18/10/2021
ಎಲ್ಲಿಯ ಪ್ರಾಯೋದ ಮಲ್ಲ ಮನಸ್ದ ಬಾಲೆ ಒಂಜಿ ಕಡೆಟ್, ನನೊಂಜಿ ಕಡೆ ಹಿರಿಯ ಪ್ರಾಯೋದ ಎಲ್ಲಿಯ ಮನಸ್ದ ನಮ್ಮ ಹಿರಿಯಕುಲು ಮೂಲಸ್ಥಾನೊಡು ಒಗ್ಗಟದ್ ಶ್ರಮದಾನಡ್ ತೆಲಿತೊಂದು ಪತ್ತೊಂದು ಬೆನ್ಪಿನ ಪೊರ್ಲು ತುಲೇ ಉಂದು ನಮ್ಮ ಸಮುದಾಯ ಅಂದ್ ಪನರ ಪೆರ್ಮೆ ಅಪುಂಡು.
ನಮ್ಮ ತುಳುನಾಡ ಮಣ್ಣ್ ದ ಅಮರ್ ವೀರ ಪುರುಷೇರ್ ಆಯಿನ ಶ್ರೀ ಕಾನದ ಕಟದೆರೆನ ಮೂಲಸ್ಥಾನ ಅವ್ವು ನಮ್ಮ ಮೂಲದ ಇಲ್. ನಮ್ಮ ಊರು, ಆಚಾರ ವಿಚಾರ, ಸಂಪ್ರದಾಯ-ಸಂಸ್ಕೃತಿ ಬೇತೆ ಬೇತೆ ಅಂಡಲಾ ನಮ ಒಂಜೆ ಜಾತಿ ಕೂಡುಕಟ್ ದಕುಲು, ನಮ ಕಾನದ ಕಟದೆರೆನ್ ದಿನೊಳ ಒಂಜಿ ಅರೆಗಳಿಗೆ ಸುಗಿತುದ್ ದೈವರಾಧನೆ ಮಲ್ಪುನ ಕುಲತಕುಲು ನಮ. ಒಲ ಇತ್ತಿನ ನಮ ಇನಿ ಮೂಲಸ್ಥಾನ ಅಲೇರಿದ ಮಣ್ಣ್ ಡ್ ಒಟ್ಟಿಗೆ ಅದ್ ಸುರುತ ಪಜ್ಜೆ ದಿದ್ ಕಾಡ್, ಪುದೆಲ್, ಮುಳ್ಳು, ಪಜೀರ್ ಲಕ್ಕುದ್ ಮುಚ್ಚಿದ್ ಪೊತಿನ ನಮ್ಮ ಇಲ್ ಅವ್ವು ಕಾನದ ಕಟದೆರೆನ ಮೂಲಸ್ಥಾನ ಇನಿತ ದಿನ ಒಂಜತ್ ಜನ ಶ್ರಮದಾನದ ಮೂಲಕ ಒಂಜವೊಂದು ತೆಲಿತೊಂದು ನಲಿತೊಂದು ಬೆನ್ಪಿನ ಖುಷಿಯೇ ಬೇತೆ, ನನಲ ನನಲಾತ್ ಬೆನೋಡು ಪನ್ಪಿನ ಆಸೆ ಪುಟ್ಟೊಂದುಂಡು ಕಾನದ ಕಟದ ಕುಲಬಾಂಧವೆರೆಡ, ಉಂದು ಪೊಸ ಇತಿಹಾಸ ಸೃಷ್ಟಿ ಆಪಿನ ಭವಿಷ್ಯ ತೊಜೊಂದುಂಡು ಅಲೇರಿ ಪುಣ್ಯದ ಮಣ್ಣ್ ಡ್ ಈ ನಮ್ಮ ತುಳುವನಾಡ್ಡ್.
7 ವರ್ಷದ ಕಿರಿಯ ಬಾಲೆಡ್ದ್ ಪತ್ತಿನ 70 ವರ್ಷ ಕರಿನ ಹಿರಿಯ ಪರಬೆರ್ ಕಾನದ ಕಟದ ಮೂಲಕ್ಷೇತ್ರದ ಕೊಡಿಯಡಿಟ್ ಶ್ರಮದಾನ ಮಲ್ತೊಂದುಲ್ಲೆರ್, ದಾಯೆ ಪಂಡ ನಮ್ಮ ಕುಲಕ್ ಒಂಜಿ ಮೂಲ ಉಂಡು ನಮ್ಮ ಕುಲದೈವಗ್ ಒಂಜಿ ಮೂಲ ಉಂಡು ಅವ್ವು ಬೆದ್ರದ ಮಿಜಾರ್ ಗ್ರಾಮದ ಅಲೇರಿ ಕಿಜನೋಟ್ಟ್ ಬರ್ಕೆ. ಆ ಪುಣ್ಯದ ಜಾಗೋಡ್ ನಮ್ಮ ಕುಲಕ್ ಕುಲದೇವೆರ್ ಆಯಿನ ಶ್ರೀ ಕಾನದ ಕಟದೆರೆಗ್ ಒಂಜಿ ಎಲ್ಲಿಯ ದೀಪದ ಬೊಲ್ಪು ಪೊತ್ತವೋಡ್ ಪನ್ಪಿನ ಆಸೆಡ್ ಉಲ್ಲೆರ್ ಒಂಜತ್ ಜನ ಮಂದೆ, ಆ ಪುಣ್ಯೋದ ಜಾಗಡ್ ನಮ ದಾದಂಡಲ ಬೆನೋಡು ಪಂಡುದ್ ಜನ ಕಡಲ ಬರಿಡ್ದ್ - ಘಟ್ಟ ಸೀಮೆಡ್ದ್ ಜತ್ತ್ ಬರೊಂದುಲ್ಲೆರ್ ಕಾನದ ಕಟದ ಮೂಲಸ್ಥಾನ ನಮ್ಮ ಬೆದ್ರದ ಮಿಜಾರ್ ಅಲೇರಿ ಶ್ರೀ ಸತ್ಯಸಾರಮಾನಿ ಕಾನದ ಕಟದೆರೆನ ಮೂಲದ ಮಣ್ಣುಗ್ ಬರೊಂದುಲ್ಲೆರ್ ಸಮುದಾಯದ ಒಗ್ಗಟ್ ಆಪಿನ ಒಟ್ಟಿಗೆ, ಒಂಜೆ ಮೂಲದ ಒಂಜೆ ಇಲ್ಲದ ಅಜ್ಜ-ಅಜ್ಜಿ ಅಪ್ಪೆ-ಅಮ್ಮೆ ಪಲಯೇ-ಮೆಗ್ಯೆ ಅಕ್ಕ-ತಂಗಡಿ ಎನ್ನಿಗ ನಮ ಮಾತ ಒಂಜೆ ಒಮ್ಮತೊಡು ಮೂಲಸ್ಥಾನಡ್ ಆಪಿನ ಬೆಲೆಗ್ ನಮಲ ಆಯಿನಾತ್ ಒಂತೆ ಪುಗ್ಗೆಲ್ ಕೊರ್ಕ. ನಮ ಎಪೊಳ ಒಗ್ಗಟ್ ಒಂಜಾದ್ ಇತ್ತಂಡ ನಮಕ್ ಒವ್ವೆ ಕೆಲಸಲಾ ಬಂಗ ಅಂದ್ ಅಪುಜಿ, ನಮ ಬೆತೆನೆ ಅಂದು ಕುಲ್ಲುಂಡ ಪುರ ಬೆಲೆಳ ಬಂಗನೆ ಅಂದ್ ತೋಜುಂಡ್, ನಮ್ಮ ಇಲ್ ಅಲೇರಿ ಶ್ರೀ ಕಾನದ ಕಟದ ಮೂಲಸ್ಥಾನಡ್ ನಮ ನಿಸ್ವಾರ್ಥ ಭಾವನೆಡ್ ಬೆನ್ಕ ಬಲೆ.........
#ಅಲೇರಿ ಶ್ರೀ ಸತ್ಯಸಾರಮಾನಿ ಕಾನದ ಕಟದ ಮೂಲಕ್ಷೇತ್ರ ಕಿಜನೋಟ್ಟ್ ಬರ್ಕೆ,ಮೂಡಬಿದಿರೆ ದ.ಕ ಜಿಲ್ಲೆ ಕೇಂದ್ರ ಸಮಿತಿ.
