https://www.facebook.com/2005221713100813/

Masjid-e-Makhdoomiya, Channapatan (2026)

03/10/2026

21’RABI UL SANI BEHR-E-AAM MUBARAK
22’RABI UL SANI URS-E-MUBARAK
MOHSIN-E-KAMALAAT,FAIZAN-E-PAIKAR-E-MIMBAR,SARWAR-E-MURSHIDEEN,MEHTAB-E-WILAYAT HAZRAT BANDAGI MIYAN SYED ABUBAKAR.RAH.
{BANI O SAHIB-E-DAIRA GOKAK}.(Damad Hazrat Bandagi Meeran Syedna Shah Yaqoob Hasn-e-Wilayat.raz.)
*****************************************************
Hazrat Bandagi Miyan Syed Abul Fatah.raz.(Mubashshir o Nawasa-e-Imamana Mehdi Maud.ahs.) Ka Nikah Bibi Raje Maryam.rah.Binte Hazrat Bandagi Miyan Shah Dilawar.raz.Ke Saath Hua Jo Bibi Munauwara.raz.Ke Batan Se Thhein,Bibi Munauwara.raz.Ne Apni Dukhtar Raje Maryam Ke Nikah Ke Liye Shart Rakhey Thhey Ke Jo Naujawan Chashm-e-Sar Se Khuda Ko Dekhta Ho Main Uss Naujawan Ko Apni Beeti Nikah Mein Doongi Tab Hazrat Bandagi Miyan Shah Dilwar.raz.Ne Bibi Munauwar Se Farmaya Bibi Miyan Abul Fatah Ko Apni Dukhtar Do Yeh Bhai Abubakar Wa Bibi Badanji.raz.Ke Noor-e-Nazar Hain Aur Khusoosan Nawas-e-Mehdi.ahs.Hain. Iss Naujawan Ko Apni Maa’n Ke Shikam Se Deedar-e-Elahi Ka Sharf Haasil Hai, Iss Tarah Hazrat Bandagi Miyan Syed Abul Fatah.raz.Ka Nikah Taiy Paya Aur Bibi Raje Maryam Ke Shikam Se Teen Farzand Huye,(1) Hazrat Bandagi Miyan Syed Sher Mohammed.rah.{Sahib-e-Daira Akeli,Zaheerabad}. (2) Hazrat Bandagi Miyan Syed Abubakar.rah.{Bani o Sahib-e-Daira Gokak}. (3) Hazrat Bandagi Miyan Syed Alhadad.rah.{Sahib-e-Daira Lankh,Maharashtra}.
Hazrat Bandagi Miyan Syed Abubakar.rah.Ki Wiladat 933,Hijri Mein Hui, Aap.rah.Ka Ism-e-Girami Aap Ke Dada Hazrat Bandagi Miyan Syed Abubakar.raz.{Damad o Sahabi-e-Imamana Mehdi Maud.ahs.}Ke Naam Se Mansoob Kiya Gaya. Aap.rah. Ki Umar Shareef Hazrat Bandagi Miyan Shah Dilawar.raz.Ke Wisal Ke Waqt 11’Saal Thhi.
Hazrat Bandagi Miyan Syed Abubakar.rah.Ko Sahaba-e-Mehdi.ahs.Ki Sohbat Ka Bhi Sharf Haasil Hai, Aap.rah.Ka Shumar Jaleel ul Qadr Tabayeen Mein Se Hai, Hazrat Bandagi Miyan Syed Abubakar.rah.Apne Walid Hazrat Bandagi Miyan Syed Abul Fatah.raz.Se Talqeen o Tarbiyat Hain Aur Tark-e-Dunya Bhi Apne Walid Se Hain, Walid-e-Amjad Ke Pardah Farmaney Ke Baad Aap Apne Badey Bhai Hazrat Bandagi Miyan Syed Sher Mohammed.rah.Se Sohbati ilaqa Kiye.
Hazrat Bandagi Miyan Syed Abubakar.rah. Hazrat Bandagi Meeran Syedna Shah Yaqoob Hasn-e-Wilayat.raz.Ke Damad Hain, Hazrat Bandagi Meeran Syedna Shah Yaqoob Hasn-e-Wilayat.raz.Ki Do Betiyan Aap.rah.Ke Nikah Mein Aayein,(1) Syeda Khunza Buzarg.rah.(2) Manna Ji Bibi Saheba.rah. Yeh Dono Hazrat Shah Yaqoob Hasn-e-Wilayat.raz.Ki Teesri Biwi Bibi Saheba Bibi Urf Aaqa Malik.rah.Binte Nawab Aalam Khan Mewati.rah.Ke Shikam Se Hain. Aap.rah.Ki Pehli Beewi Bibi Khunza Buzarg Ke Inteqal Ke Baad Bibi Manna Ji Saheba Se Nikah Hua.
Hazrat Bandagi Miyan Abubakar.rah.Kayi Baras Daulatabad Mein Hazrat Bandagi Meeran Shah Yaqoob.raz.Ke Daira Mein Rahey.
Hazrat Bandagi Miyan Syed Abubakar.rah.Ke Chhotey Bhai Miyan Syed Alhadad.rah.Ke Ek Farzand Thhey Jinka Naam Miyan Syed Abul Fatah Hai Jo Tareekh Mein “Data Sundar Soor”Ke Naam Se Mash’hoor Hain.
Miyan Syed Abul Fatah Data Sundar Soor.rah. Jo Aadil Shahi Hukumat Mein Sipah Saalar Thhey,Aap Ki Bahaduri Aur Shujaa’t Ko Dekh Kar Aadil Shahi Hukumat Ne Hazrat Miyan Abul Fatah Data Sundar Soor.rah.Ko Panj Hazari Mansab Ke Saath Saath Beejapur Ki Jageer Ka Mansab Daar Bana Diya Gaya Tab Miyan Abul Fatah Ne Apne Taaya Hazrat Bandagi Miyan Syed Abubakar.rah.Ko Beejapur Apni Jageer Mein Daira Basane Ke Liye Bula Liye, Yeh Woh Zamana Thha Jab Har Taraf Se Mehdaviyo’n Ka Ikhraj Ho Raha Thha Aur Jor-o-Zulm Ho Raha Thha.
Hazrat Bandagi Miyan Syed Abubakar.rah.Ne Apne Bhatijey Ki ilteja Par Hijrat Kar Ke Moza Gokak Mein Daira Basaye,Iss Tarah Gokak Ka Daira Tashkeel Mein Aaya Aur Hazrat Bandagi Miyan Syed Abubakar.rah.”Bani-e-Daira”Baney. Aur Phir Baad Mein Ziyada Tar Mehdavi Buzarg Beejapur Mein Aakar Daira Basaney Lagey Aur Deen Ki Tableegk Karne Lagey Aur Phir Dheerey Dheerey Beejapur Mehdaviyo’n Ka Markaz Ban Gaya.
Hazrat Bandagi Meeran Syedna Shah Yaqoob Hasn-e-Wilayat.raz.Ke Wisal Ke Baad Aap.raz. Ke Farzand Hazrat Bandagi Meeran Syed Ashraf.rah.Ne Bhi Daulatabad Se Hijrat Kar Ke Apne Behanwai Ke Daira Se Chand Meel Door Moza Raibagh Mein Daira Qayeem Kiye, Phir Hazrat Bandagi Meeran Syed Ibrahim.rah.Aur Hazrat Bandagi Meeran Syed Mehmood.rah.Ne Bhi Hazrat Bandagi Meeran Shah Yaqoob.raz.Ki Wasiyat Ke Mutabiq Apne Behanwai Hazrat Bandagi Miyan Syed Abubakar.rah.Ki Sohbat Mein Aap Ke Daira Mein Rehne Lagey.
Hazrat Bandagi Miyan Syed Abubakar.rah.Jama-e-Mohsin-e-Kamalat Wa Faizan-e-Paikar-e-Mimbar Thhey, Aap.rah. Apne Walid-e-Amjad Aur Badey Bhai Hazrat Bandagi Miyan Syed Sher Mohammed.rah.Ke Faiz Yaafta Hain, Khusoosan Hazrat Bandagi Miyan Shah Dilawar.raz.Ki Sohbat Aur Hazrat Bandagi Meeran Syedna Shah Yaqoob Hasne-Wilayat.raz.Ki Sohbat Ka Sharf Bhi Haasil Hai.
Hazrat Bandagi Miyan Syed Abubakar.rah.Ko Bibi Khunza Buzarg Se 5 Farzand Huye.(1) Hazrat Bandagi Miyan Syed Jalal Meeran.rah.(2) Hazrat Bandagi Miyan Syed Muheeb Ji Meeran.rah.(3) Hazrat Bandagi Miyan Syed Fatoo Ji Meeran.rah.(4) Hazrat Bandagi Miyan Syed Meeranji.rah.(5) Hazrat Bandagi Miyan Syed Qutb-e-Aalam.rah.
Hazrat Bandagi Miyan Syed Abubakar.rah.Ne Apne Badey Farzand Miyan Syed Jalal Meeran.rah. Ko Apne Aakhri Lamhaat Mein Wasiyat Farmayi Ke Mere Inteqal Ke Baad Yeh Daira Apne Mamoo Miyan Syed Ibrahim.rah. Ke Supurd Kar Ke Yahan Se Hijrat Karlo.Aap.rah.Ki Wasiyat Ke Mutabiq Hazrat Bandagi Miyan Syed Jalal Meeran.rah.Ne Daira Apne Mamoo Hazrat Bandagi Meeran Syed Ibrahim.rah.Ke Hawaley Kar Ke Ma’a Ahl o Ayaal Deccan Ki Taraf Hijrat Farma Diye.
Hazrat Bandagi Miyan Syed Abubakar.rah.Ka Wisal 63 Saal Ki Umar Mein Baroz-e-Itwar 22’Rabi Ul Sani 996’Hijri Ba Mutabiq 20’March 1585.AD. Ko Daira Gokak Mein Hua Aap.rah.Ki Namaz-e-Janaza Aap Ke Farzand Wa Janasheen Hazrat Bandagi Miyan Syed Jalal Meeran.rah.Ne Padhayi.
Hazrat Bandagi Miyan Syed Abubakar.rah.Gokak Daira Mein Sab Se Pehley Madfan Honey Wali Hasti Hain, Iss Lihaz Se Aap.rah. Bani-e-Daira Ke Saath Saath Sahib-e-Dair Gokak Bhi Hain,Aaj Bhi Yeh Daira Faizan-e-Marja-e-Khalayeq Bana Hua Hai.
NOTE:- Hazrat Bandagi Miyan Syed Abubakar.rah.Ki Aulad Se Irshadi Chanpatan Mein Masjid-e-Makhdoomiya,Hazrat Ibban Miyan Saheb.rah.Daira Mein Chal Rahi Hai Aur Faqeer Aap.rah.Ki Aulad Se Hai.
{Written By:- Faqeer Al Haqeer Sarapa Taqseer Syed Allah Bakhash Miyan Mehdavi,Masjid-e-Makhdoomiya,Daira Chanpatan}.

26/09/2026

14’RABI UL SAANI BEHR-E-AAM MUBARAK
15’RABI UL SAANI URS-E-MUBARAK
SARWAR-E-MURSHIDEEN , SULTANUS SAALIKEEN . SHAMSUL AARIFEEN , DAYEMUS SAUM HAZRAT BANDAGI MIYAN SYED ABUL FATAH JI MEERAN @ MANJHLEY MIYAN SAHEB MAKHDOOMI.RAH.{ BANI-E-DAIRA-E-AWWAL} S/O HAZRAT BANDAGI MIYAN SYED RAJ MOHAMMED MAKHDOOMI.RAH.(BADA HAZEERA , CHANNAPATNA,BANGALORE)
**********************************************************************
Aap Hazrat Bandagi Miyan Syed Raj Mohammed.rah.Ke Farzand Hain Aap Ki Walidah Ka Naam Badi Bibi Saheba.rah Hai Aap Ki Walidah Badi Zahd o Taqwa Wali Parhezgar Bibi Thhein Jab Aap Apni Walidah Ke Shikam Mein Thhey Ke Khwab Mein Khwaja Khizar.ahs.Aap Ke Hujra Mein Tashreef Farma Hokar Farmaye Ke Bibi Yeh Farzand Allah Ki Ataa Hai Iss Farzand Se Deen Ki Ishaat Tez Hogi Yeh Jahan Bhi Qadam Rakhega Woh Jagah Sar Sabz o Shadaab Hojayegi Iss Farzand Ka Naam Inn Ke Jadde Amjad Ke Yani Nawasa-e-Mehdi.ahs.Ke Naam Par Rakhna Yeh Aap Ke Silsila Ka Yaqoot o Marjaan Hai.Isi Tarah Ka Khwab Aap Ke Taya Sultanul Mashaikh Hazrat Bandagi Miyan Syed Hussain Mithhey Miyan Saheb Ahl-e-Erode.rah.Ko Bhi Dikha.Jab Aap Paida Huye Daira Mein 9’Din Se Faqa Thha Aur Shab-e-Meraj Ki Raat Aap Ki Paidaish Hui Aap Ki Paidish Ki Subah Daira Mein Fajar Ke Waqt Ghaibi Fatooh Aayi Fatooh Ke Saath Ek Parcha Likha Hua Thha Jismein Yeh Darj Thha Ke Yeh Fatooh Nau Maulood Farzand Ka Hissa Hai Allah Wastey Qabool Kar Ke Sawiyat Farmayein.”SUBHAN ALLAH”.
Hazrat Bandagi Miyan Syed Abul Fatah Ji Meeran Manjhley Miyan Saheb.rah.Apne Taya Hazrat Bandagi Miyan Syed Hussain Mithhey Miyan Saheb.rah.Ke Tarbiyat Hain Aur Apne Walid Hazrat Bandagi Miyan Syed Raj Mohammed.rah.Ke Haath Par Tark-e-Dunya Kiye.Aap Ki Umar Shareef 12’Saal Thhi Aap Janasheen Huye.Walid Qibla Ke Inteqal Ke Baad Aap Arkaat Se Hijrat Kar Ke Apne Taya Ke Daira Erode Tashreef Laye Aur Hazrat Bandagi Miyan Syed Hussain Mithhey Miyan Saheb.rah.Ki Sohbat Mein Kaamil Huye Aur Taya Ke Parda Farmaney Ke Baad Aap Apne Ahlo Ayaal Wa Daira Ke Saath 1162’Hijri Mein Erode Se Hijrat Kartey Huye Sarzameen-e-Chanpatan Ko Tashreef Laye.Chanpatan Uss Waqt Ek Jungle Thha Atraaf o Aknaaf Mein Butt Paraston Ki Aabadi Thhi.Aap 1162’Hijri Mein Sab Se Pehla Mehdavi Daira Basaye Aur Isi Sabab Se Aap Bani-e-Daira Hain Aap Ke Tashreef Farmaney Ke 45’Saal Ke Baad Doosrey Mehdavi Murshideen Chanpatan Mein Daira Basaye.
Aap.rah.Bahut Kam Guftagu Kartey Thhey Aksar Aap Kai Kai Din Bolne Ka Roza Rakhtey Thhey.Be Wajah Hujra Se Bahar Nahin Aatey Thhey.Aap Jab Bhi Hujra Mein Tashreef Farma Hotey Aap Ke Hujra Ke Bahar Aap Ke Farzand Aur Khulfa Baari Baari Pehra Detey Thhey,Baaz Martaba Aap Ke Hujra Se Do Logon Ki Baat Karne Ki Awaz Sunai Deti Thhi,Ek Raat Aap Ke Badey Farzand Bandagi Miyan Syed Yaqoob Shah Miyan.rah.Pehra De Rahey Thhey Ke Hujra Se Do Logon Ki Baat Karne Ki Awaz Suntey Hi Hujra Ke Andar Dakhil Hogaye Hujra Ke Andar Dakhil Hotey Hi Aap Be Hosh Hogaye Thhodi Der Baad Jab Hosh Aaya To Aap Ke Walid Ke Saath Safed Posh Darweshana Libas Pehney Shakhs Ko Dekhey Lekin Unke Chehre Ki Roshni Ki Wajah Se Chehra Nahin Dekh Paaye Apne Walid Se Adban Kaha Khundkar Yeh Kaun Hain Tab Aap.rah.Ne Farmaya Farzand Yeh Khwaja Khizar.ahs.Hain Inki Qadambosi Karo.Aap Ko Iss Tarah Bila Ijazat Hujra Mein Nahin Aana Chahiye Thha.Aaj Aap Ne Yeh Raaz Jaan Liya Hai.Allah Khair Karey Uss Din Se Aap Ke Janasheen-e-Awwal Farzand Hazrat Bandagi Miyan Syed Yaqoob Shah Miyan.rah.Majzoob ul Haal Rehney Lagey Aur Zaban Se Haq Mehdi Ke Elawa Kuchh Nahin Kehtey Thhey.Ab Daira Ki Kamaan Aap.rah.Ne Apne Teesrey Farzand Hazrat Bandagi Miyan Syed Ibrahim Ibban Miyan Saheb.rah.Ke Hawaley Kardiye.Hazrat Bandagi Miyan Syed Abul Fatah Ji Meeran Manjhley Miyan Saheb Makhdoomi.rah.Ko Do Bibiyan Thein . Pehli Bibi Hazrata Syeda Boonja Bibi Saheba Mehmoodi.rah.Iss Bibi Se 4’Farzand Huye.(1) Hazrat Bandagi Miyan Syed Yaqoob @ Yaqoob Shah Miyan Makhdoomi.rah.(2) Hazrat Miyan Syed Badey Meeran @ Badey Miyan Saheb Makhdoomi.(3) Hazrat Bandagi Miyan Syed Ibrahim @ Ibban Miyan Saheb Makhdoomi.rah.(4) Hazrat Miyan Syed Qasim @ Qasoo Miyan Saheb Makhdoomi. Doosri Bibi Hazrata Syeda Zohra Saheba Bibi.rah.Iss Bibi Se Ek Farzand Huye Jinka Naam Syed Budhhan Saheb Makhdoomi Hai.Hazrat Bandagi Miyan Syed Abul Fatah Ji Meeran Manjhley Miyan Saheb.rah.Ke Murideen Ka Halqa Bahut Wasee Thha Badey Badey Umra Wa Fuzla Aap Ke Murideen Mein Thhey Jismein Sar-e-Fehrist Salatanat-e-Arkaat Ke Wazeer Shaikh Budhan Saheb Hain Jo Bibi Syeda Zohra Saheba.rah.Ke Qadmon Mein Badey Hazeera Mein Madfan Hain.Hazrat Bandagi Miyan Syed Abul Fatah Ji Meeran Manjhley Miyan Saheb Makhdoomi.rah.Ka Wisal Baroz-e-Jumma 15’Rabi ul Saani 1180’Hijri 19’September 1766 Ko Hua Aap Chanpatan Ke Badey Hazeera Mein Madfan Hain.Aap Ki Namaz e Janaza Aap Ke Wali Ahad Wa Janasheen Farzand Hazrat Bandagi Miyan Syed Ibrahim @ Ibban Miyan Saheb Makhdoomi.rah.Ne Padhayi Aur Aap Ko Supurde Khaak Kiya.

20/09/2026

"8,Rabi Ul Sani BEHR-E-AAM MUBARAK"
"9,Rabi Ul Sani URS-E-MUBARAK"
SIRAJUL MUTTAQEEN, SHAMSUL AARIFEEN, MOHSINUS SALIKEEN, SHAMMA-E-WILAYAT HAZRAT BANDAGI MIYAN SYED ALHADAD HAMEED.raz.(Sahabi O Mubashshir O Muhajir Hazrat Imamana Mehdi Maud.ahs.){Ilham-e-Tasbeeh Giroh-e-Mehdaviya}
(Madfan:-RADHANPUR.GUJRAT)
*************************************************************
Qaum-e-Mehdaviya Ki Tareekh Mein Be Shumar Jaleelul Qadr Hastiyan Guzri Hain Jinho’n Ne Hazrat Imamana Mehdi Maud.ahs.Ke Tawassat Se Chashm-e-Sar Se Khuda Ko Dekha Aur Dikhlaya, Lekin Aisi Azeem Hastiyo’n Ka Tazkirah Qaumi Kutub Mein Door Door Tak Nazar Nahi Aata Aur Kayi Buzargo’n Ka Zikr Aata Bhi Hai To Sirf Na Ke Barabar, Iski Aham Wajah Yeh Hai Ke Inn Hastiyo’n Ka Tazkirah Ya To Seena Ba Seena Chaltey Huye Khatam Hogaya Ya To Khandani Qalmi Nuskho’n Ki Shakal Mein Kutub Khana Mein Gard Aalood Boseedah Padey Huye Hain, Faqeer Aaj Aisi Hi Azeemul Martabat Hasti Hazrat Bandagi Miyan Syed Alhadad Hameed.raz.Jo Faqeer Ke Jadd-e-Amjad Hain Ka Tazkirah Apne Khandani Qalmi Kutub Aur Nuskho’n Mein Mukhtasar Andaz Mein Manzar-e-Aam Par Laaney Ki Saadat Hasil Kiya Hai.
SEERAT-E-MUBARAK:- Hazrat Bandagi Miyan Syed Alhadad Hameed.raz.Ke Walid Hazrat Syed Ahmed Kabeer.rah.Hain Aur Aap.raz.Hazrat Syed Jalaluddin Makhdoom Jahaniya’n Jaha’n Gasht.rah.Ke Par Potey Hain, Aap.raz.Ka Shijra Mubarak 23’ Wasto’n Se Ameerul Momineen Hazrat Syedna Ali Sher-e-Khuda.raz.Se Milta Hai, Aap.raz.Hussaini Saadat Se Hain.
Hazrat Bandagi Miyan Syed Alhadad Hameed.raz.Ki Wiladat 833’Hijri Ko Shehr-e-Ahmedabad Gujrat Mein Hui, Aap.raz.Bachpan Se Hi Nihayat Zahin, Sanjeedah Mizaj Aur Taqwa Wa Parhezgar Shakhsiyat Ke Maalik Thhey, Aap.raz.Suharwardi Khanwadey Ke Chashm o Chiragh Thhey, Ishq-e-Elahi Ki Tadap Mein Apna Aabayi Shehar Ahmedabad Aur Masnad-e-Mashkhiyat Ko Chhod Kar Apne Ahl o Ayal Ke Saath Shehr-e-Jaunpur Tashreef Laye. Mashiyat-e-Elahi Ko Yehi Manzoor Thha Kyun Ke Shirk o Biddat Se Roo-e-Zameen Ko Paak Karne Wali Azeemush Shaan Hasti Mehdi Maud Aakhiruz Zama’n Ki Baysat Bhi Isi Shehar Mein Honey Wali Thhi Aur Wilayat-e-Mohammedi Sallallahu Alaihi Wasallam Ke Faiz Ka Darya Yahi’n Shehr-e-Jaunpur Se Behney Wala Thha.Aur Khusoosan Shehr-e-Jaunpur Jaleelul Qadar Ulmaa Wa Mashaikheen Ka Markaz Bana Hua Thha.
Hazrat Bandagi Miyan Syed Alhadad Hameed.raz.Jaunpur Ke Ulmaa Wa Mashaikheen Mein Mumtaz Haisiyat Rakhtey Thhey. Aap.raz.Waheedul Asar Shayer, Uloom-e-Aqli Wa Naqli Mein Apni Misal Aap Khud Hain, Nahoo Wa Fiqah Mein Apni Nazeer Nahin Rakhtey Thhey Aur Aap.raz.Fiqah Ke Samandar Thhey. Aap.raz. Mein Aajizi Wa Ankasari Koot Koot Kar Bhari Hui Thhi, Aap.raz.Apni Sayadat Ko Makhfi Rakh Kar Aam Insano’n Ki Tarah Zindagi Guzara Kartey Thhey.
Hazrat Makhdoom Shaikh Daniyal.raz.Aap.raz.Ke Hum Asar Wa Hum Nasheen Thhey. Aap Dono’n Zaat Ba Barkaat Ishq-e-Elahi Mein Itna Mahoo Hogaye Thhey Ke Imamana Mehdi Maud.ahs. Ki Baysat Se Pehley Apni Ishq-e-Elahi Ki Aag Ko Bujhaney Ke Liye Hazrat Syed Raje Hamid Shah Manakpuri Chishti.rah.Ke Mureed Huye Lekin Faiz-e-Baatini Hazrat Khwaja Khizar.raz.Se Haasil Kiye, Baad Mein Yeh Dono’n Buzarg.raz.Hazrat Imamul Kainat Syed Mohammed Jaunpuri Mehdi Maud.ahs.Se Baiyat Kar Ke Wilayat-e-Mohammedi Sallallahu Alaihi Wasallam Ke Faiz Se Musharraf Hokar Sahaba Mein Shumar Huye.
Hazrat Bandagi Miyan Syed Alhadad Hameed.raz.Ko Ek Farzand Thhey Jinka Ism-e-Giraami Hazrat Bandagi Miyan Syed Abubakar.raz.Hai,Jo Hazrat Makhdoom Shaikh Daniyal.raz.Ke Madrasa Se Ulma Billah Wa Haafiz-e-Kalamullah Ho Kar Shaikh Daniyal.raz.Ke Shagirdo’n Mein Shumar Huye, Aap.raz.Ne Jab Shaikh Daniyal.raz.Se Apne Farzand Ki Shadi Ke Muamla Ka Zikar Kiye To Hazrat Shaikh Daniyal.raz.Ne Hazrat Imamana Mehdi Maud.ahs. Ki Badi Dukhtar Syeda Khunza Gouhar Urf Badanji Bibi Saheba.raz.Ka Zikr Kiya To Aap.raz.Shaikh Daniyal.raz.Aur Apne Farzand Ke Humraah Imamana Mehdi Maud.ahs.Ke Ghar Tashreef Laye, Yeh Woh Zamana Thha Jab Hazrat Mehdi Maud.ahs. Par Jazba-e-Elahi Taari Thha,Aap Teeno’n Buzarg Imamana Mehdi Maud.ahs.Ke Hujra Mein Tashreef Farma Thhey, Mehdi Maud.ahs.Maghrib Ke Waqt Jab Sahoo Mein Aaye To Ummul Musaddiqeen Bibi Alhadadi.raz.Ne Farmaya Meeranji Koi Aap Se Mulaqat Ke Muntazir Hain Aur Hujra Mein Tashreef Farma Hain, Maghrib Ki Namaz Se Farigh Hokar Imamana Mehdi Maud.ahs. Ne Aane Ka Sabab Poochhey To Hazrat Bandagi Miyan Syed Alhadad Hameed.raz.Ne Kaha Meeranji Banda Apne Farzand Ko Aap Ki Ghulami Mein Deney Aaya Hai,Tab Imamana Mehdi Maud.ahs.Ne Saamney Nazar Ki To Miyan Abubakar.raz.Thhodey Fasla Par Adab Se Thhehrey Huye Thhey, Aap.ahs.Ne Farmaya “Bhai Abubakar Aap Wahan Kyun Khadey Ho Qareeb Aao Aap To Aulad-e-Makhdoom Se Ho”.Aur Phir Imamana Mehdi Maud.ahs.Ne Muraqba Farmaya Aur Baad Muraqba Irshad Farmaya”Bhai Alhadad Hameed Banda Apni Lakht-e-Jigar Bibi Badanji Ka Rishta Aap Ke Farzand Se Looh-e-Mehfooz Mein Dekha Hai Kya Aap Yeh Rishta Manzoor Kartey Hain, Aur Iss Tarah Bandagi Miyan Syed Alhadad Hameed.raz.Ke Farzand Miyan Syed Abubakar.raz.Ka Nikah 882’Hijri Ko Jaunpur Mein Hua Aur Hazrat Imamana Mehdi Maud.ahs.Ne Bazaat-e-Khud Khutba-e-Nikah Padhey, Aur Iss Tarah Bandagi Miyan Syed Alhadad Hameed.raz.Ke Farzand Bandagi Miyan Syed Abubakar.raz.Aap.ahs. Ke Badey Damad Huye Aur Jab Imamana Mehdi Maud.ahs.Ne Jaunpur Se Hijrat Kiye To Miyan Abubakar.raz.Bhi Unn 17’Muhajireen Mein Shaamil Thhey Aur Ta Hayat Imamana Mehdi Maud.ahs.Ki Sohbat Mein Reh Kar Khaas Muhajireen Wa Sahaba Mein Shumar Hokar Mustafeez Huye.
Phool Kitna Bhi Chhup Jaye Magar Uski Khushboo Fiza Ko Muattar Kar Hi Deti Hai Yehi Haal Hazrat Bandagi Miyan Syed Alhadad Hameed.raz.Ka Thha, Aap.raz.Ke ilm Aur Buzargi Ka Shohra Sirf Jaunpur Hi Nahi Balke Atraaf o Aknaaf Ki Riyasato’n Tak Phail Chuka Thha, Shehr-e-Mandau Ki Riyasat Ke Badshah Sultan Ghayasuddin Khilji Ko Aap.raz.Ki Shohrat Aur Shakhsiyat Ki Khabar Hui To Sultan Ne Aap.raz.Ko Jaunpur Se Bula Kar Apni Saltanat Mandau Ka Wazeer-e-Aazam Bana Kar Apne Khaas Hum Nasheeno’n Mein Shaamil Kar Liye Is Ki Ek Khaas Wajah Yeh Bhi Thhi Ke Khilji Khandan Aap.raz.Ke Par Dada Hazrat Syed Jalaluddin Makhdoom Jahaniya’n Jaha’n Gasht.rah.Se Halqa-e-Iradat Rakhtey Thhey.
Hazrat Imamana Mehdi Maud.ahs.Ki Aamad Jab Shehr-e-Mandau Mein Hui To Aap.raz.Bila Nagha Daira Mein Aakar Bayan-e-Quran Suntey Thhey, Bil Aakhir Ek Roz Hazrat Bandagi Miyan Syed Alhadad Hameed.raz.Ne Apni Wazarat Tarak Kar Ke Sab Maal o Daulat Imamana Mehdi Maud.ahs.Ki Khidmat Mein Lillah Guzaar Kar Tark-e-Dunya Kar Ke Aap.ahs.Ki Sohbat Mein Ta Hayat Hijrat Kar Ke Imamana Mehdi Maud.ahs.Ke Sahaba Mein Chhatwein Darja Mein Shumar Huye.
Hazrat Bandagi Miyan Syed Alhadad Hameed.raz.Ko Daira Mein Fuqra Jo Zikr-e-Elahi Mein Naubat Baithhtey Thhey Unn Ko Neend Se Bedaar Kar Ke Zikrullah Ki Nashisto’n Ko Jaari Wa Saari Rakhney Ka Zimmah Diya Gaya Thha,Aap.raz.Baari Baari Se Unn Fuqra-e-Kiram Ko Unke Naam Se Pukara Kartey Thhey,Ek Din Aap.raz.Ko ilham-e-Elahi Hua Ke Mere Zakireen Ko Naam Se Pukaro Mujhey Bura Lagta Hai Aur Aap.raz.Ko ALLAH-MOHAMMED-MEHDI-QURAN Ke Kalimaat Nazar Aaye,Aap.raz.Fauran Sahoo Mein Aaye Aur Aap.raz.Ki Shayerana Tabiyat Jaagi Aap.raz.Ne Inn Chaar Kalimaat Ko Shayerana Andaz Mein Tasbeeh Ki Shakal Mein Iss Tarah Qalamband Kiye.
LA ILAHA ILLALLAH MOHAMMEDUR RASOOL ALLAH
ALLAHU ILAHUNA MOHAMMED UN NABIYUNA
AL QURAN WAL MEHDI YU IMAMANA AAMANNA WA SADDAQNA
Hazrat Bandagi Miyan Syed Alhadad Hameed.raz.Ne Tamam Muamla Hazrat Imamana Mehdi Maud.ahs.Ke Huzoor Pesh Kiye Aur Inn Kalimaat Ka Zikar Kar Ke Aap Ki Qalamband Tasbeeh Khidmat Mein Pesh Kiye, Imamana Mehdi Maud.ahs.Ki Ijazat Se Naubat Ke Waqt Tasbeeh Ke Inn Kalimaat Se Zakireen-e-Khuda Ko Bedaar Kiya Janey Laga, Aur Tab Se Qaum-e-Mehdaviya Mein Aaj Tak Baad Namaz-e-Ishaa Aur Har Deeni Umoor Ke Ikhtetam Par Tasbeeh Dee Jati Hai Jo Aaj Tak Jaari Hai, Aur Khusoosan Tasbeeh Dar Asal Hazrat Bandagi Miyan Syed Alhadad Hameed.raz.Ka Faiz Hai Jo Qayamat Tak Baaqi Rahega.
Hazrat Bandagi Miyan Syed Alhadad Hameed.raz.Ne Hazrat Imamana Mehdi Maud.ahs.Ke Pardah Farmaney Ke Baad Daswein Ke Roz Ek Jigar Soz Marsiya Likh Kar Padhey Aur Khud Bhi Roye Doosron Ko Bhi Rulaya.Iss Marsiaya Ke Chandd Kalaam Kitab “SHAWAHIDUL WILAYAT”Ke Safha 323 se 328 Par Kuchh Shaya Hua Hai, Iss Ke Baad Aap.raz.Ne Hazrat Mehdi Maud.ahs.Ki Shaan Mein Ek Ek Deewan Likhey Hain Jo Ghair Manqoot Hai Yaani Baghair Nuqta Ke Hurfo’n Se Likha Hua Hai,Iss Deewan Ka Naam “KALAAM-E-ALHADAD”Hai,Iss Deewan Ka Ek Shayr Yahan Pesh Kiya Jata Hai
اعلام داد ہمسراحمد رہ صلاح آگاہ کرد ہمد م آدم رہ ملام
Hazrat Bandagi Miyan Syed Alhadad Hameed.raz.Ne Saboot-e-Mehdi.ahs.Par 911’Hijri Mein Sab Se Pehla Risala Likha Jis Ka Naam “RISALA ASBAAT-E-MEHDI” Hai, Daqeeq Zaban Ki Wajah Se Aam Logo’n Mein Yeh Risala Mash’hoor Na Hua,Aur Aap.raz.Ki Ek Aur Tasneef “RISALA BAAR-E-AMANAT”Hai.
Hazarat Imamana Mehdi Maud.ahs.Ke Pardah Farmaney Ke Baad Ek Saal Farah Mubarak Reh Kar Hazrat Ameer ul Musaddiqeen Sani-e-Mehdi.raz.Ke Hum Raah Hindustan Wapas Aaye Aur Bhilot Shareef Mein Sani-e-Mehdi.raz.Ki Sohbat Mein Rehne Lagey,Hazrat Sani-e-Mehdi.raz.Aap Se Bahut Ehteram Wa Aqeedat Rakhtey Thhey,Tamam Sahaba Mein Aap.raz.Khaasi Umar Waley Thhey. Ameer ul Musaddiqeen Hazrat Bandagi Meeran Syed Mehmood Sani-e-Mehdi.raz.Ne Sahaba-e-Mehdi Mein Se Jo 18’Daire Alag Kiye Thhey Uss Mein Sab Se Awwal Darja Par Hazrat Bandagi Miyan Syed Alhadad Hameed.raz.Hain,Jin Ko Sab Se Pehley Sani-e-Mehi.raz.Ne Alag Daira Baandhney Ki Ijazat Dee, Aap.raz.Fatehkot Radhanpur Mein Fateh Khan Badoo Ki Jageer Mein Daira Qayeem Kartey Hain. Chandd Mahino’n Ke Baad Aap.raz.Ke Farzand Hazrat Bandagi Miyan Syed Abubakar.raz.Ko Ma’a Ahl o Ayaal Hazrat Sani-e-Mehdi.raz.Ne Ijazat De Kar Aap Ke Daira Mein Bhej Diye, Iss Liye Fatehkot Radhanpur Daire Ko Sani-e-Mehdi.raz.Ke Sadqa Wa Tufail Mein Qaum-e-Mehdaviya Ka Sab Se Pehla Azad Daira Hone Ka Sharf Haasil Hai.
Hazrat Bandagi Miyan Syed Alhadad Hameed.raz.Ne Radhanpur Daire Mein Tableegh-e-Mehdaviyat Kartey Rahey, Aap.raz.Ke Bayan-e-Quran Ka Yeh Aalam Hota Ke Jo Bhi Sunta Dunya Ki Mohabbat Ko Tarak Kar Deta Aur Mehdaviyat Mein Shaamil Ho Jata Isi Tarah Sainkdo’n Log Mehdaviyat Se Judtey Chaley Gaye, Aap.raz.Ki Shaan-e-Aqdas Ka Kya Kehna Jo Bhi Sohbat Ikhtiyar Karta Aur Tasdeeq-e-Mehdi Se Aap.raz.Ke Haath Par Musharraf Hota Baaz Chandd Lamho’n Mein Aur Baaz Chand Dino’n Mein Kaamil Ho Kar Deedar-e-Khuda Se Mustafeez Ho Jata.
Jiski Misaal Hazrat Malik Mohammed Jayesi.rah.(Musannif-e-Padmavat)Se Milti Hai Jo Hazrat Bandagi Miyan Syed Alhadad Hameed.raz.Ke Mureed Wa Khalifa Hain Jinho’n Ne “PADMAVAT”Kitab Mein Apne Murshid Ka Zikar Kuchh Iss Tarah Kiya Hai.
وہ الہداد پیرانکےنیکوہیں جودنیامیں روشن سرخروہیں
ہوۓسید محمد ان کےمخدوم کیاصحبت نےکامل مقصوم
Hazrat Bandagi Miyan Syed Burhanuddin.rah.(Musannif-e-Shawahid ul Wilyat) Safar o Hazar Mein Hazrat Bandagi Miyan Syed Alhadad Hameed.raz.Ki Tamam Tasaneef Apne Saath Rakhtey Thhey, Aur Khusoosan Hazrat Bandagi Miyan Malik Ji Mehri.raz.Ibne Khwaja Taha.raz.Jaisi Azeem Hasti Aap.raz.Ke Shagirdo’n Mein Shumar Hain.
Radhanpur Daira Mein Sab Se Pehley Madfan Honey Wali Hasti Syeda Khunza Jeevan Saheba.rah. Bintey Hazrat Bandagi Miyan Syed Abubakar.raz.Hain Jo Hazrat Sani-e-Mehdi.raz.Ki Hayat-e-Mubarikah Mein Hi Kamsini Mein Wafat Paayein.
Hazrat Bandagi Meeran Syed Mehmood Sani-e-Mehdi.raz. Ki Wafat Ke Teen Saal Baad Hazrat Bandagi Miyan Syed Alhadad Hameed.raz.Ka Wisaal Baroz-e-Jumma 9’Rabi ul Saani 923’Hijri Ba Mutabiq 1’May 1517.A.D. Ko 90 Saal Ki Umar Shareef Mein Fatehkot Radhanpur Daira Mein Hua, Aap.raz.Ki Namaz-e-Janaza Aap Ke Farzand Hazrat Bandagi Miyan Syed Abubakar.raz.Ne Padhayi Aur Apne Walid-e-Amjad Ko Syeda Khunza Jeevan Saheba.rah.Ke Pehloo Mein Supurd-e-Khaak Kiye.
Hazrat Bandagi Miyan Syed Alhadad Hameed.raz.Apni Potri Ke Bazoo Radhanpur Daira Mein Aaram Farma Hain.
Fatehkot Daira Jo Aaj Radhanpur Railway Station Ke Samney Maujood Hai Iss Daira Mein Chaar Azeem Hastiyan Aaram Farma Hain.
Maghrib Se Mashriq Ki Jaanib Pehli Qabar Mubarak Syeda Khunza Jeevan Saheba.rah.Binte Hazrat Bandagi Miyan Syed Abubakar.raz.Ki Hai,Inn Ke Bazoo Hazrat Bandagi Miyan Syed Alhadad Hameed.raz.Hain, Phir Inn Ke Bazoo Aap.raz.Ki Bahu Hazrata Syeda Khunza Gouhar Urf Badanji Bibi Saheba.raz.Binte Hazrat Imamana Mehdi Maud.ahs.Hain, Bibi Ke Bazoo Aap Ke Shouhar Hazrat Bandagi Miyan Syed Abubakar.raz.(Damad-e-Imamana Mehdi Maud.ahs.)Aaram Farma Hain.
Yeh Azeemush Shaan Daira Inn Chaar Azeem Hastiyon Se Marja Khalayeq Wa Markaz-e-Faizan Bana Hua Hai Aur Hazrat Bandagi Miyan Syed Alhadad Hameed.raz.Fatehkot Radhanpur Daira Ke Sahib-e-Daira Hain.

*********************Aapki Aulad Dakhkhan Mein Beshumar Hain.Lekin Aapki Aulad Mein Murshidi Sarey World Mein Ek Hi Hai Jo Chanpatan(Banglore)Mein Hai Jo Ke Faqir Ka Daira Hai.Faqir Aap Ke Nabeero'n Mein Se Hai.
Aapke Talluq Se Mehdaviyat Taleemat Kutub & Qalmi Kutub Mein Ziyada Tafseel Qalamband Nahin Hai.Iska Jawab Woh Musannifeen Ke Zimma Hai.Behar Haal Allah Ka Lakh Lakh Shukar Hai Aise Jaleelul Qadar Hastiyo'n Ka Tazkira Faqir Ke Kutub Khana Mein Qalmi Nuskho'n Mein Maujood Hai Jo Faqir Huruf Ba Huruf Aapki Ittela Mein Diya Hai.In Sarey Kutub Ko Faqir Ke Dada Hazrat Peer O Murshid Syed Hyder @ Ali Miyan Saheb.rah.Ne Sambhal Kar Rakhey Jiski Wajah Se Faqir Ko Bhi Ilm Hua Aur Aaj Aap Ko Bhi.
{Written By Faqeer Al Haqeer Sarapa Taqseer Syed Abdul Kader Makhdoomi @ Syed Allahbakhash Miyan Mehdavi.CHANPATAN}

12/08/2026

28’SAFAR UL MUZAFFAR BEHR-E-AAM MUBARAK
29’SAFAR UL MUZAFFAR URS-E-MUBARAK
HAZRAT BANDAGI MIYAN SYED NUSRAT MAKHSOOSUZ ZAMAA’N.rah.(LAL GHADI,HYDER ABAD)
******************************************************
Hazrat Bandagi Miyan Syed Nusrat Makhsoosuz Zamaa’n.rah.Hazrat Bandagi Miyan Syed Khundmir.rah.(Bara Bani Israil)Ke Farzand Hain,Aap Hazrat Bandagi Miyan Syed Mehmood Syedanji Khatimul Murshid.rah.Ke Mubashshir Hain.
Naqal Hai Ke Jalor Mein Miyan Syed Khundmir.rah.(Bara Bani Israil)Ne Malik Shah Mohammed Fauladi Ki Dukhtar Maangi Nikah Ke Liye Magar Malik Ne Manzoor Na Kiya,Hazrat Bandagi Miyan Khatimul Murshid.rah.Ne Sunkar Farmaya Ai Shah Mohammed Apni Beti Khanji Bhai Ko Kyun Nahin Detey?Uski Shadi Apni Beti Se Karo Usko Bete Hongey Unn Mein Ek Mere Jaisa Hoga,Behar Haal Malik Shah Mohammed Fauladi Ki Dukhtar BiBi Ummatur Raheem Se Shadi Hui Aur 7’Zil Hajja 1004’Hijri Ko Hazrat Shah Nusrat.rah.Paida Huye,Aap Apne Walid Ke Tarbiyat Hain Aur 17-18’Saal Ki Umar Mein Tark-E-Dunya Kar Ke Baap Ki Sohbat Mein Rahey.
Apne Inteqal Ke Waqt Bandagi Miyan Syed Khundmir.rah.(Bara Bani Israil)Ne Farmaya Banda Ka Waqt-E-Aakhir Pahunch Chuka Thha,Magar Yeh Nusrat Ko Poora Karne Banda Ne Khuda Se 2—3’Saal Maang Liye Thhey,Bandagi Miyan Syed Khundmir.rah.Ki Wafat Ke Waqt Aap Ke Biradar Buzarg Bandagi Miyan Syed Yousuf.rah.Beejapur Gaye Huye Thhey,Jab Wapas Huye To Miyan Shah Nusrat.rah.Isteqbal Ke Liye Pahunchey,Bandagi Miyan Syed Yousuf.rah.Ne Aap Ki Aankhon Mein Aansoo Dekh Kar Khayal Kiya Ke Bhai Ki Wafat Ho Chuki Hai Aapko Galey Se Lagaya Tasalli Di Aur Farmaya Main Tera Baap Hoon,Miyan Syed Nusrat.rah.Ne Aap Se Ilaqa Kiya Aur Aapki Sohbat Ikhtiyar Ki,Miyan Syed Khundmir.rah.Ki Wafat Ke 1’Maah 25’Din Ke Baad Bandagi Miyan Syed Yousuf.rah.Bhi Waasil-E-Haq Hogaye,Bandagi Miyan Syed Yousuf.rah.Ke Inteqal Ke Baad Aap Hazrat Bandagi Miyan Syed Noor Mohammed Khatim-E-Kaar.rah.Ki Khidmat Mein Aagaye Aur Aap Se Ilaqa Lagaya,Bandagi Miyan Syed Nustrat.rah.Ko Afsos Thha Ke Bandagi Miyan Syed Yousuf.rah.Ki Sohbat Sirf Chand Roz Rahi Hai Faiz Haasil Hua Ya Nahin Isi Fikar Mein Rehtey Thhey,Bandagi Miyan Syed Noor Mohammed.rah.Ne Farmaya Nusrat Ji Hum Teenon Tere Haami Hain,Shah Nusrat.rah.Ne Arz Kiya Ek Aap Aur Doosrey Walid Buzargwar Hain,Iss Par Syed Noor Mohammed.rah.Ne Farmaya Teesrey Miyan Syed Yousuf Hain,Phir Miyan Syed Nusrat.rah.Ne Arz Kiya Unki Sohbat Sirf Chandd Roz Hi Rahi Hai,Jawab Mein Khatim-E-Kaar.rah.Ne Farmaya Kaamil Ki Sohbat Ka Sirf Ek Din Hi Kaafi Hai,Bandgi Miyan Syed Noor Mohammed.rah.Ke Farmaney Ke Baad Hazrat Shah Nusrat.rah.Ko Yeh Itminan Haasil Hua Ke Bandagi Miyan Syed Yousuf.rah.Se Bhi Aap Ko Faiz Haasil Hai.
Naqal Hai Hazrat Bandagi Miyan Syed Noor Mohammed.rah.Gujrat Jaane Ke Liye Hijrat Ki Hazrat Shah Qasim.rah.Aur Hazrat Shah Nusrat.rah.Saath Thhey,Shah Qasim.rah.Ke Haath Mein Chatoor Aur Shah Nusrat.rah.Ke Haath Mein Paani Ki Chhagal Thhi,Ek Jagah Se Inka Guzar Hua Jahan Door Door Tak Meetha Paani Mayassar Na Thha,Itne Mein Hazrat Bandagi Miyan Syed Noor Mohammed Khatim-E-Kaar.rah.Ne Shah Nusrat.rah.Se Peene Ke Liye Paani Talab Kiya,Shah Nusrat.rah.Ne Paani Diya,Hazrat Khatim-E-Kaar.rah.Ne Paani Piya To Paani Bahut Meethha Thha Aap Ne Poochha Nusrat Ji Yeh Paani Kahan Se Aaya Yahan To Sirf Khare Paani Ke Elawa Kuchh Nahin Hai,Aap Ne Arz Kiya Khundkaar Raasta Mein Teen Chaar Koss Door Ek Bowli Mujhey Mili Wahin Chhagal Bhar Li,Hazrat Bahut Khush Huye Aur Tareef Ki,Paani Peene Ke Baad Hazrat Shah Nusrat.rah.Usi Waqt Wapas Uss Bowli Par Teen Chaar Koss Door Baghair Kisi Ko Maloom Kiye Jakar Paani Bhar Laye,Aap Ke Janey Aaney Ki Kisi Ko Khabar Nahin Hui Aur Hawa Se Paani Thhanda Bhi Hogaya,Jab Khatim-E-Kaar.rah.Ne Dobara Paani Talab Kiya Wahi Paani Pilaya,Aap Ne Poochha Syed Nusrat Yeh Thanda Aur Meethha Paani Kahan Se Aaya,Aap Ne Arz Kiya Usi Bowli Ka Hai,Khatim-E-Kaar.rah.Ne Bahut Hi Khush Hokar Farmaya Syed Nusrat Jaisa Too Ne Iss Thhande Paani Se Mujhey Sairab Kiya Khuda Tujh Ko Apne Deedar Se Sarfaraz Karey.
Jab Nizam Shahi Hukumat Ko Zawal Aaya Daulat Abad Mein Afra Tafri Phail Gayi,Hazrat Shah Qasim.rah.Aur Hazrat Shah Nusrat.rah.Ne Jo Bandagi Miyan Syed Noor Mohammed.rah.Ke Inteqal Ke Baad Daulat Abad Aakar Apne Apne Dairon Par Mutamakkin Thhey Daulat Abad Se Hijrat Ki,Hazrat Shah Nusrat.rah.Daulat Abad Se Hjrat Kar Ke Ausa Aaye Jo Sher Khan Ba Yazeed Khan Ki Jageer Thhi,Phir Wahan Se Hijrat Kar Ke Elangdal Aaye,Elangdal Se Cheela Sagar Aaye,Cheela Sagar Se Markok Mein Daira Bandha Jo Ippalguda Ke Qareeb Hai Yahan Par Shehzada Subhan Quli(Quli Qutub Shah Badshah Golkunda Ki Aulad)Ne Aakar Aap Ke Haath Par Hazrat Mehdi Maud.ahs.Ki Tasdeeq Ki Aur Aap Ka Mureed Hogaya,Markok Mein Ek Saal Reh Kar Aap Ameer Peth Aaye Jo Ali Abad Ke Qareeb Hai,Yahan Aap Ki Walida Mohtarma BiBi Ummatur Raheem Ka Inteqal Hogaya,Iss Muqam Par Jisko Ab Galasgur Ya Lal Ghadi Kehtey Hain Walida Mohtarma Ko Dafan Kiya Gaya,Hazrat Shah Nusrat Makhsoosuz Zamaa’n.rah.Walida Ke Inteqal Ke Baad Wahan Se Daira Uthha Kar Chanchalguda Mein Daira Qayeem Kiya,Aap Kam O Besh Tera Saal Hazrat Bandagi Miyan Syed Noor Mohammed Khatim-E-Kaar.rah.Ki Sohbat Mein Rahey.Hazrat Bandagi Miyan Shah Nusrat.rah.Ko Wafat Ke Ek Saal Pehle Jazba Hogaya Thha,Teen Maah Tak Jazba Ki Halat Mein Rahey Hazrat Farmatey Jo Wilayat Mere Seena Mein Hai Bhai Nahin Jantey To Yeh Farzand Aur Mere Taalib Kya Pehchaneingey,Dono Haath Uthha Kar Farmatey Mere Dono Haath Mein Laddu Hain,Aakhir Kaar Mashiyat-E-Elahi Ke Samney Kisi Ka Zor Nahin Chalta Yeh Deen Ka Aaftab Apne Mashooq Rabbul Izzat Khudawand-E-Kareem Se 29 Safar Ul Muzaffar 1079’Hijri Ko Ja Mila.Aap Ka Rouza-E-Aqdas Lalghadi Mein Hai,Aap Ke Darbar-E-Aali Mein Koi Bhi Sawli Khaali Nahin Jata Har Ek Ka Sawal Aap Ke Tawassat Se Bargah-E-Khudawandi Mein Qabool Hojati Hai,Aap Ke Faiz Ka Darya Aaj Bhi Lalghadi Mein Beh Raha Hai Bas Lene Wale Ke Zarf Par Munhasir Hai Ke Woh Kaisi Niyyat Karta Hai Waisa Zaroor Milta Hai.
Allah Taala Hum Sab Ko Hazrat Ke Faiz Se Sarafaraz Farmaye Hamarey Dilon Se Dunya Ki Mohabbat Ko Nikal Phenke Aur Sirf Khalis Wahdahu La Shareek Ki Mohabbat Jagazeen Ho,Hazrat Ke Waseela Se Hum Sabko Deedar Ki Manzil Ki Taraf Badhne Ki Taufeeq Ata Farmaye,Aameen Summa Aameen Ya Rabbul Aalameen.

Address

Channapatan
562160

Telephone

9738267944

Website

facebook.com

Alerts

Be the first to know and let us send you an email when Masjid-e-Makhdoomiya posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Masjid-e-Makhdoomiya:

Masjid-e-Makhdoomiya