14/08/2020
കൊട്ടറ ശ്രീ ഭഗവതി ക്ഷേത്രം
പൈതൃക ജ്ഞാനം - 01
ഗായത്രി മന്ത്രവും പ്രാധാന്യവും
*തത് സവിതുർവരേണ്യം*
*ഭർഗോ ദേവസ്യ ധീമഹി*
*ധിയോ യോന: പ്രചോദയാത്*
('ഓം' എന്ന പ്രണവവും 'ഭൂർഭുവ: സ്വ:' എന്ന വ്യാഹൃതിയും തുടക്കത്തിൽ ചേർത്താണ് ഈ മന്ത്രം ചൊല്ലേണ്ടത്).
ഓം = പ്രണവം (പരബ്രഹ്മം). ഭൂ = ഭൂലോകം. ഭുവ: = ഭുവർ ലോകം (അന്തരീക്ഷം, ഭൂമിക്കു മുകളിലും സൂര്യനു താഴെയുമുള്ള ഭൂപ്രതലം). സ്വ: = സ്വർലോകം. തത് = അത്. സവിതു: = സവിതാവിന്റെ (സൂര്യന്റെ). ഭർഗ: = തേജസ്സ്. വരേണ്യം = അതിശ്രേഷ്ഠമായ. വയം ധീമഹി = ഞങ്ങൾ ധ്യാനിക്കുന്നു. യ: = യാതൊരു. ന: = ഞങ്ങളുടെ. ധിയ: = ബുദ്ധി. പ്രചോദയാത് = പ്രചോദിപ്പിക്കുമാറാകട്ടെ, പ്രകാശിപ്പിക്കട്ടെ.
ഭൂലോകം, അന്തരീക്ഷം, സ്വർഗലോകം ഇവയെ പ്രകാശിപ്പിക്കുന്ന ദേവനായ സവിതാവിന്റെ അതിശ്രേഷ്ഠമായ ആ തേജസിനെ ഞങ്ങൾ ധ്യാനിക്കുന്നു. ആ സവിതാവ് ഞങ്ങളുടെ ബുദ്ധിയെ പ്രചോദിപ്പിക്കുമാറാകട്ടെ.
ഋഗ്വേദത്തിലെ പ്രസിദ്ധമായ ഗായത്രിമന്ത്രമാണിത്. (മണ്ഡലം 3, സൂക്തം 62, ഋഷി- വിശ്വാമിത്രൻ, ദേവത- സവിതാവ്). ഇരുട്ടിനെ അകറ്റുന്ന, ഉറങ്ങുന്നവരെ ഉണർത്തുന്ന, എല്ലാവരെയും ഒരു പോലെ കാണുന്ന അദ്വൈത പ്രഭാവമാണ് സൂര്യൻ. പുറത്തെ ഇരുട്ടെന്ന പോലെ ഉള്ളിലെ ഇരുട്ടും അകറ്റി ജീവിതം സഫലവും ശ്രേഷ്ഠവുമാകാൻ ഞങ്ങളുടെ ബുദ്ധിയെ പ്രകാശിപ്പിക്കണമേ എന്നാണ് ഋഷിയുടെ പ്രാർത്ഥന. എന്റെ ബുദ്ധിയെ എന്നല്ല, ഞങ്ങളുടെ ബുദ്ധിയെ എന്നാണ് പറയുന്നത്. സ്വാർത്ഥത ഒട്ടുമില്ല. നമ്മുടെ ഋഷിമാർ പ്രാർത്ഥിച്ചത് ലോകത്തിന്റെ നന്മയ്ക്കുവേണ്ടിയാണ്.
24 അക്ഷരങ്ങളാണ് ഗായത്രി മന്ത്രത്തിലുള്ളത്. ഈ വിശ്വപ്രപഞ്ചത്തിലെ സ്ഥാവരങ്ങളും ജംഗമങ്ങളുമായ ജീവികളുടെ വർഗസംഖ്യയായ 19 ന്റെ കൂടെ പഞ്ചഭൂതങ്ങളുടെ നാമസംഖ്യയായ അഞ്ചും ചേർന്നതാണ് 24 എന്ന സംഖ്യ. ബ്രഹ്മചര്യാകാലമായ 24 വർഷമാണ് ഇതു കാണിക്കുന്നതെന്ന് മറ്റൊരു അഭിപ്രായവുമുണ്ട്. വാല്മീകി മഹർഷി ഗായത്രിയുടെ ഓരോ അക്ഷരം കൊണ്ടാണ് രാമായണത്തിലെ ഓരോ ആയിരം ശ്ലോകങ്ങൾ ആരംഭിച്ചതെന്നും അങ്ങനെയാണ് രാമായണത്തിൽ 24000 ശ്ലോകങ്ങൾ ആയതെന്നും പറയുന്നു. ഗായത്രിമന്ത്രത്തിലെ ഓരോ അക്ഷരത്തിനും ഓരോ ദേവനുണ്ട്.
*ഗായത്രി അസ്തു പരം ജാപ്യം*
*നാ ഭൂതം ച ഭവിഷ്യതി*
(ഗായത്രിയോട് ഉപമിക്കാവുന്ന മറ്റൊരു മന്ത്രവും ഇന്നോളമുണ്ടായിട്ടില്ല. മേലിൽ ഉണ്ടാവുകയുമില്ല).
ദേവി ചരണങ്ങളിൽ പ്രാർത്ഥനയോടെ....
