03/09/2026
കംസശാസനയുടെ കൽത്തുറുങ്കിൽ അർദ്ധ രാത്രിയിൽ അവതരിച്ച സ്വാതന്ത്ര്യമാണ് കൃഷ്ണഭഗവാൻ..
ദ്വാപരയുഗത്തിൽ ശ്രാവണംമാസത്തിൽ കൃഷ്ണപക്ഷത്തിൽ അഷ്ടമിനാളിൽ രോഹിണി നക്ഷത്രത്തിൽ ഭൂജാതനായ ഭഗവാൻ കൃഷ്ണൻ....
ജനിച്ചപാടെ മാതാവായ ദേവകിക്ക് വിശ്വരൂപം കാണിക്കുകയും മായയാൽ ആ വിസ്മയം മാറ്റുകയും ചെയ്ത അവതാരം...
ആ അവതാരശിശുവിന്റെ ഇച്ഛയിൽ പിതാവായ വസുദേവരുടെ കാൽച്ചങ്ങലകൾ സ്വയം അഴിഞ്ഞു. കാരിരുമ്പഴിവാതിൽ താനേ തുറന്നു. കണ്ണിൽ ശ്രദ്ധയൊഴിച്ചു കാത്തിരുന്ന കാവൽച്ചാരന്മാർ മോഹാലസ്യത്താൽ ഉറങ്ങിപ്പോയി...
അപ്പോൾ വസുദേവരോട് ഭഗവദ് നാദം മുഴങ്ങിയത് ഇങ്ങനെയാണ്...
"അധാർമികരെ ഉന്മൂലനം ചെയ്ത് ധർമ്മം നിലനിർത്തുവാനാണ് എന്റെ ഈ അവതാരം. വേഗം എന്നെ അമ്പാടിയിൽ കൊണ്ടെത്തിക്കുക. പകരം,നന്ദഗോപഗൃഹത്തിൽ യശോദ പ്രസവിച്ച പെൺകുഞ്ഞിനെ ഇങ്ങോട്ടും കൊണ്ടുവരിക. ഭയം വേണ്ടാ.. പുറപ്പെടുക... "
വസുദേവരുടെ യാത്രയിൽ ആകാശം അനുഗ്രഹമഴ കോരിച്ചൊരിഞ്ഞു,അനന്തന്റെ പത്തികൾ വസുദേവശിരസ്സിനുമേൽ കുടയായി നിവർന്നു, അനന്തഫണത്തിലെ അനേകരത്നങ്ങൾ അന്ധകാരത്തിൽ വഴിവെട്ടം ചൊരിഞ്ഞു,ആർത്തലച്ചൊഴുകുന്ന യമുന രണ്ടായിട്ടകന്നു,അമ്പാടിയിലേക്കുള്ള വഴി തെളിഞ്ഞു..
ഭഗവാന്റെ ഇച്ഛ പോലെ ധർമസംരക്ഷണത്തിന് അങ്ങനെ ഒരു വച്ചുമാറ്റം വേണ്ടിവന്നു...
പിന്നീട് വിധിയാം വണ്ണമുള്ള കംസനിഗ്രഹവും...
കംസൻ മാത്രമല്ല പൂതനക്ക് മോക്ഷവും,ശകടന് ധൂളീകരണവും..
തൃണാവർത്തൻ, വത്സൻ, ബകൻ, അഘൻ, ധേനുകൻ, പ്രലംബൻ, വൃഷഭൻ, കേശി, വ്യോമൻ അങ്ങനെ നിരവധിയായ രാക്ഷസ നിഗ്രഹങ്ങൾക്കും പ്രകൃതി സാക്ഷ്യം വഹിച്ചു...
ഒരുപിടി മണ്ണുതിന്ന് വായ തുറന്നു മണ്ണും വിണ്ണും മൂവുലകങ്ങൾതന്നെയും തന്നിൽത്തന്നെയാണെന്ന് അമ്മയ്ക്കു ബോധ്യംവരുത്തിയ ബ്രഹ്മരൂപൻ....
കംസവധം എന്ന അവതാരലക്ഷ്യം പൂർത്തിയായിട്ടും കൃഷ്ണപക്ഷം ഇവിടെ തുടർന്നു...
പക്ഷത്തിനും പ്രതിപക്ഷത്തിനുമപ്പുറം കൃഷ്ണപക്ഷം വളർന്നു...
തുറുങ്കറകൾ തുറക്കപ്പെട്ടു..
ഉഗ്രസേനന് രാജ്യം കൈവന്നു...
വസുദേവരും ദേവകിയും സ്വാതന്ത്ര്യസൂര്യോദയം കണ്ടറിഞ്ഞു...
യദുകുലം തഴച്ചുവളർന്നു...
കൃഷ്ണൻ സകലചരാചരങ്ങളുടെയും ഹൃദയം കവർന്നു...
വാടാത്ത മന്ദഹാസവും വറ്റാത്ത പ്രതീക്ഷയും തെറ്റാത്ത പ്രത്യാശയുമാണ് ജീവിതം എന്നു നമ്മെ പഠിപ്പിക്കുകയായിരുന്നു ഭഗവാൻ കൃഷ്ണൻ..
ഭാരതത്തിന്റെ ആത്മാവിൽ സ്വൈരനിദ്രകൊള്ളുന്ന കാൽവിരൽത്തുമ്പു വായിൽത്തിരുകി ആലിലയിൽ കിടക്കുന്ന ഓമൽപൈതലിന്റെ ഭാവം മാത്രമല്ല..,
ചക്രായുധപാണിയായ ലോകജേതാവ് കൂടിയാണ് ഭഗവാൻ ശ്രീകൃഷ്ണൻ...
അധർമ്മങ്ങളുടെ ഗുണനമാണ് അസുരപ്രകൃതി..
ഭഗവാന്റെ അവതാരലക്ഷ്യം അവയുടെ ഹരണവും...
പരീക്ഷണങ്ങളിൽ വലയുന്ന ഇന്നിന്റെ കാലഘട്ടത്തിൽ ഭഗവാന്റെ അവതാരലക്ഷ്യത്തിന്റെയും പൂർത്തീകരണത്തിന്റേയും ത്രസിക്കുന്ന സ്മരണകൾ തന്നെയാണ് ജനതയുടെ പ്രതീക്ഷ....
ശ്രീകൃഷ്ണജയന്തി ആശംസകൾ...
കൃഷ്ണം വന്ദേ ജഗദ്ഗുരും..
©
