17/07/2026
പാർവ്വതീദേവിയുടെ ഒരു ഭാവമാണ് അന്നത്തിന്റെ ദേവിയായ അന്നപൂർണ്ണേശ്വരി. ഈ ദേവിയുടെ ഒരു കൈയിൽ അന്നപാത്രവും മറു കൈയിൽ ഭക്ഷണം വിളമ്പാനുള്ള കരണ്ടിയുമുണ്ട്. ശംഖ്, താമര, അന്നപാത്രം, കരണ്ടി എന്നിവ ധരിച്ച് നാല് കൈകളോടുകൂടിയ മറ്റൊരു സങ്കല്പവും ചില ശില്പങ്ങളിൽ കാണുന്നുണ്ട്.
ഏവർക്കും ആഹാരം നൽകുന്ന ആദിപരാശക്തിയാണ് അന്നപൂർണയെന്ന് പുരാണങ്ങൾ പറയുന്നു. ശാകംഭരിയാണ് സമാനമായ മറ്റൊരു ശക്തിരൂപം. കാശിയിലെ (വാരണാസി) അന്നപൂർണ്ണാക്ഷേത്രം ഏറെ പ്രസിദ്ധമാണ്.
ശിവന് അന്നമൂട്ടുന്ന ശ്രീപാർവതിയെയാണ് അന്നപൂർണേശ്വരിയായി സങ്കല്പിക്കുന്നത്..ശ്രീ അന്നപൂർണ്ണേശ്വരി ദേവിയെ നിത്യവും ഭജിച്ചാൽ ദാരിദ്ര്യദുഃഖം ബാധിക്കില്ല. അന്നത്തിന് ഒരിക്കലും ഒരു
ബുദ്ധിമുട്ടും ഉണ്ടാകില്ല. കേരളത്തിലെ മുഖ്യ അന്നപൂർണ്ണേശ്വരി ക്ഷേത്രം കണ്ണൂർ ചെറുകുന്നിലാണ്.അന്നപൂർണേശ്വരിയെക്കുറിച്ച് അനേകം സ്തോത്രങ്ങൾ ഉണ്ടെങ്കിലും ആദിശങ്കരാചാര്യർ എഴുതിയ നിത്യാനന്ദകരീ, വരാഭയകരീ, സൗന്ദര്യരത്നാകരീ എന്ന രചനയാണ് ദേവ്യുപാസകർക്കിടയിൽ ഏറ്റവും പ്രസിദ്ധം. കേരളത്തിൽ അന്നപൂർണ്ണേശ്വരി ക്ഷേത്രങ്ങൾ ധാരാളമുണ്ട്. ഇതിന് പുറമെ പല തറവാടുകളുടേയും കുടുംബദേവതയായും അന്നപൂർണ്ണേശ്വരി വാഴുന്നു. ധനധാന്യങ്ങളുടേയും സമ്പത്തിന്റെയും അധിദേവത എന്ന സങ്കല്പത്തിലാണ് അന്നപൂർണ്ണേശ്വരിയെ അറയുടേയും നിലവറയുടേയും വാതിലിനു മുകളിലായി ദേവതാരൂപത്തിൽ കൊത്തിവെച്ചിരിക്കുന്നത്. ഈ രൂപത്തെ മനസ്സിൽ ധ്യാനിച്ചാണ് അറയും നിലവറയും തുറക്കുന്നത്. ഭക്തിയോടെയും ശുദ്ധിയോടെയും അന്നപൂർണ്ണേശ്വരിയെ ജപിച്ചാൽ കുടുംബാഭിവൃദ്ധിയും ശ്രേയസ്സും ഉണ്ടാകുമെന്നും വിശ്വസിക്കുന്നു..സർവ്വജീവജാലങ്ങൾക്കും ആഹാരം നൽകുന്ന പാർവ്വതീദേവിയുടെ ഭാവമായാണ് അന്നപൂർണ്ണയെ ആരാധിക്കുന്നത്. വെള്ളിയാഴ്ചകളും പൗർണ്ണമിയും അക്ഷയതൃതീയയും ദേവിക്ക് പ്രധാനപ്പെട്ട ദിവസങ്ങളാണ്.
" ഭിക്ഷാം ദേഹി കൃപാവലംബനകരി മാതാന്നപൂര്ണ്ണേശ്വരി... "
