23/09/2025
കറുകപ്പിള്ളി സെന്റ് ജോർജ് യാക്കോബായ സുറിയാനി പള്ളിയിൽ വച്ച് 21.09.2025 ഞായറാഴ്ച നടന്ന എം. ജെ. എസ്. എസ്. എ. കണ്ടനാട് ഭദ്രാസന കോലഞ്ചേരി സോൺ കലോത്സവത്തിൽ നീറാംമുകൾ ഡിസ്ട്രിക്ട് ഓവറോൾ ഒന്നാം സ്ഥാനവും, കോലഞ്ചേരി ഡിസ്ട്രിക്ട് രണ്ടാം സ്ഥാനവും വാളകം ഡിസ്ട്രിക്ട് മൂന്നാം സ്ഥാനവും കരസ്ഥമാക്കി. പുത്തൻകുരിശ് സെന്റ് പീറ്റേഴ്സ് സൺഡേ സ്കൂൾ ഏറ്റവും കൂടുതൽ പോയിന്റ് നേടി ഒന്നാം സ്ഥാനം കരസ്ഥമാക്കിയപ്പോൾ, കുറിഞ്ഞി സെന്റ് പീറ്റേഴ്സ് & സെന്റ് പോൾസ്, പഴുക്കാമറ്റം സെന്റ് മേരീസ് എന്നിവർ യഥാക്രമം രണ്ടും മൂന്നും സ്ഥാനം കരസ്ഥമാക്കി. സബ് ജൂനിയർ, ജൂനിയർ, പ്ലസ് വൺ പ്ലസ് ടു വിഭാഗത്തിൽ നീറാംമുകൾ ഡിസ്ട്രിക്ട് ഒന്നാം സ്ഥാനം കരസ്ഥമാക്കിയപ്പോൾ സീനിയർ വിഭാഗത്തിൽ കോലഞ്ചേരി ഡിസ്ട്രിക്ട് ഒന്നാം സ്ഥാനം നേടി.
സബ് ജൂനിയർ വിഭാഗത്തിൽ ഇവാന മറിയം സൂസൻ, ജൂനിയർ വിഭാഗത്തിൽ ജോഹന്ന ജോൺ, ഏബെൽ ഏലിയാസ് മെജോ, ദിയ മെറിൻ ടോമി, സീനിയർ വിഭാഗത്തിൽ ദിയ മരിയ കുര്യാക്കോസ്, പ്ലസ് വൺ പ്ലസ് ടു വിഭാഗത്തിൽ റെസിൻ ഷിബു എന്നിവർ കലാതിലകം / കലാപ്രതിഭയായി തിരഞ്ഞെടുക്കപ്പെട്ടു.
രാവിലെ വി. കുർബ്ബാനാനന്തരം വികാരി ബഹു. ഫാ. അജോ കുര്യാക്കോസ് ഓമ്പാളയിൽ പതാക ഉയർത്തി മത്സരങ്ങൾ ആരംഭിച്ചു. ഉച്ചകഴിഞ്ഞ് സമാപന സമ്മേളനം കണ്ടനാട് ഭദ്രാസന മെത്രാപ്പോലീത്ത അഭി. ഡോ. മാത്യൂസ് മോർ ഈവാനിയോസ് തിരുമനസ്സ് കൊണ്ട് ഉദ്ഘാടനം നിർവഹിച്ചു. വികാരി റവ. ഫാ. അജോ കുര്യാക്കോസ് ഓമ്പാളയിൽ അദ്ധ്യക്ഷത വഹിച്ച ചടങ്ങിൽ എം. ജെ. എസ്. എസ്. എ. കണ്ടനാട് വൈസ് പ്രസിഡന്റ് റവ. ഫാ. ഷിബിൻ പോൾ പെരുമ്പാട്ട് മുഖ്യപ്രഭാഷണം നടത്തി. എം. ജെ. എസ്. എസ്. എ. കോലഞ്ചേരി സോൺ ഡയറക്ടർ ശ്രീ ടി. കെ. പീറ്റർ സ്വാഗതം ആശംസിച്ചു. വന്ദ്യ പൗലോസ് കാളിയമ്മേലിൽ കോറെപ്പിസ്കോപ്പ, റവ. ഫാ. ഐസക് കരിപ്പാൽ, റവ. ഫാ. പോൾ പടിഞ്ഞാറേതിൽ, ഷെവ. ജോയ് പി. ജോർജ് ഷെവ. എം. ജെ. മർക്കോസ്, ശ്രീ ബിനോയ് പി. ജോർജ്, ശ്രീ എ. വി. തങ്കച്ചൻ എന്നിവർ ആശംസകൾ അർപ്പിച്ച് സംസാരിച്ചു. അഭിവന്ദ്യ തിരുമനസ്സ് കൊണ്ട് വിജയികൾക്ക് സമ്മാനങ്ങൾ വിതരണം ചെയ്തു. എം ജെ എസ് എസ് എ കോലഞ്ചേരി സോൺ സെക്രട്ടറി ശ്രീ കെ. പി. സാജു കൃതജ്ഞത അർപ്പിച്ചു.
മത്സരത്തിൽ പങ്കെടുത്തവരെയും വിജയിച്ചവരെയും പരിശീലിപ്പിച്ച അദ്ധ്യാപകരെയും പ്രത്യേകം അഭിനന്ദിക്കുന്നു.
