15/07/2026
പാവറട്ടി തീർത്ഥകേന്ദ്രത്തിന്റെ സ്നേഹസ്പർശം: 'സാൻ ജോസ് ഭവന നിർമ്മാണ പദ്ധതിക്ക്' തുടക്കമായി
പാവറട്ടി: കാരുണ്യത്തിന്റേയും കരുതലിന്റേയും പുതിയൊരു അധ്യായം കുറിച്ചുകൊണ്ട് പാവറട്ടി വിശുദ്ധ യൗസേപ്പിതാവിന്റെ തീർത്ഥകേന്ദ്രത്തിൽ 'സാൻ ജോസ് ഭവന നിർമ്മാണ പദ്ധതി'ക്ക് തുടക്കമായി. തീർത്ഥകേന്ദ്രത്തിന്റെ ശതോത്തര സുവർണ ജൂബിലി ആഘോഷങ്ങളുടെ ഭാഗമായി, നിർധനരായ കുടുംബങ്ങൾക്ക് സുരക്ഷിതമായ തലചായ്ക്കാൻ ഒരിടം ഒരുക്കുക എന്ന ലക്ഷ്യത്തോടെയാണ് ഈ പദ്ധതി നടപ്പിലാക്കുന്നത്.
പദ്ധതിയുടെ ഭാഗമായി നിർമ്മിച്ചു നൽകുന്ന മൂന്ന് പുതിയ ഭവനങ്ങളിൽ ആദ്യത്തേതിന്റെ കല്ലിടൽ കർമ്മം തീർത്ഥകേന്ദ്രം റെക്ടർ ഫാ. ആന്റണി ചെമ്പകശ്ശേരി നിർവഹിച്ചു. പ്രാർത്ഥനാ നിർഭരമായ അന്തരീക്ഷത്തിൽ നടന്ന ചടങ്ങിൽ ജൂബിലി വർഷത്തിന്റെ തിളക്കം അർഹരായവർക്ക് തണലൊരുക്കുന്ന ജീവകാരുണ്യ പ്രവർത്തനങ്ങളിലൂടെയാവണം എന്ന് അദ്ദേഹം ഓർമ്മിപ്പിച്ചു.
തീർത്ഥകേന്ദ്രത്തിന്റെ ആഭിമുഖ്യത്തിൽ നടക്കുന്ന ഈ മഹത്തായ സംരംഭത്തിന് വലിയ പിന്തുണയാണ് ഇടവക സമൂഹത്തിൽ നിന്നും ലഭിക്കുന്നത്. ചടങ്ങിൽ തീർത്ഥകേന്ദ്രം ട്രസ്റ്റിമാരായ ബാബു കെ.ജെ., ജോസൺ കെ.എ., ലിയോ ജോസഫ് ഒ.ടി., ജയ്സൺ വടുകൂട്ട് എന്നിവരും ഭവന നിർമ്മാണ കമ്മിറ്റി അംഗങ്ങളും, ഇടവക ജനങ്ങളും പങ്കെടുത്തു. ബാക്കി രണ്ട് വീടുകളുടെ നിർമ്മാണവും സമയബന്ധിതമായി പൂർത്തിയാക്കാനാണ് കമ്മിറ്റി ലക്ഷ്യമിടുന്നത്.
