Lawm-It Gospel Ministry

Lawm-It Gospel Ministry I Gamsung ua Tahsa leh Hagau lam a khantouna ding deinatoh apeisa dt.10/12/2023 in ana kiphut khie hi

28/04/2026

NICHIN THUMNA PUITU
By Rev. Awnkhankhup

April 28 (Sepkiani).
LUNGKIMDAN KA THEI TA

🙏🙏 _Tahsap zieh a tam thu ka gen ahi sih, bang chi bang in um nanleng lungkim dan ka thei ta hi *(Phil. 4:11).*_

Sawltah *Paul* in, _‘Bangchibang in um nanleng lungkim dan ka thei ta’_ ana chi ngam a, thupi in a lamdang mama mai hi. Tasam a umdan a siem a, hausa a um dan zong a siem hi. Bangchi bang a hasa leh zauhuoi a tuo hun in zong Mangpa Jesu ziehin lungkim tah in a thuoh siem zel china ahi. Eiten ahileh, hasatna neu nou khat ituo a, mite neibang neizou lou a i um hun chieng in lungkim theilou in i hase pai thei zel uhi. Alelam ah, neu nou khat i khosah thei a, i lawchin hun chieng in zong ama Paul bang a hausah dan i siem thei sih a, midang te leh i Pasian mitsip na ding a hing in i khosa kha zelzel uhi.
Tuaziehin, Khrist neitu te khu, bang dinmun ah um in ding nan uleh zong, a kipahna uh Mangpa dan ahi tah zieh in, Mangpa ah a kipah zing thei uhi. Lungkham beidotnate, shina tan hial hing tun le zong, Khrist a kinga zing gingtu khat in, Jesu zieh in ka thuoh siem in ka lung a kim a chi thei zel hi. Tuaziehin, Sawltah Paul ma bang in genthei dan siem in hausah dan zong siem isawm ding uhi. Lungkimdan ka siemta chi thei ding in Mangpan hing guolzawl ta hen.🙏🙏👏

27/04/2026

NICHIN THUMNA PUITU
By Rev. Awnkhankhup

April 27 (Seppatni).
PASIAN LAWMPA-ABRAHAM

🙏🙏 _Tuachin tuamite khumna kipat in a kihei khie ua, S***m lam a zuon ua, hinanleh Abraham pen Mangpa masang ah a ding ngitnget nalai hi *(Gem 18:22).* Tualeh Mangpan ka silbawl tup Abraham kung ah ka imm ding amah? a chi hi *(Gen 18:17).*_

Pasian in *S***m* khopi suhsiet a sawm lai in a alawm hoi mama *Abraham* kung ah iim nei hetlou in a theisah hi. Bangzieh pen tah a Pasian in a silbawl dingte Abraham a hil masah zel a tadiei chi dohna poimaw tah a ching hi. A dawnna ahileh, Abraham khu Pasian a ding a alawm hoi mama ahi zieh ahi pen mai hi. Bangchidan a lawm hoi a kinei thei uh adiei le? Midangte Pasian apat kihei mang a S***m lam a zot lai un, Abraham pen Mangpa masang ah a ding zing chi imu uhi. I kung a um zing leh i masang a ding zing te ilawm hoi ahi tangpi zel uhi.
I lungsim a silhoilou i ngaisut a, dihlou ahi chi thei napi a sil hoilou i bawl paupau chieng in Pasian apat i vahmang a, akung nai a um ding nuom isa het sih uhi. Sil hoi bawl in Pasian deilam na sem lei, ama toh kinai tah in i um ding a, Pasian lawm hoi leh a ta deitah ihi thei ding hi. Tuaziehin, khovel silte kihei san in Mangpa masang a ding zing mi hilei Pasian lawm ihi thei ding hi.🙏🙏👏

26/04/2026

NICHIN THUMNA PUITU
By Rev. Awnkhankhup

April 26 (Pasianni).
MANGPA LAM-NGA LENG JOSIAH

🙏🙏 _Tualeh Mosi dan dungzui a alungtang zousie, a hinna zousie, tualeh a hatna zousie toh Mangpa lam nga, a ma bang mawngmawng a masang in leengpa koima ana um kha sih a, ama nua in zong koima a um nawn sih hi *(2 Lengte 23:25).*_

Tami thu khu *Juda* Leeng *Josiah* hoidan thu kigenna ahia, Leeng a apan k*m *18*-na ah hun sawttah ana kinei kha nawnlou Peikan Pawi *Jerusalem* ah a zang ua, Juda gam sung leh Jerusalem a sil kidahhuoi kimu kha zousie Josiah in a paimang sieng hi. Israel tate kung a Pasian in dan thu ana pieh, _‘Mangpa na Pasian khu na lungtang zousie, na hinna zousie leh na hatna zousie a na it ding ahi’,_ chi zui in tam mun ah Josiah in Pasian lam nga in nna a hing sem khe ta hi *(Deut. 6:4).*
Midang koima in a bawl khah ngai lou uh, Leeng Josiah in a bawl a, sil kihdahhuoi Pasian deilou zousie a subei thei hi. Ei gingtuten zong, Josiah bang in i lungtang zousie, i hinnna zousie leh i hatna zousie toh Pasian it kawm in ama lam i nga kia ding a, ama deilou sil hoilou leh kidahhuoi te zousie in i nuasie sawm ding uhi.🙏🙏👏

23/04/2026

NICHIN THUMNA PUITU
By Rev. Awnkhankhup

April 23 (Ningani).
PASIAN IN A MUONHUOINA HING CHIEM

🙏🙏 _Tualeh ngaivawi, hing umpi vang in, napeina phot ah hing veng vang in, tam gam ah hing puikia vang in; na kung a ka gen ka bawl zou masang sien ka hing nuasie sih ding hi *(Gen 28:15).*_

Tam thu khu *Jakob* kung a Pasian in a umpina muonhuoi tah a chiemna kam teng hoi tah ahi. A u *Esau,* zau a hing taikhie *Jakob* khu, apu *Laban* te tenna *Haran* zuon in a hing pei hi. Lamkal a zaangieh in, *Bethel* kichi na mun ah a mumang lam in Pasian houpi in, tam bang thu te ana chiem hi. Mangpan a peina mun teng a vengding ahidan leh, nuasie ngailou ding ahidan gen in a umpina muonhuoi tah a chiem ta hi. Pasian thuchiem bang ngei in Jakob zong, a p**e kung a nasem a ava um sung in, zi leh ta ban ah ganta tampi mama toh Mangpan a guolzawl hi.
Tuni hun in eite zong Jakob bang in i khuolzinna khovel ah, thawmhau leh tangkhat kisah hun bang i nei kha thamtham ding uhi. Tuabang hun chieng in a umpina hing chiem i Pasian khut muonhuoi ah i ginna i nga ding ua, ama lam-en in ingah zelzel ding uhi. Amite kung a mutheilou a um zing *Immanuel Pasian* in hing umpi in i tahsapte a hing pezel ding hi.🙏🙏👏

22/04/2026

NICHIN THUMNA PUITU
By Rev. Awnkhankhup

April 22 (Nilaini).
MANGPAN SUN LEH ZAN IN HING PUI ZEL

🙏🙏 _Tualeh Mangpa khu sun in meipi a ma uh pui ding in, tualeh zan in meikuong in amauhte vah pe ding in a masang uah sun leh zan in a pei hi *(Exo. 13:21)*_

Tami Laisiangthou kitahlang a kigen khu Israel tate *Kanaan* gam zuon a a khuolzinna ua Pasian khut hat leh muonhuoi tah a pui a a um na thu uh ahi. Sun hun chieng in nisa leh guozu apat amaute bitna pe ding in meipi a koi sah a, tua meipi kitawl bang zel in Israel tate zong a kitawl khe zom zel uhi. Tuamabang in zanlai khomiel hun chieng a apeina ding lampi uh kawhmu ding in meikuong a koisah zel hi. Tambang in Pasian in amite hawmthaw tah mai in a kem a, a tahsapte uh a bawl pieh zel hi.
Ei Khrist gingtu te zong i nichin khosahna lampi izui lai in, hasatna leh lungkieh theina mun tampi ituoh kha tou zel uhi. Khat veivei chieng in koiman ihasatnate hing thei khah pi lou bang in ithei zel uhi. Amabou, ami Israel te sun leh zan a ching den pa Pasian ma ei Pasian zong hi thou ahi dan thei in ama muong in sun leh zan in ama ah ikinga ngam zing ding uhi.🙏🙏👏

20/04/2026

NICHIN THUMNA PUITU
By Rev. Awnkhankhup

April 20 (Seppatni).
SIL HOI MAWNGMAWNG A IT NGAI SIH

🙏🙏 _Aziehpen Mangpa Pasian khu ni leh phaw ahia, Mangpa hepina leh thupina a pe ding a; dihtah a umte lah ah sil hoi mawngmawng a it ngai sih ding hi "(Sam 84:11).*_

Tami *Sam* geltu in Pasian thupidan leh a silbawl theidante, a hatdante, a itna thuhdante ana muchien mama hi. Mangpan amite a deisah mama a, a thumangte hunchin in a ngaisah zelzel hi. Amitmu a dihtah a umzing mite a mu zing zel a, lamet phahlou hidan a ithei nua chieng un zong a mel a hing kilang thei zel hi. Tuachin dih tah leh thutah a um te tung ah sil hoi mawngmawng a it ngaisih hi. Ama giing mite khu a vansawlsiang ten a vengzing zel ua, a tahsap uh a guon zel hi.
Mangpa hoidan leh amite ngaisah a a etkoldan te, a deisah dante thei siem a, eiten zong thu dih leh thutahna toh ama deidan bang a i hin leh, ei a ding in silhoi bangma mawng mawng a it sih ding a, i tahsap leh i poimawte ahing guon zaw zel ding hi.🙏🙏👏

18/04/2026

NICHIN THUMNA PUITU
By Rev. Awnkhankhup

April 18 (Kiginni).
MITE MU DING A VAH DING

🙏🙏 _Tuamabang in navah uh mi mu ding in vah heh, tuachin na sil bawl hoite a mu ding ua, van a na pa uh a pahtawi thei ding uhi *(Mat. 5:16).*_

A masapen in mi mitmu a vah tang sah ding in Mangpa Jesu a um vah i nei uh a ngai hi. Jesu neilou leh ama gingta lou mi khu ama a vah a um lou zieh in a tang khe ding bangma a nei sih hi. Tuaziehin, mite mitmu a tang khe ding in Mangpa Jesu i nei masah a ngai hi. Masang lai a Judate inn te ah kotta um lou in, a innsung te uh sun lai in zong a miel a, a lut chieng un mei a tan uh a ngai zel hi. Tua a mei tan uh khu innsung miel vah sah ding in a koina mun ding dihtah ah a koi khezel uhi. Tuamabang in Mangpa Jesun ama gingtute leh zuitute khu i kung a mite vahsah ding leh khovel vahsah ding in a hing dei hi.
Tuaziehin gingtute khu khovel vahsah ding ihi zieh un, Khrist khu eima a a vah khiet theina ding in Khrist a i um zing a, a dei banga i um a poimaw hi. Khrist zieh a kingainiemna leh thuoh ding um te i thoh zel nate tungtawn in i vah i tangsah ding uhi.🙏🙏👏

17/04/2026

NICHIN THUMNA PUITU
By Rev. Awnkhankhup

April 17 (Ziltawpni).
JESU TELLOU A PILNA

🙏🙏 _Pilvang un, tuachilou in mi koi ahiei in Khrist thu bang a kibulphu hilou in, mihingte thugousie leh leitung thubulte bang zaw in, leitung pilna leh solna hawmpi toh min a hing manzou kha ding uhi *(Kol. 2:8).*_

Tam mun a mihingte thugousie leh leitung thubulte kichi khu Pasian tellou mihing theina leh pilna genna ahi. *Kolosa* khuo ah sinsahna dihlou, hundamna ding a Khrist nasep deikhop lou a sildang poimaw um nalai bang in mi khenkhatten a sinsah uhi. Tam bang kithuhilna dihlou, pilhuoi thu leh kisolna thu te zang in gingtute puikawi in a um kha ding uh chi Sawltah *Paul* ana zau mama hi. Mangpa Jesu tatna nasep panglou in hundamna kichi a um thei sih a, bang chi bang pilna thuhtah hinanleh zong, tuabang kithuhilna lah a pilvang ding in a hanthawn hi.
Pilna pen poimaw mama nanleh, Jesu panglou pilna ahi chieng in bang ma lou a suoh zel hi. Tambang pilna te khu mi puimang thei ahi giap hi. Mangpa Jesun ama khu lampi leh thutah leh hinna ahia, ama a peilou koima Pa kung a tung ngai sih ana chi hi. Jesu panglou a pilna khu khovel pilna ahi chi thei in Jesu bou tel zaw va ui.🙏🙏👏

16/04/2026

NICHIN THUMNA PUITU
By Rev. Awnkhankhup

April 15 (Nilaini).
MANGPA NGAH ZEL VA UI

🙏🙏 _Hinanleh Mangpa ngahte pen a hatna uh siemtha ahi ding ua, muvanlai bang in ha in a lengtou ding ua, a tai ding ua, a gim sih ding uhi; tualeh keng in a pei ding ua, a basih ding uhi *(Isai 40:31).*_

I Pasian hina leh A zie khu kinaw hehu lou, ahivang a ahun tah a nasem zelzel ahi hi. Tuaziehin ama gingtuten ama zie ingah siem uh a poimaw mama mai hi. Leeng *Saul* in Pasian zie leh a hunchiem ngah zou lou in *Samuel* tun masang in ama bawl ding chi hikha mawngmawng lou maitam a sillat ana bawl a, a silbawl Pasian in deilou in a lalna suhtawp sah in a um hiel hi. Mangpa ngah zou lou zieh a lawsam Thuhunlui leh Thuhuntha hunte ah mi bangzat ama khatte imu thei uhi.
I Bible tang sim in Mangpa ngah miten hatna tha a nei kia ding thu uh a hing hil hi. Ba hunte a hing tung thei zel a, tam bang hun chieng in gingtu ten thahatna inei kia ding a poimaw mama zel hi. Mangpa ngah ding ichi chieng in, mun khat a tou muong kawm a ngah ding hi mawh lou in, Pasian lam nga kawm leh a lunglam sui a um zing ding china bang ahi zaw hi.🙏🙏👏

16/04/2026

💔NICHIN THUMNA PUITU
By Rev. Awnkhankhup

April 16 (Ningani).
MAITAM A MEI AMIT DING AHI SIH

🙏🙏 _Tualeh maitam tung a mei khu a kuong sah ngitnget ding a, a mit sah ngai sih ding hi. Tuachin siempu in zingmawng chin in sing a vang zing ding a, halmang sillat hoitah in a koi ding a, khunah lemna sillatte sathau a hal ding hi *(Lev. 6:12)*_

Israel tate a ding in Pasian a biehna maitam uh a poimaw dan i Bible in ahing nahil ta hi. Maitam a mei kuonsah zing ding ahia, zingmawng chin in siempu in tua maitam mei a mi louna ding in sing a vang zel ding chi ahi. Pasian in a kithoi ding dan uh leh a van zah dingte kichien tah in ana hil diimdiem a, a poimaw hun bang zel in Israel mipi ten siemp**e khut tungtawn in maitam a bawl zel uhi.
Tuamabang in Khrist gingtu te hinkhuo leh khosahna ah zong, Pasian i biehna leh a kung a kilan a i tahsap te i nget theina ding in Khristian innkuon chinten maitam i bawl zing uh a poimaw hi. Tuami i innkuon maitam mei haltu ding in innsung nu leh pa te mawpuohna pieh ihi uhi. Tuaziehin, i maitam a mei a mi louna ding in hun chin in Pasain thu leh la te toh mei i taw zing ding uhi. Innkuon maitam khu vangam kigalmu theina um sun zong ahia a poimaw mama mai hi.🙏🙏👏

13/04/2026

NICHIN THUMNA PUITU
By Rev. Awnkhankhup

April 13 (Seppatni).
EIMA KI THUNUNNA POIMAW

🙏🙏👏 _Tuhun a haute kisathei lou ding leh a kiplou hausatna a muonna ngalou a, sil zousie a kipahna ding a kiching tah a hing pepa Pasian hing tung a nga zaw ding in, sil hoilou bawl ding in leh nasep hoi a hausa ding in, silphal ding in, mite pe ding a mansa leh midangte kikoppi ut ding in thu pie in *(I Tim. 6:17,18).*_

Sawltah *Paul* in *Timothi* kung ah, mi hausate khu kiliensah lou ding leh, kingahna chinglou sum leh pai a lametna nga mai lou ding, tuanahsang a sil bangkim neitu Pasian tung a kinga zaw ding a mite thuhil ding in a hanthawn hi. Lungkimna dihtah umna khu Pasian kung ahi a, ama a kinga lou a, sum a kingah khu manthaina bulpi ana hizaw zel hi. I sum leh paite, i inn leh loute, i gari changkang tahtah ten limna leh kipahna dihtah hing pe theilou in, tuate zieh a i lungnopna ten hun tomnou khat zong a dai zou ngai sih hi.
Tualeh sum khu mihing a hilou in, Mangpan mihing te a hing kepsah zual maimai ahi chi ithei siem ding uh a poimaw hi. I poimaw nasepna ding te, midangte tung a silhoi bawlna ding te a Pasian in hausatna a hing pieh ahi zaw hi.🙏🙏👏

12/04/2026

NICHIN THUMNA PUITU
By Rev. Awnkhankhup

April 12 (Pasianni).
MAILAM DEL A TAI

🙏🙏 _Unaute aw, kei pen neizouta in ka ki ngaituo sih a, hinanleh tam sil khat kabawl hi; nualam a sil umte manghil in, mailam a sil umte ka del hi *(Phil. 3:13).*_

Mi khenkhat ten hun peisa leh nualam a sil umte buoipi seng in, mailam del a tai ding lam a mangmat kha sih zel uhi. Mi lungleng thei tah tah leh lunglen la ngumngiet tahtah phuoh a sasa thei mite khu mi vangsie leh mi lungsiet um te ahi zel uhi. Tualeh, mi pawl khat te kia in ahileh, a tun na chieng uh deikhop paipai in huntawh bang a kisa thei zel uhi. Tam bang miten a mailam ua sil umte del a tai ding ahi lam thei pha ban nawn lou in, huntawh kisahna toh a um lel uhi.
Sawltah *Paul* in ahileh, hagau lam a piching nailou a hi dan a kitheisiem mama a, a mailam a sep ding a um silte ngai sun zaw in, a del in a del vevaw hi. Eite pen tahsa leh hagau lam ah zong i kideikhop bai thei sengseng ua, mailam del a tai ding lam i ngaisah kha zel sih uhi. Tuaziehin, a peisa hunte leh i nualam a sil umte manghil kizil vai in, Mangpan a hing musah ding silte mu ding in mailam del in tai zel va ui.🙏🙏👏

Address

Muallum
Churachandpur
795139

Website

Alerts

Be the first to know and let us send you an email when Lawm-It Gospel Ministry posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Lawm-It Gospel Ministry:

Shortcuts

Share

Category