16/08/2018
അറിയിപ്പ്
ജില്ലാ കളക്ടര് & ജില്ലാ ദുരന്തനിവാരണ അതോറിറ്റി ചെയര്മാന് നല്കുന്ന പത്രക്കുറിപ്പ്
പെരിങ്ങല്ക്കുത്ത് ഡാമിന്റെ സംഭരണശേഷി 15.08.2018 വൈകീട്ട 7.00 മണിക്ക് എത്തിച്ചേര്ന്നതിനെ തുടര്ന്ന് ഡാമിന്റെ ഷട്ടറുകള് ഉയര്ത്തി ജലനിരപ്പ് ക്രമീകരിച്ച് വരവേ തമിഴ്നാട് ഷോളയാര് (മലക്കപ്പാറ) ഷട്ടറുകള് മൂന്നെണ്ണം 6 അടിയില് നിന്നും നീരൊഴുക്ക് വര്ദ്ധിച്ചതിനെ തുടര്ന്ന് 9 അടിയാക്കി ഉയര്ത്തുമെന്ന അറിയിപ്പ് ലഭിച്ചതിനെ തുടര്ന്ന് കേരള ഷോളയാറിലെ ഷട്ടറുകള് 13.50 അടിയില് നിന്നും 16.00 അടിയായി 16.08.18 ന് 1.00 A.M. ന് ഉയര്ത്തിയിട്ടുളളതും ഈ അധികജലം 3 മണിക്കൂറിനകം പെരിങ്ങല്ക്കുത്തിലെത്തുകയും (പുലര്ച്ചെ 4 മണി) അടുത്ത 4 മണിക്കൂറിനുള്ളില് ചാലക്കുടി എത്തിച്ചേരുകയും ചെയ്യും. ഇത് ചാലക്കുടിപ്പുഴയില് ജലനിരപ്പ് ഉയരുന്നതിനും വെള്ളപ്പൊക്കമുണ്ടാകുന്നതിനും കാരണമാകുമെന്നും പറമ്പിക്കുളം ഡാമില് നിന്നുള്ള നീരൊഴുക്ക് പുലര്ച്ചെ 1.15 മണിക്ക് ഉയര്ത്തിയിട്ടുള്ളതാണ് എന്ന് പറമ്പിക്കുളം അസി. എക്സിക്യൂട്ടീവ് എന്ജിനീയര് അറിയിച്ചതായും മേല്പ്പറഞ്ഞ രണ്ട് ഡാമുകളില് നിന്നും ഇപ്പോഴുള്ള നീരൊഴുക്കിനേക്കാള് കൂടുതല് വെള്ളം വെളുപ്പിന് 5.00 മണിയോട് കൂടി പെരിങ്ങല്ക്കുത്ത് ഡാമില് എത്തിച്ചേരുകയും , നിലവിലുള്ള നീരൊഴുക്കിന് അധികമായി പുറം തള്ളേണ്ടി വരുന്നതായും റിസര്ച്ച് & ഡാം സേഫ്റ്റി ഓര്ഗനൈസേഷന് അതോറിറ്റി ഡെപ്യൂട്ടി ചീഫ് എന്ജിനീയര് അറിയിപ്പ് നല്കിയിട്ടുള്ളതാണ്.
ഈ സാഹചര്യത്തില് 16.08.2018 കാലത്ത് 08.00 മണിയോടെ ചാലക്കുടിപ്പുഴ കവിഞ്ഞൊഴുകുമെന്നതിനാല് ചാലക്കുടിപ്പുഴയുടെ തീരത്തുള്ളവര് അതീവജാഗ്രത നിര്ദ്ദേശം പാലിക്കേണ്ടതും, ക്യാമ്പുകളിലേയ്ക്ക് മാറി താമസിക്കേണ്ടതുമാണ്.
