08/02/2025
🙏 ഓം നമ: ശിവായ
തൃച്ചാറ്റുകുളം ശ്രീ മഹാദേവൻ്റെ വലിയവിളക്കുത്സവമായ ഇന്ന് രാത്രി 8.30 ന് വിളക്കിനെഴുന്നള്ളത്ത്. തുടർന്ന് കൂടിയെഴുന്നള്ളത്ത് ( ദർശന പ്രധാനം ) ,വലിയ കാണിക്ക, 11.30 ഓടെ പള്ളിനായാട്ട്. ശേഷം ദേവൻമുഖമണ്ഡപത്തിൽ നിദ്രകൊള്ളും.കൊടിയേറ്റു ദിവസം മുതൽ മുളയറയിൽ താന്ത്രികവിധിപ്രകാരം പൂജ ചെയ്ത,പൂപ്പാലികകളിലെ അങ്കുരിത ദ്രവ്യങ്ങൾ മെത്തക്ക് ചുറ്റും വച്ച് പോഷിപ്പിച്ച ജീവനകലകളെ ദേവനിലേക്ക് സന്നിവേശിപ്പിക്കും. ആറാട്ട് ദിനമായ നാളെ(9/2/25 ) രാവിലെ താമസിച്ചാവും നടതുറക്കുക. തുടർന്ന് ദേവനെ ഗണപതി നടയിലേക്ക് എഴുന്നള്ളിച്ച് അഭിഷേകാദികൾ നടത്തിയ ശേഷം ഗർഭഗൃഹത്തിലേക്ക് എഴുന്നുള്ളിക്കും. ഉഷപൂജ, എതിർത്ത പൂജ എന്നിവക്കു ശേഷം ശ്രീബലി. വൈകിട്ട് 3.00 ന് ശേഷം കൊടിയിറക്ക്. തുടർന്ന് പരമ്പരാഗത പാതയിലൂടെ അരൂക്കുറ്റി ആറാട്ടുകടവിലേക്ക്. ആറാട്ടിനു ശേഷം പന്തീരടിപൂജ( പതിവുപോലെ ഇത്തവണയും ആറാട്ടു ദിവസം പ്രദോഷം കൂടിയാണ്, ആയതിനാൽ പ്രദോഷപൂജ ആറാട്ടുകടവിൽ). രാത്രി 10 മണിയോടെ അവിടെ നിന്നുംതിരിച്ചെഴുന്നള്ളത്ത്.വാദ്യമേളങ്ങളോടെ ആറാട്ടുകഴിഞ്ഞ് ഏറ്റവുംതേജ്വസ്സിയായി ,മംഗളസ്വരൂപനായിവരുന്ന ശ്രീമഹാദേവനെ രാത്രി വൈകി ക്ഷേത്രഗോപുരത്തിൽ ശംഖനാദത്തോടെ മംഗളാരതി ഉഴിഞ്ഞ് എതിരേല്ക്കും. പ്രദക്ഷിണം പൂർത്തിയാക്കി അകത്തേക്ക് എഴുന്നള്ളിക്കുന്ന ശ്രീ പരമേശ്വരന് മുന്നിൽ രക്ഷാഭോഗ സമർപ്പണം. തുടർന്ന്ഇരുപത്തഞ്ചു കലശവും ശ്രീഭൂതബലിയും നടത്തുന്നതോടെ ഉത്സവ ചടങ്ങുകൾക്ക്പരിസമാപ്തി.ശേഷംഅത്താഴശ്ശീവേലിവരെയുള്ളപതിവുചടങ്ങുകൾപൂർത്തിയാക്കി ക്ഷേത്രനടയടയ്ക്കും.
