23/12/2025
युनाइटेड ख्रिष्टियन माइनाेरिटी वेलफेयर सोसाइटी, मिरिकका पदाधिकारीहरूले मंगलबार २३ डिसेम्बर २०२५ को दिन मिरिक क्षेत्रका विभिन्न सरकारी निकायका अधिकारीहरूसँग शिष्टाचार भेट गर्दै क्रिसमस पर्व २०२५ तथा नयाँ वर्ष २०२६ को शुभकामना आदान–प्रदान गरेका छन्।
सो अवसरमा सोसाइटीका अध्यक्ष पास्टर केवल लामा, महासचिव पास्टर सागर कार्कीडोली, प्रमुख सल्लाहकार रेभरेन्ड उमेश सेवा, कोषाध्यक्ष डी.बी. एन्ड्रु राई, प्रवक्ता पास्टर लाडुप लेप्चा तथा क्षेत्रीय संयोजक पास्टर उमेश राई बिसेकरको उपस्थिति रहेको थियो। टोलीले मिरिक महकुमा अधिकारी, मिरिक खण्ड विकास अधिकारी, मिरिक नगरपालिका अध्यक्ष लगायत विभिन्न प्रशासनिक तथा विभागीय अधिकारीहरूसँग भेट गरी क्रिसमस पर्वको शुभकामना व्यक्त गरेको छ।
भेटघाटका क्रममा मिरिक खण्ड विकास अधिकारी (BDO), मिरिक उप–महकुमा अधिकारी (SDO), मिरिक उप–महकुमा प्रहरी अधिकारी (SDPO), सभासद, बैंक प्रबन्धक, भूमिसुधार तथा अभिलेख अधिकारी (BLRO), मिरिक थाना इन्चार्ज, मिरिक नगरपालिका अध्यक्ष, मिरिक महकुमा म्याजिस्ट्रेट, मिरिक नगरपालिका अस्पतालका चिकित्सक, तथा छब्बिसे थाना प्रभारीलाई क्रिसमस केक र क्यालेन्डर उपहार स्वरुप प्रदान गरिएको थियो।
युनाइटेड ख्रिष्टियन माइनाेरिटी वेलफेयर सोसाइटी, मिरिकले प्रत्येक वर्ष क्रिसमस पर्वको अवसरमा क्षेत्रका विभागीय अधिकारीहरूसँग भेट गरी शुभकामना व्यक्त गर्ने कामलाई निरन्तरता दिँदै आएको छ। सोही अनुसार यस वर्ष पनि उक्त कार्यक्रम आयोजना गरिएको जनाइएको छ।
हाल सोसाइटीअन्तर्गत मिरिक क्षेत्रका ३२ भन्दा बढी चर्चहरूमा क्रिसमस पर्व श्रद्धा र उल्लासका साथ मनाइँरहेको छ। यस अवसरमा सोसाइटीले सम्पूर्ण समुदायलाई क्रिसमस पर्वको हार्दिक शुभकामना व्यक्त गरेको छ।
कार्यक्रम सफलतापूर्वक सम्पन्न भएको जनाउँदै भेटघाटमा सहभागी सरकारी अधिकारीहरूले यस्तो पहलले समुदाय र प्रशासनबीचको आपसी सम्बन्ध सुदृढ गर्न महत्वपूर्ण भूमिका खेलेको बताएका छन्। सोसाइटीले आगामी दिनमा पनि यस्ता सामाजिक तथा सद्भावमूलक कार्यक्रमलाई निरन्तरता दिने प्रतिबद्धता व्यक्त गरेको छ।
