18/04/2026
കർത്താവിൽ പ്രിയ വിശ്വാസികളെ,
നമ്മുടെ കാവൽ പിതാവായ വി. ഗീവർഗീസ് സഹദായുടെ (പെരുമ്പിള്ളി പുണ്യാളച്ചൻ്റെ) മദ്ധ്യസ്ഥതയിൽ അഭയപ്പെട്ട് ദൈവീകാനുഗ്രഹങ്ങൾ പ്രാപിക്കുന്നതിനായി വി. സഹദായുടെ തിരുശേഷിപ്പിനാൽ അനുഗ്രഹീതമായ നമ്മുടെ ദേവാലയത്തിൽ വിശുദ്ധൻ്റെ ഓർമ്മപ്പെരുന്നാൾ 2026 ഏപ്രിൽ 19, 20, 21, 22, 23 (ഞാർ, തിങ്കൾ, ചൊവ്വ, ബുധൻ, വ്യാഴം) തീയതികളിൽ പൂർവ്വാധികം ഭംഗിയായി ആഘോഷിക്കുവാൻ കർത്താവിൽ പ്രത്യാശിക്കുന്നു.
ചാത്തുരുത്തിൽ മോർ ഗ്രീഗോറിയോസ് കൊച്ചുതിരുമേനി സ്മാരക കുരിശിൻതൊട്ടിയിൽ സ്ഥാപിച്ചിരിക്കുന്ന വിശുദ്ധ ഗീവർഗീസ് സഹദായുടെ തിരുശേഷിപ്പ് പെരുന്നാൾ ദിവസങ്ങളിൽ പരി. ദേവാലയത്തിൽ പ്രത്യേകം തയ്യാറാക്കിയിരിക്കുന്ന പേടകത്തിൽ സ്ഥാപിക്കുന്നതും, പെരുന്നാൾ ദിവസങ്ങളിൽ വിശ്വാസികൾക്ക് കണ്ട് വണങ്ങി അനുഗ്രഹം പ്രാപിക്കുവാൻ തക്കവിധം ക്രമീകരിക്കുന്നതുമാണ്.
പ്രധാന പെരുന്നാൾ ദിവസം ഏപ്രിൽ 23ന് അങ്കമാലി-മൂവാറ്റുപുഴ മേഖല മെത്രാപ്പോലീത്ത നി.വ.ദി.ശ്രീ. ഡോ. മാത്യൂസ് മോർ അന്തിമോസ് തിരുമനസ്സിൻ്റെ മുഖ്യ കാർമ്മികത്വത്തിൽ വിശുദ്ധ അഞ്ചിന്മേൽ കുർബാന നടത്തപ്പെടുന്നതാണ്.
അന്നേദിവസം വിശ്വാസികൾക്ക് ഏവർക്കും നൽകുന്ന അപ്പവും കോഴിയും നേർച്ച വഴിപാടായി സമർപ്പിക്കുന്നവർ മുൻകൂട്ടി പള്ളി കാര്യത്തിൽ ഏൽപ്പിക്കേണ്ടതാണ്.
വിശ്വാസികളിൽ നിന്നും 1,000 രൂപ വീതമുള്ള ഷെയറുകൾ സ്വീകരിച്ചുകൊണ്ടാണ് വി. സഹദാ പെരുന്നാൾ നമ്മുടെ പള്ളിയിൽ നടത്തപ്പെടുന്നത്. പെരുന്നാൾ ഓഹരിയായി 1000 രൂപ പള്ളി ഓഫീസിൽ അടച്ച് അതിൽ ഭാഗവാക്കാകാവുന്നതാണ്.
വിളിച്ചാൽ വിളി കേൾക്കുന്നവനും അത്ഭുതങ്ങളുടെ കലവറയുമായ പെരുമ്പള്ളി പള്ളിയിൽ "പെരുമ്പള്ളി പുണ്യാളച്ചന്റെ" ഈ വർഷത്തെ പെരുന്നാൾ പ്രത്യേകം ഏറ്റെടുത്ത് നടത്തുവാൻ ആഗ്രഹിക്കുന്നവർക്ക് 10000 രൂപ അടച്ച് പെരുന്നാളിൽ പങ്കുചേരാവുന്നതാണ്.
വിശ്വാസികളേവരും പ്രാർത്ഥനാപൂർവ്വം നേർച്ചകാഴ്ച്ചകളോടെ വിശുദ്ധൻ്റെ പെരുന്നാളിൽ സംബന്ധിച്ച് അനുഗ്രഹം പ്രാപിക്കുവാൻ കർതൃനാമത്തിൽ ക്ഷണിച്ചുകൊള്ളുന്നു.
എന്ന്,
കർത്താവിൽ നിങ്ങളുടെ എളിയ ശുശ്രൂഷകൻ
ഫാ. ബാബു എലിയാസ്, തെക്കുംപുറത്ത്, വികാരി
പെരുമ്പള്ളി പള്ളി.
