01/07/2023
സർപ്പബലി നടത്തുന്നത് എന്തിനാണ് ?
സർപ്പ ദോഷം മാറുന്നതിന് എന്നാണ് എല്ലാവരും ഉത്തരം പറയുന്നത്.
അപ്പോൾ പിന്നെ, സർപ്പങ്ങൾക്ക് നുറും പാലും, രാഹു കേതു പൂജ, ഗുളികൻ ദോഷ പരിഹാരം, അഷ്ടനാഗപൂജ, അഷ്ടനാഗങ്ങൾക്ക് എട്ടുരുളി നുറും പാലും, നാഗപൂജ, നാഗയക്ഷിപൂജ, നാഗലക്ഷ്മി പൂജ, കാളസർപ്പദോഷ പരിഹാരം, ഇതൊക്കെ എന്തിനാണെന്ന് അടുത്ത സംശയം ഉണ്ടാകും.
ഇത് കൂടാതെ സർപ്പം പാട്ടും, സർപ്പം തുള്ളലും, സർപ്പക്കളമെഴുത്തും തുടങ്ങി വർഷം തോറും സർപ്പ പ്രീതിക്ക് നടത്തുന്ന അനുഷ്ട്ടാന ചടങ്ങുകൾ വേറെയുമുണ്ട്.
സർപ്പദോഷങ്ങൾ രണ്ടു വിധത്തിൽ ബാധിക്കുന്നു:
1. ജന്മനാലുള്ള ദോഷവും
2. കർമ്മണാലുള്ള ദോഷവും
1 . ജന്മനാലുള്ള ദോഷം.
ജാതകം നോക്കി രാഹുവും കേതുവും ഗുളികനും നിൽക്കുന്ന രാശിയും സ്ഥാനവും അനുസരിച്ചു ജന്മനാലുള്ള ദോഷങ്ങൾ മനസ്സിലാക്കാൻ സാധിക്കും.
ഇതിന് ഓരോരുത്തരുടെയും ജാതകവും ഗ്രഹനിലയും നവാംശകവും, ഭാവവും പാപങ്ങളുടെ ഏറ്റകുറച്ചിലും ജാതകന്റെ അനുഭവവും അനുസരിച്ചു ജാതക ദോഷ പരിഹാരങ്ങൾ ചെയ്യിക്കുന്നു.
സർപ്പങ്ങൾക്ക് നുറും പാലും, രാഹു കേതു പൂജ, അഷ്ടനാഗപൂജ, സർപ്പപൂജ, അഷ്ടനാഗങ്ങൾക്ക് എട്ടുരുളി നുറും പാലും, നാഗപൂജ, നാഗയക്ഷിപൂജ, നാഗലക്ഷ്മി പൂജ , കാളസർപ്പദോഷ പരിഹാരം, ഇതൊക്കെ ജാതകദോഷ പരിഹാരങ്ങളിൽ പെടുന്നു.
2. കർമ്മണാലുള്ള ദോഷം.
മനപ്പൂർവ്വമോ അല്ലാതെയോ കർമ്മങ്ങൾ കൊണ്ട് ഈ ദോഷം ബാധിക്കുന്നതാണ്. ഉദാഹരണത്തിലൂടെ ഇത് വ്യക്തമാക്കാം.
വൈകുന്നേരം മുറ്റം തൂത്തു കരിയില കൂട്ടി വെച്ചു, നമുക്ക് അത് വാരി കളയുവാനോ കത്തിക്കുവാനോ സാധിച്ചില്ല. കത്തിക്കുന്നത് ചിലപ്പോൾ പിറ്റേ ദിവസമോ ചിലപ്പോൾ ദിവസങ്ങൾ കഴിഞ്ഞോ ആയിരിക്കും.
കൂട്ടിയിട്ട കരിയിലക്കടിയിലെ തണുപ്പ് പറ്റി അതിനുള്ളിലേക്ക് ഒരു സർപ്പം കേറി ചുരുണ്ടു ഇരിക്കുന്നു എന്ന് വിചാരിക്കുക.
പിറ്റേ ദിവസം നമ്മളോ, മറ്റാരെങ്കിലുമൊ തലേ ദിവസം കൂട്ടി വെച്ച കരികിലക്ക് തീയിടുന്നു. ചുറ്റിനും പെട്ടന്ന് തീ ആളുമ്പോൾ അതിനുള്ളിൽ പെട്ടു സർപ്പവും ചത്തു പോകുന്നു.
സർപ്പക്കാവിന്റെ പരിസരത്ത് താമസിക്കുന്നവരാണ് ഇത് കൂടുതലും ശ്രദ്ധിക്കേണ്ടത്.
അത് കൊണ്ടാണ് പൂർവ്വികർ പറഞ്ഞു തന്നത് തൂത്തു കൂട്ടി വെക്കരുത് അപ്പോൾ തന്നെ വാരി കളയുകയോ, കത്തിക്കുകയോ ചെയ്യുവാൻ.
അതുപോലെ കൊയ്ത്തു കഴിഞ്ഞ പാടത്തും കൃഷി ഭൂമിയിലും നിരത്തി തീയിടുന്നവരും ഉണ്ട്. പാമ്പുകൾ മാത്രമല്ല ആ കൃഷിസ്ഥലത്തുള്ള പൊത്തുകളിൽ ജീവിക്കുന്ന പാമ്പുകളും തവളകളും മണ്ണിരകളും ഉൾപ്പെടെയുള്ള ജീവനുള്ള സകല ജീവികളും, അതിന്റെ കുഞ്ഞുങ്ങളും മുട്ടകളും വെന്തു മരിക്കുന്നു.
അതുപോലെ പാമ്പുകളെ കണ്ടാൽ ഉടനെ ഓടിച്ചിട്ട് തല്ലി കൊല്ലുന്നവരും കുറവല്ല.
ഇതെല്ലാം കർമ്മം കൊണ്ടുള്ള സർപ്പ ദോഷങ്ങളിൽ പെടുന്നു.
തീപ്പെട്ടിയിൽ കൊള്ളി കൊണ്ട് ഉരക്കുമ്പോൾ എങ്ങിനെയാണോ അന്തരീക്ഷത്തിൽ നിന്നും അഗ്നി പ്രവേശിക്കുന്നത് അതുപോലെയാണ്, അണ്ഡവും ബീജവും ചേരുമ്പോൾ പ്രപഞ്ചത്തിൽ നിന്നും ജീവാത്മാവ് മൂന്നര ചുറ്റ് സർപ്പാകാരമായി അതിലേക്ക് പ്രവേശിക്കുകയും, നട്ടെല്ലിന്റെ ചുവട്ടിൽ കുണ്ഡലിനിയിൽ ജീവത്മാവ് അഗ്നി സ്വരൂപമായി കുടികൊള്ളുകയും ചെയ്യുന്നു ആ നിമിഷം മുതൽ ഭ്രൂണം വളരുവാനും തുടങ്ങുന്നു.
പ്രാണൻ അഥവാ നിർഗുണ നിരാകാരമായ ജീവാത്മാവ് സർപ്പരൂപമാണെന്ന് വിശ്വാസം.
അതുകൊണ്ട് മനപ്പൂർവ്വം ചെയ്യുന്ന ഭ്രൂണഹത്യയും കർമ്മണാലുള്ള സർപ്പദോഷത്തിന് കാരണം ആകുന്നു.
നാഗരാജാവേ എന്ന് വിളിച്ചാൽ നമ്മുടെ ഉള്ളിൽ നിന്നും ആത്മാവ് വിളി കേൾക്കും.
കർമ്മം കൊണ്ട് ചെയ്യുന്ന പാതകങ്ങൾ ഒന്നും ജാതകത്തിൽ ഉണ്ടാവില്ല.
അങ്ങിനെ കർമ്മം കൊണ്ട് ജീവഹാനി വന്ന സർപ്പങ്ങളുടെ ആത്മാക്കളെ പത്മത്തിലോ സർപ്പക്കളത്തിലോ ആവാഹിച്ചു ക്ഷമാപണം ചൊല്ലി പ്രാർഥിച്ചു, ബലിയിട്ട് മോക്ഷം നൽകുന്ന പായശ്ചിത്ത ചടങ്ങാണ് സർപ്പബലി.
പിതൃബലി ഇടുന്നത് പോലെ തന്നെയാണിത്, നമ്മുടെ കർമ്മം കൊണ്ട് ദുർമൃതിയടഞ്ഞ സർപ്പങ്ങളുടെ ആത്മാകൾക്ക് സർപ്പബലി കൊണ്ട് മോക്ഷം ലഭിക്കുമെന്ന് വിശ്വാസം.
ലോകത്തു ആദ്യമായി സർപ്പബലി നടത്തിയത് പരീക്ഷിത്തിന്റെ പുത്രനായ ജനമേജയ രാജാവ് ആയിരുന്നു.
ജനമേജയൻ തന്റെ പിതാവായ പരീക്ഷിത്തിന്റെ മരണ ഹേതുവായ നാഗരാജാവ് തക്ഷകനെ അഗ്നിയിൽ ആവാഹിച്ചു കൊല്ലുവാൻ സർപ്പസത്രം എന്ന മഹായാഗം നടത്തി.
സർപ്പസത്രം എന്ന മഹായാഗം മുടക്കിയ ജാരത്കാരു പുത്രൻ അസ്ഥികന്റെ ഉപദേശം കൊണ്ട് മനസ്താപം വന്ന ജനമേജയ രാജാവ് സർപ്പദോഷം മാറുവാൻ സർപ്പബലി നടത്തി പ്രായശ്ചിത്തം ചെയ്തു എന്ന് വിശ്വാസം.
സർപ്പക്കാവ് ഉള്ള കുടുംബങ്ങളിൽ പാരമ്പര്യമായി പുള്ളുവ കുലത്തിൽ ഉള്ളവർ സർപ്പക്കളം വരച്ച് സർപ്പബലിയിട്ട് വീണയും മീട്ടി കുടവും കൊട്ടി സർപ്പം പാട്ടു പാടി സർപ്പങ്ങളെ പ്രീതിപെടുത്തുന്നു.
തന്ത്രശാസ്ത്ര പ്രകാരം ഉപാസനയോടെ സർപ്പബലി പഠിച്ചവരും സർപ്പബലി ചെയ്യുന്നുണ്ട്.
സർപ്പക്കാവിലും ക്ഷേത്രങ്ങളിലും സർപ്പബലി നടത്തുന്നു.
ഇത് വായിച്ച എല്ലാവർക്കും സത്യമുള്ള സർപ്പങ്ങളുടെ അനുഗ്രഹം ഉണ്ടാവട്ടെ...🙏🏻
