01/08/2023
എസ്.കെ.എസ്.എസ്.എഫ്
ബാലാരവം
സത്യം , സ്വത്വം, സമർപ്പണം എന്ന പ്രമേയം ഉയർത്തിപ്പിടിച്ച് 35 ാം വാർഷികം ആഘോഷിക്കുകയാണ് എസ്.കെ.എസ്.എസ്.എഫ്.
വിജ്ഞാനത്തിന്റെ നറുമണം തലമുറകളിൽ നിന്ന് തലമുറകളിലേക്ക് പകർന്നു നൽകുന്നതിന് നിമിത്തവും പ്രോത്സാഹനവുമായി, വിനയമെന്ന സവിശേഷമായ ജീവിത മൂല്യം മുറുകെപ്പിടിച്ച്, സഹജീവികൾക്ക് വേണ്ടി സേവനത്തിന്റെയും സ്നേഹ സാഹോദര്യത്തിന്റെയും ചിറകു വിരിച്ചു മുന്നേറുന്ന ആദർശ പ്രസ്ഥാനത്തിൻറെ വാർഷികാഘോഷ പരിപാടികൾ
കൃത്യമായ ആസൂത്രണ മികവോടെ പൊതു സമൂഹത്തിലേക്ക് എത്തിച്ചേരുകയാണ്..
വിദ്യാർത്ഥി യുവജനങ്ങൾക്ക് വേണ്ടി കാലത്തിൻറെ പുതിയ കാഴ്ചകൾ തുറന്നുവെക്കുന്ന നിരവധി വ്യത്യസ്ത പദ്ധതികൾ ഉൾക്കൊള്ളുന്ന വാർഷിക
പരിപാടികളുടെ ഭാഗമായി കൊച്ചു ബാലന്മാർക്ക് വേണ്ടി നടത്തുന്ന ശ്രദ്ധേയമായ പ്രവർത്തന പദ്ധതിയാണ് ബാലാരവം.
ശാഖാതലത്തിൽ നടക്കുന്ന ഏറ്റവും ശ്രദ്ധേയമായ ഈ പരിപാടിയിൽ
ശാഖയിലെ 6 മുതൽ 10 വരെ ക്ലാസുകളിൽ പഠിക്കുന്ന
വിദ്യാർഥി, വിദ്യാർഥിനികളാണ് പങ്കെടുക്കുക. വളർന്നുവരുന്ന പുതുതലമുറയിൽ
ധാർമിക മൂല്യവും സംഘടനാ ബോധവും വളർത്തുക ,ആത്മവിശ്വാസവും ലക്ഷ്യബോധവും സമ്മാനിക്കുക,
സർഗാത്മകതയും കാര്യക്ഷമതയും പരിപോഷിപ്പിക്കുക മക്കളെ മതാ പിതാക്കൾക്കും കുടുംബത്തിനും നാടിനും ഉപകാരമുള്ളവരാക്കുക തുടങ്ങിയ ലക്ഷ്യങ്ങളുമായാണ് ഈ പ്രോഗ്രാം നടക്കുക.
മുതിർന്നവരെ ബഹുമാനിച്ചും രാജ്യത്തിൻറെ നിയമങ്ങളെ അനുസരിച്ചും ഇതര മതസ്ഥരോട് സഹിഷ്ണുതയോടെ പെരുമാറിയും അറിവിനനുസരിച്ച് ജീവിക്കേണ്ടതിന്റെ ബാലപാഠങ്ങൾ
ഈ പരിപാടിയിലൂടെ ഏറെ ആകർഷകമായി പങ്കുവെക്കും.
സംഘടനാ പ്രവർത്തകർക്കൊപ്പം
സാമൂഹിക സാംസ്കാരിക രംഗത്തെ മുഴുവൻ ആളുകളുടെയും രക്ഷിതാക്കളുടെയും സമസ്ത സഹകരണവും പിന്തുണയും ഈ പരിപാടിയുടെ വിജയത്തിന് വേണ്ടി ഉണ്ടാകണമെന്ന് സ്നേഹപൂർവം അഭ്യർത്ഥിക്കുന്നു.
-ജനറൽ സെക്രട്ടറി SKSSF
സംസ്ഥാന കമ്മിറ്റി
