04/03/2026
సాఫ్ట్వేర్ ఇంజనీర్ 'చైన్ స్నాచింగ్' వేషాలు.. నిందితుడి అరెస్ట్, రూ. 40 లక్షల విలువైన బంగారం, వెండి స్వాధీనం....! మదనపల్లె ఈశ్వరమ్మ కాలనీకి చెందిన కోరకూటి రాజేష్ అరెస్ట్..... మీడియా సమావేశంలో వివరాలు వెల్లడించిన జిల్లా ఎస్పీ ధీరజ్ కునుబిల్లి
సాఫ్ట్వేర్ ఇంజనీర్గా ఉంటూ విలాసాలకు అలవాటు పడి, దొంగతనాలను వృత్తిగా మార్చుకున్న ఒక మోస్ట్ వాంటెడ్ ‘హాబిచ్యువల్ అఫెండర్’ను అన్నమయ్య జిల్లా పోలీసులు అరెస్ట్ చేశారు. నిందితుడి నుండి సుమారు రూ. 40 లక్షల విలువైన 250 గ్రాముల బంగారు ఆభరణాలు, 930 గ్రాముల వెండి వస్తువులను పోలీసులు స్వాధీనం చేసుకున్నారు. ఈ కేసుకు సంబంధించిన వివరాలను జిల్లా ఎస్పీ ధీరజ్ కునుబిల్లి మీడియా సమావేశంలో వెల్లడించారు.
నిందితుడి వివరాలు
అరెస్టయిన నిందితుడు మదనపల్లె మండలం, ఈశ్వరమ్మ కాలనీకి చెందిన కోరకూటి రాజేష్ (35). వృత్తిరీత్యా సాఫ్ట్వేర్ ఇంజనీర్ అయిన రాజేష్, సులభంగా డబ్బు సంపాదించాలనే దురాశతో నేరాల బాట పట్టాడు.
నేరాల వివరాలు
నిందితుడు రాజేష్ ప్రధానంగా మూడు ప్రధాన నేరాలకు పాల్పడినట్లు విచారణలో తేలింది..
1. మదనపల్లి I టౌన్ P.S. Cr No. 49/2026 (U/Sec 331(3), 305(a) BNS): ఫిబ్రవరి 16న మదనపల్లి బీసెంట్ రోడ్డులోని ఒక ఇంట్లో చొరబడి భారీగా బంగారు, వెండి ఆభరణాలను అపహరించాడు.
2. Cr No. 36/2025 (U/Sec 304(2), 329(4) BNS): గత ఏడాది మార్చి 24న దేవాలయం వీధి సందులో ఒక ముసలి ఆమె వద్ద నుండి 30 గ్రాముల బంగారు గొలుసును లాక్కెళ్ళాడు (చైన్ స్నాచింగ్).
3. Cr No. 59/2026 (U/Sec 304(2) BNS): ఇదే ఏడాది ఫిబ్రవరి 6న మళ్ళీ దేవాలయం వీధిలోనే మరో వృద్ధురాలి మెడలోని 25 గ్రాముల బంగారు గొలుసును దొంగిలించాడు.
పోలీస్ ఆపరేషన్
జిల్లా ఎస్పీ ఆదేశాల మేరకు మదనపల్లి అడిషనల్ ఎస్పీ ఎం. వెంకటాద్రి పర్యవేక్షణలో, మదనపల్లి 1 టౌన్ సిఐ కె. రాజా రెడ్డి, సి.సి.ఎస్ ఇన్ స్పెక్టర్ ఎం. చంద్రశేఖర్, ఎస్.ఐ ఎస్.కె రహమతుల్లా, సి.సి.ఎస్ ఎస్.ఐ ఎం.కె నరసింహులు మరియు వారి బృందం మార్చి 3న ఉదయం 08:30 గంటలకు నిందితుడిని అరెస్ట్ చేశారు. ఈ మూడు కేసులకు సంబంధించిన మొత్తం రికవరీని పూర్తి చేశారు.
జిల్లా ఎస్పీ హెచ్చరిక
ఈ సందర్భంగా ఎస్పీ మాట్లాడుతూ, "యువత చెడు అలవాట్లకు బానిసలై నేరాల బాట పట్టడం వల్ల వారి భవిష్యత్తు అంధకారమవుతుంది. చదువుల్లో రాణించి జీవితంలో పైకి రావాలి తప్ప, దొంగతనాలకు పాల్పడితే కఠిన చర్యలు తప్పవు" అని హెచ్చరించారు. అలాగే ప్రజలు అప్రమత్తంగా ఉండాలని సూచించారు. ఈ కేసును ఛేదించిన పోలీస్ అధికారులను, సిబ్బందిని ఎస్పీ ప్రత్యేకంగా అభినందించి, నగదు రివార్డులను అందజేశారు.
❤️❤️
