01/04/2020
CORONAVIRUS LAKA DAMNA:
Rev. Tlanghmingthang
Coronavirus (Covid-19) hi ieng angam a na; ieng ti taka hung ințan am; hri leng ve hrim hrim am; mihriem thil thawsuol lei am; mihriemin a mihriem chanpuihai a runna hmangruo am? Tu chen hin hriet chieng a ni nawh.
Dean Ray Koontz, Dean Koontz tia ko, July 9, 1945 a pieng chu, American lekhaziektu (Author) ropui le langsartakel a nia. A lekhabu ziek țhenkhathai chu the New York Times a pholang le Best Seller list a chuong hiel phak a nih. A lekhabu ziek phek 312 vel a sa, “The Eyes of Darkness,” k*m 1981 May 10 Publication le released a chun, “Nu pakhat hin a naupa k*m khat liemtaa khan, a thi ta dim, a la dam khiet am, tia zawng suok dinga an thawk suokna thu chu,” a ziek a nih. Chu lekhabua mak danglamtakel chu, “bioweapon (biological weapon) ‘Gorki-400’ ti a lo ziek le, 2008 edition a, “Wuhan-400” tia ziek nawka um chu a nia. Chu taka hril dan chun, “Chinese Scientist Li Chen, United States phatsantu chun China thil pawimaw em em le țibaium biological weapon chu a chawi a. Chu chu Wuhan khawpui puoa RDNA labs a siem (developed) a ni leiin “Wuhan-400” tia ko a nih,” ti’n a lo hril a. Hril sawng pei dana chun, “pneumonia hrattak anga natna hri hung inleng chun khawvel pumpui tuom a ta; chuop le boruok/thuok fena (bronchial tubes) hai chu sukbuoi a ta; chun, a natna sukbui ang hu chun, chu natna hri chu hung tlung thut a ni ang bawkin bo nawk a tih” ti’n; a tuortuhai ngei khawm chu khum hran (quarantined) an ni ding thu lo hrilin a um a nih. Hi thu ziek hi vawisun huna Coronavirus (Covod-19) hripui inleng mek le hin inzawmna a nei dim ti ruok chu hriet an nawa; amiruokchu, thil mak ve tak chu a lo nih.
Pathien chun a nuom phawt chun mihriemhai kuomah hmatieng hun la hung tlung dinga, thil tlung dinghai hrillawk theina a pek thei a; bible-a ei hmu angin mi țhenkhat kuomah a pek hrim bawk a nih. Hun nuhnung, Isu Krista hung tawma thlil hung tlung dinghai chu zawlneihai le, Thupuongsuo-a ei hmu angin hmangai Johan ngei khawm a lo in hmulawktir a; Ama Isu ngei khawmin chiengtakin a lo hrillawk a ni kha. Daniel 8:25 tawp tienga lem hin chu, hun nuhnunga lal țibaiumtak hung ngirsuok chun, “a remruot dan hmangin a k*ta chun vervekna chu inhlawtlingtir a ta; a lungrila chun ama le ama chu inchawimawi a tih; chun, ‘an inring naw karin mi tamtak chu suksieng a ta, lalhai lal chungah ngirsuok bawk a ta,’” ti’n a lo hril hiel a. “Nisienlakhawm, k*t lova suksiet ning a tih,” a ti bawk a nih.
A ieng po khawm chu lo tlung ding nisien, buoi loa ei umna dingin, ei bible a hin Pathienin mihriemhai suol leia hripui chi hran hran hmanga a lo hrem dan le a sansuok nuomhai a sansuok dan dam; Ama Isu hung tawm, hun nuhnunga thil tlung dinghai chu hmun tamtaka a mi lo ziek pek a; hri mak tak takhai inlengin, hun khirtakhai a tlung ding thu hai ei hmu bawk a nih.
Chuleiin, unau dittakhai, Iengdinga beidawng, chi-ai-taka um am ei nia? Iengdinga lungawp inkaia um am ei nia? Iengdinga lungril mawktak, ngaituona mu-le-mal nei loa um am ei nia? Iengdinga lulul le lungril sukngar tlat am ei nia? Iengdinga lungril piktak le ngaituona fim nei loa um am ei nia? Pathien beisei rawh! Amaa chau chun damna famkim hmung i tih!!
LALPA chun, “i kuomah fe ve pei ka ta, chawlna peng ka ti che,” a tih (Exo. 33:14). “A mi ko pha chun, dawn ka ta, a lunginzing lai chun a kuomah um ka ta, ama chu sanhimin chawimawi ka tih. Dam sawtnain suklungawi ka ta, Ka sandamna chu inhmutir bawk ka tih,” LALPA’N a tih (Psalms 91:15-16). Amen!
