Eruppara Sree Durga Temple

25/05/2026

നമ്മൾ ചിന്തിക്കുന്നതെന്തോ അതാണ് നമ്മൾ. മനസ്സ് ഏത് ദിശയിൽ സഞ്ചരിക്കുമോ ജീവിതവും പതുക്കെ അതേ രൂപം കൈക്കൊള്ളുo. നല്ല ചിന്തകൾ ഉള്ളിൽ നിറഞ്ഞാൽ വാക്കുകൾ സാന്ത്വനമാകും. വാക്കുകൾ നല്ലതായാൽ പ്രവർത്തികൾ വിശുദ്ധമാകും. പ്രവർത്തികൾ ശുദ്ധമായാൽ ജീവിതം പ്രകാശിക്കും. ഒരു വിത്തിൽ ഒരു വൃക്ഷം ഒളിഞ്ഞിരിക്കുന്നത് പോലെ ഒരു ചിന്തയിൽ ഭാവി ഒളിഞ്ഞിരിക്കുന്നു. ഭയം ചിന്തിച്ചാൽ മനസ്സ് ദുർബലമാകും. ദ്വേഷം ചിന്തിച്ചാൽ ഹൃദയം കഠിനമാകും. സ്നേഹം ചിന്തിച്ചാൽ ജീവിതം വിശാലമാകും. ഈശ്വരനെ ചിന്തിച്ചാൽ മനസ്സ് ശാന്തമാകും. ഓർക്കാം. മനസ്സിൽ എത് ചിന്തയെ വാഴിപ്പിക്കുമോ ജീവിതം ആ രൂപം ധരിക്കും.

18/05/2026

ഹിന്ദുമതാചാരപ്രകാരം പുലര്‍ച്ചെ ഉറക്കമുണര്‍ന്നത്‌ മുതല്‍ ഉറങ്ങുന്നത് വരെ ഒരു വിശ്വാസി അനുഷ്ഠിക്കേണ്ട നിത്യകര്‍മ്മങ്ങള്‍

പുലര്‍ച്ചെ ഉണര്‍ന്നെണീറ്റാൽ ഉടന്‍ വലത് കൈ കണികാണുകയും
കരാഗ്രത്തില്‍ ലക്ഷ്മിയെയും, മദ്ധ്യേ സരസ്വതിയും, കരമൂലത്തില്‍ ഗൌരിയേയും കണികാണുന്നതായി മനസ്സില്‍ സ്മരിക്കുക, മനസാ വന്ദിക്കുക. താഴെ പറയുന്ന മന്ത്രം ജപിക്കുകയും വേണം.

"കരാഗ്രേ വസതേ ലക്ഷ്മി
കരമദ്ധ്യേ സരസ്വതി
കരമൂലേ ഭവേത് ഗൌരീ
പ്രഭാതേ കരദര്‍ശനം"

അതിന് ശേഷം ഭൂമിയില്‍ പാദസ്പര്‍ശം ചെയ്യുന്നതിന് മുന്നേ താഴെ പറയുന്ന മന്ത്രം ജപിച്ച് ഭൂമിദേവിയെ മനസാ സ്മരിച്ചു കൈകൊണ്ടു തൊട്ടുവന്ദിക്കുക. ഭൂമിയില്‍ ചവിട്ടുന്നതിന് മുന്നേ ഭൂമിദേവിയോട് ക്ഷമ ചോദിക്കുക.

"സമുദ്രവസനേ ദേവി പർവതസ്തന മണ്ടലേ
വിഷ്ണുപത്നീ നമസ്തുഭ്യം പാദസ്പർശം ക്ഷമസ്വമേ"

സ്നാനം ചെയ്യുന്നതിന് മുന്നേ കുളിക്കുന്ന വെള്ളത്തില്‍ കൈതൊട്ട് താഴെ പറയുന്ന മന്ത്രം ജപിച്ച് സപ്തഗംഗകളുടെ സാന്നിധ്യം വരുത്തി വന്ദിക്കുക...

"ഗംഗേ ച യമുനേ ചൈവ ഗോദാവരീ സരസ്വതീ
നർമദേ സിന്ധു കാവേരി ജലേസ്മിൻ സന്നിധിം കുരു".

കുളികഴിഞ്ഞ് ഒരു കൈക്കുമ്പിള്‍ ജലമെടുത്ത്‌ സൂര്യഗായത്രി മന്ത്രം ജപിച്ച് സൂര്യന് അര്‍ഘ്യം കൊടുക്കുക...

"ഓം ഭൂർ ഭുവസ്വ തത് സവിതുർ വരേണ്യം
ഭർഗോ ദേവസ്യ ധീമഹി ധിയോയോന പ്രചോദയാത്"

ഭക്ഷണം കഴിക്കുന്നതിന് മുന്നേ താഴെ പറയുന്ന മന്ത്രം ജപിച്ച് അന്നത്തെ വന്ദിക്കുക...

"അന്നപൂർണേ സദാപൂർണേ ശങ്കരപ്രാണവല്ലഭേ
ജ്ഞാനവൈരാഗ്യ സിദ്ധ്യാർത്ഥം
ഭിക്ഷാംദേഹി ച പാർവതി"

"ബ്രഹ്മാർപണം ബ്രഹ്മഹാവിർ ബ്രഹ്മാഗ്നൗ ബ്രഹ്മണാഹുതം
ബ്രഹ്മൈവ തേന ഗന്തവ്യം ബ്രഹ്മകർമ സമാധിനാ "

കുട്ടികള്‍ പഠിക്കുന്നതിന് മുന്നേ ഈ മന്ത്രം ജപിക്കുക.

"ഓം കൃഷ്ണ കൃഷ്ണ ഹരേകൃഷ്ണ
സർവജ്ഞത്വം പ്രസീദമേ
രമാരമണ വിശ്വേശ
വിദ്യാമാശു പ്രയശ്ചമേ"

വീട്ടില്‍ നിന്ന് പുറത്തേക്ക് ഇറങ്ങുന്നതിന് മുന്നേ ഗണേശ ഏകവിംശതി ജപിക്കുക യാത്രാവിഘ്നങ്ങള്‍ തീരാന്‍ സഹായിക്കും.

"ഗണംജയോ ഗണപതിർ ഹേരംബോ ധരണീധര:
മഹാഗണപതിർ ലക്ഷപ്രദ: ക്ഷിപ്രപ്രസാദന:
അമോഘസിദ് ധിരമിതൊ മന്ത്രശ് ചിന്താമണിർനിധി:
സുമംഗളോ ബീജമാശാപൂരകോ വരദശ് ശിവ:
കാശ്യപോനന്ദനോ വാചാസിദ്ധോഢുഠഢിവിനായക:
മോദകൈരെഭിരത്രൈക വിംശ്യത്യാനാമഭി: പുമാൻ
യ:സ്തൌതി മദ്ഗതമനോ: മദാരാധനതത്പര:
സ്തുതോ നാമ് നാം സഹസ്രേണ
തേനാഹം നാത്ര സംശയ:
നമോ നമ: സുരവര പൂജിതാംഘ്രയേ
നമോ നമോ നിരുപമമംഗളാത് മനേ
നമോ നമോ വിപുലപദൈകസിദ്ധയേ
നമോ നമ: കരി കലഭാനനായതേ"

ഉറങ്ങുന്നതിന് മുന്നേ ഈ മന്ത്രം ജപിച്ച് കിടക്കുക..

"അർജുനൻ ഫൽഗുണൻ പാർഥൻ വിജയനും
വിശ്രുതമായ പേർ പിന്നെ കിരീടിയും
ശ്വേതവാഹനൻ ധനഞ്ജയൻ ജിഷ്ണുവും
ഭീതിഹരം സവ്യസാചി ഭീഭൽസുവും
പത്തു നാമങ്ങളും ഭക്ത്യാ ജപിക്കിലോ
നിത്യ ഭയങ്ങൾ അകന്നുപോം നിശ്ചയം"

അതോടൊപ്പം ഈ മന്ത്രം കൂടി ജപിച്ച് നമ്മള്‍ അറിഞ്ഞോ അറിയാതെയെ ആ ദിവസം ചെയ്ത തെറ്റുകുറ്റങ്ങള്‍ക്ക് ഭഗവാനോട് മാപ്പിരക്കുക...

"കരചരണകൃതം വാ കായജം കർമജം വാ
ശ്രവണനയനജം വാ
മാനസം വാ പരാധം
വിഹിതമവിഹിതം വാ സർവമേതത് ക്ഷമസ്വ
ജയ ജയ കരുണാബ്ധെ ശ്രീ മഹാദേവ ശംഭോ"

ഇതാണ് ഭാരതീയസംസ്കാരം. ഒരു ഉറുമ്പിനെപ്പോലും ദ്രോഹിക്കാതെ ഒരു ദിവസം അവസാനിപ്പിക്കണം എന്നതാണ് ആചാര്യമതം.

13/05/2026

നിലവിലെ വ്യാഴമാറ്റം (2024 - 2025)
2024 മെയ് മാസത്തിൽ വ്യാഴം മേടം രാശിയിൽ നിന്നും ഇടവം രാശിയിലേക്ക് മാറുകയുണ്ടായി. 2025 മെയ് മാസം വരെ വ്യാഴം ഇടവം രാശിയിൽ തുടരും.

പ്രാധാന്യം
ജ്യോതിഷത്തിൽ 'ഗുരു' എന്ന് വിളിക്കപ്പെടുന്ന വ്യാഴം ഭാഗ്യം, വിദ്യ, സമ്പത്ത്, സന്താനം, വിവാഹം എന്നിവയുടെ പ്രതീകമാണ്. അതിനാൽ വ്യാഴത്തിന്റെ മാറ്റം ഈ മേഖലകളിലെല്ലാം ഗുണകരമായോ ദോഷകരമായോ സ്വാധീനം ചെലുത്തുന്നു.

ശുഭസ്ഥാനങ്ങൾ
ഒരാളുടെ ജന്മരാശിയിൽ നിന്ന് 2, 5, 7, 9, 11 എന്നീ ഭാവങ്ങളിൽ വ്യാഴം സഞ്ചരിക്കുമ്പോഴാണ് ഏറ്റവും കൂടുതൽ ഗുണഫലങ്ങൾ ലഭിക്കുന്നത്.

രണ്ടാം ഭാവം: ധനലാഭം, കുടുംബസുഖം.

അഞ്ചാം ഭാവം: സന്താനഭാഗ്യം, വിദ്യാലാഭം.

ഏഴാം ഭാവം: വിവാഹസിദ്ധി, പങ്കാളിത്ത വിജയം.

ഒൻപതാം ഭാവം: ഭാഗ്യപുഷ്ടി, തീർത്ഥാടനം.

പതിനൊന്നാം ഭാവം: സർവ്വകാര്യ വിജയം, ആഗ്രഹസാഫല്യം.

വ്യാഴദോഷം (അശുഭസ്ഥാനങ്ങൾ)
ജന്മരാശിയിലും (ഒന്നാം ഭാവം), 4, 6, 8, 12 എന്നീ ഭാവങ്ങളിലും വ്യാഴം വരുമ്പോൾ പൊതുവെ ഗുണഫലങ്ങൾ കുറയാൻ സാധ്യതയുണ്ട്. ഇതിനെയാണ് 'വ്യാഴദോഷം' എന്ന് പറയുന്നത്. ഈ സമയങ്ങളിൽ ആരോഗ്യപ്രശ്നങ്ങൾ, അനാവശ്യ ചിലവുകൾ, മനഃക്ലേശം എന്നിവ ഉണ്ടായേക്കാം.

11/05/2026

അമ്മയുടെ അനുഗ്രഹം തേടി, മന്ത്രോച്ചാരണങ്ങളാൽ മുഖരിതമായ സന്ധ്യയിൽ, ഇരുപ്പ ശ്രീ ദുർഗ്ഗാ ദേവി ക്ഷേത്രത്തിലെ കലശ പൂജാ ദൃശ്യങ്ങൾ."

09/05/2026

സന്ധ്യാദീപത്തിന്റെ പ്രഭയിൽ നമ്മുടെ മനസ്സിലെ ഇരുളകന്നു സന്തോഷം നിറയട്ടെ. സന്ധ്യാനാമം ജപിച്ചു ഐശ്വര്യപൂർണ്ണമായ ഒരു സായാഹ്നം എല്ലാവർക്കും ആശംസിക്കുന്നു."ഓം ഹ്രീം സർവ്വ മംഗള മംഗല്യേ...ശിവേ സർവ്വാർത്ഥ സാധികേ..." 🌸✨

14/06/2025