Cherubim

26/05/2026

🧚കെരൂബ് 🧚27/05/2026
ശ്ലീഹാ ഒന്നാം ബുധൻ

📖വായനകൾ

🛑എങ്കർത്താ
📕റോമാ 12 : 3-13

എനിക്കു ലഭിച്ചിരിക്കുന്ന കൃപയാല്‍ പ്രേരിതനായി നിങ്ങളോടു ഞാന്‍ പറയുന്നു, ഉള്ളതിലധികം മേന്‍മ ആരും ഭാവിക്കരുത്‌; മറിച്ച്‌, ദൈവം ഓരോരുത്തര്‍ക്കും നല്‍കിയിരിക്കുന്ന വിശ്വാസത്തിന്റെ അളവനുസരിച്ചു വിവേകപൂര്‍വം ചിന്തിക്കുവിന്‍.
നമുക്ക്‌ ഒരു ശരീരത്തില്‍ അനേകം അവയവങ്ങള്‍ ഉണ്ടല്ലോ. എല്ലാ അവയവങ്ങള്‍ക്കും ഒരേ ധര്‍മമല്ല.
അതുപോലെ, നാം പലരാണെങ്കിലും ക്രിസ്‌തുവില്‍ ഏകശരീരമാണ്‌. എല്ലാവരും പരസ്‌പരം ബന്‌ധപ്പെട്ട അവയവങ്ങളുമാണ്‌.
നമുക്കു ലഭിച്ചിരിക്കുന്ന കൃപയനുസരിച്ചു നമുക്കുള്ള ദാനങ്ങളും വ്യത്യസ്‌തങ്ങളാണ്‌. പ്രവചനവരം വിശ്വാസത്തിനു ചേര്‍ന്നവിധം പ്രവചിക്കുന്നതിലും,
ശുശ്രൂഷാവരം ശുശ്രൂഷാ നിര്‍വഹണത്തിലും, അധ്യാപനവരം അധ്യാപനത്തിലും,
ഉപദേശവരം ഉപദേശത്തിലും നമുക്ക്‌ ഉപയോഗിക്കാം. ദാനംചെയ്യുന്നവന്‍ ഒൗദാര്യത്തോടെയും, നേതൃത്വം നല്‍കുന്നവന്‍ തീക്‌ഷ്‌ണതയോടെയും, കരുണ കാണിക്കുന്നവന്‍ പ്രസന്നതയോടെയും പ്രവര്‍ത്തിക്കട്ടെ.
നിങ്ങളുടെ സ്‌നേഹം നിഷ്‌കളങ്കമായിരിക്കട്ടെ. തിന്‍മയെ ദ്വേഷിക്കുവിന്‍; നന്‍മയെ മുറുകെപ്പിടിക്കുവിന്‍.
നിങ്ങള്‍ അന്യോന്യം സഹോദരതുല്യം സ്‌നേഹിക്കുവിന്‍; പരസ്‌പരം ബഹുമാനിക്കുന്നതില്‍ ഓരോരുത്തരും മുന്നിട്ടുനില്‍ക്കുവിന്‍.
തീക്‌ഷ്‌്‌ണതയില്‍ മാന്‌ദ്യം കൂടാതെ ആത്‌മാവില്‍ ജ്വലിക്കുന്നവരായി കര്‍ത്താവിനെ ശുശ്രൂഷിക്കുവിന്‍.
പ്രത്യാശയില്‍ സന്തോഷിക്കുവിന്‍; ക്ലേശങ്ങളില്‍ സഹനശീലരായിരിക്കുവിന്‍; പ്രാര്‍ഥനയില്‍ സ്‌ഥിരതയുള്ളവരായിരിക്കുവിന്‍.
വിശുദ്‌ധരെ അവരുടെ ആവശ്യങ്ങളില്‍ സഹായിക്കുവിന്‍; അതിഥി സത്‌കാരത്തില്‍ തത്‌പരരാകുവിന്‍.

✝️എവൻഗെലിയോൻ
📙 ലൂക്കാ 1:39-45

👤വിശുദ്ധ ലൂക്കാ അറിയിച്ച നമ്മുടെ കർത്താവ് ഈശോമിശിഹായുടെ സുവിശേഷം .

👥നമ്മുടെ കർത്താവായ മിശിഹായ്ക്ക് സ്തുതി

ആദിവസങ്ങളില്‍, മറിയംയൂദയായിലെ മലമ്പ്രദേശത്തുള്ള ഒരു പട്ടണത്തിലേക്കു തിടുക്കത്തില്‍യാത്രപുറപ്പെട്ടു.
അവള്‍ സഖറിയായുടെ വീട്ടില്‍ പ്രവേശിച്ച്‌ എലിസബത്തിനെ അഭിവാദനം ചെയ്‌തു.
മറിയത്തിന്റെ അഭിവാദനം കേട്ടപ്പോള്‍ എലിസബത്തിന്റെ ഉദരത്തില്‍ ശിശു കുതിച്ചു ചാടി. എലിസബത്ത്‌ പരിശുദ്‌ധാത്‌മാവു നിറഞ്ഞവളായി.
അവള്‍ ഉദ്‌ഘോഷിച്ചു: നീ സ്‌ത്രീകളില്‍ അനുഗൃഹീതയാണ്‌. നിന്റെ ഉദരഫലവും അനുഗൃഹീതം.
എന്റെ കര്‍ത്താവിന്റെ അമ്മഎന്റെ അടുത്തു വരാനുള്ള ഈ ഭാഗ്യം എനിക്ക്‌ എവിടെ നിന്ന്‌?
ഇതാ, നിന്റെ അഭിവാദനസ്വരം എന്റെ ചെവികളില്‍ പതിച്ചപ്പോള്‍ ശിശു എന്റെ ഉദരത്തില്‍ സന്തോഷത്താല്‍ കുതിച്ചുചാടി.
കര്‍ത്താവ്‌ അരുളിച്ചെയ്‌ത കാര്യങ്ങള്‍ നിറവേറുമെന്ന്‌ വിശ്വസിച്ചവള്‍ ഭാഗ്യവതി.

👥നമ്മുടെ കർത്താവായ മിശിഹായ്ക്ക് സ്തുതി .

🌳വിചിന്തനം ............✍️

"പരസ്പരം ബഹുമാനിക്കുന്നതിൽ ഓരോരുത്തരും മുന്നിട്ടു നിൽക്കുവിൻ"
(റോമാ 12:10) പരസ്പരം ബഹുമാനിക്കുക. ദൈവമാതാവായിത്തിർന്നിട്ടും പരിശുദ്ധ അമ്മ , തന്റെ ഏളയമ്മയും വൃദ്ധയുമായ ഏലിശ്വായെ പരിചരിക്കുവാൻ മലമുകളിലുള്ള അവരുടെ ഭവനത്തിലേക്ക് യാത്രയാകുന്നു. ജീവിത സായഹ്നത്തിൽ അവർക്കു ലഭിച്ച ദൈവാനുഗ്രഹത്തിൽ അവരോടൊപ്പം സന്തോഷിക്കുവാൻ ഇറങ്ങിപുറപ്പെടുന്ന മറിയം. നന്മ ചെയ്യുവാൻ നമുക്കു ലഭിക്കുന്ന ഒരു അവസരവും പാഴാക്കരുതന്നു കൂടി മാതാവ് നമുക്കു കാണിച്ചു തരുന്നു. വലിപ്പചെറുപ്പം നോക്കാതെ മറ്റുള്ളവർക്ക് നന്മ ചെയ്യുമ്പോൾ നാം അവരെ ബഹുമാനിക്കുന്നു. തന്റെ ജീവിതത്തിൽ സംഭവിച്ച അസാധാരണ കാര്യങ്ങൾ നന്മ ചെയ്യുന്നതിൽനിന്നും മറിയത്തെ പിൻതിരിപ്പിക്കുന്നില്ല. ദൈവത്തിൽ ആശ്രയിച്ച്‌, അവിടുത്തെ വചനത്തിൽ വിശ്വസിക്കുന്നവനു വലിപ്പം ചെറുപ്പം നന്മക്കു തടസ്സമല്ല.. ദൈവത്തിലുള്ള വിശ്വാസം മറിയത്തെ ഭാഗ്യവതിയാക്കിയപ്പോലെ നമുക്കും ദൈവത്തിന്റെയും മനുഷ്യരുടെയും മുമ്പിൽ എളിമപ്പെട്ടു ജീവിക്കാം .
കഴിയും പോലെ നന്മ ചെയ്യുവാനുള്ള അവസരങ്ങൾ പാഴാക്കാതെ നന്മ ചെയ്യുന്നവരാകാം..

🌿🌿🌿🌿🌿🌿🌿🌿🌿🌿🌿🌿
NB :💙"ബുദ്ധിയും ആത്മാവും ശരീരവും തമ്മിലുള്ള കൂടിച്ചേരലാണ് ജീവിതം"♥️
✍️മഹാനായ വിശുദ്ധ അന്തോണി.
🎵🎶🎵🎶🎵🎶🎵🎶🎶🎵

25/05/2026

🧚കെരൂബ് 🧚26/05/2026
ശ്ലീഹാ ഒന്നാം ചൊവ്വ

📖വായനകൾ

🛑എങ്കർത്താ
📕1 കോറിന്തോസ്‌ 12 : 4-11+28-31

ദാനങ്ങളില്‍ വൈവിധ്യം ഉണ്ടെങ്കിലും ആത്‌മാവ്‌ ഒന്നുതന്നെ.
ശുശ്രൂഷകളില്‍വൈവിധ്യം ഉണ്ടെങ്കിലും കര്‍ത്താവ്‌ ഒന്നുതന്നെ.
പ്രവൃത്തികളില്‍ വൈവിധ്യം ഉണ്ടെങ്കിലും എല്ലാവര്‍ക്കും എല്ലാറ്റിലും പ്രചോദനം നല്‍കുന്ന ദൈവം ഒന്നുതന്നെ.
ഓരോരുത്തരിലും ആത്‌മാവുവെളിപ്പെടുന്നത്‌ പൊതുനന്‍മയ്‌ക്കുവേണ്ടിയാണ്‌.
ഒരേ ആത്‌മാവുതന്നെ ഒരാള്‍ക്കു വിവേകത്തിന്റെ വചനവും മറ്റൊരാള്‍ക്കു ജ്‌ഞാനത്തിന്റെ വചനവും നല്‍കുന്നു.
ഒരേ ആത്‌മാവുതന്നെ ഒരുവനു വിശ്വാസവും വേറൊരുവനു രോഗ ശാന്തിക്കുള്ള വരവും നല്‍കുന്നു.
ഒരുവന്‌ അദ്‌ഭുതങ്ങള്‍ പ്രവര്‍ത്തിക്കാന്‍ ശക്‌തിയും, മറ്റൊരുവനു പ്രവചിക്കാന്‍ വരവും, വേറൊരുവന്‌ ആത്‌മാക്കളെ വിവേചിച്ചറിയാന്‍ കഴിവും വേറൊരുവനു ഭാഷാവരവും, വേറൊരുവന്‌ വ്യാഖ്യാനത്തിനുള്ള വരവും, അതേ ആത്‌മാവു തന്നെ നല്‍കുന്നു.
തന്റെ ഇ ച്‌ഛയ്‌ക്കൊത്ത്‌ ഓരോരുത്തര്‍ക്കും പ്രത്യേക പ്രത്യേക ദാനങ്ങള്‍ നല്‍കുന്ന ഒരേ ആത്‌മാവിന്റെ തന്നെ പ്രവൃത്തിയാണ്‌ ഇതെല്ലാം.
ദൈവം സഭയില്‍ ഒന്നാമത്‌ അപ്പസ്‌തോലന്‍മാരെയും രണ്ടാമത്‌ പ്രവാചകന്‍മാരെയും, മൂന്നാമത്‌ പ്രബോധകരെയും, തുടര്‍ന്ന്‌ അദ്‌ഭുതപ്രവര്‍ത്തകര്‍, രോഗശാന്തി നല്‍കുന്നവര്‍, സഹായകര്‍, ഭരണകര്‍ത്താക്കള്‍, വിവിധ ഭാഷകളില്‍ സംസാരിക്കുന്നവര്‍ എന്നിവരെയും നിയമിച്ചിരിക്കുന്നു. എല്ലാവരും അപ്പസ്‌തോലരോ?
എല്ലാവരും പ്രവാചകരോ? എല്ലാവരും പ്രബോധകരോ?
എല്ലാവരും അദ്‌ഭുതപ്രവര്‍ത്തകരോ? എല്ലാവര്‍ക്കും രോഗശാന്തിക്കുള്ള വരങ്ങളുണ്ടോ? എല്ലാവരും വിവിധഭാഷകളില്‍ സംസാരിക്കുന്നുണ്ടോ? എല്ലാവരും വ്യാഖ്യാനിക്കുന്നുണ്ടോ?
എന്നാല്‍, ഉത്‌കൃഷ്‌ടദാനങ്ങള്‍ക്കുവേണ്ടി തീക്‌ഷ്‌ണമായി അഭിലഷിക്കുവിന്‍. ഉത്തമ മായ മാര്‍ഗം ഞാന്‍ നിങ്ങള്‍ക്കു കാണിച്ചു തരാം.

✝️എവൻഗെലിയോൻ
📙 ലൂക്കാ 19:11-27

👤വിശുദ്ധ ലൂക്കാ അറിയിച്ച നമ്മുടെ കർത്താവ് ഈശോമിശിഹായുടെ സുവിശേഷം .

👥നമ്മുടെ കർത്താവായ മിശിഹായ്ക്ക് സ്തുതി

🥇പത്തു നാണയത്തിന്റെ ഉപമ🥇
(മത്താ 25,14-30)

അവർ ഇതു കേട്ടുകൊണ്ടിരിക്കുമ്പോൾ, അവൻ തുടർന്ന് ഒരു ഉപമ പറഞ്ഞു. കാരണം, അവൻ ജറുസലേമിനു സമീപത്തായിരുന്നു; ദൈവരാജ്യം ഉടൻ പ്രത്യക്ഷമാകുമെന്ന് അവർ വിചാരിക്കുകയും ചെയ്തിരുന്നു. അവൻ പറഞ്ഞു: കുലീനനായ ഒരു മനുഷ്യൻ രാജപദവി സ്വീകരിച്ചു തിരിച്ചുവരാൻ ദൂരദേശ ത്തേക്കു പോയി. അവൻ ഭൃത്യരിൽ പത്തുപേരെ വിളിച്ച്, പത്തു നാണയം അവർക്കു നല്കിക്കൊണ്ടു പറഞ്ഞു: ഞാൻ തിരിച്ചുവരുന്നതുവരെ നിങ്ങൾ ഇതു കൊണ്ടു വ്യാപാരം ചെയ്യുവിൻ. അവന്റെ പൗരന്മാർ അവനെ വെറുത്തിരുന്നു. ഇവൻ ഞങ്ങളെ ഭരിക്കാൻ ഞങ്ങൾ ഇഷ്ടപ്പെടുന്നില്ല എന്നു പറഞ്ഞ് അവർ ഒരു പ്രതിനിധിസംഘത്തെ അവന്റെ പിന്നാലേ അയച്ചു.
അവനാകട്ടെ, രാജപദവി സ്വീകരിച്ചു തിരിച്ചുവന്നു താൻ പണം നല്‌കിയിരുന്ന ഭൃത്യർ വ്യാപാരം ചെയ്‌ത് എന്തു സമ്പാദിച്ചെന്ന് അറിയുന്നതിന് അവരെ വിളിക്കാൻ അവൻ കല്‌പിച്ചു . ഒന്നാമൻ വന്നുപറഞ്ഞു: യജമാനനേ, നിൻ്റെ നാണയം പത്തുകൂടി നേടിയിരിക്കുന്നു. അവൻ പറഞ്ഞു: കൊള്ളാം, നല്ലവനായ ഭൃത്യാ, ചെറിയകാര്യത്തിൽ വിശ്വസ്‌തനായിരുന്നതു കൊണ്ട് പത്തു നഗരങ്ങളുടെമേൽ നീ അധികാരിയായിരിക്കുക. രണ്ടാമൻ വന്നു പറഞ്ഞു: യജമാനനേ, നിന്റെ നാണയം അഞ്ചുകൂടി സമ്പാദിച്ചിരിക്കുന്നു. യജമാനൻ അയാളോടു പറഞ്ഞു: നീ അഞ്ചു നഗരങ്ങളുടെ മേൽ അധികാരിയായിരിക്കുക. വേറൊരുവൻ വന്നു പറഞ്ഞു: യജമാനനേ, ഞാൻ തൂവാലയിൽ പൊതിഞ്ഞുവച്ചിരുന്ന നിൻ്റെ നാണയം ഇതാ. നിന്നെ എനിക്കു ഭയമായിരുന്നു. കാരണം, നീ കർക്കശനും വയ്ക്കാത്തത് എടുക്കുന്നവനും വിതയ്ക്കാത്തതു കൊയ്യുന്നവനുമാണ്. അവൻ പറഞ്ഞു: ദുഷ്ടഭൃത്യാ, നിന്റെ വാക്കുകൊണ്ടുതന്നെ നിന്നെ ഞാൻ വിധിക്കും. ഞാൻ കർക്കശനും വയ്ക്കാത്തത് എടുക്കുന്നവനും വിതയ്ക്കാത്തതു കൊയ്യുന്നവനും ആണെന്നു . നീ അറിഞ്ഞിരുന്നില്ലേ? പിന്നെ നീ എന്തുകൊണ്ട് എൻ്റെ പണം പണമിടപാടുകാരെ ഏല്പിച്ചില്ല? എങ്കിൽ, ഞാൻ മടങ്ങിവന്നപ്പോൾ പലിശയോടുകൂടെ അതു തിരിച്ചു വാങ്ങുമായിരുന്നില്ലേ? അവൻ അടുത്തു നിന്നിരുന്നവരോടു പറഞ്ഞു: അവനിൽനിന്ന് ആ നാണയം എടുത്ത് പത്തുനാണയമുള്ളവനു കൊടുക്കുക. അവർ അവനോടു പറഞ്ഞു: യജമാനനേ, അവനു പത്തു നാണയമുണ്ടല്ലോ. ഞാൻ നിങ്ങളോടു പറയുന്നു, ഉള്ളവന് കൊടുക്കപ്പെടും, ഇല്ലാത്തവനിൽനിന്ന് ഉള്ളതുപോലും എടുക്കപ്പെടും. ഞാൻ ഭരിക്കുന്നത് ഇഷ്ടമില്ലാതിരുന്ന എന്റെ ശത്രുക്കളെ ഇവിടെ കൊണ്ടുവന്ന് എൻ്റെ മുമ്പിൽവച്ച് കൊന്നുകളയുവിൻ.

👥നമ്മുടെ കർത്താവായ മിശിഹായ്ക്ക് സ്തുതി

വിചിന്തനം...........

🥇🥈🥉താലന്തുകൾ🥉🥈🥇

ഈശോ നാഥൻ താലന്തുകളുടെ ഉപമയിലുടെ ദൈവരാജ്യത്തിൻ്റെ അഭിവൃദ്ധിക്ക് വേണ്ടി നൽകപ്പെട്ടിരിക്കുന്ന കഴിവുകൾ വിനിയോഗിക്കേണ്ടതിൻ്റെ അവശ്യകത പഠിപ്പിക്കുന്നു.

ഈ ഉപമയിൽ രണ്ടു തരം വ്യക്തികളെ കാണാം. ലഭിച്ച താലന്തുകൾ ബിസിനസ്സ് ചെയ്ത് ഇരട്ടിപ്പിച്ചവർ. ലഭിച്ച സമ്പത്ത് ബിസിനസ്സ് ചെയ്താൽ നഷ്ടമാകുമെന്ന് ഭയന്ന് നിഷ്ക്രിയനായി ജീവിക്കുന്ന മടിയനും ദുഷ്ടനുമായ വ്യക്തി.

ഈശോയെയും ഈശോയുടെ സുവിശേഷത്തെയും തള്ളി നിഷ്ക്രിയരായി നൽകപ്പെട്ട നിയമത്തെയും സത്യത്തെയും ലോകത്തിനു വെളിപ്പെടുത്താതെ " നിയമത്തിനു ചുറ്റും വേലി കെട്ടി "കഴിയുന്ന ഇസ്രയേൽ മക്കൾക്ക് ലഭിക്കുവാനിരിക്കുന്ന ശിക്ഷയുടെ മുന്നറിയിപ്പു കൂടിയായിരുന്നു ഈ ഉപമ .ലോകത്തിനു മുഴുവൻ പങ്കു ചേരുന്നതിനു വേണ്ടി ഇസ്രയേലിനെ വിശ്വസിപ്പിച്ചേൽപ്പിച്ച ദൈവിക വെളിപാടുകൾ അവർ ഒളിച്ചു വച്ചു എന്നതായിരുന്നു അവർ ചെയ്ത തെറ്റ്.

അന്ന് ഇസ്രയേൽ മക്കളോടു പറഞ്ഞ അതേ കാര്യം ഇന്ന് തിരുസഭാ മക്കളോടും (പുതിയ ഇസ്രയേൽ ) അവിടുന്ന് ആവർത്തിക്കുന്നു. "സർവ്വജനതകൾക്കുമായി നൽകിയ ആത്മീയ സമ്പത്ത് നിങ്ങൾ എന്തു ചെയ്യുന്നുവെന്ന് അവിടുന്നു ആരായുന്നു.

തൻ്റെ മക്കൾക്ക് ദൈവം കഴിവുകൾ നൽകിയിരിക്കുന്നത് ഒരേ അളവിലല്ല. വിത്യസ്ത വ്യക്തികൾക്ക് വിവിധ അളവിലാണ് കഴിവുകൾ ഉള്ളത്. നമുക്കു ലഭിച്ചിരിക്കുന്ന കഴിവുകളുടെ എണ്ണത്തേക്കാളുപരിയായി ലഭിച്ചിരിക്കുന്ന കഴിവുകൾ എപ്രകാരം നാം വിനിയോഗിക്കുന്നു എന്നതാണ് പരമപ്രധാനം.ഇല്ലാത്ത കഴിവുകളുടെ കണക്ക് ദൈവം ചോദിക്കുന്നില്ല .കഴിവുകളിൽ നാം തുല്യരല്ലായിരിക്കാം എന്നാൽ പരിശ്രമത്തിൽ നാം തുല്യരായിരിക്കണം.

നാം ഒരു പ്രവർത്തി നന്നായി ചെയ്യുമ്പോൾ ദൈവം കുടുതൽ ചുമതലകൾ നമുക്കു പ്രതിഫലമായി തരുന്നു. നൽകപ്പെട്ട പ്രവൃത്തി ചെയ്തു കഴിഞ്ഞാൽ വിശ്രമമല്ല അവിടുന്നു തരുന്നത്;കുടുതൽ ജോലികൾ ഭരമേല്പിച്ച് ദൈവത്തിൻ്റെ ജോലിയിൽ നമുക്കും കുടുതൽ ഉത്തരവാദിത്വമുള്ള പങ്കാളിത്തം അവിടുന്നു നൽകുന്നു. കൂടുതൽ നല്ല കാര്യങ്ങൾ ദൈവമഹത്വത്തിനായി ചെയ്യുവാനുള്ള കരുത്ത് അവിടുന്നു പ്രതിഫലമായി നൽകുന്നു.

പരിശ്രമിക്കാൻ പോലും മടി കാണിക്കുന്നവൻ ശിക്ഷിക്കപ്പെട്ടിരിക്കും. ഒരു താലന്തു ലഭിച്ചവൻ ശിക്ഷിക്കപ്പെടുവാൻ കാരണം അതു നഷ്ടപ്പെടുത്തി എന്നതല്ല പ്രത്യുതാ അതു കൊണ്ട് ഒന്നും ചെയ്തില്ല എന്നതാണ്. നിഷ്ക്രിയത്വമല്ല, എന്തെങ്കിലും പ്രവർത്തിക്കുവാനുള്ള സാഹസികതയാണ് അവിടുന്ന് കാംക്ഷിക്കുന്നത്. കഴിവുകേടിനെ അവിടുന്നു വിധിക്കുന്നില്ല. എന്നാൽ എനിക്ക് കുറച്ചേയുള്ള എന്ന വിലാപമനോഭാവത്തെ അവിടുന്നു നീതികരിക്കുന്നില്ല.

"ഇല്ലാത്തവനില്‍നിന്ന്‌ ഉള്ളതുപോലും എടുക്കപ്പെടും." ഈ ചൊല്ലിൻ്റെ അർത്ഥമെന്തന്നാൽ, ലഭിച്ച എന്തെങ്കിലും കഴിവ് നാം ഉപയോഗപ്പെടുത്തിയാൽ കുടുതൽ കഴിവുകൾ നൽകപ്പെടും; അപ്പോൾ അവൻ കൂടുതൽ സമ്പാദിക്കും.എന്നാൽ ലഭിച്ച കഴിവുകൾ ഫലപ്രദമായി ഉപയോഗപ്പെടുത്താതെ നിഷ്ക്രിയമായി ഇരുന്നാൽ കഴിവുകൾ മുരടിച്ചു പോകുന്നു. ശാരീരികവും, ബൗദ്ധികവും ആത്മീയ വുമായ എല്ലാ കഴിവുകൾക്കും ഇത് ബാധകമാണ്.

ഈ ലോകത്തിലായിരിക്കവേ , നൽകപ്പെട്ടിരിക്കുന്ന ഭൗതികവും ബൗദ്ധികവും ആത്മീയവുമായ കഴിവുകളെ മനുഷ്യരുടെയും ദൈവത്തിൻ്റെയും സേവനത്തിനായി ഉപയോഗിക്കാം.

❤️🩵🤍💚🧡💙🤎💛💜

N.B. " ഉണ്ടായിരിക്കുകയും കൊടുക്കാതിരിക്കുകയും ചെയ്യുന്നത് ചില സന്ദർഭങ്ങളിൽ മോഷണത്തെക്കാൾ മോശമാണ്. "

🥇🥈🥉🥇🥈🥉🥇🥈🥉
കെരൂബ്

24/05/2026

24/05/2026

🧚കെരൂബ് 🧚25/05/202
ശ്ലീഹാക്കാലം ഒന്നാം തിങ്കൾ

📖വായനകൾ

🛑എങ്കർത്താ
📕ഗലാത്തിയാ 3 : 10-14

നിയമാനുഷ്‌ഠാനത്തില്‍ ആശ്രയമര്‍പ്പിക്കുന്ന എല്ലാവരും ശാപത്തിന്‌ വിധേയരാണ്‌. എന്തെന്നാല്‍, ഇപ്രകാരം എഴുതപ്പെട്ടിരിക്കുന്നു: നിയമഗ്രന്‌ഥത്തില്‍ എഴുതപ്പെട്ടിരിക്കുന്നതെല്ലാം അനുസരിക്കാതെയും പ്രവര്‍ത്തിക്കാതെയും ഇരിക്കുന്നവന്‍ ശപിക്കപ്പെട്ടവനാണ്‌.
ഒരുവനും ദൈവസന്നിധിയില്‍ നിയമംവഴി നീതീകരിക്കപ്പെടുന്നില്ല എന്നു വ്യക്‌തമാണ്‌. എന്തെന്നാല്‍, നീതിമാന്‍ വിശ്വാസംവഴിയാണു ജീവിക്കുക.
നിയമത്തിന്റെ അടിസ്‌ഥാനം വിശ്വാസമല്ല; എന്തെന്നാല്‍, അവ അനുഷ്‌ഠിക്കുന്നവന്‍ അവവഴി ജീവിക്കും.
ക്രിസ്‌തു നമ്മെപ്രതി ശപിക്കപ്പെട്ടവനായിത്തീര്‍ന്നുകൊണ്ടു നിയമത്തിന്റെ ശാപത്തില്‍നിന്നു നമ്മെരക്ഷിച്ചു. എന്തെന്നാല്‍, മരത്തില്‍ തൂക്കപ്പെടുന്നവന്‍ ശപിക്കപ്പെട്ടവനാണ്‌ എന്ന്‌ എഴുതിയിരിക്കുന്നു.
അബ്രാഹത്തിനു ലഭിച്ച അനുഗ്രഹം യേശുക്രിസ്‌തുവഴി വിജാതീയരിലേക്കും വ്യാപിക്കേണ്ടതിനും ആത്മാവിന്റെ വാഗ്‌ദാനം വിശ്വാസം വഴി നമ്മള്‍ പ്രാപിക്കേണ്ടതിനും ആണ്‌ ഇപ്രകാരം സംഭവിച്ചത്‌.

✝️എവൻഗെലിയോൻ
📙യോഹന്നാൻ 16:5-15

👤വിശുദ്ധ യോഹന്നാൻ അറിയിച്ച നമ്മുടെ കർത്താവ് ഈശോമിശിഹായുടെ സുവിശേഷം .

👥നമ്മുടെ കർത്താവായ മിശിഹായ്ക്ക് സ്തുതി

എന്നാല്‍, ഇപ്പോള്‍ ഞാന്‍ എന്നെ അയച്ചവന്റെ അടുക്കലേക്കു പോവുകയാണ്‌. എന്നിട്ടും നീ എവിടെപോകുന്നു എന്ന്‌ നിങ്ങളിലാരും എന്നോടു ചോദിക്കുന്നില്ല.
ഞാന്‍ ഇതെല്ലാം നിങ്ങളോടു പറഞ്ഞതുകൊണ്ട്‌ നിങ്ങളുടെ ഹൃദയം ദുഃഖപൂരിതമായിരിക്കുന്നു.
എങ്കിലും, സത്യം ഞാന്‍ നിങ്ങളോടു പറയുന്നു. നിങ്ങളുടെ നന്‍മയ്‌ക്കുവേണ്ടിയാണ്‌ ഞാന്‍ പോകുന്നത്‌. ഞാന്‍ പോകുന്നില്ലെങ്കില്‍, സഹായകന്‍ നിങ്ങളുടെ അടുക്കലേക്കു വരുകയില്ല. ഞാന്‍ പോയാല്‍ അവനെ നിങ്ങളുടെ അടുക്കലേക്കു ഞാന്‍ അയയ്‌ക്കും.
അവന്‍ വന്ന്‌ പാപത്തെക്കുറിച്ചും നീതിയെക്കുറിച്ചും ന്യായവിധിയെക്കുറിച്ചും ലോകത്തെ ബോധ്യപ്പെടുത്തും -
അവര്‍ എന്നില്‍ വിശ്വസിക്കാത്തതിനാല്‍ പാപത്തെക്കുറിച്ചും ,
ഞാന്‍ പിതാവിന്റെ അടുക്കലേക്കു പോകുന്നതുകൊണ്ടും നിങ്ങള്‍ ഇനിമേലില്‍ എന്നെ കാണുകയില്ലാത്തതുകൊണ്ടും നീതിയെക്കുറിച്ചും ,
ഈ ലോകത്തിന്റെ അധികാരി വിധിക്കപ്പെട്ടിരിക്കുന്നതിനാല്‍ ന്യായവിധിയെക്കുറിച്ചും ബോധ്യപ്പെടുത്തും.
ഇനിയും വളരെ കാര്യങ്ങള്‍ എനിക്കു നിങ്ങളോടു പറയാനുണ്ട്‌. എന്നാല്‍, അവ ഉള്‍ക്കൊള്ളാന്‍ ഇപ്പോള്‍ നിങ്ങള്‍ക്കു കഴിവില്ല.
സത്യാത്‌മാവു വരുമ്പോള്‍ നിങ്ങളെ സത്യത്തിന്റെ പൂര്‍ണതയിലേക്കു നയിക്കും.
അവന്‍ സ്വമേധയാ ആയിരിക്കയില്ല സംസാരിക്കുന്നത്‌; അവന്‍ കേള്‍ക്കുന്നതു മാത്രം സംസാരിക്കും. വരാനിരിക്കുന്ന കാര്യങ്ങള്‍ അവന്‍ നിങ്ങളെ അറിയിക്കും. അവന്‍ എനിക്കുള്ളവയില്‍നിന്നു സ്വീകരിച്ച്‌ നിങ്ങളോടു പ്രഖ്യാപിക്കും. അങ്ങനെ അവന്‍ എന്നെ മഹത്വപ്പെടുത്തും.
പിതാവിനുള്ളതെല്ലാം എനിക്കുള്ളതാണ്‌. അതുകൊണ്ടാണ്‌ എനിക്കുള്ളവയില്‍നിന്നു സ്വീകരിച്ച്‌ അവന്‍ നിങ്ങളോടു പ്രഖ്യാപിക്കും എന്നു ഞാന്‍ പറഞ്ഞത്‌.

👥നമ്മുടെ കർത്താവായ മിശിഹായ്ക്ക് സ്തുതി

🌳വിചിന്തനo ...............✍️

യേശു നാഥൻ്റെ വിടവാങ്ങൽ പ്രഭാഷണം. യേശു നാഥൻ്റെ സഹനവും കുരിശുമരണവും ശേഷമുള്ള ഉത്ഥാനവുo മനുഷ്യവർഗ്ഗത്തിൻ്റെ നന്മയ്ക്കു വേണ്ടിയാണന്ന് അവിടുന്നു പഠിപ്പിക്കുന്നു. സ്ഥല-സമയ - കാലത്തിലായിരുന്നവൻ്റെ കടന്നു പോക്ക് അനിവാര്യമാണ്; കാരണം അവൻ ഇനി മുതൽ പരിശുദ്ധാത്മാവിലുടെ നിത്യം നമ്മിൽ വസിക്കുന്നു. നമ്മിലെ എല്ലാ അപൂർണ്ണതകളെയും ഈ സത്യാത്മാവ് പൂർണ്ണമാക്കും. സത്യവും നീതിയും അവിടുന്ന്
നമ്മെ പഠിപ്പിക്കും. നമ്മിലെ കുറവുകളെ നിറവുകളാക്കുന്ന സത്യത്മാവിനെ നമുക്കു സ്വീകരിക്കാം.

23/05/2026

11 മക്കള്‍, 68 കൊച്ചുമക്കള്‍ അവരുടെ 109 ചെറുമക്കള്‍, അമ്മമാരുടെ ഉദരത്തിലുള്ള 11 ഗര്‍ഭസ്ഥശിശുക്കള്‍… ജീനും ഡൊറോത്തിയും ദൈവത്തിന് മുന്നില്‍ നന്ദിയോടെ കൈകൂപ്പി! ദൈവാനുഗ്രഹത്തിന്റെ 70 സംവത്സരങ്ങള്‍ക്ക്..

തുടർന്ന് വായിക്കാൻ: https://shalomnews.in/couple-celebrates-70th-wedding-anniversary/

22/05/2026

🧚കെരൂബ് 🧚23/05/2026
ഉയിർപ്പ് ഏഴാം ശനി

📖വായനകൾ

🛑എങ്കർത്താ
📕2 കോറിന്തോസ്‌ 1 : 17-22

എന്റെ ഈ തീരുമാനത്തില്‍ ഞാന്‍ ഉറപ്പില്ലാത്തവനായിരുന്നുവോ? ഒരേ സമയം അതേ എന്നും അല്ല എന്നും പറയാന്‍ മുതിരുന്ന ലൗകിക മനുഷ്യനെപ്പോലെയാണോ ഞാന്‍ പദ്‌ധതികള്‍ തയ്യാറാക്കുന്നത്‌?
നിങ്ങളോടുള്ള ഞങ്ങളുടെ വാക്കുകള്‍ ഒരേ സമയം അതേ എന്നും അല്ല എന്നും ആയിരുന്നില്ല എന്നതിനു വിശ്വസ്‌തനായ ദൈവം സാക്‌ഷിയാണ്‌.
എന്തുകൊണ്ടെന്നാല്‍, നിങ്ങളുടെയിടയില്‍ ഞങ്ങള്‍, ഞാനും സില്‍വാനോസും തിമോത്തേയോസും, പ്രസംഗിച്ച ദൈവപുത്രനായ യേശുക്രിസ്‌തു അതേയും അല്ലയും ആയിരുന്നില്ല. എല്ലായ്‌പോഴും അതേ തന്നെ ആയിരുന്നു.
ദൈവത്തിന്റെ സകല വാഗ്‌ദാനങ്ങളും ക്രിസ്‌തുവില്‍ അതേ എന്നുതന്നെ. അതുകൊണ്ടു തന്നെയാണു ദൈവമഹത്വത്തിന്‌ അവന്‍ വഴി ഞങ്ങള്‍ ആമേന്‍ പറയുന്നത്‌.
ഞങ്ങളെ നിങ്ങളോടുകൂടെ ക്രിസ്‌തുവില്‍ സ്‌ഥാപിച്ചിരിക്കുന്നതും അഭിഷേകം ചെയ്‌തിരിക്കുന്നതും ദൈവമാണ്‌.
അവിടുന്ന്‌ നമ്മില്‍ തന്റെ മുദ്രപതിക്കുകയും അച്ചാരമായിട്ടു തന്റെ ആത്‌മാവിനെ നമ്മുടെ ഹൃദയങ്ങളിലേക്കു പകരുകയും ചെയ്‌തിരിക്കുന്നു.

✝️എവൻഗെലിയോൻ
📙 ലൂക്കാ 11:5-13

👤വിശുദ്ധ ലൂക്കാ അറിയിച്ച നമ്മുടെ കർത്താവ് ഈശോമിശിഹായുടെ സുവിശേഷം .

👥നമ്മുടെ കർത്താവായ മിശിഹായ്ക്ക് സ്തുതി

അവന്‍ അവരോടു പറഞ്ഞു: നിങ്ങളിലൊരുവന്‌ ഒരു സ്‌നേഹിതനുണ്ടെന്നിരിക്കട്ടെ. അര്‍ധരാത്രി അവന്റെ അടുത്തു ചെന്ന്‌ അവന്‍ പറയുന്നു: സ്‌നേഹിതാ, എനിക്കു മൂന്ന്‌ അപ്പം വായ്‌പ തരുക.ഒരു സ്‌നേഹിതന്‍ യാത്രാ മധ്യേ എന്റെ അടുക്കല്‍ വന്നിരിക്കുന്നു. അവനു കൊടുക്കാന്‍ എനിക്കൊന്നുമില്ല.
അപ്പോള്‍, അവന്റെ സ്‌നേഹിതന്‍ അകത്തുനിന്നു മറുപടി പറയുന്നു: എന്നെ ഉപദ്രവിക്കരുത്‌. കതകടച്ചു കഴിഞ്ഞു. എന്റെ കുഞ്ഞുങ്ങളും എന്റെ കൂടെ കിടക്കയിലാണ്‌. എഴുന്നേറ്റ്‌ നിനക്ക്‌ ഒന്നും തരാന്‍ സാധിക്കുകയില്ല.
ഞാന്‍ നിങ്ങളോടു പറയുന്നു, അവന്‍ സ്‌നേഹിതനാണ്‌ എന്നതിന്റെ പേരില്‍ അവന്‌ ഒന്നും കൊടുക്കുകയില്ലെങ്കില്‍ത്തന്നെ നിര്‍ബന്‌ധം നിമിത്തം എഴുന്നേറ്റ്‌ അവന്‌ വേണ്ടതു നല്‍കും.
ഞാന്‍ നിങ്ങളോടു പറയുന്നു: ചോദിക്കുവിന്‍; നിങ്ങള്‍ക്കു ലഭിക്കും. അന്വേഷിക്കുവിന്‍; നിങ്ങള്‍ കണ്ടെത്തും. മുട്ടുവിന്‍; നിങ്ങള്‍ക്കു തുറന്നുകിട്ടും.
എന്തെന്നാല്‍ ചോദിക്കുന്ന ഏവനും ലഭിക്കുന്നു. അന്വേഷിക്കുന്നവന്‍ കണ്ടെത്തുന്നു. മുട്ടുന്നവനു തുറന്നുകിട്ടുകയും ചെയ്യുന്നു.
നിങ്ങളില്‍ ഏതൊരു പിതാവാണ്‌ മകന്‍ മീന്‍ ചോദിച്ചാല്‍ പകരം പാമ്പിനെ കൊടുക്കുക?
മുട്ട ചോദിച്ചാല്‍ പകരം തേളിനെ കൊടുക്കുക?
മക്കള്‍ക്കു നല്ല ദാനങ്ങള്‍ നല്‍കാന്‍ ദുഷ്‌ടരായ നിങ്ങള്‍ക്ക്‌ അറിയാമെങ്കില്‍, സ്വര്‍ഗസ്‌ഥനായ പിതാവ്‌ തന്നോടു ചോദിക്കുന്നവര്‍ക്ക്‌ എത്രയധികമായി പരിശുദ്‌ധാത്‌മാവിനെ നല്‍കുകയില്ല!

🌳വിചിന്തനം.............✍️

നമ്മുടെ പ്രാർത്ഥനകൾ ദൈവത്തെ പരീക്ഷിക്കുവാനുള്ളതാകരുത്. നമ്മൾ കൊണ്ടുവരുന്ന പാത്രങ്ങളുടെ അളവ് അനുസരിച്ച് അവിടുന്നു പരിശുദ്ധാത്മാവിനെ തരുന്നു. സ്വാർത്ഥതയോടെ ഒറ്റയ്ക്ക് പ്രാർത്ഥിക്കാതെ കൂട്ടായ്മയിൽ അവിടുത്തെ സ്തുതിക്കുന്നവരായിരിക്കാം. അവിടുന്ന് ഇപ്രകാരം അരുളിച്ചെയ്തിരിക്കുന്നു" രണ്ടോ മൂന്നോ പേർ ഒരുമിച്ച് കൂടുന്നിടത്ത് ഞാൻ സന്നിഹിതനായിരിക്കും ". സത്യത്തിൻ്റെ ശക്തിയും ഊഷ്മാവും കൂട്ടായ്മയിലാണ് പ്രകടമാക്കുന്നത്. അമിതമായ സ്വസ്നേഹം നിമിത്തം സ്വന്തം ഇഷ്ടങ്ങളെയും സുഖ സന്തോഷങ്ങളെയും മാത്രം ദൈവത്തിൽ ആരായാതെ; കൂട്ടായ്മയിൽ ഒന്നായി ഒരു ജനമായി, പരിശുദ്ധാത്മാവിൻ്റെ നിറവിനായി, പുതിയൊരു സ്നേഹ കൂട്ടായ്മയുടെ പെന്തക്കുസ്താക്കായ് ഒരുങ്ങാം.

21/05/2026

🧚കെരൂബ് 🧚22/05/2026
ഉയിർപ്പ് ഏഴാം വെള്ളി

📖 വായനകൾ

🛑എങ്കർത്താ:
📕എഫേസോസ്‌ 6 : 14-20

അതിനാല്‍, സത്യം കൊണ്ട്‌ അരമുറുക്കി, നീതിയുടെ കവചം ധരിച്ച്‌ നിങ്ങള്‍ ഉറച്ചുനില്‍ക്കുവിന്‍.
സമാധാനത്തിന്റെ സുവിശേഷത്തിനുള്ള ഒരുക്കമാകുന്ന പാദരക്‌ഷകള്‍ ധരിക്കുവിന്‍.
സര്‍വോപരി, ദുഷ്‌ടന്റെ ജ്വലിക്കുന്ന കൂരമ്പുകളെ കെടുത്തുന്നതിന്‌ നിങ്ങളെ ശക്‌തരാക്കുന്ന വിശ്വാസത്തിന്റെ പരിച എടുക്കുവിന്‍.
രക്‌ഷയുടെ പടത്തൊപ്പി അണിയുകയും ദൈവവചനമാകുന്ന ആത്‌മാവിന്റെ വാള്‍ എടുക്കുകയും ചെയ്യുവിന്‍.
നിങ്ങള്‍ അപേക്‌ഷകളോടും യാചനകളോടും കൂടെ എല്ലാസമയവും ആത്‌മാവില്‍ പ്രാര്‍ഥനാനിരതരായിരിക്കുവിന്‍. അവിശ്രാന്തം ഉണര്‍ന്നിരുന്ന്‌ എല്ലാ വിശുദ്‌ധര്‍ക്കുംവേണ്ടി പ്രാര്‍ഥിക്കുവിന്‍.
ഞാന്‍ വായ്‌ തുറക്കുമ്പോള്‍ എനിക്കു വചനം ലഭിക്കാനും സുവിശേഷത്തിന്റെ രഹസ്യം ധൈര്യപൂര്‍വം പ്രഘോഷിക്കാനും നിങ്ങള്‍ എനിക്കുവേണ്ടി പ്രാര്‍ഥിക്കുവിന്‍.
സുവിശേഷ രഹസ്യത്തിന്റെ ബന്‌ധനസ്‌ഥനായ സ്‌ഥാനപതിയാണല്ലോ ഞാന്‍. എന്റെ കടമയ്‌ക്കൊത്തവിധം ധീരതയോടെ പ്രസംഗിക്കാന്‍വേണ്ടി നിങ്ങള്‍ പ്രാര്‍ഥിക്കണം.

✝️ എവൻഗെലിയോൻ
📙 യോഹന്നാൻ: 4 :19-24

👤വിശുദ്ധ യോഹന്നാൻ അറിയിച്ച നമ്മുടെ കർത്താവ് ഈശോമിശിഹായുടെ സുവിശേഷം .

👥നമ്മുടെ കർത്താവായ മിശിഹായ്ക്ക് സ്തുതി

✝️അവള്‍ പറഞ്ഞു: പ്രഭോ, അങ്ങ്‌ ഒരു പ്രവാചകനാണെന്നു ഞാന്‍ മനസ്‌സിലാക്കുന്നു.
ഞങ്ങളുടെ പിതാക്കന്മാര്‍ ഈ മലയില്‍ ആരാധന നടത്തി; എന്നാല്‍, യഥാര്‍ഥമായ ആരാധനാസ്‌ഥലം ജറുസലെമിലാണ്‌ എന്നു നിങ്ങള്‍ പറയുന്നു.
യേശു പറഞ്ഞു: സ്‌ത്രീയേ, എന്നെ വിശ്വസിക്കുക. ഈ മലയിലോ ജറുസലെമിലോ നിങ്ങള്‍ പിതാവിനെ ആരാധിക്കാത്ത സമയം വരുന്നു.
നിങ്ങള്‍ അറിയാത്തതിനെ ആരാധിക്കുന്നു. ഞങ്ങള്‍ അറിയുന്നതിനെ ആരാധിക്കുന്നു. എന്തെന്നാല്‍, രക്‌ഷ യഹൂദരില്‍ നിന്നാണ്‌.
എന്നാല്‍, യഥാര്‍ഥ ആരാധകര്‍ ആത്‌മാവിലും സത്യത്തിലും പിതാവിനെ ആരാധിക്കുന്ന സമയം വരുന്നു. അല്ല, അത്‌ ഇപ്പോള്‍ത്തന്നെയാണ്‌. യഥാര്‍ഥത്തില്‍ അങ്ങനെയുള്ള ആരാധകരെത്തന്നെയാണ്‌ പിതാവ്‌ അന്വേഷിക്കുന്നതും.
ദൈവം ആത്‌മാവാണ്‌. അവിടുത്തെ ആരാധിക്കുന്നവര്‍ ആത്മാവിലും സത്യത്തിലുമാണ്‌ ആരാധിക്കേണ്ടത്‌.

👥നമ്മുടെ കർത്താവായ മിശിഹായ്ക്ക് സ്തുതി

🌳വിചിന്തനം........:✍️

"യഥാർത്ഥ ആരാധകര്‍ ആത്‌മാവിലും സത്യത്തിലും പിതാവിനെ ആരാധിക്കുന്ന സമയം വരുന്നു." പരിശുദ്ധാത്മാവാകുന്ന ആത്മാവിലും യേശുവാകുന്ന ഏക സത്യത്തിലും നാം പിതാവിനെ ആരാധിക്കുമ്പോൾ ഈ വചനം പൂർത്തിയാകുന്നു. ദൈവമക്കളാക്കുന്ന ആത്മാവിനെ സ്വന്തമാക്കാതെ ദൈവത്തെ പിതാവായി ആരാധിക്കുവാൻ ആർക്കും സാധിക്കില്ല. ആത്മാവിലുടെയാണ് ദൈവം നമുക്ക് ഉന്നതത്തിൽ നിന്നും കൃപകൾ നൽകുന്നതും.

20/05/2026

🧚കെരൂബ് 🧚21/05/2026
ഉയിർപ്പ് ഏഴാം വ്യാഴം

📖വായനകൾ

🛑എങ്കർത്താ
📕അപ്പ. പ്രവര്‍ത്തനങ്ങള്‍ 10 : 44-48

പത്രോസ്‌ ഇതു പറഞ്ഞുകൊണ്ടിരിക്കുമ്പോള്‍ തന്നെ, കേട്ടുകൊണ്ടിരുന്ന എല്ലാവരുടെയുംമേല്‍ പരിശുദ്‌ധാത്‌മാവ്‌ വന്നു. വിജാതീയരുടെമേല്‍പോലും പരിശുദ്‌ധാത്‌മാവിന്റെ ദാനം വര്‍ഷിക്കപ്പെട്ടതിനാല്‍, പത്രോസിനോടുകൂടെ വന്നിരുന്ന പരിച്‌ഛേദിതരായ വിശ്വാസികള്‍ വിസ്‌മയിച്ചു.
അവര്‍ അന്യഭാഷകളില്‍ സംസാരിക്കുന്നതും ദൈവത്തെ സ്‌തുതിക്കുന്നതും അവര്‍ കേട്ടു. അപ്പോള്‍ പത്രോസ്‌ പറഞ്ഞു:
നമ്മെപ്പോലെതന്നെ പരിശുദ്‌ധാത്‌മാവിനെ സ്വീകരിച്ച ഇവര്‍ക്കു ജ്‌ഞാനസ്‌നാനജലം നിഷേധിക്കാന്‍ ആര്‍ക്കെങ്കിലും സാധിക്കുമോ?
യേശുക്രിസ്‌തുവിന്റെ നാമത്തില്‍ അവര്‍ക്ക്‌ സ്‌നാനം നല്‍കാന്‍ അവന്‍ കല്‍പിച്ചു. കുറെദിവസം തങ്ങളോടുകൂടെ താമസിക്കണമെന്ന്‌ അവര്‍ അവനോട്‌ അഭ്യര്‍ഥിച്ചു.

✝️ എവൻഗെലിയോൻ
📙 മത്തായി 7: 7-14

👤വിശുദ്ധ മത്തായി അറിയിച്ച നമ്മുടെ കർത്താവ് ഈശോമിശിഹായുടെ സുവിശേഷം .

👥നമ്മുടെ കർത്താവായ മിശിഹായ്ക്ക് സ്തുതി

ചോദിക്കുവിന്‍, നിങ്ങള്‍ക്കു ലഭിക്കും; അന്വേഷിക്കുവിന്‍, നിങ്ങള്‍ കണ്ടെത്തും; മുട്ടുവിന്‍, നിങ്ങള്‍ക്കു തുറന്നുകിട്ടും.
ചോദിക്കുന്ന ഏവനും ലഭിക്കുന്നു; അന്വേഷിക്കുന്നവന്‍ കണ്ടെത്തുന്നു; മുട്ടുന്നവനു തുറന്നുകിട്ടുകയും ചെയ്യുന്നു.
മകന്‍ അപ്പംചോദിച്ചാല്‍ കല്ലു കൊടുക്കുന്ന ആരെങ്കിലും നിങ്ങളില്‍ ഉണ്ടോ?
അഥവാ, മീന്‍ ചോദിച്ചാല്‍ പാമ്പിനെ കൊടുക്കുമോ?
മക്കള്‍ക്കു നല്ല വസ്‌തുക്കള്‍ കൊടുക്കണമെന്നു ദുഷ്‌ടരായ നിങ്ങള്‍ അറിയുന്നുവെങ്കില്‍, നിങ്ങളുടെ സ്വര്‍ഗസ്‌ഥനായ പിതാവ്‌, തന്നോടു ചോദിക്കുന്നവര്‍ക്ക്‌ എത്രയോ കൂടുതല്‍ നന്‍മകള്‍ നല്‍കും!
മറ്റുള്ളവര്‍ നിങ്ങള്‍ക്കുചെയ്‌തു തരണമെന്നു നിങ്ങള്‍ ആഗ്രഹിക്കുന്നതെല്ലാം നിങ്ങള്‍ അവര്‍ക്കു ചെയ്യുവിന്‍. ഇതാണു നിയമവും പ്രവാചകന്‍മാരും.
ഇടുങ്ങിയ വാതിലിലൂടെ പ്രവേശിക്കുവിന്‍; വിനാശത്തിലേക്കു നയിക്കുന്ന വാതില്‍ വിസ്‌തൃതവും വഴി വിശാലവുമാണ്‌; അതിലേ കടന്നുപോകുന്നവര്‍ വളരെയാണുതാനും.
എന്നാല്‍, ജീവനിലേക്കു നയിക്കുന്ന വാതില്‍ ഇടുങ്ങിയതും വഴി വീതികുറഞ്ഞതുമാണ്‌. അതു കണ്ടെത്തുന്നവരോ ചുരുക്കം.

👥നമ്മുടെ കർത്താവായ മിശിഹായ്ക്ക് സ്തുതി

🌳വിചിന്തനം...............✍️

നാമെല്ലാം നല്ലതു മാത്രം നമ്മുടെ ജീവിതത്തിൽ ആഗ്രഹിക്കുന്നു. നല്ലതു ലഭിക്കണമെങ്കിൽ നല്ലതു ചിന്തിക്കുകയും പ്രവർത്തിക്കുകയും ചെയ്യണം. ചെയ്യുവാൻ നാം ആഗ്രഹിക്കുന്ന നന്മ പ്രവർത്തികൾ പ്രവർത്തി പഥത്തിലെത്തിക്കണം. വാതിൽ ഇടുങ്ങിയതാണ്. അതിനാൽ നന്മ ചെയ്യാതിരിക്കരുത് .വിശുദ്ധർ ഈ ഇടുങ്ങിയ വാതിൽ കടന്നവരാണ്. അവരെപ്പോലെ നന്മകൾ ചെയ്ത് ഇടുങ്ങിയ വാതിൽ കടക്കുവാനുള്ള കൃപയ്ക്കായ് നമുക്കു ആത്മാർത്ഥമായി പ്രാർത്ഥിക്കാം .

🌿ദൈവവുമായുള്ള മനസ്സിൻ്റെ സംസർഗ്ഗമാണ് പ്രാർത്ഥന. വീഴ്‌ച കൂടാതെ, മദ്ധ്യസ്ഥരില്ലാതെ തൻ്റെ കർത്താവുമായി ബന്ധപ്പെടുന്നതിന് ഏതവസ്ഥയിലാണ് മനസ്സ് എത്തിച്ചേരേണ്ടത്?🌿

✍️ താപസനായ ഇവാഗ്രിയോസ് 345-399

19/05/2026

മുന്‍ ഇന്ത്യന്‍ വനിതാ ബാസ്‌കറ്റ്ബോള്‍ ടീം ക്യാപ്റ്റനും ഒളിമ്പ്യനും, ടെന്നീസ് ഇതിഹാസം ലിയാണ്ടര്‍ പെയ്‌സിന്റെ മാതാവുമായ ജെന്നിഫര്‍ പെയ്‌സ് (72) അന്തരിച്ചു. ഇന്ത്യയിലെ ഏറ്റവും പ്രശസ്തമായ കായിക കുടുംബത്തിന്റെ അവിസ്മരണീയമായ ഒരു അധ്യായത്തിനാണ് ജെന്നിഫറിന്റെ വിയോഗത്തോടെ അന്ത്യമാകുന്നത്.

തുടർന്ന് വായിക്കാൻ: https://shalomnews.in/olympian-jennifer-paes-passes-away/