02/03/2026
ഓണാട്ടുകരയുടെ ഉത്സവങ്ങളിൽ പ്രധാനപ്പെട്ട ഒന്നാണ് ചെട്ടികുളങ്ങര ഉത്സവം. ഉത്സവങ്ങൾ ദ്വജാതി, അങ്കുരാദി, പടഹാദി എന്നിങ്ങനെ ത്രിവിധങ്ങളായി ക്രമപ്പെടുത്തിയതിൽ ഇവിടെ നടക്കുന്നത് പടഹാദി ഉത്സവമാണ്. കുംഭഭരണിക്ക് ശേഷമുള്ള പത്താം ദിനം സമാരംഭിച്ച് (2026 മാർച്ച് 03 മുതൽ 15 വരെ) ഓരോ കരക്കാരുടേതും ആയി 13 ദിവസം ആഘോഷിക്കുന്നു
ഓരോ ദിവസത്തെ ഉത്സവം ആരംഭിക്കുന്നത് അതാത് കരക്കാർ ക്ഷേത്രത്തിലെത്തി ഭഗവതിയെ വന്ദിച്ച് തങ്ങളുടെ കരയുടെ ഉത്സവം അറിയിച്ച് പ്രത്യേക വഴിപാടുകളും കഴിച്ച് വൈകുന്നേരം ഘോഷയാത്രകൾ, തോറ്റംപാട്ട് എന്നിവ നടത്തി ഉത്സവം സമർപ്പിക്കുകയും രാത്രിയിൽ ഭഗവതി പുറത്തേക്ക് എഴുന്നള്ളുകയും അതാത് കരക്കാർ ഭഗവതിയെ എതിരേൽക്കുകയും അമ്മ വിളക്കും ഭക്തന്മാരെയും കണ്ട് അകത്തെഴുന്നള്ളുന്നതോടുകൂടി ആ ദിവസത്തെ ഉത്സവം പൂർത്തിയാക്കുന്നു. അടുത്ത ദിവസം ഇതേ ചടങ്ങ് അടുത്ത കരക്കാർ ആവർത്തിച്ച് 13 ദിവസത്തെ ഉത്സവത്തിന് സമാപ്തി ആകുന്നു.
ഉത്സവ കാലം ഭക്തന്മാർക്ക് ഈശ്വര കടാക്ഷം ലഭിക്കുന്ന അസുലഭ സന്ദർഭമായി വിശ്വസിക്കുന്നു. ഈ ഉത്സവത്തിന് എല്ലാവർക്കും അമ്മയുടെ കടാക്ഷവും അനുഗ്രഹവും പ്രാർത്ഥിച്ചു കൊള്ളുന്നു.
