई वणी रेणूका
लगबग साऱ्यांची ॥
तालावरती नाचती दिवट्या
रात्र ही रंगली ।
भावभक्तीचा जागर पाहुनी
कुलस्वामिनी हर्षली ॥
==================
🔶 गीत :- श्री. विश्वास बाबर
🔶 १० ऑक्टोबर २०२४

09/10/2024

🏵️ आवाहन 🏵️
=====================
प्रपंचातून परमार्थाची
निरलस सेवा व्हावी ।
गोंधळ पुजा अशी निरंतर
तुझ्या साक्षीने व्हावी ॥
रथाधिश गणा - गोंधळा यावे
बुद्धी सागरा - गोंधळा यावे ।
तुळजाई मंगळाई जानाई निनाई
वाघजाई नवलाई - गोंधळा यावे ॥
रेणूका माता - गोंधळा यावे
भवानी अंबा - गोंधळा यावे ।
ज्योतिबा खंडोबा म्हसोबा बिरोबा
नाईकबा भैरुबा - गोंधळा यावे ॥
मोह माया मद द्वेष मत्सर
नि:संग होऊनी जावे ।
आळवितो कुलस्वामिनी
माते गोंधळाला यावे ॥
=====================
🔶 गीत :- श्री. विश्वास बाबर
🔶 ९ ऑक्टोबर २०२४

08/10/2024

🏵️ मार्ग 🏵️
==================
सहस्त्र नामावलीत दडले
महात्य नाम जपाचे ।
कुंकुमार्चन अभिषेकाने
पुजन करती अंबेचे ॥
कुठे गुंजती सुर भजनाचे
कुठे चालते सप्तशती ।
स्तोत्र श्लोकांचे पठनही चाले
मिळे जिवाला मनःशांती ॥
टाळां सोबत रंगे आरती
अबाल वृद्धां संगे ।
नाचात रंगती गोंधळाच्या
कुलस्वामिनी तव संगे ॥
साधनेचे मार्ग ते कितीक
लगबग प्रत्येकाची ।
कृपादृष्टी तव व्हावी आंबे
हिच आस तव भक्तांची ॥
==================
🔶 गीत :- श्री. विश्वास बाबर
🔶 ८ ऑक्टोबर २०२४

07/10/2024

🏵️ शिव तेज 🏵️
===================
दार उघड बय्ये दार
गुंजली आर्त साद हृदयाची ।
शिवज्योत जन्मली तेजस्वी
कृपा त्या कुलस्वामिनी ची ॥
अठरा पगड मावळे
शिवबांनी गोळा केले l
भवानी तुझ्या कृपेने
हिंदवी स्वराज्य स्थापियले ॥
अवघा म्लेंच्छ मार्दियेला
कुंठली शत्रुची मती l
महाराष्ट्राचे भाग्य जन्मले
शिवबा छत्रपती ॥
अनुभवला तो दिव्य सोहळा
स्वर ताल झंकारले l
शिवशक्तीचे तेज आज
जणू भूवनी अवतरले ॥
===================
🏵️ गीत :- श्री. विश्वास बाबर
🏵️ ७ ऑक्टोबर २०२४

06/10/2024

🏵️ चैतन्य तेज 🏵️
===================
आदिशक्तीच्या उत्सवाचा
उत्साह असा रंगला ।
गंध चैतन्य तेजाचा
दश दिशांना दरवळला ॥
चिंता क्लेष सारूनी
खुलती उपासनेचे रंग ।
चराचरात भरूनी राहे
भक्तीचा तो रंग ॥
किणकिण मंजिऱ्यांची
नाद निनादे घंटेचा ।
शंखाच्या सुरात गुंजला
जयघोष मम मातेचा ॥
तेजोमय चैतन्याची
प्रचिती दिसे तव ठायी ।
आनंदाने बहू गाती सारे
जय कुलस्वामिनी आई ॥
===================
🔶 गीत :- श्री. विश्वास बाबर
🔶 ६ ऑक्टोबर २०२४

06/10/2024

🏵️ मन 🏵️
===================
मी न तेथे परी
खेळे मन माझे ।
ठाव नसे मनाचा
परी ध्यान रहावे तुझे ।
क्षणात बदले मन हे
ताबा न त्याच्यावरती ।
दे शक्ती मज रहावे ते
तुझ्याच अवती भवती ।
आठवणींच्या हिंदोळ्यावर
मन हे माझे झुलते ।
कशास चिंता घ्यावी
पाहता आनंद लहरी उठती ।
नव चैतन्याची बहार
दाटे मोद बहू मनी ।
कुलस्वामिनी ही येता घरा
होई हर्ष जनमनी ।
===================
🏵️ गीत :- श्री. विश्वास बाबर
🏵️ ५ ऑक्टोबर २०२४

05/10/2024

🏵️ महिमा 🏵️
==================
तुझ्याच दर्शनासाठी
मन हे आसावले ।
सुमुख पहाता नयनी
चित्त हे सुखावले ॥
तोषवी मम आत्म्याला
कृपा तुझी न्यारी ।
उभा मी नतमस्तक
तुझ्या गं दरबारी ॥
शत सूर्यांचे तेज
पाहता देहभान हरपले ।
शितल शत चंद्रांची ममता
पाहता डोळे पाणावले ॥
महिमा तुझाच न्यारा
किमया ही सारी ।
आशिर्वाद कुलस्वामिनी गे
असो आम्हावर निरंतरी ॥
==================
🔶गीत :- श्री. विश्वास बाबर
🔶४ ऑक्टोबर २०२४

05/10/2024

🏵️ द्वंद्व 🏵️
===================
घडला काही प्रमाद
उदरी घ्यावा माते ।
दोन्ही कर जोडोनी
हिच विनवणी तू ते ॥
मन चक्षूंनी अनुभवला
सोहळा आनंदाचा ।
मन भावे केला
जयघोष कुलस्वामिनीचा ॥
द्वंद्व मनाचे संपेना
तू तर अंतर्यामी ।
खेळ तुझाच सारा
बालक अबोध मी ॥
कृपावंत तू करूणासिंधू
अंतरू नको तू आता ।
कृपा असु द्या शिरी
जय कुलस्वामिनी माता ॥
===================
🔶गीत :- श्री. विश्वास बाबर
🔶 ३ आक्टोबर २०२४

05/10/2024

🏵️ आनंद सोहळा 🏵️
=================================
अभ्युदय नगरची कुलस्वामिनी वाजत गाजत निघाली ।
आतुरता दर्शनाची ही वर्षाने पूर्ण झाली ॥
दर्शनाला तिच्या जाऊ चला...
डोळे भरून रूप पाहू चला...
माऊली साऱ्या विश्वाची अभ्युदयनगरात अवतरली ॥ धृ०॥

जमला सारा मेळा तिच्या दरबारी ।
आनंद अवनी फुलला त्यांच्या चेहऱ्यावरी ।
विसरूनी सारे देहभान भक्तीत लीन झाले ।
सोहळा पाहुनी मातेचे रोमांचित अंग झाले ।
जागर करूया शक्तीचा तल्लिन होऊ सारे ॥ १ ॥

नवरंग खुलले जगती सुख नयनांचे ।
नवरस पुजन करता लेणे भाग्याचे ।
कनवाळू माते येशी तू भक्तांच्या रक्षणाला ।
निर्दालन असूरांचे त्या सुखवी साऱ्या जगाला ।
कृपा असावी अर्पितो सेवा तव चरणाशी ॥ २ ॥
==============================
🔶गीत :- श्री. विश्वास बाबर
🔶 १ ऑक्टोबर २०२४

02/10/2024

11/09/2024