07/08/2025
താമരച്ചാൽ വി. മർത്തമറിയം യാക്കോബായ വലിയ പള്ളിയിലെ മോർ യാക്കോബ് മോർ ശെമവൂൻ യൂത്ത് അസ്സോസിയേഷന്റെ " മാർഗ്ഗദർശൻ" പദ്ധതി അഞ്ചാമത് വർഷം പിന്നിടുന്ന ഈ വേളയിൽ നമ്മൾ 2025 ഓഗസ്റ്റ് മാസം 10 ന് മിനി മാരത്തോൺ സംഘടിപ്പിക്കുന്നു.
കുട്ടികൾ ഉൾപ്പെടുന്ന ഇന്നത്തെ യുവതലമുറയിൽ വർദ്ധിച്ചു വരുന്ന ലഹരിയുടെ ഉപയോഗത്തിന് എതിരായ ബോധവൽക്കരണ സന്ദേശവുമായാണ് "മാർഗ്ഗദർശൻ" പദ്ധതി ആരംഭിച്ചത്. മാതാപിതാക്കൾക്കും വിദ്യാർത്ഥികൾക്കുമായി 5 വർഷം മുൻപ് പോലീസ്, എക്സൈസ് എന്നി വകുപ്പുകളുടെ സഹായത്തോടെ ബോധവൽക്കരണ ക്ലാസ്സുകൾ സംഘടിപ്പിച്ചിരുന്നു. വളർന്നുവരുന്ന തലമുറയിൽ ലഹരിയുടെ കടന്നു കയറ്റം തടയുന്നതിന് അവരുടെ ഒറ്റപ്പെടലിൽ നിന്നും, തെറ്റായ കൂട്ടുകെട്ടിൽ പെട്ടുപോകുന്നതിൽ നിന്നും, മാറ്റം വരുത്തുന്നത് ആവശ്യമാണ് എന്ന് തിരിച്ചറിവിൽ നിന്നാണ് ജോർജിയൻ ആർട്സ് ആൻഡ് സ്പോർട്സ് അക്കാഡമി എന്ന ആശയം രൂപപ്പെടുന്നത്.
ജോർജിയൻ ആർട്സ് ആൻഡ് സ്പോർട്സ് അക്കാഡമിയുടെ നേതൃത്വത്തിൽ നമ്മൾ ക്രിക്കറ്റ്, ബാഡ്മിന്റൺ, ക്യാരംസ്, ചെസ്സ്, അത്ലറ്റിക്സ് എന്നിങ്ങനെ കായിക ഇനങ്ങളും ഡാൻസ്, നാടകം, ഇൻസ്ട്രമെന്റ് മ്യൂസിക്, ഫോട്ടോഗ്രാഫി, ഡിജിറ്റൽ ആർട്ട് എന്നീ കലകളും നടത്തി വരികയാണ്. പള്ളിയിൽ വന്ന് കൂടിച്ചേരലുകൾ ഉണ്ടാവുന്നതിനായും കൂടാതെ കല കായിക കഴിവുകൾ വളർത്തി എടുക്കുന്നതിലും ഇതിലൂടെ അവസരം ഒരുക്കുന്നു. എല്ലാ വർഷങ്ങളിലും കലാ കായിക മത്സരങ്ങളും ടൂർണമെന്റുകളും നടത്തി വരുന്നുമുണ്ട്. അതിൻ്റെ ഭാഗമായിട്ടാണ് ഈ മിനി മാരത്തോൺ സംഘടിപ്പിക്കുന്നത്.
നല്ല ഒരു ഭാവി തലമുറയെ വാർത്തെടുക്കുന്നതിൽ യൂത്ത് അസോസിയേഷന്റെ സംഘടനാ പ്രവർത്തനം ഭംഗിയായി തീരാൻ കൂടെ സഹായ, സഹകരണങ്ങൾ നൽകി വന്നവരെ നന്ദിയോടെ ഓർക്കുന്നതിന്നതിനോടൊപ്പം ഈ വരുന്നതായ മിനി മാരത്തോൺ വിജയകരമായി തീരാനും ലഹരിയുടെ കടന്നു കയറ്റം തടയാനും ഇതിനായി ഒത്തൊരുമിക്കണമെന്ന് അഭ്യർത്ഥിക്കുന്നു.
താമരച്ചാൽ പള്ളിയിൽ നിന്നും ആരംഭിച്ച് കിഴക്കമ്പലം മാർക്കറ്റ് ബൈപാസ് റോഡ് വഴി കിഴക്കമ്പലം ടൗൺ ചുറ്റി താമരച്ചാൽ തിരുഹൃദയ പള്ളി റോഡ് വഴി താമരച്ചാൽ സെന്റ് മേരിസ് സ്കൂൾ ഗേറ്റ് വഴി തിരികെ പള്ളിയിൽ എത്തി ചേരുന്ന, ഏകദേശം 5 കിലോമീറ്ററുകൾ സഞ്ചരിക്കുന്ന ഈ മിനി മരത്തോണിന് പൂർത്തിയാക്കുന്നവർക്ക് മെഡലും സർട്ടിഫിക്കറ്റുകളും ഉണ്ടായിരിക്കുന്നതാണ്.
