Town Kazi of Kilakarai

17/08/2026

கீழக்கரை நகரின் நான்காவது காஜியார் மேதகு ஹழ்ரத் மக்தூம் காஜி முஹம்மது கியாதுத்தீன் II அவர்களின் செம்பு முத்திரை.

முகலாய சாம்ராஜ்யத்தின் மாட்சிமைமிகு பேரரசர் ஷாஜஹான் அவர்கள் காலத்தில் 407 வருடங்களுக்கு முன்னால் ஹிஜ்ரி 1041 ஆம் வருடம் (கி.பி. 1631) கீர்த்திமிகு கீழக்கரை நகரின் நான்காவது பாரம்பரிய காஜியாக விளங்கிய மேதகு ஹழ்ரத் அல்ஆரிஃபுபில்லாஹ் மக்தூம் காஜி முஹம்மது கியாதுத்தீன் II அஸ்ஸித்தீகி அல்கிர்கரி (ரஹிமஹுல்லாஹு) அவர்களின் செம்பு முத்திரை.

மேதகு ஹழ்ரத் காஜி முஹம்மது கியாதுத்தீன் II அவர்களுக்கு அங்கிகாரம் வழங்கப்பட்ட தேதி ஹிஜ்ரீ 1041 ரபீஉல் அவ்வல் பிறை 1 என்று முத்திரையில் குறிப்பிடப்பட்டுள்ளது.

காஜியார் அவா்கள் மார்க்க சட்ட விளக்கம் கூறும் காஜி சேவையுடன் அக்காலத்தின் மரபுப்படி மஸ்ஜித்களின் (மிராசு)
பொறுப்பாளராகவும் இமாமாகவும் விளங்கினார்கள். அவர்களின் அடக்கத்தலம் கீழக்கரை பழைய குத்பா பள்ளியில் அமைந்துள்ளது.

இவர்களின் புதல்வர் மேதகு ஹழ்ரத் அல்ஆரிஃபுபில்லாஹ் மக்தூம் காஜி ஷெய்கு அப்துல்லாஹ்‌ II (ரஹிமஹுல்லாஹ்) அவர்கள் கீழக்கரை நகரின் ஐந்தாவது காஜியாக விளங்கினார்கள். பெருங்கொடை வள்ளல் சீதக்காதி ஷெய்கு அப்துல் காதிர் ‌மரைக்காயர் (ரஹிமஹுல்லாஹ்) அவர்கள் ஜும்ஆ மஸ்ஜிதை கட்டிமுடித்து அல்லாஹ்வுக்காக வக்ஃபு செய்து அதன் நிர்வாகப் பொறுப்பை அக்காலத்தின் மரபுப்படி ஹழ்ரத் காஜி ஷெய்கு அப்துல்லாஹ்‌ II அவர்களிடம் ஒப்படைத்தார்கள் அதன் படி ஜும்ஆ மஸ்ஜிதின் முதல் மஹல்லி மிராசாகவும் இமாமாகவும் விளங்கினார்கள். இவர்கள் ஹழ்ரத் அல்ஆரிஃபுபில்லாஹ் மாதிஹுர் ரஸூல் சதகத்துல்லாஹ் அப்பா (ரஹிமஹுல்லாஹ்) அவர்களுக்கு அருகில் அடங்கப்பட்டுள்ளார்கள்.

வல்ல அல்லாஹ் சங்கைமிகு காஜியார் அவர்களின் சன்மார்க்க சேவையை ஏற்று அவர்களை பொருந்திக்கொண்டு அவர்களின் கப்ரை மணமாக்குவானாக. ஆமீன்

- காஜி Dr. A.M.M. காதர் பக்ஸ் ஹுசைன் ஸித்தீக்கி மக்தூமி M.A.,D.Litt.
டவுன் காஜி, கீழக்கரை.
(கீழக்கரை நகர் 13வது பாரம்பரிய காஜி)

#கீழக்கரை_காஜி #கீழக்கரை

13/08/2026

பிறை அறிவிப்பு

தமிழகத்தில் இன்று 13/8/2026 மாலை ஹிஜ்ரி 1448 ரபீஉல் அவ்வல் பிறை தென்படாததால் 15/8/2026 சனிக்கிழமை அன்று ரபீஉல் அவ்வல் பிறை 1 எனவும் 26/8/2026 புதன்கிழமை அன்று ரபீஉல் அவ்வல் பிறை 12 மீலாதுன் நபி ﷺ தினம் என அறிவிக்கப்படுகிறது.

- காஜி Dr. A.M.M. காதர் பக்ஸ் ஹுசைன் ஸித்தீக்கி மக்தூமி M.A.,D.Litt.
டவுன் காஜி, கீழக்கரை.

#பிறை_அறிவிப்பு #ரபீஉல்_அவ்வல்_1448

02/08/2026

திருச்சி அய்மான் மகளிர் கல்லூரி பட்டமளிப்பு விழா

30/7/2026 அன்று திருச்சி அய்மான் கலை, அறிவியல் மகளிர் கல்லூரி 23வது பட்டமளிப்பு விழா கல்லூரி ஹாஜி ஷம்சுதீன் அரங்கில் கல்லூரி தாளாளர் ஹாஜி ஹபீபுல்லாஹ் தலைமையில் நடைபெற்றது .
கல்லூரி முதல்வர் முனைவர் முனப்பர் ஹுசைனா வரவேற்றார் .

கல்லூரி தலைவரும் கீழக்கரை டவுன் காஜியுமான மவ்லவி முனைவர் காஜி காதர் பக்ஸ் ஹுசைன் சித்தீக்கி, துணைத் தலைவர் ஹாஜி ஹஸன் அஹ்மது, பொருளாளர் ஹாஜி அப்துல் மஜீத், மற்றும் கல்லூரி நிர்வாக உறுப்பினர்கள்
ஹாஜி முஹம்மது உஸ்மான், ஹாஜி குலாம் முஹம்மது, ஹாஜி அன்சாரி பாஷா, ஹாருண் ரஷீத் ஆகியோர் முன்னிலை வகித்தனர்.

இந்திய மருத்துவ சங்கம் ஐ.எம்.ஏ. மருத்துவமனை வாரிய தலைவர், இந்தியா காமன் வெல்த் இளைஞர் மேம்பாட்டு முன்னெடுப்பின் ஒருங்கிணைப்பாளர், ஈரோடு சிட்டி மருத்துவமனை நிர்வாக இயக்குநர் மற்றும் தலைமை செயல் அதிகாரிடாக்டர் அபுல் ஹசன் பட்டமளிப்பு உரை நிகழ்த்தி மாணவிகளுக்கு பட்டங்கள் வழங்கினார்.

2022-25 கல்வியாண்டில் இளங்கலை மற்றும் முதுகலை தேர்ச்சி பெற்ற 340 பட்டதாரிகளுக்கு பட்டங்கள் வழங்கப்பட்டது. பல்கலைக்கழகத்தின் தரவரிசை பட்டியலில் 23 இளங்கலை மற்றும் முதுகலை பட்டதாரிகளுக்கு தங்கப்பதக்கம் சான்றிதழும்,மற்றும் சி.எல்.ஐ.எஸ் - நூலக படிப்பு சான்றிதழ் 23 மாணவிகளுக்கு வழங்கப்பட்டன.

நிகழ்ச்சியில் சமுதாய பிரமுகர்கள், கல்வியாளர்கள், பெற்றோர்கள் மாணவியர்கள், கலந்துகொண்டு சிறப்பித்தனர்.

22/07/2026

திருச்சி அய்மான் மகளிர் கல்லூரியில் ஹிஜ்ரி புத்தாண்டு விழா

திருச்சி அய்மான் மகளிர் கலை, அறிவியல் கல்லூரியில் 13/7/2026 அன்று ஹிஜ்ரி 1448 வருடப் புத்தாண்டு சிறப்பு நிகழ்ச்சி கல்லூரி தலைவரும் கீழக்கரை டவுன் காஜியுமான மவ்லவி முனைவர் காஜி காதர் பக்ஸ் ஹுசைன் ஸித்தீகி மக்தூமி தலைமையில் நடைபெற்றது.

கல்லூரி பொருளாளர் ஹாஜி சிடிசன் அப்துல் மஜீத் முன்னிலை வகித்தார். இளங்கலை ஊட்டச்சத்து மற்றும் உணவுமுறைத் துறை மூன்றாம் ஆண்டு மாணவி அசீலா கிராஅத் ஓதினார். கல்லூரி முதல்வர் முனைவர் முனப்பர் ஹுசைனா வரவேற்றார்.

ஜமால் முஹம்மது கல்லூரி அரபுத் துறை பேராசிரியர் ஹாஃபிள் செய்யது அஹ்மது நெய்னா ஸித்தீகி ஜமாலி வாழ்த்துரை வழங்கினார்.

ஜமால் முஹம்மது கல்லூரி அரபுத் துறை பேராசிரியர் மவ்லவி முஹம்மது இஸ்மாயில் ஹசனி சிறப்புரையாற்றினார். அரபித் துறைத் தலைவர் பிருன்னிஸா நன்றி கூறினார். பேராசிரியர்கள், மாணவிகள் கலந்து கொண்டனர்.

20/07/2026

மறைந்த பெரியோர்களை நினைவு கூறுவோம்

ஹழ்ரத் அல்ஆரிஃபுபில்லாஹ் ஸதகத்துல்லாஹ் அப்பா (ரஹ்) அவர்களின் 333வது நினைவு நாள் மற்றும் ஹழ்ரத் அல்ஆரிஃபுபில்லாஹ் காஜி ஷெய்கு அப்துல்லாஹ் III (ரஹ்) அவர்களின் 203வது நினைவு நாள்

ஹழ்ரத் அல்ஆரிஃபுபில்லாஹ் ஸதகத்துல்லாஹ் அப்பா (ரஹ்) அவர்கள்

(மறைவு ஹிஜ்ரி 1115) ஸஃபர் 5, காயல்பட்டினத்திலிருந்து கீழக்கரை வருகை தந்து மார்க்கக் கல்வி கற்றுத் தேர்ந்து மார்க்கப் பணியாற்றிய மகிமை தங்கிய இறைநேசச் செல்வர் ஹழ்ரத் மாதிஹுர் ரஸூல் அல்ஆரிஃபுபில்லாஹ் ஸதகத்துல்லாஹ் அப்பா (ரஹிமஹுல்லாஹ்) அவர்களின் 333வது நினைவு நாள்.

இவர்கள் காயல்பட்டினம் ஹழ்ரத் அல்ஆரிஃபுபில்லாஹ் சுலைமான் லெப்பை ஆலிம் (ரஹ்) அவர்களின் புதல்வர் ஆவார்கள்.

இவர்கள் தங்கள் தந்தையாரிடமும் அதிராம்பட்டினத்திலிருந்து கீழக்கரை வருகை தந்து மார்க்கப் பணியாற்றிய மாமேதை ஹழ்ரத் அல்ஆரிஃபுபில்லாஹ் முஹம்மது அப்துல் காதிர் மக்தூம் சின்னீனா லெப்பை ஆலிம் (ரஹ்) அவர்களிடமும் மார்க்கக் கல்வி கற்றார்கள்.

இவர்கள் ஈருலகத் தலைவர் பெருமானார் ﷺ அவர்களின் புகழ் மாலையான கஸீதத்துல் புர்தா, கஸீதத்துல் வித்ரிய்யா உள்ளிட்ட கஸீதாக்களுக்கு தஹ்மீஸ் செய்துள்ளார்கள். மேலும் பல அரபு இலக்கண நூல்கள், அரபு இலக்கியங்கள் இயற்றியுள்ளார்கள்.

சமகாலத்துச் சான்றோர்கள்

• முகலாய பேரரசர் முஹ்யித்தீன் ஆலம்கீர் அவ்ரங்கசிப் (ரஹ்) அவர்கள்

• இராமநாதபுர சமஸ்தானத்தை ஆட்சி செய்த மன்னர் கிழவன் சேதுபதி என்ற விஜய ரகுநாத சேதுபதி அவர்கள்

• ஹழ்ரத் அல்ஆரிஃபுபில்லாஹ் மக்தூம் காஜி ஷெய்கு அப்துல்லாஹ் II (ரஹ்) அவர்கள் (கீழக்கரையின் 5 வது பாரம்பரிய காஜி. இவர்கள் ஸதகத்துல்லாஹ் அப்பா (ரஹ்) அவர்களுக்கு அருகில் அடக்கம் செய்யப்பட்டுள்ளார்கள்)

• பெருங்கொடை வள்ளல் சீதக்காதி ஷெய்கு அப்துல் காதிர் மரைக்காயர் (ரஹ்)

• சீறாப் புராணம் இயற்றிய உமறுப்புலவர் (ரஹ்)

***********

ஹழ்ரத் அல்ஆரிஃபுபில்லாஹ் மக்தூம் காஜி ஷெய்கு அப்துல்லாஹ் III (ரஹ்) அவர்கள்

(மறைவு ஹிஜ்ரி 1245) ஸஃபர் 5, ஹழ்ரத் அல்ஆரிஃபுபில்லாஹ் மக்தூம் காஜி ஷெய்கு அப்துல்லாஹ் II (ரஹ்) அவர்களின் பேரரும் ஹழ்ரத் அல்ஆரிஃபுபில்லாஹ் மக்தூம் காஜி முஹம்மது கியாதுத்தீன் III அவர்களின் புதல்வரும் கீழக்கரையின் 7வது பாரம்பரிய காஜியும் ஜும்ஆ மஸ்ஜிதின் 3வது மஹல்லி மிராசும் இமாமுமான மேதகு ஹழ்ரத் அல்ஆரிஃபுபில்லாஹ் மக்தூம் காஜி ஷெய்கு அப்துல்லாஹ் III (ரஹ்) அவர்களின் 203வது நினைவு நாள்.

இவர்களுக்கு நவாப் சம்சாமுத் தவ்லா பஹாதுர் (ரஹ்) அவர்களின் புதல்வர் நவாப் உம்தத்துல் உமரா பஹாதுர் (ரஹ்) அவர்கள் ஹிஜ்ரி 1193ல் அங்கிகாரம் வழங்கியுள்ளார்கள்.

இவர்கள் காஜிகள் திலகம் ஹழ்ரத் ஷெய்குல் மஷாயிக் அல்ஆரிஃபுபில்லாஹ் மக்தூம் காஜி முஹம்மது கியாதுத்தீன் IV (ரஹ்) அவர்களின் தந்தை ஆவார்கள்.

இவர்களின் பெரர் ஹழ்ரத் அல்ஆரிஃபுபில்லாஹ் மக்தூம் காஜி முஹம்மது இப்ராஹீம் ஆலிம் ஸாஹிப் பஹாதுர் (ரஹ்) அவர்கள் தான் 1899ல் கீழக்கரையின் முதல் சேர்மனாக சேவையாற்றி பல நகர் நலத் திட்டங்களுக்கு வித்திட்டவர்கள்.

வல்ல அல்லாஹ் சங்கைமிகு ஹழ்ரத் மாதிஹுர் ரஸூல் ஸதகத்துல்லாஹ் அப்பா (ரஹ்) அவர்களையும் சங்கைமிகு காஜியார் அவர்களையும் பொருந்திக் கொள்வானாக.

- காஜி Dr. A.M.M காதர் பக்ஸ் ஹுசைன் ஸித்தீக்கி மக்தூமி M.A.,D.Litt.
டவுன் காஜி, கீழக்கரை
(கீழக்கரை நகர் 13வது பாரம்பரிய காஜி)

படம்: ஹழ்ரத் அல்ஆரிஃபுபில்லாஹ் காஜி ஷெய்கு அப்துல்லாஹ் III (ரஹ்) அவர்களின் ‌முத்திரை.

#கீழக்கரை_காஜி #கீழக்கரை

15/07/2026

பிறை அறிவிப்பு

தமிழகத்தில் இன்று 15/7/2026 மாலை ஹிஜ்ரி 1448 ஸஃபர் பிறை தென்பட்டதால் 16/7/2026 வியாழக்கிழமை அன்று ஸஃபர் பிறை 1 என அறிவிக்கப்படுகிறது.

- காஜி Dr. A.M.M காதர் பக்ஸ் ஹுசைன் ஸித்தீக்கி மக்தூமி M.A.,D.Litt.
டவுன் காஜி, கீழக்கரை.

#பிறை_அறிவிப்பு #ஸஃபர்_1448

12/07/2026

23/06/2026

திருச்சி அய்மான் மகளிர் கல்லூரி முபல்லிகா பட்டமளிப்பு விழா

22/6/2026 அன்று திருச்சி அய்மான் கலை, அறிவியல் மகளிர் கல்லூரியின் 15வது முபல்லிகா பட்டமளிப்பு விழா நடைபெற்றது. கல்லூரி தலைவரும் கீழக்கரை டவுன் காஜியுமான மவ்லவி முனைவர் காஜி காதர் பக்ஸ் ஹுசைன் சித்தீகி தலைமை வகித்து சனது வழங்கினார்.

கல்லூரி பொருளாளர் ஹாஜி சிடிசன் அப்துல் மஜீத், ஆட்சிமன்றக் குழு உறுப்பினர்கள் ஹாஜி குலாம் முஹம்மது, ஹாஜி அன்சாரி பாஷா முன்னிலை வகித்தனர். கல்லூரி முதல்வர் முனைவர் முனாஃபர் ஹுசைனா வரவேற்புரை நிகழ்த்தினார். முன்னாள் இயக்குநர் முனைவர் பேராசிரியர் ஷாஹுல் ஹமீது சிறப்புரை நிகழ்த்தினார்.
மாணவியர்களின் பெற்றோர்களின் சார்பில் ஆயர்பாடி நூருல்லாஹ், ஈரோடு காஜா முஹைதீன் ஆகியோர் வாழ்த்துரை வழங்கினர்.

திருச்சி ஜாமிஆ அன்வாருல் உலூம் அரபுக் கல்லூரி முதல்வர் மவ்லவி முஃப்தி முஹம்மது ரூஹுல் ஹக் ரஷாதி காஸிமி பட்டமளிப்புப் பேருரை நிகழ்த்தினார்.

கல்லூரி துணை முதல்வர் பேராசிரியை ஜாஸ்மின் உஹானிதா நன்றி கூறினார். கல்லூரியில் பல்வேறு துறைகளில் கல்வி பயின்ற 166 மாணவியர் முபல்லிகா பட்டம், 9 மாணவியர் முஅல்லமா பட்டம் பெற்றனர்.

நிகழ்ச்சியில் சமுதாய பிரமுகர்கள், கல்வியாளர்கள், பெற்றோர், மாணவியர்கள், கலந்துகொண்டு சிறப்பித்தனர்.