28/09/2026
ചടയമംഗലം: ജടായുപ്പാറയിലെ ശ്രീ രാമ പാദത്തിലേക്ക് എത്തുവാൻ 501 -ാം മത്തെ പടവ് ജൂനെ അക്കാഡെ മഹാമണ്ഡലേശ്വർ ആനന്ദവനം ഭാരതി സ്വാമികൾ സമർപ്പിച്ചു.
ജടായുപ്പാറയിലുളള ശ്രീരാമ ക്ഷേത്രം , കൊക്കരണി, രാമ പാദം തുടങ്ങിയ തീർത്ഥ സ്ഥാനങ്ങളിലേക്ക് എം സി റോഡിൽ നിന്നും കാൽനടയായി എത്താനുള്ള സൗകര്യം ഒരുക്കാനാണ് പടവ് നിർമ്മാണം നടന്നു വരുന്നതു്.
മേടയിൽ ജംഗ്ഷനിൽ വെച്ച് സ്വാമിജിയെ ട്രസ്റ്റ് പ്രസിഡൻ റ് അശോകൻ തുളസിമാലയിട്ട് സ്വീകരിച്ചാനയിച്ചു. ഒന്നാം പടവിൽ വെച്ച്പൂർണ്ണ കുംഭം നൽകി വരവേറ്റു.
പദം പദം രാമ പാദം എന്ന പേരിൽ ആവിഷ്ക്കരിച്ച് നടപ്പിലാക്കി വരുന്ന പദ്ധതി പ്രകാരമാണ് പടവുകൾ സ്ഥാപിക്കുന്നത്.
ആദ്യ പടവ് 3 വർഷം മുമ്പ് അയോധ്യ ശ്രീരാമ ക്ഷേത്ര ട്രസ്റ്റി പേജ് വാർ മഠാധിപതി വിശ്വപ്രസന്ന തീർത്ഥ സ്വാമികൾ സ്ഥാപിച്ചു.
രണ്ടു വലിയ പാറക്കെട്ടുകൾക്കിടയിലുള്ള ഗുഹയിലെ ഹനുമദ് പ്രതിഷ്ഠ വരെ 201 പടവുകൾ സ്ഥാപിച്ചു കൊണ്ട് ഒന്നാം ഘട്ടം 4 മാസം മുമ്പ് പൂർത്തിയായി.
300 പടവുകൾ കൂടി പൂർത്തിയാക്കിക്കൊണ്ടാണ് മൂന്നാം ഘട്ടത്തിന് ഇന്നലെ തുടക്കം കുറിച്ചത്. അടുത്ത മകരവിളക്കോ ടെ പടവുസമർപ്പണം പൂർത്തിയാകും.
മൈലാടിയിൽ നിന്നുളള ശിലയാണ് പടവിനായി ഉപയോഗിക്കുന്നതു്. കല്ലിൽ ശില്പ വിസ്മയം തീർക്കുന്ന പ്രശസ്തശില്പകലാ വിദഗ്ദനായ ബാലുവാണ് പടവുകൾ സ്ഥാപിക്കുന്നതു്.
അടുത്ത തലമുറക്ക് ജീവിത ധാർമ്മികമൂല്യങ്ങൾ പകർന്നു കൊടുക്കുന്ന മോക്ഷഭൂമിയാണ് ജടായുപ്പാറയെന്ന് മഹാമണ്ഡലേശ്വർ സ്വാമി ആനന്ദവനം ഭാരതി പടവു സമർപ്പിച്ചു കൊണ്ട് ചൂണ്ടിക്കാട്ടി. ഭാവിയിൽ ലക്ഷക്കണക്കിന് ഭക്തരുടെ പാദസ്പർശമേൽക്കുന്ന കരിങ്കൽ പടവുകൾ മോക്ഷദായകമായ അനുഭൂതിയും അനുഭവവുമാണ് പകർന്നു നൽകുന്നത്. ത്യാഗത്തിന്റെയും സ്ത്രീ സുരക്ഷയുടെയും പ്രകാശഗോപുരമായി ജടായുപ്പാറ പരിലസിക്കട്ടെ എന്ന് അദ്ദേഹം ആശംസിച്ചു.
പടവു സമർപ്പണം കേവലം ഭൗതിക സൗകര്യത്തിന് വേണ്ടിയുള്ള നിർമ്മതിയല്ല, മറിച്ച് ആത്മ സാക്ഷാത്കാരത്തിന് ഉതകുന്ന സാധനാ യജ്ഞമാണെന്ന് കുമ്മനം രാജശേഖരൻ പറഞ്ഞു. രാജീവ് അഞ്ചൽ,
ട്രസ്റ്റ്‌പ്രസിഡൻറ് കെ. അശോകൻ, സെക്രട്ടറി രാജശേഖരൻ , ട്രഷറർ രവികുമാർ , എൻജിനീയർ കൈലാസ്, ജോ.സെക്രട്ടറി രാജേഷ്, കൃഷ്ണകുമാർ , ഉണ്ണികൃഷ്ണൻ , ബാലുശില്‌പി തുടങ്ങിയവർ സംബന്ധിച്ചു.
