Voice Of MarThoma Nasrani

04/10/2026

സീറോമലബാർ സഭയുടെ വക്താക്കൾക്കായി പുതിയ പാനൽ പ്രഖ്യാപിച്ചു. റവ. ഡോ. ടോം ഒളിക്കരോട്ട് (PRO, സീറോമലബാർ സഭ), ശ്രീ രാജീവ് കൊച്ചുപറമ്പിൽ, ഡോ. ചാക്കോ കളമ്പറമ്പിൽ, ശ്രീ ജോഷി വടക്കൻ, അഡ്വ. ജസ്റ്റിൻ പള്ളिवाതുക്കൽ, അഡ്വ. ജോജി ചിറയിൽ, അഡ്വ. സിസ്റ്റർ ജോസിയ S.D., ഡോ. ട്രീസ ലിസ് സെബാസ്റ്റ്യൻ എന്നിവരടങ്ങുന്നതാണ് പുതിയ പാനൽ. 02-10-2026 തീയതിയിലുള്ള വാർത്താ ചിത്രത്തിലൂടെ ഷെക്കീന ന്യൂസ് ആണ് ഈ വിവരം പുറത്തുവിട്ടിരിക്കുന്നത്.

03/10/2026

സീറോ മലബാർ സഭയിലെ കോട്ടയം അതിരൂപതയുടെ സഹായ മെത്രാനായി തിരഞ്ഞെടുക്കപ്പെട്ട മോൺസിഞ്ഞോർ തോമസ് ആനിമൂട്ടിലിന്റെ മെത്രാഭിഷേക ശുശ്രൂഷ (Episcopal Ordination) സഭയിലെ പ്രമുഖ മേലധ്യക്ഷന്മാരുടെയും വൈദികരുടെയും വിശ്വാസികളുടെയും സാന്നിധ്യത്തിൽ ഭക്തിനിർഭരമായി നിർവ്വഹിക്കപ്പെട്ടു. 1989-ൽ പൗരോഹിത്യം സ്വീകരിച്ച അദ്ദേഹം വികാരിയായും അതിരൂപതാ ചാൻസലറായും അമേരിക്കയിലെ ക്നാനായ കത്തോലിക്കാ മിഷനുകളുടെ ഡയറക്ടറായും കോട്ടയം അതിരൂപതയുടെ പ്രോ-പ്രോട്ടോസിഞ്ചെല്ലൂസായും ദീർഘകാലം മാതൃകാപരമായ സേവനം അനുഷ്ഠിച്ചിട്ടുണ്ട്. സഭാ സിനഡിന്റെ തെരഞ്ഞെടുപ്പും പരിശുദ്ധ മാർപാപ്പയുടെ അംഗീകാരവും തുടർന്നുള്ള ഈ മെത്രാഭിഷേകവും കോട്ടയം അതിരൂപതയുടെയും ക്നാനായ സമുദായത്തിന്റെയും ഇടയസേവന രംഗത്ത് വലിയൊരു ആത്മീയ മുന്നേറ്റത്തിനാണ് വഴിതെളിക്കുന്നത്.

സീറോ മലബാർ സഭയിലെ കോട്ടയം അതിരൂപതയുടെ സഹായ മെത്രാനായ മാർ തോമസ് ആനിമൂട്ടിൽ, 1962 ജനുവരി 13-ന് കണ്ണൂർ ജില്ലയിലെ പയ്യവൂരിൽ ജോസഫ്-ഏലി ദമ്പതികളുടെ മകനായി ജനിച്ചു. പയ്യവൂരിലും മൈസൂരുവിലുമായി പ്രാഥമിക-ഉന്നത വിദ്യാഭ്യാസം പൂർത്തിയാക്കിയ അദ്ദേഹം, കോട്ടയം സെന്റ് സ്റ്റാനിസ്ലാവൂസ് മൈനർ സെമിനാരിയിലും മംഗലാപുരം സെന്റ് ജോസഫ്സ് സെമിനാരിയിലുമായി വൈദിക പരിശീലനം നേടുകയും 1989 ഏപ്രിൽ 13-ന് പൗരോഹിത്യം സ്വീകരിക്കുകയും ചെയ്തു. റോമിലെ പോന്തിഫിക്കൽ യൂണിവേഴ്സിറ്റി ഓഫ് ദ ഹോളി ക്രോസിൽ നിന്ന് കാനോൻ നിയമത്തിൽ ലൈസൻഷ്യേറ്റ് നേടിയ അദ്ദേഹം, കോട്ടയം അതിരൂപതയിൽ വികാരി, ബിഷപ്പിന്റെ സെക്രട്ടറി, അതിരൂപതാ ചാൻസലർ, ഉഴവൂർ-കടുത്തുരുത്തി ഫൊറോനാ വികാരി, പ്രോ-പ്രോട്ടോസിഞ്ചെല്ലൂസ് തുടങ്ങിയ പ്രധാന പദവികളും അമേരിക്കയിലെ വിവിധ ക്നാനായ മിഷനുകളുടെ ഡയറക്ടറായും സേവനമനുഷ്ഠിച്ചിട്ടുണ്ട്. 2026 ഓഗസ്റ്റിൽ സീറോ മലബാർ സഭാ സിനഡിന്റെ തീരുമാനപ്രകാരവും പരിശുദ്ധ മാർപാപ്പയുടെ അംഗീകാരത്തോടെയും കോട്ടയം അതിരൂപതയുടെ സഹായ മെത്രാനായി തെരഞ്ഞെടുക്കപ്പെട്ട അദ്ദേഹത്തിന്റെ മെത്രാഭിഷേകം 2026 ഒക്ടോബർ 2-ന് നടന്നു.

03/10/2026

ഒക്ടോബര്‍ മാസം ജപമാല മാസം എന്നറിയപ്പെടുന്നതിന് ഒരു പ്രത്യേക കാരണമുണ്ട്. ഒക്‌ടോബര്‍ 7 ാം തീയതിയാണ് ജപമാല മാതാവിന്റെ തിരുനാള്‍. പതിനാറാം നൂറ്റാണ്ടില്‍ പരിശുദ്ധ കന്യകാ മാതാവിന്റെ പ്രത്യേക ഇടപെടല്‍ വഴി സംഭവിച്ച ഒരു വലിയ വിജയത്തിന്റെ ഓര്‍മയ്ക്കായിട്ടാണ് കത്തോലിക്കാ സഭ ഒക്ടോബര്‍ 7 ജപമാല തിരുനാളായി പ്രഖ്യാപിച്ചത്. ഏഡി 1571 ഒക്ടോബറില്‍ യൂറോപ്പിലെ കത്തോലിക്കാ സഭ മുസ്ലിം തുര്‍ക്കികളില്‍ നിന്ന് വലിയ ഭീഷണി നേരിട്ടിരുന്നു. മധ്യേഷ്യ ആക്രമിച്ച് അവിടെയുണ്ടായിരുന്ന ക്രിസ്ത്യാനികളെയെല്ലാം ഇസ്ലാം മതത്തിലേക്ക് മതപരിവര്‍ത്തനം ചെയ്ത ശേഷം തുര്‍ക്കികള്‍ മെഡിറ്ററേനിയന്‍ കടലിലൂടെ യൂറോപ്പിലേക്ക് നീങ്ങി. യൂറോപ്പിലെ ക്രിസ്ത്യന്‍ സാമ്രാജ്യങ്ങളെ കീഴടക്കുകയായിരുന്നു അവരുടെ ലക്ഷ്യം.

അപകടം മുന്നില്‍ കണ്ട മാര്‍പാപ്പാ യൂറോപ്പിലെ ക്രിസ്ത്യന്‍ രാജാക്കന്മാരെ റോമില്‍ വിളിച്ചു വരുത്തി. മാര്‍പാപ്പായുടെ പ്രത്യേക ആഹ്വാനപ്രകാരം യൂറോപ്പിലെ രാജാക്കന്മാര്‍ തുര്‍ക്കികളോട് യുദ്ധത്തിനിറങ്ങി. അംഗബലം കൊണ്ടും യുദ്ധ തന്ത്രങ്ങള്‍ കൊണ്ടും തുര്‍ക്കികള്‍ ഏറെ ശക്തരാണെന്ന് മാര്‍പാപ്പായ്ക്ക് അറിയമായിരുന്നു. അവരെ യുദ്ധത്തില്‍ തോല്‍പ്പിക്കുക അത്ര എളുപ്പമായിരുന്നു. അപ്പോള്‍ മാര്‍പ്പാപ്പാ ഒരു കാര്യം ചെയ്തു. റോമിലെ ക്രിസ്ത്യാനികളെയെല്ലാം ഒരുമിച്ചു കൂട്ടി പാപ്പാ ഒരു ജപമാല റാലി നടത്തി.

അതിനെ തുടര്‍ന്ന് തുര്‍ക്കികളും ക്രിസ്ത്യന്‍ സൈന്യവും തമ്മില്‍പ്രശസ്തമായ ലെപ്പാന്റോ യുദ്ധം നടന്നു. യുദ്ധം നടക്കുന്ന സമയമെല്ലാം ക്രിസ്ത്യാനികള്‍ അണിനിരന്ന് ജപമാല ചൊല്ലിയതിന്റെ ഫലമായി ക്രിസ്ത്യന്‍ സൈന്യത്തേക്കാള്‍ സംഖ്യയില്‍ വളരെ ഏറെയുണ്ടായിരുന്ന തുര്‍ക്കികള്‍ക്കെതിരെ ക്രിസ്ത്യന്‍ രാജാക്കന്‍മാര്‍ വിജയിച്ചു.

ഈ അത്ഭുതകരമായ വിജയം പരിശുദ്ധ മാതാവിന്റെ മാധ്യസ്ഥം കൊണ്ടാണെന്നും ജപമാല ഭക്തിയുടെ ഫലമായിട്ടാണെന്നും മാര്‍പാപ്പായും ക്രിസ്തീയ വിശ്വാസികളും വിശ്വസിച്ചു. ഈ വിജയത്തിന്റെ ഓര്‍മയ്ക്കായി എല്ലാവര്‍ഷവും പരിശുദ്ധ മാതാവിന്റെ ബഹുമാനാര്‍ത്ഥം തിരുനാള്‍ ആഘോഷിക്കാന്‍ പാപ്പാ ഉത്തരവിട്ടു. അദ്ദേഹത്തിന്റെ പിന്‍ഗാമിയായി വന്ന ഗ്രിഗറി പതിമൂന്നാമന്‍ പാപ്പാ ഒക്ടോബറിലെ ആദ്യ ഞായറാഴ്ച ജപമാല മാതാവിന്റെ തിരുനാളായി പ്രഖ്യാപിച്ചു.🙏✝️

02/10/2026

സീറോമലബാർ സഭയുടെ പബ്ലിക് റിലേഷൻസ് ഓഫീസിന്റെ (PRO) കീഴിൽ മാധ്യമങ്ങളുമായും പൊതുസമൂഹവുമായും ആശയവിനിമയം നടത്തുന്നതിനായി പുതിയ വക്താക്കളുടെ പാനൽ രൂപീകരിച്ചു. നിലവിലെ വക്താക്കളുടെ കാലാവധി പൂർത്തിയായതിനെ തുടർന്ന് മേജർ ആർച്ച്ബിഷപ്പ് മാർ റാഫേൽ തട്ടിൽ പിതാവാണ് പുതിയ നിയമനം നടത്തിയത്. ഡോ. ചാക്കോ കാലാപറമ്പിൽ, ശ്രീ രാജീവ് കൊച്ചുപറമ്പിൽ, ശ്രീ ജോഷി വടക്കൻ, അഡ്വ. ജോർജി ചിറയിൽ, അഡ്വ. ജസ്റ്റിൻ പള്ളिवाതുക്കൽ, ഡോ. ട്രീസ ലിസ് സെബാസ്റ്റ്യൻ, അഡ്വ. സിസ്റ്റർ ജോസിയ എസ്.ഡി. എന്നിവരാണ് പുതിയ വക്താക്കൾ. സഭയുമായി ബന്ധപ്പെട്ട ഔദ്യോഗിക വിവരങ്ങൾ കൃത്യമായും സമയബന്ധിതമായും പൊതുസമൂഹത്തിലേക്കും മാധ്യമങ്ങളിലേക്കും എത്തിക്കുക, വിവിധ വിഷയങ്ങളിലെ സഭയുടെ നിലപാടുകളും പ്രതികരണങ്ങളും വ്യക്തമാക്കുക എന്നിവയാണ് പുതിയ പാനലിന്റെ പ്രധാന ചുമതലകൾ.

01/10/2026

പാരിസിൽ ലെയോ പാപ്പ അർപ്പിച്ച വിശുദ്ധ കുർബാനയിൽ എട്ടു ലക്ഷത്തോളം വിശ്വാസികൾ പങ്കെടുത്തു. ഫ്രാൻസിന്റെ തലസ്ഥാനമായ പാരിസിൽ സംഘടിപ്പിച്ച ഈ ദിവ്യബലിയിൽ ആഗോള കത്തോലിക്കാ സഭയുടെ വിവിധ ഭാഗങ്ങളിൽ നിന്നുള്ള വൻ വിശ്വാസിസഞ്ചയമാണ് ഒഴുകിയെത്തിയത്. പാപ്പയെ നേരിൽ കാണാനും അനുഗ്രഹം തേടാനും അതിരാവിലെ തന്നെ ജനങ്ങൾ വേദിക്ക് ചുറ്റും തടിച്ചുകൂടിയിരുന്നു.

വലിയ സുരക്ഷാ സജ്ജീകരണങ്ങളോടെയാണ് ചടങ്ങുകൾ ക്രമീകരിച്ചത്. പോപ്പ് മൊബീലിൽ വേദിയിലേക്ക് എത്തിയ പാപ്പ വിശ്വാസികളെ അഭിവാദ്യം ചെയ്തു. ലോകസമാധാനത്തിനും സാഹോദര്യത്തിനുമായി അദ്ദേഹം തന്റെ സന്ദേശത്തിൽ ആഹ്വാനം ചെയ്തു. സഭയുടെ ചരിത്രത്തിലെ തന്നെ ഏറ്റവും വലിയ ജനപങ്കാളിത്തമുള്ള ചടങ്ങുകളിലൊന്നായി ഈ വിശുദ്ധ കുർബാന മാറി.

30/09/2026

സീറോ മലബാർ സഭയുടെ മേജർ ആർച്ച് ബിഷപ്പ് അഭിവന്ദ്യ മാർ റാഫേൽ തട്ടിൽ പിതാവിന് ഹൃദയം നിറഞ്ഞ Feast മംഗളങ്ങൾ നേരുന്നു! ദൈവാനുഗ്രഹവും ആയുരാരോഗ്യവും എന്നും കൂടെയുണ്ടാകട്ടെ എന്ന് പ്രാർത്ഥിക്കുന്നു.

29/09/2026

ബേസ് അപ്രേം നസ്രാണി ദയറാ കാപ്പും തലയിൽ സ്ഥാപിക്കപ്പെട്ടതിന്റെ ഇരുപതാം വാർഷികം സമുചിതമായി ആചരിച്ചു. കുറവിലങ്ങാട്, കടുത്തുരുത്തി, മുട്ടുചിറ, കോതനല്ലൂർ എന്നീ പൗരാണിക നസ്രാണി കേന്ദ്രങ്ങളുടെ മധ്യത്തിലായി 2006 സെപ്റ്റംബർ 25-നാണ് ദയറാ സ്ഥാപിക്കപ്പെട്ടത്. വാർഷികത്തോടനുബന്ധിച്ച് സെപ്റ്റംബർ 25 വെള്ളി വൈകുന്നേരം ആറുമണിക്ക് ബേസ് സ്ലീവായുടെ മുന്നിൽ നടന്ന പുറത്തു നമസ്കാരത്തിന് പൗരസ്ത്യ കൽദായ സുറിയാനി സഭയുടെ മേലധ്യക്ഷൻ അഭിവന്ദ്യ മാർ ഔഗിൻ കുറിയാക്കോസ് മെത്രാപ്പോലീത്ത മുഖ്യ കാർമികത്വം വഹിച്ചു.

പാലാ രൂപതയുടെ മെത്രാനും ദയറായുടെ രക്ഷാധികാരിയുമായ അഭിവന്ദ്യ മാർ ജോസഫ് കല്ലറങ്ങാട്ട് മെത്രാപ്പോലീത്തയുടെ അധ്യക്ഷതയിൽ കൂടിയ സമ്മേളനത്തിൽ മാർ ഔഗിൻ കുറിയാക്കോസ് മെത്രാപ്പോലീത്ത, സിറിയൻ ഓർത്തഡോക്സ് സഭയുടെ ഓറശ്ലേം ഭദ്രാസനത്തിന്റെ പാത്രിയാർക്കൽ മെട്രോപോളിറ്റൻ വികാരിയും വീട്ടൂർ ദയറായുടെ അധിപനുമായ അഭിവന്ദ്യ മാത്യൂസ് മാർ തിമോത്തിയോസ് മെത്രാപ്പോലീത്ത എന്നിവർ അനുഗ്രഹ പ്രഭാഷണം നടത്തി.

ദയറാകളിലൂടെയാണ് സഭയുടെ പാരമ്പര്യങ്ങൾ സംരക്ഷിക്കപ്പെടുന്നതെന്നും ദയറാകൾ ആരംഭിച്ച് സഭകളും സമുദായവും നവീകരിക്കപ്പെടണമെന്നും അധ്യക്ഷ പ്രസംഗത്തിൽ മാർ ജോസഫ് കല്ലറങ്ങാട്ട് അഭിപ്രായപ്പെട്ടു. സങ്കീർത്തനങ്ങൾ ചൊല്ലുന്ന ഈശോയുടെയും മർത്ത് മറിയത്തിന്റെയും ശ്ലീഹന്മാരുടെയും പാരമ്പര്യം മാർത്തോമ്മാ നസ്രാണികൾക്ക് ഉണ്ടായിരുന്നെന്നും, അനുദിന പ്രാർത്ഥനയിലൂടെ ആത്മീയ സംസ്കാരത്തിലേക്ക് വളർന്ന് നസ്രാണിത്തനിമ വീണ്ടെടുക്കണമെന്നും അദ്ദേഹം കൂട്ടിച്ചേർത്തു.

നമ്മുടെ പൂർവികർ സങ്കീർത്തനങ്ങളും കുർബാനയിലെ പ്രാർത്ഥനകളും ചെറുപ്പം മുതൽ മനഃപാഠമാക്കിയിരുന്നെന്നും സുറിയാനി പാരമ്പര്യങ്ങൾ സംരക്ഷിക്കുന്ന പരിശ്രമങ്ങളിലൂടെ സഭകൾക്ക് വലിയ ഉപകാരമാണ് ദയറാകൾ നൽകുന്നതെന്നും മാർ ഔഗിൻ കുര്യാക്കോസ് മെത്രാപ്പോലീത്ത ഓർമ്മിപ്പിച്ചു. മാർ അപ്രേമിന്റെ കാലഘട്ടത്തിൽ അദ്ദേഹത്തിന് ചുറ്റുമുള്ളവർ അദ്ദേഹത്തെ അനുകരിക്കാൻ ശ്രമിച്ചതുപോലെ, നമ്മുടെ സൽപ്രവർത്തികൾ കണ്ട് മറ്റുള്ളവർ ക്രിസ്ത്യാനികളെ തിരിച്ചറിയണമെന്നും അനുകരിക്കണമെന്നും മാത്യൂസ് മാർ തിമോത്തിയോസ് മെത്രാപോലീത്ത പ്രസ്താവിച്ചു.

മാർഗംകളി, പരിചമുട്ടുകളി, റമ്പാൻ പാട്ട് തുടങ്ങിയ നസ്രാണി കലകളുടെയും സുറിയാനി സംഗീതം, സംഗീതോപകരണങ്ങൾ, മദ്ബഹാ ശുശ്രൂഷികൾ, ഗാന ശുശ്രൂഷകർ എന്നിവരുടെയും പരിശീലനം ഉൾക്കൊള്ളുന്ന 'APPAN Nazrani Heritage Club' പ്രവർത്തനങ്ങൾ അഭിവന്ദ്യ മാർ ജോസഫ് കല്ലറങ്ങാട്ട് പിതാവ് ഉദ്ഘാടനം ചെയ്തു. ദയറായിൽ നടത്തപ്പെട്ട കോഴ്സുകളുടെ സർട്ടിഫിക്കറ്റ് വിതരണവും അഭിവന്ദ്യ പിതാക്കന്മാർ നിർവഹിച്ചു.

ദയറായുടെ സ്ഥാപകൻ കൂനമ്മാക്കൽ തോമാ കത്തനാർ, അർക്കദിയാക്കോന്മാർ, പള്ളിവീട്ടിൽ-പറമ്പിൽ ചാണ്ടി മെത്രാൻ, ഗോവർണദോർ പാറേമ്മാക്കൽ തോമാ കത്തനാർ, കുടക്കച്ചിറ അന്തോനിക്കത്തനാർ, നിധീരിക്കൽ മാണി കത്തനാർ എന്നിവരെ യോഗത്തിൽ അനുസ്മരിച്ചു. നസ്രാണി സംസ്കൃതിയുടെ പരിരക്ഷണവും പരിശീലനവും ലക്ഷ്യമാക്കിയാണ് പുതിയ സംരംഭത്തിന് തുടക്കം കുറിച്ചിരിക്കുന്നത്.

സുറിയാനി ഭാഷാ പഠനത്തിനായുള്ള സ്‌ലീവാ സ്കൂൾ, മാർത്തോമ്മാ മാർഗം പരിശീലിപ്പിക്കുന്ന ഹെന്തോ അക്കാദമി, പിതാക്കന്മാരെയും ചരിത്ര സംഭവങ്ങളെയും അനുസ്മരിക്കുന്ന ആവാഹാസാ, പാറേമ്മാക്കൽ ലൈബ്രറി, കരിയാറ്റിൽ മ്യൂസിയം എന്നിവയാണ് ദയറയിലുള്ള പ്രധാന സ്ഥാപനങ്ങൾ. എല്ലാ ദിവസവും രാവിലെ 6.30-ന് സുറിയാനി ഭാഷയിൽ പരിശുദ്ധ കുർബാന അർപ്പണം നടക്കുന്നു. വിശുദ്ധ മൽക്കാ ഉപയോഗിച്ചുള്ള ഗോതമ്പപ്പവും മുന്തിരിച്ചാറുമാണ് വിശുദ്ധ കുർബാനയ്ക്കായി ഉപയോഗിക്കുന്നത്.

ഈശോയും ശിഷ്യന്മാരും പതിവുപോലെ സിനഗോഗുകളിൽ കൂടിയിരുന്ന പാരമ്പര്യം പതിനെട്ടാം നൂറ്റാണ്ട് വരെ പിന്തുടർന്നു പോന്ന നസ്രാണികളുടെ യഹൂദ പാരമ്പര്യം വീണ്ടെടുക്കുന്നതിനായി, ശനിയാഴ്ചകളിൽ വിശ്വാസികൾക്കായി സായാഹ്ന നമസ്കാരവും സമുദായ യോഗവും ക്രമീകരിക്കുന്നുണ്ട്. ദനഹാ (രാക്കുളി പെരുന്നാൾ), പെസഹാ, മാർ തോമാ ശ്ലീഹായുടെയും മാർ അപ്രേമിന്റെയും ദുക്റാനകൾ എന്നിവയാണ് ദയറായിലെ പ്രധാന തിരുനാളുകൾ.

29/09/2026

1985 സെപ്റ്റംബർ 14-ന് കോട്ടയത്ത് ആരംഭിച്ച St. Ephrem Ecumenical Research Institute (SEERI) 41 വർഷങ്ങൾ പൂർത്തിയായിരിക്കുകയാണ്. 41 വർഷങ്ങൾ എന്നത് ഒരു സ്ഥാപനത്തിന്റെ മാത്രം ചരിത്രമല്ല, മറിച്ച് ഒരു പുരാതന പാരമ്പര്യത്തിന്റെ പുനർജ്ജനത്തിന്റെ കഥയാണ്. മറവിയിലേക്ക് നീങ്ങിക്കൊണ്ടിരുന്ന ഒരു പാരമ്പര്യത്തെ ഭാഷയിലൂടെയും, കൈയെഴുത്തുപ്രതികളിലൂടെയും, ആരാധനയിലൂടെയും, ദൈവശാസ്ത്രത്തിലൂടെയും, ഗവേഷണത്തിലൂടെയും വീണ്ടും അന്വേഷിക്കാനുള്ള ഒരു വലിയ സ്വപ്നമാണ് ഇവിടെ സാക്ഷാത്കരിക്കപ്പെട്ടത്. 1980-കളിൽ വലിയൊരു പണ്ഡിതോചിതമായ ദർശനത്തോടെ ആരംഭിച്ച ഈ പ്രസ്ഥാനം, സഭാതിരിവുകൾക്കതീതമായി ഒന്നിച്ചുചേർന്ന നേതൃത്വത്തിന്റെ പിന്തുണയോടെയാണ് വളർന്നു പന്തലിച്ചത്.

കേരളത്തിലെ വിവിധ സുറിയാനി ക്രൈസ്തവ പാരമ്പര്യങ്ങളെ ഒരുമിച്ച് പഠിക്കാനുള്ള അപൂർവ്വ വേദിയായിരുന്നു SEERI. സുറിയാനി ഭാഷ, പുരാതന ആരാധനാക്രമങ്ങൾ, സഭാപിതാക്കന്മാരുടെ രചനകൾ, സുറിയാനി ഗാനങ്ങൾ, ദൈവശാസ്ത്രം, കൈയെഴുത്തുപ്രതികൾ എന്നിവയെല്ലാം പഠനവിധേയമാക്കി. അതിനാൽ തന്നെ SEERI-യുടെ "Ecumenical" എന്ന വിശേഷണം വെറുമൊരു അലങ്കാരമല്ല, മറിച്ച് പങ്കിട്ട പൈതൃകത്തിലൂടെ ബൗദ്ധിക സംവാദം സൃഷ്ടിക്കാനുള്ള ഒരു വൈജ്ഞാനിക തത്ത്വചിന്ത കൂടിയാണ്. 📜

ഇന്ത്യയിൽ എളുപ്പത്തിൽ ലഭ്യമല്ലാത്ത സുറിയാനി ഗ്രന്ഥങ്ങളും രേഖകളും പാരിസ്, ലണ്ടൻ, ഓക്സ്ഫോർഡ്, കേംബ്രിഡ്ജ്, റോം, വെസ്റ്റ് ബെർലിൻ തുടങ്ങിയ ലോകോത്തര ലൈബ്രറികളിൽ നിന്ന് മൈക്രോഫിലിം രൂപത്തിൽ ശേഖരിക്കാൻ എടുത്ത ശ്രമങ്ങൾ ചരിത്രപരമാണ്. ബഹു. ഡോ. ജേക്കബ് തെക്കേപറമ്പിൽ കശീശോയുടെ ദീർഘകാല അന്താരാഷ്ട്ര ബന്ധങ്ങളും പഠനാനുഭവങ്ങളും ഈ വിപുലീകരണത്തിന് നിർണായക പങ്ക് വഹിച്ചു. ലോകത്തിന്റെ വിവിധ ഭാഗങ്ങളിൽ ചിതറിക്കിടന്നിരുന്ന സുറിയാനി പൈതൃകത്തിന്റെ ഭാഗങ്ങളെ കോട്ടയത്തേക്ക് എത്തിക്കാൻ ഇതിലൂടെ സാധിച്ചു.

സുറിയാനിയെ ഒരു പുരാതന ഭാഷയായി മ്യൂസിയത്തിൽ സൂക്ഷിക്കേണ്ട ഒന്നായല്ല SEERI കണ്ടത്. അത് പാടപ്പെട്ടതും പ്രാർത്ഥിക്കപ്പെട്ടതും കവിതകൾ രചിക്കപ്പെട്ടതുമായ ഒരു ജീവസ്സുറ്റ ഭാഷയാണ്. സുറിയാനി പാരമ്പര്യത്തിൽ "ആത്മാവിന്റെ വീണ" (Harp of the Holy Spirit) എന്നറിയപ്പെടുന്ന St. Ephrem-ന്റെ പേരുമായി ബന്ധപ്പെടുത്തി 'The Harp' എന്ന പ്രസിദ്ധീകരണവും ആരംഭിച്ചു. 1987-ലെ 'The Harp' രേഖകൾ വ്യക്തമാക്കുന്നത് പാരമ്പര്യം സംരക്ഷിക്കണമെങ്കിൽ അതിനെ പഠിക്കണമെന്നും മൂലഗ്രന്ഥങ്ങളിലേക്ക് മടങ്ങണമെന്നുമുള്ള വലിയ സന്ദേശമാണ്. 🎼

സെബാസ്റ്റ്യൻ ബ്രോക്ക് തുടങ്ങിയ പ്രമുഖ അന്താരാഷ്ട്ര സുറിയാനി പണ്ഡിതന്മാരുമായി സഹകരിച്ച് പ്രഭാഷണങ്ങളും അക്കാദമിക് കൂട്ടായ്മകളും സംഘടിപ്പിക്കാൻ സ്ഥാപനത്തിന് കഴിഞ്ഞു. ഇതിലൂടെ കോട്ടയത്തെ ഒരു പ്രാദേശിക ഗവേഷണകേന്ദ്രം എന്നതിലുപരി, സുറിയാനി പഠനത്തിന്റെ അന്താരാഷ്ട്ര ഭൂപടത്തിലെ ഒരു പ്രധാന ഇന്ത്യൻ കേന്ദ്രമായി SEERI ഉയർന്നു. ഇന്ന് എം.എ സുറിയാനി, പി.എച്ച്.ഡി, ഓൺലൈൻ സർട്ടിഫിക്കറ്റ് കോഴ്സുകൾ എന്നിവയിലൂടെ ഈ സ്ഥാപനം മുന്നേറിക്കൊണ്ടിരിക്കുന്നു. 🌍

ഈ 41-ാം വാർഷികത്തിൽ SEERI നമ്മോട് ചോദിക്കുന്നത് "നമ്മുടെ പാരമ്പര്യം നമുക്ക് എത്രമാത്രം അറിയാം?" എന്ന പ്രധാന ചോദ്യമാണ്. പാരമ്പര്യത്തിൽ അഭിമാനം കൊള്ളുക മാത്രം പോരാ, അതിന്റെ ഗ്രന്ഥങ്ങൾ വായിക്കുകയും ഭാഷ പഠിക്കുകയും കൈയെഴുത്തുപ്രതികൾ പരിശോധിക്കുകയും വേണം. 41 വർഷങ്ങൾ എന്നത് ഒരു കെട്ടിടത്തിന്റെ പ്രായമല്ല, മറിച്ച് മറവിയിലേക്ക് പോകുമായിരുന്ന ചരിത്രത്തെ തിരികെ കൊണ്ടുവരാനും പുതിയ തലമുറയ്ക്ക് കൈമാറാനുമുള്ള മഹത്തായ ദൗത്യത്തിന്റെ ഓർമ്മപ്പെടുത്തലാണ്. ✨

28/09/2026

പശ്ചിമഘട്ട സംരക്ഷണത്തിനായി കൊണ്ടുവരുന്ന ഇഎസ്എ (ESA) നിയന്ത്രണങ്ങൾ മലയോര കർഷകരുടെ ദൈനംദിന ജീവിതത്തെയും ഭാവി നിലനിൽപ്പിനെയും വലിയ പ്രതിസന്ധിയിലാഴ്ത്തുന്നു. അശാസ്ത്രീയമായ ഉപഗ്രഹ സർവേകളുടെ അടിസ്ഥാനത്തിൽ ജനവാസ മേഖലകളും കാർഷിക ഭൂമികളും ഇഎസ്എ പരിധിയിൽ ഉൾപ്പെടുത്തിയത് കാരണം സ്വന്തം വസ്തുവകകളിൽ പുതിയ നിർമ്മാണങ്ങൾ നടത്താനോ, വീടുകൾ പുതുക്കിപ്പണിയാനോ, ഭൂമി പണയം വെച്ച് വായ്പകൾ എടുക്കാനോ കർഷകർക്ക് സാധിക്കുന്നില്ല.

കൂടാതെ, ക്വാറിയിംഗ്, ഖനനം, അനുബന്ധ വ്യവസായങ്ങൾ എന്നിവയ്ക്കുള്ള വിലക്ക് മൂലം മേഖലയിലെ അടിസ്ഥാന സൗകര്യ വികസനവും സാമ്പത്തിക വളർച്ചയും പൂർണ്ണമായും സ്തംഭിക്കുന്ന അവസ്ഥയിലാണ്. തലമുറകളായി കഷ്ടപ്പെട്ട് കൃഷിയോഗ്യമാക്കിയ ഭൂമി മേൽക്കോയ്മ നഷ്ടപ്പെട്ട് വികസനരഹിത മേഖലയായി മാറുമെന്ന ഭയത്തോടൊപ്പം, കൃഷി നഷ്ടത്തിലായാൽ മറ്റ് ഉപജീവനമാർഗ്ഗങ്ങൾ കണ്ടെത്താനാകാതെ ഈ മേഖലയിലെ കുടുംബങ്ങൾ വൻ കടക്കെണിയിലേക്കും സാമ്പത്തിക തകർച്ചയിലേക്കും തള്ളപ്പെടുകയാണ്.

2026 ജൂലൈ 27-ന് S.O.4106(E) നമ്പരിൽ കേന്ദ്ര വന പരിസ്ഥിതി കാലാവസ്ഥാ ...

27/09/2026

വിശ്വാസികളുടെ ഉപയോഗത്തിനായി പൗരസ്ത്യ സുറിയാനി ഭാഷയിൽ മാത്രമുള്ള വി. കുർബാന പുസ്തകത്തിൻ്റെ പ്രകാശനം മാർ സ്‌ലീവായുടെ തിരുനാളിൽ ആലഞ്ചേരി മാർ ഗീവർഗീസ് വലിയ മെത്രാപ്പോലീത്ത , കാഞ്ഞിരത്താനം പള്ളിയിൽവച്ച് വികാരി വയലിൽ ജെയിംസ് അച്ചന് നൽകി നിർവഹിക്കുന്നു.

മാർത്തോമ്മാ നസ്രാണികളുടെ സുറിയാനി ആത്മീയതയുടെ പരിശീലന കേന്ദ്രമായ ബേസ് അപ്രേം നസ്രാണി ദയറാ ഡയറക്ടർ മേക്കാട്ടുകുന്നേൽ അച്ചൻ, അസി. ഡയറക്ടർ സിറിൽ തോമസ് തയ്യിൽ അച്ചൻ, പുസ്തകം എഡിറ്റർ ജിൻ്റു പുത്തൂർ അച്ചൻ, അസി. വികാരി കാഞ്ഞിരത്തുങ്കൽ ജിജിൻ അച്ചൻ , ഡേവിസ് എരുമപ്പെട്ടി , ജോൺ തൃശ്ശൂർ , നോബിൾ ഏഴാച്ചേരി തുടങ്ങിയവർ സമീപം ...